មន្ត្រីជាន់ខ្ពស់ក្រសួងយុត្តិធម៌ និយាយថា ក្រសួងបានដាក់ចេញយន្តការច្បាប់មួយចំនួនក្នុងការគ្រប់គ្រងទណ្ឌិតដែលទទួលទោសមិនទាន់ចប់ ឱ្យពួកគេបាននៅក្រៅឃុំ ដើម្បីជួយដោះស្រាយភាពចង្អៀតណែនក្នុងពន្ធនាគារ និងទប់ស្កាត់រលកចម្លងជំងឺកូវីដ-១៩។
អ្នកនាំពាក្យក្រសួងយុត្តិធម៌ លោក គឹម សន្តិភាព ឱ្យដឹងនៅថ្ងៃអង្គារនេះថា លោកបានដឹកនាំកិច្ចប្រជុំមួយជាមួយមន្ត្រីនៅស្ថាប័នពាក់ព័ន្ធ កាលពីថ្ងៃទី១០ ខែមិថុនា ឆ្នាំ២០២១ ដើម្បីពិនិត្យមើលពីលទ្ធភាពដោះលែងទណ្ឌិតដែលទទួលទោសជិតចប់តាមលក្ខខណ្ឌច្បាប់។
លោកបានគូសបញ្ជាក់ថា ដើម្បីជាការលើកទឹកចិត្តដល់ទណ្ឌិតដែលបានកែប្រែខ្លួន ក៏ដូចជាការចូលរួមដោះស្រាយភាពចង្អៀតណែនក្នុងពន្ធនាគារ អំឡុងការរីករាលដាលនៃជំងឺកូវីដ-១៩ផងនោះ ក្រសួងយុត្តិធម៌បានដាក់ចេញនូវយន្តការច្បាប់ ដើម្បីជំរុញឱ្យមានការដោះលែងទណ្ឌិតដោយមានលក្ខខណ្ឌ ដែលថា យន្តការនេះតម្រូវឱ្យមានគណៈកម្មការមួយ ដើម្បីពិនិត្យនិងអនុវត្តវិធានការនេះ។
លោកថា៖ «ពាក់ព័ន្ធនឹងបញ្ហានេះ ក៏តម្រូវឱ្យមានប្រកាសរបស់ក្រសួងយុត្តិធម៌មួយ ស្តីអំពីបែបបទនិងនីតិវិធីក្នុងការតាមដានត្រួតពិនិត្យ ក្រោយពីទណ្ឌិតដែលត្រូវបានដោះលែងហើយចេញមកចូលរួមក្នុងសង្គមវិញ»។
អ្នកនាំពាក្យរូបនេះបន្តទៀតថា ទណ្ឌិតដែលត្រូវដោះលែងត្រូវអនុវត្តទោសដែលនៅសល់នៅក្រៅពន្ធនាគារឬសហគមន៍ តាមលក្ខខណ្ឌច្បាប់ដែលក្រសួងនឹងដាក់ចេញនៅពេលខាងមុខ។
បើតាមអ្នកនាំពាក្យដដែល សម្រាប់ទណ្ឌិតដែលត្រូវបានដោះលែង ពួកគេត្រូវគោរពលក្ខខណ្ឌមួយដែលចងដោយច្បាប់ ដូចជា ការចូលរួមកិច្ចការសង្គម ការទៅបង្ហាញខ្លួននៅចំពោះមុខសមត្ថកិច្ច និងការកម្រិតសិទ្ធិក្នុងការដើរហើរ ជាដើម។
មួយវិញទៀត លោកថា លក្ខខណ្ឌសម្រាប់ដោះលែងផ្តោតលើទណ្ឌិតដែលអនុវត្តទោសបាន៥០ភាគរយ ឬ២ភាគ៣នៃទោស តែថា ក្នុងករណីពួកគេអនុវត្តមិនបាន ចៅក្រមមានសិទ្ធិចេញដីកាបង្គាប់ឱ្យសមត្ថកិច្ចនាំខ្លួនទណ្ឌិតនោះទៅទទួលទោសក្នុងពន្ធនាគារវិញ។
យ៉ាងណា មន្ត្រីរូបនេះថា ក្រសួងមិនទាន់មានទិន្នន័យជាក់លាក់ពីចំនួនទណ្ឌិតដែលមានលក្ខខណ្ឌគ្រប់គ្រាន់នឹងត្រូវដោះលែងឱ្យនៅក្រៅឃុំតាមយន្តការនេះនៅឡើយទេ។
នាយករងអង្គការឃ្លាំមើលសិទ្ធិមនុស្សអង្គការលីកាដូ លោក អំ សំអាត សាទរទៅនឹងយន្តការរបស់ក្រសួងយុត្តិធម៌នេះ។ ប៉ុន្តែលោកថា យន្តការនេះមិនគួរត្រូវពន្យារទៀតទេ ដោយថា ពេលនេះភាពចង្អៀតណែនក្នុងពន្ធនាគារកំពុងប្រឈមនឹងការឆ្លងរាលដាលជំងឺកូវីដ-១៩ ដែលថាជាការព្រួយបារម្ភដល់សុខភាពអ្នកជាប់ឃុំ។
លោកថា៖ «ទោះលក្ខខណ្ឌនៃការដោះលែងហ្នឹងធ្វើយ៉ាងណាក៏ដោយ គួរតែធ្វើឡើងឱ្យបានឆាប់នៅក្នុងដំណាក់កាលនេះ ហើយលក្ខខណ្ឌណាដែលវារំលោភសិទ្ធិធ្ងន់ធ្ងរពេក យើងគួរតែពិនិត្យនិងពិចារណាដែរ ពីព្រោះលក្ខខណ្ឌច្បាប់ក៏ត្រូវផ្អែកទៅលើស្ថានភាពសិទ្ធិជនដែលជាប់ចោទហ្នឹងដែរ»។
ភាពចង្អៀតណែនក្នុងពន្ធនាគារត្រូវបានក្រុមអង្គការសង្គមស៊ីវិលរកឃើញថា វាបានកើតឡើងចាប់ពីឆ្នាំ២០១៧មក អំឡុងពេលដែលរដ្ឋាភិបាលប្រកាសធ្វើយុទ្ធនាការបង្ក្រាបគ្រឿងញៀន។
បើតាមអ្នកនាំពាក្យអគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ ប្រាប់ VOD កាលពីសប្តាហ៍មុនថា អ្នកជាប់ឃុំបច្ចុប្បន្នមានជិត៤០ ០០០នាក់។
បញ្ហានេះ អង្គការលើកលែងទោសអន្តរជាតិ (Amnesty International) កាលពីដើមឆ្នាំ២០២០ បានបង្ហាញរបាយការណ៍មួយថា គិតត្រឹមខែមីនា ឆ្នាំ២០២០ អ្នកជាប់ឃុំនៅទូទាំងប្រទេសមានចំនួន៣៦ ០០០នាក់ ខណៈពន្ធនាគាររបស់កម្ពុជាអាចដាក់អ្នកជាប់ឃុំបានប្រមាណ២៦ ០០០នាក់តែប៉ុណ្ណោះ។
អង្គការអន្តរជាតិនេះបញ្ជាក់ថា៖ «វិបត្តិនៃការចង្អៀតណែនក្នុងពន្ធនាគារនេះ កំពុងបង្កឱ្យមានការរំលោភបំពានយ៉ាងធ្ងន់ធ្ងរនិងលក្ខណៈជាប្រព័ន្ធ»៕
អត្ថបទទាក់ទង