លោកនាយករដ្ឋមន្ត្រី ហ៊ុន សែន បង្ហាញការតាំងចិត្តថ្មីទៀតក្នុងការប្រយុទ្ធប្រឆាំងទៅនឹងការឆ្លងរីករាលដាលនៃជំងឺកូវីដ-១៩ ពាក់ព័ន្ធព្រឹត្តិការណ៍២០កុម្ភៈ ក្រោយវិធានការជាង៤ខែមកនេះមិនទាន់អាចកាត់ផ្តាច់រលកចម្លងជំងឺជាសកលនេះបាននៅឡើយ។
តាមអនុក្រឹត្យថ្មីមួយទៀតដែលរដ្ឋាភិបាលចេញផ្សាយកាលពីថ្ងៃម្សិលមិញ មានខ្លឹមសារប្រហាក់ប្រហែលនឹងអនុក្រឹត្យចុះថ្ងៃទី១៨ ខែមីនា ឆ្នាំ២០២០។
តាមអនុក្រឹត្យថ្មី ស្តីពី «ការរៀបចំនិងការប្រព្រឹត្តទៅនៃគណៈកម្មការជាតិប្រយុទ្ធនឹងជំងឺកូវីដ-១៩» ដែលមាននាយករដ្ឋមន្ត្រីជាប្រធាន ឧបនាយករដ្ឋមន្ត្រី៤រូបជាអនុប្រធាន ទេសរដ្ឋមន្ត្រី រដ្ឋមន្ត្រីទាំង៩ក្រសួង កងកម្លាំងប្រដាប់អាវុធ រួមទាំងគណៈអភិបាលរាជធានី-ខេត្តទាំងអស់ជាសមាជិកផងនោះ បានដាក់ចេញនូវវិធានការមួយចំនួន នូវអ្វីដែលរដ្ឋាភិបាលថា «ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត យោងតាមតម្រូវការចាំបាច់ ដើម្បីប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩»។
នាយករដ្ឋមន្ត្រី បានគូសបញ្ជាក់ក្នុងអនុក្រឹត្យនោះថា គណៈកម្មការជាតិមួយនេះមានតួនាទីនិងភារកិច្ចដឹកនាំប្រយុទ្ធនឹងជំងឺកូវីដ-១៩ កំណត់គោលនយោបាយ និងផែនការយុទ្ធសាស្ត្រ ដើម្បីប្រយុទ្ធនឹងជំងឺកូវីដ-១៩ សំដៅដល់ការកាត់បន្ថយឱ្យបានជាអតិបរមានូវផលប៉ះពាល់ដល់សុខភាពសាធាណៈ និងធានាដល់និរន្តរភាពនៃកិច្ចដំណើរការជំរុញដល់ការស្តារឡើងវិញវិស័យសេដ្ឋកិច្ចសង្គមតាមប្រក្រតីភាពថ្មី។
ការចេញអនុក្រឹត្យថ្មីទៀតរបស់រដ្ឋាភិបាលនេះ ចំពេលមានការហក់ឡើងនៃចំនួនអ្នកស្លាប់ដោយសារជំងឺកូវីដ-១៩ ពាក់ព័ន្ធព្រឹត្តិការណ៍សហគមន៍២០កុម្ភៈ នៅបន្តអូសបន្លាយជាង៤ខែមកហើយ។
ត្រឹម២សប្តាហ៍ចុងក្រោយនេះ អ្នកស្លាប់ដោយជំងឺកូវីដ-១៩ បានបន្តហក់ឡើង ដែលសប្តាហ៍មុនមានអ្នកស្លាប់៥២នាក់ ខណៈសប្តាហ៍នេះមានអ្នកស្លាប់ដល់ទៅ៨២នាក់ ធ្វើឱ្យតួលេខអ្នកស្លាប់សរុបគិតត្រឹមថ្ងៃចន្ទនេះឡើងដល់៣៤៨នាក់។
ព្រឹត្តិការណ៍សហគមន៍២០កុម្ភៈ មកដល់ពេលនេះ បានឆ្លងចូលទៅដល់អាជីវករផ្សារ កម្មករក្នុងវិស័យកាត់ដេរ ពន្ធនាគារ ដែលជាបណ្តុះមនុស្សច្រើន និងពលរដ្ឋមួយចំនួននៅតាមបណ្តាខេត្ត។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន សុំមិនធ្វើអត្ថាធិប្បាយនៅពេលសួរថាតើក្រសួងជំនាញមួយនេះ មានឧបសគ្គចម្បងអ្វីខ្លះបានជាង៤ខែមកនេះ មិនអាចកាត់ផ្តាច់រលកចម្លងនេះបាន ដោយលោកស្រីបង្វែរសំណួរទៅទីស្តីការគណៈរដ្ឋមន្ត្រីវិញ។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន មានប្រសាសន៍ថា ឧបសគ្គជាបណ្តោះអាសន្នគឺអាស្រ័យដោយល្បឿននៃការទទួលនិងការចាក់វ៉ាក់សាំងអត់ទាន់សភាពការ។
លោកថា៖ «ប៉ុន្តែជាយុទ្ធសាស្ត្រហ្នឹង យើងស្រោចវ៉ាក់សាំង គេហៅថា ចំសំបុកមេរោគហ្នឹង [តំបន់ក្រហម] ឥលូវហ្នឹង យើងតាមមើលដល់សំបុកមេមេរោគដែលវាឆ្លងទៅកម្មកររបស់យើង អាហ្នឹងជាទី២ធំបំផុត»។
យ៉ាងណា លោកអំពាវនាវដូច្នេះថា៖ «ទោះជាយើងមិនទាន់ទទួលបានវ៉ាក់សាំងពីរដូសហ្នឹងក៏ដោយ ប៉ុន្តែសុំអនុវត្តទៅតាម “៣កុំ និង ៣ការពារ” នោះជាការប្រតិបត្តិដ៏ស័ក្តិសិទ្ធិមួយក្នុងការទប់ស្កាត់របស់មេរោគកូវីដ-១៩នេះឯង»។
អ្នកស្រី ឡាង ស៊ីណាង ប្រកបមុខរបរជាអ្នកលក់បាយ នៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បាននិយាយថា ជីវភាពគាត់បានធ្លាក់ចុះខ្លាំងចាប់ពីព្រឹត្តិការណ៍សហគមន៍២០កុម្ភៈមក។
ស្ត្រីអាយុ៤១ឆ្នាំ មានកូន៣នាក់ក្នុងបន្ទុក រូបនេះ បារម្ភថា បើវិបត្តិនេះនៅតែអូសបន្លាយឬឈានទៅបិទខ្ទប់ម្តងទៀតនោះ គាត់គ្មានលទ្ធភាពដោះស្រាយបញ្ហាបំណុលនិងជីវភាពប្រចាំថ្ងៃទៀតទេ។
អ្នកស្រីថា៖ «ដឹងម៉េចម៉ាទេ! ខ្ញុំគ្មានអីទប់ទល់ទេ ដីធ្លីអីលក់គ្រប់កន្លែងអស់ហើយ លុយធ្វើផ្ទះក៏ខ្ចីធនាគារ ម៉ូតូជិះក៏បង់រម្លស់ សព្វគ្រប់ កូនក៏រៀន[អនឡាញ] ណាកូនស៊ី ខ្ញុំកូនង៉ែតតូចបៅទឹកដោះគោទៀត ខ្ញុំបើមិនលោតទឹក ក៏ទៅចងកដែរ»។
វិបត្តិកូវីដ-១៩ ដែលបានផ្ទុះឡើងចាប់ពីដើមឆ្នាំ២០២០មក បូកទាំងព្រឹត្តិការណ៍សហគមន៍២០កុម្ភៈ បានបង្កផលប៉ះពាល់ស្ទើរគ្រប់វិស័យ ប៉ុន្តែវិស័យដែលប៉ះពាល់ខ្លាំងជាងគេ រួមមាន វិស័យកាត់ដេរ ទេសចរណ៍ សណ្ឋាគារ ផ្ទះសំណាក់ និងដឹកជញ្ជូន ដែលជំរុញឱ្យកម្មករច្រើនម៉ឺននាក់បាត់បង់ការងារនិងប្រាក់ចំណូល។
ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា និយាយថា ផ្នែកមួយនៃការកាត់ផ្តាច់រលកចម្លងជំងឺកូវីដ-១៩នេះ អាស្រ័យលើរដ្ឋាភិបាល ថាតើមានលទ្ធភាពកម្រិតណាក្នុងការផ្តល់ជំនួយសង្គម រួមទាំងបញ្ចេញកញ្ចប់ថវិកាជួយវិស័យឯកជននិងពលរដ្ឋ ដើម្បីឱ្យពួកគេផ្អាកមួយរយៈ រក្សាគម្លាតសង្គម។
លោកថា៖ «ដើម្បីឱ្យពលរដ្ឋចូលរួមបាន ទាល់តែគាត់មានចំណូល គាត់មានស្បៀងអាហារគ្រប់គ្រាន់ ហេតុផលហ្នឹងដែលខ្ញុំគិតថា រដ្ឋត្រូវគិតពីជំនួយសង្គមទៅដល់ប្រជាពលរដ្ឋទាំងវិស័យឯកជន ហើយជាពិសេស ត្រូវផ្អាកទារបំណុលពីសំណាក់ធនាគារពីអីហ្នឹង អ៊ឹចឹងទាល់តែស្រាយបន្ទុកទាំងអស់ហ្នឹង បានអាចផ្តាច់[រលកចម្លង]បាន»។
យ៉ាងណា លោកថា កន្លងទៅ រដ្ឋាភិបាលបានបញ្ចេញកញ្ចប់ថវិកាជាតិជួយដោះស្រាយបញ្ហាអ្នកដែលរងផលប៉ះពាល់ អំឡុងនៃការបិទខ្ទប់ រួមទាំងការផ្គត់ផ្គង់ស្បៀងដល់អ្នកធ្វើចត្តាឡីស័ក និងការព្យាបាលអ្នកជំងឺកូវីដ-១៩ជាដើម ប៉ុន្តែលោកថា បញ្ហានេះនឹងរីកធំជាងនេះ បើរដ្ឋាភិបាលមិនអាចកាត់ផ្តាច់រលកចម្លងបាន។
អង្គការសហប្រជាជាតិប្រចាំកម្ពុជា បានដកស្រង់សម្តីលោកស្រីវេជ្ជបណ្ឌិត លី អាយឡាន តំណាងអង្គការសុខភាពពិភពលោក មកចុះផ្សាយលើគេហទំព័ររបស់ខ្លួនថា ការស្ទង់មតិថ្មីមួយរបស់អង្គការសុខភាពពិភពលោក ជុំវិញឥរិយាបថនិងការយល់ឃើញរបស់ប្រជាជនអំពីជំងឺកូវីដ-១៩ កាលពីខែឧសភា ឆ្នាំ២០២១ បានបង្ហាញថា នៅសហគមន៍នានាក្នុងប្រទេសកម្ពុជា ប្រជាជននៅតែមានការគិតថា ជំងឺរាតត្បាតនេះមិនមែនជាបញ្ហាធំចម្បង ហើយមានហានិភ័យទាប។
លោកស្រីថា៖ «ខ្ញុំយល់ច្បាស់ថា ប្រជាជនធុញទ្រាន់ បន្ទាប់ពីការប្រយុទ្ធប្រឆាំងនឹងជំងឺរាតត្បាតរយៈពេល១៨ខែមកនេះ ប៉ុន្តែយើងមិនមានជម្រើសផ្សេងនោះទេ។ យើងត្រូវតែបង្កើនកិច្ចខិតខំប្រឹងប្រែងរបស់យើង ដើម្បីបញ្ឈប់ការរីករាលដាលនៃជំងឺកូវីដ-១៩ ហើយយើងគ្រប់គ្នាមានតួនាទីដ៏សំខាន់»៕