ក្រសួងមហាផ្ទៃ ណែនាំជាថ្មីទៀតទៅអាជ្ញាធរជាប់ព្រំដែនវៀតណាមឱ្យពង្រឹងវិធានការអនុវត្តច្បាប់បង្ក្រាបការនាំមនុស្សឆ្លងដែនខុសច្បាប់ ដើម្បីទប់ស្កាត់ការឆ្លងជំងឺកូវីដ-១៩ប្រភេទថ្មីចូលកម្ពុជា។
ការដាក់ចេញវិធានការនេះ ធ្វើឡើងតាមរយៈសេចក្តីណែនាំមួយចុះថ្ងៃទី៩ ខែមិថុនានេះ ស្តីពី «ការពង្រឹងការគ្រប់គ្រងនិងត្រួតពិនិត្យការចេញចូលឆ្លងដែន ដើម្បីបង្ការនិងទប់ស្កាត់ការឆ្លងរីករាលដាលនៃជំងឺកូវីដ-១៩ប្រភេទថ្មីនៅកម្ពុជា» ។
ជាផ្នែកមួយនៃការទប់ស្កាត់ជំងឺឆ្លងសកលប្រភេទថ្មីនេះឱ្យមានប្រសិទ្ធភាព រដ្ឋមន្ត្រីក្រសួងមហាផ្ទៃ លោក ស ខេង បានណែនាំថា ប្រធានគណៈបញ្ជាការឯកភាពរដ្ឋបាលខេត្តជាប់ព្រំដែនជាមួយប្រទេសវៀតណាម ត្រូវបន្តយកចិត្តទុកដាក់ រក្សាសន្តិសុខ សណ្តាប់ធ្នាប់សាធារណៈ សុវត្ថិភាព រួមទាំងបង្ការ ទប់ស្កាត់ និងបង្ក្រាបបទល្មើសនាំមនុស្សឆ្លងដែនដោយខុសច្បាប់។
លោក ស ខេង បានគូសបញ្ជាក់ថា «ត្រូវពង្រឹងអនុវត្តឱ្យបានតឹងរ៉ឹងនិងម៉ឺងម៉ាត់នូវវិធានការបង្ការ ទប់ស្កាត់ និងបង្ក្រាបសកម្មភាពឆ្លងដែនដោយខុសច្បាប់ឱ្យមានប្រសិទ្ធភាព» តាមស្មារតីនៃសេចក្តីណែនាំកន្លងទៅ និងបន្តអប់រំ ផ្សព្វផ្សាយដល់ប្រជាពលរដ្ឋរស់នៅតាមតំបន់ព្រំដែនឱ្យបង្កើនការប្រុងប្រយ័ត្នការពារខ្លួន ស្របតាមវិធានការរបស់ក្រសួងសុខាភិបាល ដើម្បីកុំឱ្យមានមេរោគកូវីដ-១៩ ឆ្លងមកលើបុគ្គលនិងសហគមន៍មូលដ្ឋាន។
លោក ស ខេង ក៏បានណែនាំផងដែរពីការពង្រឹងកិច្ចសហប្រតិបត្តិការជាមួយអាជ្ញាធរវៀតណាមជាប់ព្រំដែន ដើម្បីពង្រឹងប្រសិទ្ធភាព បង្ការ និងទប់ស្កាត់ជំងឺឆ្លងប្រភេទថ្មីនេះចូលកម្ពុជា។
អភិបាលរងខេត្តស្វាយរៀង លោក តូច ប៉ូលីវា អះអាងថា ខេត្តជាប់ព្រំដែនវៀតណាមមួយនេះបានអនុវត្តវិធានទប់ស្កាត់បង្ការជំងឺនេះជាប្រចាំ តាំងពីមានសេចក្តីណែនាំរបស់ក្រសួងមហាផ្ទៃពីដំបូង ហើយជាលទ្ធផល សមត្ថកិច្ចចាប់បានមេខ្យល់៣នាក់ដែលនាំមនុស្សឆ្លងដែនខុសច្បាប់ បញ្ជូនទៅឱ្យតុលាការដើម្បីផ្តន្ទាទោស។
លោកថា៖ «ការពង្រឹង យើងបានពង្រឹងយូរហើយ យើងខ្លាចអាបំប្លែងថ្មីហ្នឹងឆ្លងចូលកន្លែងយើង។ [ខេត្ត] យើងបានធ្វើជាប់ជាប្រចាំតាំងពីមុនចូលឆ្នាំខ្មែរមកម៉្លេះ យើងខ្លាចអាការឆ្លងដែនខុសច្បាប់អីហ្នឹងវាអាចនាំបញ្ហានាំមេរោគមកដល់យើង យើងបានពង្រឹងយូរហើយ យើងដាក់វិធានការពង្រឹង៥៩គោលដៅឯណោះ»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មានប្រសាសន៍ថា ភាពជោគជ័យនៃវិធានការរបស់ក្រសួងមហាផ្ទៃនេះ ត្រូវដើរទន្ទឹមគ្នាលើគោលការណ៍ពីរ ដែលទីមួយ ត្រូវមានការភ្ញាក់រឭកពីអាជ្ញាធរថ្នាក់ក្រោមជាតិ ពិសេសអ្នកចូលរួមអនុវត្តច្បាប់ ថាតើពួកគាត់បានតម្កល់ប្រយោជន៍ជាតិបានកម្រិតណា និងទី២ ថ្នាក់ជាតិខ្លួនឯងត្រូវហ៊ានវះកាត់មន្ត្រីពុករលួយ។
អ្នកឃ្លាំមើលរូបនេះបានគូសបញ្ជាក់ថា រដ្ឋាភិបាលបានបរាជ័យច្រើនដងហើយពីការទប់ស្កាត់អំពើពុករលួយក្នុងការទប់ស្កាត់ការនាំចូលជំងឺឆ្លងកូវីដ-១៩នេះ ដែលលោកលើកឧទាហរណ៍ ដូចជា ករណីអតីតអធិការស្រុកកំរៀង ខេត្តបាត់ដំបង ដែលបានរំដោះមនុស្សឆ្លងដែនគេចចេញពីការធ្វើចត្តាឡីស័ក និងការត្រូវរ៉ូវគ្នារវាងសន្តិសុខសណ្ឋាគារមួយនៅភ្នំពេញនិងស្ត្រីជនជាតិចិន បង្កឱ្យឆ្លងចូលសហគមន៍រហូតបច្ចុប្បន្ន ដែលរដ្ឋាភិបាលដាក់ឈ្មោះថា «ព្រឹត្តិការណ៍សហគមន៍២០កុម្ភៈ»។
លោកថា៖ «បញ្ហាអំពើពុករលួយនេះ គឺធំធេងជាងគេ ពីព្រោះមនុស្ស[ត្រូវ]អំពើពុករលួយគ្របសង្កត់ ឬក៏អំពើពុករលួយដឹកនាំ ឬក៏នាំមុខ ហើយធ្វើឱ្យគាត់ហ្នឹងភ្លេចខ្លួន ឬធ្វើឱ្យគាត់បំពេញនូវការងារមិនបានល្អ អាចខ្វះចន្លោះ ហើយអាចនាំបញ្ហាធំទៅដល់ប្រទេសជាតិនិងសង្គមទាំងមូលបាន»។
កាលពីដើមខែឧសភា វៀតណាមបានប្រកាសថា ខ្លួនបានរកឃើញវីរុសកូវីដ-១៩បំប្លែងថ្មីមួយប្រភេទ ដែលគេធ្លាប់រកឃើញដំបូងនៅក្នុងប្រទេសឥណ្ឌា និងចក្រភពអង់គ្លេស។
ដោយឡែក កាលពីពេលថ្មីៗ ក្រសួងសុខាភិបាល និងតំណាងអង្គការសុខភាពពិភពលោកប្រចាំប្រទេសកម្ពុជា បានសម្តែងពីការព្រួយបារម្ភទាក់ទងនឹងការឆ្លងនៃវីរុសបំប្លែងថ្មី មានប្រភពមកពីប្រទេសឥណ្ឌា កើតលើអ្នកជំងឺ៣រូបជាពលករកម្ពុជាត្រឡប់មកពីប្រទេសថៃ កាលពីថ្ងៃទី០៤ ខែមិថុនា។
គិតត្រឹមថ្ងៃទី១០ ខែមិថុនានេះ ព្រឹត្តិការណ៍សហគមន៍២០កុម្ភៈ បានសម្លាប់មនុស្សកើនឡើងដល់៣០០នាក់ ត្រឹមជាង៤ខែប៉ុណ្ណោះ ខណៈអ្នកឆ្លងសរុបមានចំនួន៣៦ ៦៦០នាក់ និងព្យាបាលជាសះស្បើយចំនួន២៩ ៨០៧នាក់៕
