កម្ពុជាប្រកាសច្រានចោលការចោទប្រកាន់របស់ស្ថានទូតអាមេរិកប្រចាំកម្ពុជាដែលថាមន្ត្រីយោធាកម្ពុជាមិនអនុញ្ញាតឱ្យ មន្ត្រីអនុព័ន្ធយោធាអាមេរិកទៅមើលគ្រប់កន្លែងនៅក្នុងមូលដ្ឋានកងទ័ពជើងទឹករាម ក្នុងខេត្តព្រះសីហនុ។
ការទាត់ចោលនេះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានសន្យាជាមួយលោកស្រី Wendy Sherman អនុរដ្ឋមន្ត្រីការបរទេសសហរដ្ឋអាមេរិក ក្នុងជំនួបរវាងអ្នកទាំងពីរកាលពីថ្ងៃទី១ ខែមិថុនា ឱ្យមានដំណើរទស្សនកិច្ចពីអនុព័ន្ធយោធាអាមេរិកចូលមើលតំបន់មូលដ្ឋានកងទ័ពជើងទឹករាម ខេត្តព្រះសីហនុ។
ស្ថានទូតអាមេរិកប្រចាំកម្ពុជា កាលពីថ្ងៃសុក្រ បានចេញការប្រកាសព័ត៌មានមួយដោយលើកឡើងថា មន្ត្រីអនុព័ន្ធយោធារបស់ស្ថានទូតអាមេរិកមិនត្រូវបានមន្ត្រីយោធាកម្ពុជាអនុញ្ញាតឱ្យក្រុមការងារខ្លួនដើរមើលគ្រប់ទីកន្លែងក្នុងដំណើរទស្សនកិច្ចនៅមូលដ្ឋានកងទ័ពជើងទឹករាម នៅខេត្តព្រះសីហនុ កាលពីថ្ងៃទី១១ ខែមិថុនា នោះឡើយ។
ទោះបីជាយ៉ាងណាក្តី ក្នុងសេចក្តីប្រកាសព័ត៌មានរបស់ក្រសួងការពារជាតិ កាលពីថ្ងៃទី១២ ខែមិថុនា ឱ្យដឹងថា នៅក្នុងអំឡុងពេលទស្សនកិច្ចនៅមូលដ្ឋានសមុទ្ររាមនេះ ក្រុមការងារសម្របសម្រួលក្រសួងការពារជាតិ បានព្យាយាមបំពេញបំណងរបស់ប្រតិភូអាមេរិក ដោយអនុលោមទៅតាមគោលការណ៍ដែលបានកំណត់និងការព្រមព្រៀងគ្នា។
សេចក្តីប្រកាសព័ត៌មានដដែលបញ្ជាក់ថា សកម្មភាពសំខាន់ៗមួយចំនួន រួមមាន ជំនួបពិភាក្សាការងារដែលស្នើដោយភាគីអាមេរិកមានរយៈពេលជាងមួយម៉ោង ការចុះទៅពិនិត្យមើលអាគារសង់ថ្មី២ខ្នងសម្រាប់ការស្នាក់នៅរបស់កម្មករសំណង់ ដំណើរពិនិត្យមើលផែនិងនាវារបស់កងទ័ពជើងទឹក ការទស្សនារោងជាងដែលជាជំនួយរបស់ប្រទេសអូស្ត្រាលី ការធ្វើទស្សនកិច្ចនៅមន្ទីរពេទ្យ និងការធ្វើដំណើរទៅពិនិត្យមើលសំណង់ទីបញ្ជាការជួរមុខរបស់គណៈកម្មាធិការជាតិ សន្តិសុខលម្អសមុទ្រ នៅកោះព្រាប។
ក្រៅពីទីកន្លែងទាំងប៉ុន្មានដែលបានស្នើនិងបានឯកភាពគ្នាខាងលើ កម្ពុជាលើកឡើងថា ភាគីអាមេរិកបានបង្កើតសេណារីយ៉ូថ្មីភ្លាមៗ ដោយទាមទារចូលទៅមើលកន្លែងផ្សេងទៀតដែលពុំមានការស្នើសុំពីមុនមក។ ដោយមើលឃើញភាពមិនប្រក្រតី និងយល់ឃើញអំពីការមិនគោរពចំពោះអធិបតេយ្យរបស់កម្ពុជា និងចេតនាធ្វើជាមិនយល់អំពីលក្ខណការណ៍របស់កងទ័ព ក្រុមការងារកម្ពុជាបានបដិសេធសំណើថ្មីរបស់អាមេរិកនោះ។
ក្រៅពីនេះ កម្ពុជាបានចាត់ទុកការលើកឡើងរបស់អាមេរិក ថាជាការបំភ្លៃការពិតដែលនាំឱ្យមានភាពល្អក់កករកាន់តែខ្លាំងឡើងដល់ទំនាក់ទំនងយោធារវាងប្រទេសទាំងពីរ។
សេចក្តីថ្លែងការណ៍មានខ្លឹមសារថា៖ «ផ្អែកលើកត្តាទាំងអស់ខាងលើ ក្រសួងការពារជាតិចាត់ទុកប្រតិកម្មរបស់ស្ថានទូតសហរដ្ឋអាមេរិក ជាការព្យាយាមបង្កើតបញ្ហាថ្មី និងបំភ្លៃការពិត ដែលនាំឱ្យមានភាពល្អក់កករកាន់តែខ្លាំងឡើងដល់ទំនាក់ទំនងយោធារវាងប្រទេសទាំងពីរ។ ក្រសួងការពារជាតិ ចាត់ទុកចំណាត់ការរបស់ក្រុមការងារសម្របសម្រួលដំណើរទស្សនកិច្ច ថាមានភាពត្រឹមត្រូវនិងប្រកបដោយវិជ្ជាជីវៈ»។
កាលពីថ្ងៃសុក្រសប្តាហ៍មុន តាមរយៈការប្រកាសព័ត៌មានរបស់ស្ថានទូតអាមេរិកប្រចាំនៅកម្ពុជា បានឱ្យដឹងថា លោកវរសេនីយ៍ឯក Marcus M. Ferrara បានស្នើសុំឱ្យភាគីកម្ពុជាសម្របសម្រួលឱ្យមានដំណើរទស្សនកិច្ចជាថ្មីម្តងទៀត នៅពេលឆាប់ៗខាងមុខនេះ ដោយអនុញ្ញាតឱ្យអនុព័ន្ធយោធាអាមេរិកបានដើរមើលគ្រប់ទីកន្លែងនៅមូលដ្ឋានកងទ័ពជើងទឹករាម។
យ៉ាងណា នៅក្នុងសេចក្តីប្រកាសព័ត៌មានរបស់ក្រសួងការពារជាតិ បញ្ជាក់ថា ចំពោះសំណើទៅទស្សនកិច្ចនាពេលអនាគត កម្ពុជានឹងពិចារណាយ៉ាងហ្មត់ចត់តាមករណីនីមួយៗ។
ជាមួយគ្នានេះ ក្រសួងការពារជាតិបានស្នើដោយទទូចឱ្យសហរដ្ឋអាមេរិកបញ្ឈប់ការបង្កើតសេណារីយ៉ូថ្មីៗដែលនាំមកនូវភាពអវិជ្ជមាន និងត្រូវគោរពដល់អធិបតេយ្យភាពនិងលក្ខណការណ៍កងទ័ពរបស់កម្ពុជា។ ក្រសួងការពារជាតិ និយាយថា សកម្មភាពទាំងឡាយណានៅបរិវេណមូលដ្ឋានកងទ័ពដែលបានទទួលការអនុញ្ញាត គឺជាការធ្វើទស្សនកិច្ច ពុំមែនជាការទៅត្រួតពិនិត្យឬឆែកឆេរនោះឡើយ។
អ្នកវិភាគនយោបាយ លោក ឯម សុវណ្ណរ៉ា មានប្រសាសន៍គាំទ្រនឹងសេចក្តីថ្លែងការណ៍របស់កម្ពុជា ជុំវិញការការពារអធិបតេយ្យរបស់កម្ពុជា។ ប៉ុន្តែលោកថា បើស្ថានទូតអាមេរិកមិនចង់ឱ្យមានមន្ទិលសង្ស័យជំុវិញការសម្ងាត់ឬពីសន្តិសុខជាតិនៅកម្ពុជានោះ អាមេរិកគួរតែដាក់សំណើពីចំណុចចូលមើលកងទ័ពជើងទឹករាមឱ្យបានច្បាស់លាស់ ដើម្បីកុំឱ្យប៉ះពាល់ទំនាក់ទំនងនៃប្រទេសទាំងពីរ។
លោកផ្តល់ជាអនុសាសន៍ថា៖ «លើកក្រោយ ភាគីអាមេរិក បើមានការសង្ស័យ ឱ្យគាត់លើកឡើងមក[ភាគីកម្ពុជា] ហើយឱ្យភាគីកម្ពុជាឆ្លើយតប។ ហើយប្រសិនបើយន្តការនៃការទស្សនកិច្ចនៅតែធ្វើមិនបានល្អទៀត វានៅតែមិនអាចលាងជម្រះមន្ទិលសង្ស័យរវាងភាគីទាំងពីរទេ»។
កាសែត The Wall Street Journal របស់អាមេរិក បានចុះផ្សាយកាលពីខែកក្កដា ឆ្នាំ២០១៩ ដោយបានចោទប្រកាន់ថា កម្ពុជាបានលួចចុះកុងត្រាយោធាសម្ងាត់ជាមួយចិន ដោយឱ្យចិនគ្រប់គ្រងកំពង់ផែកងទ័ពជើងទឹករាមផ្តាច់មុខរយៈពេល៣០ឆ្នាំ។ ប៉ុន្តែភាគីកម្ពុជាបានច្រានចោលម្តងហើយម្តងទៀត និងបានចាត់ទុកថា ព័ត៌មាននោះជាព័ត៌មានក្លែងក្លាយ និងមានចេតនាបម្រើមហិច្ឆតាភូមិសាស្ត្រនយោបាយរបស់អាមេរិក៕