រោងចក្រមួយចំនួនក្នុងខេត្តក្បែររាជធានីភ្នំពេញ ចាប់ផ្តើមផ្អាកដំណើរការដោយសាររកឃើញករណីឆ្លងជំងឺកូវីដ-១៩ លើកម្មករជាបន្តបន្ទាប់ ដែលនាំឱ្យមានការព្រួយបារម្ភពីក្រុមសហជីព បើទោះជារោងចក្រមួយចំនួននៅរាជធានីភ្នំពេញ ចាប់បើកទ្វារឡើងវិញបន្ទាប់ពីបិទទ្វារអស់មួយរយៈ។
ប្រធានសម្ព័ន្ធសហជីពជាតិ លោក ហ្វា សាលី ថ្លែងនៅថ្ងៃទី១៤ ខែមិថុនា ថារោងចក្រមួយចំនួននៅតំបន់ 7NG ក្នុងស្រុកខ្សាច់កណ្តាល និងតាមបណ្តោយផ្លូវជាតិលេខ៥ ក្នុងភូមិសាស្រ្តខេត្តកណ្តាល កំពង់ស្ពឺ និងកំពង់ឆ្នាំង កំពុងផ្ទុះករណីឆ្លងរាលដាលវីរុសវាយប្រហារផ្លូវដង្ហើមថ្មី។ លោកថា រោងចក្រខ្លះត្រូវផ្អាកចង្វាក់ផលិតកម្ម ដើម្បីទប់ស្កាត់ការចម្លងនិងប្រមូលសំណាកអ្នកពាក់ព័ន្ធទៅធ្វើតេស្ត។
បើតាមប្រភពដដែល រោងចក្រ Starlight Apparel នៅតំបន់ 7NG ក្នុងឃុំវិហារសួគ៌ ខេត្តកណ្តាល រកឃើញឆ្លងចំនួន២៥០ករណី ក្នុងចំណោមកម្មករ១ ៧០០នាក់ ខណៈរោងចក្រ Y&W ក្នុងខណ្ឌដង្កោ រាជធានីភ្នំពេញ រកឃើញជិត៥០០នាក់ ក្នុងចំណោមកម្មករជាង១ ០០០នាក់ ធ្វើការនៅ២អាគារ។
លោក ហ្វា សាលី និយាយថា៖ «ព័ត៌មានបឋមយើងឃើញថា ខេត្តកណ្តាល ដូចជា បូលីតូ ក៏មាន! ហើយនៅទឹកដី 7NG ហ្នឹងក៏មាន! យើងឃើញមានច្រើនគួរសមដែរ។ ឥលូវយើងនៅមិនទាន់ប្រមូលនូវរបាយការណ៍ ក៏ដូចជាព័ត៌មានលម្អិតថាតើមានរោងចក្រប៉ុន្មានទេនៅពេលថ្មីៗនេះដែលបានកើតឡើង។ ម្សិលមិញ ម្សិលម៉្ងៃ ក៏មានករណីរោងចក្រជប៉ុនមួយដែរ នៅជិតភ្នំអដ្ឋរស្សក៏មានការរកឃើញវិជ្ជមានកូវីដ-១៩ដែរ»។
ប្រភពដដែលបន្ថែមថា ការផ្ទុះករណីឆ្លងក្នុងរោងចក្រនៅតាមខេត្តពិបាកគ្រប់គ្រងនិងទប់ស្កាត់ជាងការផ្ទុះក្នុងរាជធានីភ្នំពេញ ដោយសារកម្មករភាគច្រើនត្រឡប់ទៅស្នាក់នៅផ្ទះជាមួយក្រុមគ្រួសារ ខណៈលោកសង្កេតឃើញពួកគេមួយចំនួនមិនបានធ្វើចត្តាឡីស័កដោយខ្លួនឯង ដែលនេះជាកត្តាហានិភ័យមួយ។
លោកបន្ថែមថា៖ «បើសិនជាពួកគាត់មានផ្ទុកកូវីដ គឺបានន័យថា គាត់បានចែករំលែកទៅអ្នកផ្ទះឬអ្នកភូមិរបស់គាត់ ហ្នឹងគឺជាបញ្ហាប្រឈម គឺត្រូវធ្វើទាំងផ្ទះតែម្តង! ហ្នឹងហើយគឺជាបញ្ហាសេដ្ឋកិច្ចធ្ងន់ធ្ងរដែលត្រូវបានដាក់បន្ទុកទៅលើពួកគាត់ ហ្នឹងគឺជាបញ្ហាធំ! ហើយយើងអត់ដឹងថាតើយន្តការរបស់រាជរដ្ឋាភិបាលជួយសម្រួលដល់ពួកគាត់យ៉ាងដូចម្តេចទេ»។
ប្រធានសម្ព័ន្ធសហជីពចលនាកម្មករកម្ពុជា លោក ប៉ាវ ស៊ីណា លើកឡើងថា ការរីករាលដាលនៃជំងឺកូវីដ-១៩ ក្នុងសហគមន៍រោងចក្រសហគ្រាសកាត់ដេរតាមបណ្តាខេត្ត កំពុងប៉ះពាល់ដល់កម្មករ អ្នកវិនិយោគ និងក្រុមហ៊ុនបញ្ជាទិញ ដោយសារការអាក់ខានចង្វាក់ផលិតកម្មនៃរោងចក្រមួយចំនួន។
ថ្នាក់ដឹកនាំសហជីពរូបនេះ បន្ថែមថា រោងចក្រដែលកំពុងបើកដំណើរការឡើងវិញមួយចំនួន ដូចជានៅតំបន់ព្រៃទា ក្នុងសង្កាត់ចោមចៅ ដែលផ្ទុះករណីឆ្លងកាលពីខែឧសភា និងរោងចក្រដែលមិនទាន់រកឃើញករណីឆ្លងក៏ប្រឈមមុខនឹងនាំជំងឺពីសហគមន៍ដែលពួកគេរស់នៅ និងពីកម្មករដូចគ្នាផងដែរ។
លោកមានប្រសាសន៍ថា៖ «ប្រឈម! ដោយសារកម្មករជិះឡានឈ្នួលរួមគ្នា ក៏ដូចជានៅកន្លែងបណ្តុំមនុស្ស ហើយគាត់នៅក្នុងស្ថានភាពដែលរោងចក្រពួកគាត់មិនទាន់មានវិជ្ជមាន យើងឃើញមានការដើរហើរទៅនេះទៅនោះ។ អ៊ីចឹងទាំងអស់ហ្នឹង វាជាបញ្ហាប្រឈម! ដោយឡែក បើយើងក្រឡេកទៅមួយផ្នែកទៀត ទៅលើសមាជិកក្រុមគ្រួសាររបស់គាត់»។
តំណាងកម្មករនៅរោងចក្រ Y&W ម្នាក់ និងជាជំនួយការផ្នែកវាយឡេវដែលសុំមិនបញ្ចេញឈ្មោះ ឱ្យដឹងថា កម្មករនៅអគារពីរ ត្រូវបានរកឃើញវិជ្ជមានជាបន្តបន្ទាប់ ក្រោយករណីដំបូងកើតមានលើអ្នកគ្រប់គ្រងអគារជាជនជាតិចិនម្នាក់ កាលពីថ្ងៃទី៦ ខែមិថុនា។ លោកថា អគារ៩ផ្សេងទៀតដែលស្ថិតនៅម្ខាងនៃផ្លូវពីអគារទាំង២នោះ នៅបន្តដំណើរការធម្មតា។
យ៉ាងណា លោកមិនអាចបញ្ជាក់តួលេខចំនួនអ្នកឆ្លងសរុបបានទេ ដោយសារអ្នកគ្រប់គ្រងមិនបានបញ្ចេញឱ្យដឹង។
លោកបន្ថែមថា៖ «ដោយសារគាត់មានម៉ាស៊ីនពិនិត្យរហ័ស ម៉ាស៊ីន១៥នាទី គាត់ទិញយកមកពិនិត្យផ្ទាល់។ ដំបូងឡើយ គាត់ពិនិត្យអ្នកដែលសង្ស័យពាក់ព័ន្ធជាមួយអាចែជនជាតិចិន រហូតដល់ថ្ងៃទី៨ ដែលគាត់ទប់ទល់លែងឈ្នះ គាត់ក៏ស្នើដល់ក្រសួង ទៅឱ្យពេទ្យ អ្នកគ្រូធីតា ពេទ្យស្ម័គ្រចិត្តរបស់សម្តេចហ្នឹង គាត់ចុះមកពិនិត្យនៅថ្ងៃទី៩ទៅ១០»។
ប្រធានគ្រប់គ្រងរដ្ឋបាលនៃរោងចក្រ Y&W លោក ធី ប៊ុនថុន បដិសេធមិនឆ្លើយតបនឹងសំណួររបស់ វីអូឌី ជុំវិញបញ្ហាផ្ទុះករណីឆ្លងនៅរោងចក្រ ដោយលោកថា កំពុងជាប់រវល់។ យ៉ាងណា លោកបដិសេធតួលេខករណីឆ្លងដែលលើកឡើងដោយលោក ហ្វា សារី ថាមិនមែនជាការពិត។
ដោយឡែក ប្រធានផ្នែកដេរនៅរោងចក្រដេរកាបូប JS Leather នៅតំបន់ព្រៃទា ក្នុងសង្កាត់ចោមចៅ អ្នកស្រី ផាន សាវរី លើកឡើងថា ខាងរោងចក្របានបើកទ្វារធ្វើការឡើងវិញចាប់ពីថ្ងៃទី១០ ខែមិថុនា បន្ទាប់ពីផ្អាក៣សប្តាហ៍ ក្រោយរកឃើញករណីឆ្លងលើកម្មករជាង៥០នាក់។
តំណាងកម្មករប្រចាំរោងចក្ររូបនេះ បន្ថែមថា កម្មកររោងចក្ររបស់គាត់នៅតែប្រឈមហានិភ័យឆ្លង ដោយសារពួកគេមិនអាចរក្សាគម្លាតសុវត្ថិភាពពេលសម្រាកញ៉ាំអាហារថ្ងៃត្រង់ និងពេលចេញពីធ្វើការ ហើយមានកម្មករមួយចំនួនមិនបានធ្វើតេស្តរកវិជ្ជមានកូវីដ-១៩ ឱ្យបាន២លើកតាមការណែនាំរបស់អាជ្ញាធរសុខាភិបាល។
អ្នកស្រីនិយាយថា៖ «អ្នកខ្លះគេបានធ្វើសំណាកអ៊ីចឹង តែអ្នកខ្លះគេអត់ទាន់បានធ្វើអ៊ីចឹង ចេះតែនាំគ្នាភ័យខ្លាចទាំងអស់គ្នា»។
ពាក់ព័ន្ធបញ្ហានេះ ប្រធានរដ្ឋបាលរោងចក្រ លោក ប៊ុណ្ណា លើកឡើងថា រោងចក្របានសហការជាមួយអាជ្ញាធរធ្វើតេស្តសំណាកកម្មករនិយោជិតទាំងអស់ ក្រោយកើតមានករណីផ្ទុះករណីឆ្លងកាលពីថ្ងៃទី២៤ ខែឧសភា លើកម្មកររោងចក្រនៅក្នុងតំបន់ ដើម្បីធានាសុវត្ថិភាពនៃការចម្លងសារជាថ្មី មុនពេលពួកគេវិលមកធ្វើការឡើងវិញ។ លោកថា យ៉ាងណាខាងរោងចក្រមិនអាចបង្ខំពួកគេឱ្យទៅផ្ដល់សំណាកបានទេ។
លោក ប៊ុណ្ណា និយាយថា៖ «យើងកំពុងបារម្ភរឿងហ្នឹង យើងកំពុងឆែកមើល ពីព្រោះពេល Lockdown [បិទខ្ទប់] រោងចក្រ សូម្បីពួកខ្ញុំក៏មិនបានធ្វើការ។ ដល់ពេលយើងចូលមកធ្វើការអ៊ីចឹងទៅ យើងអាងទៅលើក្រដាសគេធ្វើសំណាក លើកទី១ ទី២ គេមានសំណាក គេមានបោះត្រាខៀវៗពីរ។ អ៊ីចឹងយើងឆែកមើលទៅ អ្នកណាអត់ទាន់ធ្វើសំណាកទេ ដល់ថ្ងៃទៅធ្វើ យើងជូនដំណឹងគាត់ឱ្យទៅធ្វើតាមគោលការណ៍របស់ខាងអាជ្ញាធរ»។
ដោយឡែក ជំនួយការអ្នកគ្រប់គ្រងរដ្ឋបាលនៃរោងចក្រ Starlight Apparel លោក ស៊ូ ចាន់ណារ៉ាត់ ទទួលស្គាល់ថា ពិតជាមានកម្មករប្រមាណ២៥០នាក់រកឃើញមានវិជ្ជមានកូវីដ-១៩ ក្នុងចំណោមកម្មករចំនួន១ ៧០០នាក់។ លោកថា យុទ្ធនាការធ្វើតេស្តទ្រង់ទ្រាយធំនេះចាប់ផ្តើមសប្តាហ៍មុន ដោយអ្នកវិជ្ជមានត្រូវធ្វើចត្តាឡីស័ក១៤ថ្ងៃ និងទទួលការព្យាបាល ហើយចំណែកអ្នកអវិជ្ជមានត្រូវចាក់វ៉ាក់សាំងបង្ការ។
លោក ចាន់ណារ៉ាត់ ថ្លែងថា៖ «ឥលូវនៅដំណើរការធម្មតាទេ ព្រោះអីយើងនៅចាក់វ៉ាក់សាំងអ្នកអវិជ្ជមាន ហើយយើងនៅធ្វើការស្អិតល្មួតជាមួយមន្ទីរ ខាងស្រុក ខាងអាជ្ញាធរដែនដីធម្មតានៅឡើយទេ»។
លោកបន្ថែមថា៖ «ខ្ញុំមិនអាចដឹងថា ជំងឺហ្នឹងវាអាចឆ្លងតាមរយៈណាទេ ព្រោះអីខាងកម្មករ យើងដឹងស្រាប់ហើយថាមានការជិះឡានជាមួយគ្នា ប្រជ្រៀតគ្នា ហើយគាត់អត់សូវយកចិត្តទុកដាក់អនាម័យខ្លួនប្រាណរបស់គាត់។ ហើយម៉ាស់ក៏អ៊ីចឹង យើងបានព្យាយាមពន្យល់ណែនាំគាត់ហើយ ប៉ុន្តែអ្នកខ្លះគាត់ថាហប់ ពាក់ម៉ាស់អ៊ីចឹង។ អាហ្នឹងវាជាបញ្ហាមួយដែលធ្វើឱ្យមានការរាលដាលអ៊ីចឹង»។
វីអូឌី មិនអាចទាក់ទងអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ និងអគ្គលេខាធិការសមាគមរោងចក្រកាត់ដេរ GMAC លោក ខេន លូ ដើម្បីស្នើសុំការអធិប្បាយជុំវិញបញ្ហានេះបានទេ នៅថ្ងៃអង្គារនេះ។
កាលពីថ្ងៃទី១៣ ខែមិថុនា ឆ្នាំ២០២១ លោកនាយករដ្ឋមន្រ្តី ហ៊ុន សែន បានសម្រេចបង្កើតគណៈកម្មការប្រយុទ្ធប្រឆាំងនឹងជំងឺកូវីដ-១៩ សម្រាប់បង្កើតយន្តការថ្នាក់ជាតិ និងថ្នាក់រាជធានី-ខេត្ត ដើម្បីកាត់ផ្តាច់រលកចម្លងជំងឺផ្លូវដង្ហើមរលកទី៣ ដែលកើតចេញពីព្រឹត្តិការណ៍សហគមន៍២០កុម្ភៈ បន្ទាប់ពីតួលេខឆ្លងកើនឡើងដល់ជាង៣ម៉ឺនករណី និងស្លាប់ដល់ជាង៣រយនាក់ ក្នុងរយៈពេលជាង៣ខែចុងក្រោយ៕
