ព្រះសង្ឃការពារព្រៃឈើនៅសហគមន៍សង្ឃរុក្ខវ័ន ខេត្តឧត្តរមានជ័យ បារម្ភពីការបាត់បង់ព្រៃឈើនៅក្នុងសហគមន៍មួយនេះ ក្រោយរកឃើញជនល្មើសលួចចូលកាប់ឈើនៅទីនោះជាបន្តបន្ទាប់ ក្នុងអំឡុងពេលមានការឆ្លងរាលដាលនៃជំងឺកូវីដ-១៩។
ក្តីបារម្ភនេះបានកើតឡើងជាថ្មី ក្រោយពីព្រះសង្ឃចំនួន៦អង្គ រួមជាមួយនឹងទាហានជាអ្នកមើលការខុសត្រូវនៅតំបន់អភិរក្សព្រៃឈើសង្ឃរុក្ខវ័ន កាលពីថ្ងៃទី១០ ខែមិថុនា បានរកឃើញបទល្មើសព្រៃឈើដែលជនទុច្ចរិតបានលួចកាប់ថ្មីនៅក្នុងខែនេះ។
ព្រះតេជគុណ អ៊ឹម សុអាន គង់នៅក្នុងសហគមន៍សង្ឃរុក្ខវ័ន និងបាននិមន្តល្បាតព្រៃការពារនេះជាញឹកញាប់ មានសង្ឃដីកាថា បទល្មើសលួចកាប់ឈើនៅតែកើតមានជាបន្តបន្ទាប់នៅក្នុងតំបន់ព្រៃការពារមួយនេះ និងពុំទាន់ឃើញមានចំណាត់ការទប់ស្កាត់ឱ្យមានប្រសិទ្ធភាពពីសំណាក់អាជ្ញាធរពាក់ព័ន្ធនៅឡើយ។
ព្រះអង្គមានសង្ឃដីកាបន្តថា៖ «វាករណីថ្មីនោះ វាកើតមានជាហូហែ បើយើងដើរព្រៃច្រើនទៅ យើងដើរទៅវាជួបតែរហូត។ កន្លែងខ្លះដែលយើងមិនបានដើរទៅ ពេលដើរទៅ ឃើញដូចជាបទល្មើសវាថ្មីច្រើន។ លោកដើរល្ងាចមិញ [ថ្ងៃទី១០ ខែមិថុនា] ជួប៨ដើមទៀត ដើមធ្នុងហ្នឹងណា ដែលបានដួល»។
បើតាមព្រះតេជគុណ អ៊ឹម សុអាន ក្រៅពីបទល្មើសព្រៃឈើ ក៏មានករណីលួចបរបាញ់សត្វព្រៃខុសច្បាប់ផងដែរ ហើយជនដែលប្រព្រឹត្តអាចជាពលរដ្ឋដែលរស់នៅតំបន់ក្បែរតំបន់ព្រៃការពារមួយនេះ។
ព្រះអង្គគូសបញ្ជាក់ថា៖ «ភាគច្រើនជាពលរដ្ឋដែលនៅជុំវិញទីនោះ គាត់តែងតែលួចកាប់។ យើងមិនដឹងថាមានអ្នកពាក់ព័ន្ធឬក៏អត់ យើងវាអត់ដឹងច្បាស់លាស់ទៅ វាពិបាកនិយាយ ហើយយើងកំពុងតែតាមដាន [ព្រោះយើងមិនដឹងថានរណាគេខ្លះពាក់ព័ន្ធ] ជាពិសេសខាងមន្រ្តីរាជការ»។
ព្រះតេជគុណ អ៊ឹម សុអាន បន្តស្នើថា៖ «តាមគំនិតអាត្មា ចង់ឱ្យបរិស្ថាន [ក្រសួងបរិស្ថាន] មានច្បាប់ឱ្យតឹងរ៉ឹង កាលណាដែលយើងមានច្បាប់ យើងមិនអនុវត្ត ថ្ងៃអនាគត វានឹងអស់ហើយ។ បើយើងមានច្បាប់ យើងអត់អនុវត្ត យើងអត់ជួយជ្រោមជ្រែងតាមដាន ធ្វើតាមតែថ្នាក់ក្រោម តាមពិតខាងក្រសួងគាត់មិនដឹងទេ ថ្នាក់ក្រោមចេះតែរាយការណ៍កុហកអីទៅ។ បើយើងចេះតែជឿថ្នាក់ក្រោម ឈើដឹងតែខ្ទេចខ្ទីអស់ហើយ»។
ព្រៃសហគមន៍សង្ឃរុក្ខវ័ន មានទំហំជាង៣ម៉ឺនហិកតា ស្ថិតនៅក្នុងស្រុកសំរោង ស្រុកចុងកាល់ និងស្រុកអន្លង់វែង ខេត្តឧត្តរមានជ័យ ហើយសព្វថ្ងៃស្ថិតក្រោមការគ្រប់គ្រងនិងមើលការខុសត្រូវពីសំណាក់ប្រជាពលរដ្ឋនិងព្រះសង្ឃ ក្រោមកិច្ចសហការពីសំណាក់រដ្ឋបាលព្រៃឈើខេត្ត។
ប្រធានមន្ទីរបរិស្ថានខេត្តឧត្តរមានជ័យ លោក ភួង លីណា មានប្រសាសន៍នៅថ្ងៃចន្ទនេះថា ពាក់ព័ន្ធនឹងបទល្មើសនៅព្រៃសង្ឃរុក្ខវ័ននេះ មន្រ្តីឧទ្យានុរក្សបានខិតខំប្រឹងប្រែងក្នុងការបង្រ្កាបជាច្រើនលើកមកហើយ ហើយមន្ត្រីជំនាញក៏កំពុងតាមដាននិងទប់ស្កាត់បទល្មើសថ្មីៗផងដែរ។ លោកបន្តថា បទល្មើសថ្មីនេះជារឿងដែលពិបាកក្នុងការកំណត់បាននូវអត្តសញ្ញាណ ដោយហេតុថា អ្នកដែលចូលទៅកាប់ឈើទាំងនោះ ធ្វើឡើងដោយប្រើរណារដៃ និងនាំចេញដោយស្ពាយឈើលើខ្លួន។
លោកថា៖ «ហើយរូបភាពនៃបទល្មើសថ្មីនេះ យើងមានការចាប់អារម្មណ៍ខ្ពស់ ដោយសារតែការទៅលួចកាប់ ប្រើរូបភាពស្ពាយ ហើយកាប់នៅពេលយប់ ប្រើរណារអារ ហើយឡាំងស្ពាយ ប្រៀបបីដូចជាអ្នកដែលចូលទៅកាប់គ្រញូងនៅព្រំដែននៅប្រទេសថៃ អ៊ីចឹងនេះជារូបភាពដែលយើងបានឃើញ»។
បើតាមមន្ត្រីរូបនេះ កន្លងមក បទល្មើសធនធានធម្មជាតិទាំងនេះ នៅពេលដែលមន្ត្រីជំនាញចាប់បាន គឺក្រសួងបានរៀបចំសំណុំរឿងបញ្ជូនទៅតុលាការផងដែរ។
ចំណែកសកម្មជនព្រៃឈើនៃសមាគមបណ្ដាញយុវជនកម្ពុជា (CYN) លោក សាន់ ម៉ាឡា លើកឡើងថា បញ្ហាបទល្មើសព្រៃឈើតែងតែកើតមានគ្រប់ទីកន្លែង និងមិនមានការទប់ស្កាត់ឱ្យមានប្រសិទ្ធភាពនៅឡើយ មិនថានៅតំបន់ព្រៃឡង់ ព្រៃព្រះរការ ឬនៅព្រៃសង្ឃរុក្ខវ័ននោះទេ។ លោកបន្តថា កន្លងមក ក្រសួងបរិស្ថានហាក់មិនសូវយកចិត្តទុកដាក់ខ្ពស់ក្នុងការទប់ស្កាត់បទល្មើស រហូតដល់មានការរារាំងសកម្មជន ក៏ដូចជាប្រជាពលរដ្ឋមិនឱ្យចុះល្បាតជាដើម។
ករណីនេះ លោកស្នើឱ្យក្រសួងគួរតែបើកចំហឱ្យប្រជាពលរដ្ឋមានសិទ្ធិពេញលេញ និងក្រសួងផ្ទាល់គួរតែផ្លាស់ប្ដូរគោលនយោបាយថ្មី ដើម្បីអនុវត្តការបង្ការនិងទប់ស្កាត់បទល្មើសធនធានធម្មជាតិឱ្យមានប្រសិទ្ធភាព។
លោកថា៖ «ក្រសួងគួរតែធ្វើការស្រាយបំភ្លឺពីបញ្ហានេះ [បទល្មើសព្រៃឈើ] ដល់យើងទាំងអស់គ្នា ហើយក្រសួងបរិស្ថានត្រូវតែពង្រឹងនូវការងាររបស់ខ្លួន និងបង្ហាញនូវក្ដីគួរឱ្យជឿជាក់មួយសម្រាប់សាធារណជន បើសិនជាមិនដូច្នេះទេ យើងនៅតែទាមទារសិទ្ធិនៅក្នុងការចូលរួមទៅការពារព្រៃឈើដូចដើមវិញ»៕