ស្ថានទូតសហរដ្ឋអាមេរិកប្រចាំកម្ពុជា បង្ហាញការព្រួយបារម្ភជុំវិញការកាប់បំផ្លាញព្រៃឈើនៅដែនជម្រកសត្វព្រៃឡង់ ខណៈសកម្មជនបរិស្ថាន និងបណ្តាញព្រៃឡង់ ត្រូវបានហាមឃាត់មិនឱ្យចូលល្បាតតំបន់ការពារមួយនេះ។
ឯកអគ្គរដ្ឋទូតអាមេរិក លោក Patrick Murphy បានសរសេរនៅលើ Twitter របស់លោក កាលពីថ្ងៃទី១៥ ខែមិថុនា ឆ្នាំ២០២១ ថាលោកបានជួបពិភាក្សាជាមួយរដ្ឋមន្ត្រីក្រសួងបរិស្ថាន លោក សាយ សំអាល់ ដើម្បីពិភាក្សាពីការព្រួយបារម្ភនានាជុំវិញការកាប់បំផ្លាញព្រៃឈើនៅដែនជម្រកសត្វព្រៃឡង់ និងភាពជាដៃគូរវាងកម្ពុជា-អាមេរិកក្នុងការចូលរួមដោះស្រាយវិបត្តិអាកាសធាតុសកល។
អ្នកនាំពាក្យស្ថានទូតសហរដ្ឋអាមេរិកប្រចាំនៅកម្ពុជា លោក Arend Zwartjes ប្រាប់ វីអូឌី តាមរយៈសារអេឡិចត្រូនិចអ៊ីម៉ែលថា លោកមិនអាចប្រាប់បន្ថែមភ្លាមៗជុំវិញលទ្ធផលនៃជំនួបនេះបានទេ នៅថ្ងៃពុធនេះ។
ចំណែករដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា សុំមិនធ្វើអធិប្បាយលើរឿងនេះដែរ។
ប្រធានកម្មវិធីផ្នែកស្រាវជ្រាវ និងតស៊ូមតិរបស់សមាគមបណ្ដាញយុវជនកម្ពុជា លោក ហេង គឹមហុង មានប្រសាសន៍ថា ករណីមន្ត្រីទូតអាមេរិកជួបជាមួយក្រសួងបរិស្ថាន ពិភាក្សាជុំវិញការកាប់បំផ្លាញព្រៃឡង់នេះ អាចបញ្ជាក់បានថា សកម្មភាពបទល្មើសកាប់បំផ្លាញព្រៃឈើក្នុងតំបន់ការពារមួយនេះនៅមិនថមថយនោះទេ។
លោក ហេង គឹមហុង ស្នើទៅសហរដ្ឋអាមេរិកជជែកជាមួយក្រសួងបរិស្ថាន ដោយធ្វើយ៉ាងណាបញ្ឈប់ការរឹតត្បិតក្រុមអង្គការសង្គមស៊ីវិល សកម្មជនបរិស្ថាន និងបណ្តាញព្រៃឡង់ ក្នុងការចូលល្បាតនៅតាមតំបន់ការពារនានា ជាពិសេសតំបន់ព្រៃឡង់នេះ ដោយថា ការចូលរួមរបស់ក្រុមទាំងនេះនឹងអាចការពារព្រៃឈើមានប្រសិទ្ធភាពខ្ពស់។
លោកក៏បានស្នើឱ្យអាមេរិកពិចារណាក្នុងការផ្តល់ជំនួយចំពោះក្រុមណាដែលមិនបានបម្រើនិងការពារធនធានធម្មជាតិពិតប្រាកដផងដែរ។
លោកបន្ថែមថា៖ «ប្រសិនជាមានការចូលរួមពីសហគមន៍មូលដ្ឋាន ជាពិសេសក្រុមអ្នកធ្វើការដោយឯករាជ្យក្នុងគោលបំណងការពារធនធានធម្មជាតិហ្នឹង ខ្ញុំជឿជាក់ថា ការកាប់បំផ្លាញព្រៃឈើនិងបទល្មើសព្រៃឈើផ្សេងទៀតនឹងមានការថយចុះ ពីព្រោះក្រុមសហគមន៍មូលដ្ឋាន ក្រុមអង្គការសង្គមស៊ីវិល ដែលធ្វើការដោយតម្លាភាពនិងឆន្ទៈហ្នឹង គឺពួកគាត់មានឆន្ទៈពេញលេញជាង ក្នុងការទប់ស្កាត់និងការរារាំងបទល្មើសកុំឱ្យបន្តកើតមាន»។
លោក ហឿន សុភាព ជាសកម្មជនព្រៃឡង់ និងជាអ្នកសម្របសម្រួលបណ្តាញព្រៃឡង់ប្រចាំខេត្តកំពង់ធំ មានប្រសាសន៍ថា ចាប់តាំងពីក្រសួងបរិស្ថានហាមឃាត់មិនឱ្យបណ្ដាញព្រៃឡង់ និងអង្គការសង្គមស៊ីវិល ធ្វើសកម្មភាពចូលព្រៃឡង់មក សកម្មភាពកាប់និងដឹកឈើចេញពីតំបន់ព្រៃឡង់នៅតែបន្តកើតមានស្ទើររាល់ថ្ងៃ។
សកម្មជនព្រៃឡង់រូបនេះបានដាក់ការសង្ស័យថា បញ្ហាបទល្មើសព្រៃឈើក្នុងដែនជម្រកសត្វព្រៃឡង់នៅបន្តកើតមានឥតឈប់ឈរនេះ អាចជាប់ពាក់ព័ន្ធអំពើពុករលួយរវាងមន្ត្រីឧទ្យានុរក្ស អាជ្ញាធរមូលដ្ឋាន និងជនល្មើស ក្នុងការចូលទៅកាប់បំផ្លាញនិងដឹកជញ្ជូនឈើ។
លោកបន្ថែមថា៖ «មានការបើកដៃនិងនៅពីក្រោយខ្នង ពាក់ព័ន្ធជាមួយក្រុមកាប់បំផ្លាញព្រៃឈើហ្នឹង គឺមានការចូលរួមពីមន្ត្រីឧទ្យានុរក្សថ្នាក់ក្រោមជាតិ និងអាជ្ញាធរមូលដ្ឋានមួយចំនួន ដែលកំពុងតែរួមគំនិតគ្នាក្នុងការកាប់បំផ្លាញព្រៃឈើហ្នឹង។ ហើយមួយទៀត យើងឃើញសកម្មភាពមួយចំនួន ក្រសួងបរិស្ថានកំពុងតែលាក់និងបិទបាំងព័ត៌មានមួយចំនួនមិនឱ្យសហគមន៍ចូល មិនឱ្យសារព័ត៌មានចូល។ អ៊ីចឹងខ្ញុំថា ក្រសួងមិនអាចការពារព្រៃឈើតំបន់ការពារមួយនេះបានទេ អ៊ីចឹងខ្ញុំថា ព្រៃឈើមួយនេះនឹងរលាយឆាប់ៗនេះ»។
ក្នុងសេចក្តីថ្លែងការណ៍មួយដែលបង្ហោះលើបណ្តាញសង្គមហ្វេសប៊ុករបស់ខ្លួន កាលពីថ្ងៃទី៨ ខែមីនា ឆ្នាំ២០២១ ស្ថានទូតអាមេរិកប្រចាំនៅកម្ពុជា បានលើកឡើងថា សហរដ្ឋអាមេរិកគាំទ្រកិច្ចសហប្រតិបត្តិការជាមួយសហគមន៍ សង្គមស៊ីវិល និងរដ្ឋាភិបាលកម្ពុជា ដើម្បីធ្វើយ៉ាងណាឱ្យជីវសាស្ត្រចម្រុះដ៏សម្បូរបែបនៅដែនជម្រកសត្វព្រៃនៅព្រៃឡង់ត្រូវបានអភិរក្ស។
បើតាមសេចក្តីថ្លែងការណ៍ដដែលនេះ ទីភ្នាក់ងារផ្តល់ជំនួយរបស់សហរដ្ឋអាមេរិក ឬហៅថា USAID មានគម្រោងមួយដែលមានឈ្មោះថា «ព្រៃឡង់បៃតង» ដើម្បីជួយសហគមន៍មូលដ្ឋាន ដូចជាសមាជិកនៃបណ្តាញសហគមន៍ព្រៃឡង់ (PLCN) នៅក្នុងការងារល្បាតរួមគ្នានៅព្រៃឡង់ជាមួយក្រសួងបរិស្ថាន។
អ្នកនាំពាក្យក្រសួងបរិស្ថាន លោក នេត្រ ភក្ត្រា ធ្លាប់លើកឡើងថា ក្រសួងបរិស្ថាន និងទីភ្នាក់ងារ USAID បានកំពុងធ្វើការងារយ៉ាងស្អិតល្មួតជាមួយគ្នា និងជជែកគ្នា ដើម្បីរកដំណោះស្រាយរួមក្នុងការការពារព្រៃឡង់ឱ្យបានគង់វង្ស។ លោកបន្តថា ក្រសួងបរិស្ថាន និងទីភ្នាក់ងារ USAID បានកំពុងអនុវត្តគម្រោង«ព្រៃឡង់បៃតង» ដែលមានរយៈពេល៥ឆ្នាំ ពីឆ្នាំ២០១៨ ដល់២០២៣ ដែលមានថវិកាសរុបជាង២១លានដុល្លារអាមេរិក៕
អត្ថបទទាក់ទង
សកម្មជនព្រៃឡង់ថា USAID មិនបានគាំទ្រពួកគេលើសកម្មភាពការពារធនធានធម្មជាតិឡើយ
ក្រុមសកម្មជនការពារព្រៃឈើ បង្ហាញការខកចិត្តចំពោះទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) ដែលថាខ្លួនបានធ្វើការងារផ្ទាល់ជាមួយបណ្តាញសហគមន៍ព្រៃឡង់ ខណៈក្រុមសកម្មជនទាំងនោះអះអាងថា ទីភ្នាក់ងារមួយនេះមិនដែលគាំទ្រសកម្មភាពការពារធនធានធម្មជាតិរបស់ពួកគេម្តងណាឡើយ។
