ពលរដ្ឋមួយគ្រួសារដែលអះអាងថារងគ្រោះដោយសារវិវាទដីធ្លីជាមួយក្រុមហ៊ុន OCIC ថាកងកម្លាំងចម្រុះរបស់រដ្ឋាភិបាលជាច្រើននាក់ត្រូវបានដាក់ពង្រាយការពារគ្រឿងចក្ររបស់ក្រុមហ៊ុនដែលបានឈូសឆាយរបងនិងស្រះត្រីរបស់គាត់ ស្ថិតនៅខណ្ឌជ្រោយចង្វារ រាជធានីភ្នំពេញ ដោយមិនបានជូនដំណឹងនោះទេ។
លោក គឹម ឆាយ ដែលអះអាងជាជនរងគ្រោះ ប្រាប់អ្នកសារព័ត៌មាននៅមុខ«រមណីយដ្ឋានដីមាស»របស់ខ្លួន នៅថ្ងៃទី១០ ខែមិថុនានេះថា កងកម្លាំងប្រហែល៦០នាក់ត្រូវបានអាជ្ញាធរដាក់មកជួយការពារគ្រឿងចក្រឱ្យក្រុមហ៊ុន OCIC ដែលបានមកឈូសឆាយដីធ្លីរបស់គ្រួសារគាត់ ដោយមិនបានជូនដំណឹងនិងដោះស្រាយសំណងឡើយ។
លោកបន្តថា ដីរបស់គាត់ដែលរងផលប៉ះពាល់ដោយសារការអភិវឌ្ឍរបស់ក្រុមហ៊ុន OCIC មានទំហំជាង២ហិកតា ដោយដីនោះ គ្រួសាររបស់គាត់បានទិញពីប្រជាពលរដ្ឋផ្សេងតាំងពីឆ្នាំ២០០៥។
លោកថា៖ «មិនគំរាមកំហែងម៉េច! កម្លាំងខាងប៉េអឹមប៉ូលិសមក៥០ទៅ៦០នាក់ ហើយខាងកម្មករ[មួយចំនួនទៀត] បូកៗទៅក្បែរជាង១០០នាក់ដែរ គ្រាន់តែមកធ្វើដីខ្ញុំមួយហ្នឹងជាង១០០នាក់ ឆ្លុះបញ្ចាំងថា រាជរដ្ឋាភិបាល ការធ្វើការងារអីក៏ដោយ ខ្ញុំជូនថា សង្គមនេះ សម័យនេះ មានការអីក៏យើងអាចចរចាគ្នាទៅ កុំឱ្យធ្វើបែបហ្នឹងអី […] យើងគ្មានអីទៅតតាំងទេ ព្រោះបើយើងតតាំង ខុសច្បាប់ទៀត»។
លោក គឹម ឆាយ បន្តថា ដីទំហំជាង២ហិកតាដែលរងផលប៉ះពាល់ដោយក្រុមហ៊ុន OCIC បើគិតតម្លៃតាមទីផ្សារ ប្រហែល២លានដុល្លារ។ លោកបន្តថា ប្រសិនបើអាជ្ញាធរនិងក្រុមហ៊ុនយកដីរបស់គាត់ គួរតែធ្វើការដោះស្រាយសំណងឱ្យបានសមរម្យ ជាជាងការមិនដោះស្រាយហើយបែរជាដាក់កម្លាំងចម្រុះនិងគ្រឿងចក្រមកឈូសឆាយបែបនេះ ហើយមានត្រៀមទាំងរថយន្តបាញ់ទឹកទៀតផង។
លោកថា៖ «នៅជាច្រើនគ្រួសារណាស់ដែលមិនទាន់ដោះស្រាយ ដោយសារការដោះស្រាយគាត់គឺធ្វើម្ដងមួយៗ ខ្ញុំមិនដឹងថា គោលនយោបាយគាត់ម៉េចទេ! ខ្ញុំគិតថា ហេតុអីមិនដោះស្រាយទាំងអស់គ្នាតែម្ដងទៅ! ក្នុងនេះ តែមួយគ្រួសារខ្ញុំទេ ខ្ញុំមិនដឹងគាត់ [ក្រុមហ៊ុន] ដោះស្រាយឱ្យពួកគាត់ម៉េចទេ។ ពីមុនខ្ញុំគិតថា រាជរដ្ឋាភិបាលនឹងដោះស្រាយ យើងចេះតែចាំបាត់ៗ មកដល់ថ្ងៃនេះ គេមកឈូសហ្នឹង គេមកដោះសា្រយឱ្យខ្ញុំអ៊ីចឹង! គ្រឿងចក្រ៣ ទៅ៤គឿង មានឡានពន្លត់អគ្គិភ័យទៀត ប្រជាជនយើងមានអីជាមួយគាត់ ខ្ញុំមិនដឹងគាត់គិតម៉េច»។
មេការនៅរមណីយដ្ឋានដីមាស លោក ឌឿន ដន់ ចាត់ទុកការចុះឈូសឆាយដោយមានប្រើកងកម្លាំងការពារនេះថា ជាទង្វើឃោរឃៅ ខណៈការឈូសឆាយនេះ អាជ្ញាធរមិនបានជូនដំណឹង ហើយប្រើកម្លាំងមកគំរាមពួកគាត់តែម្តង។ លោកបន្តថា រូបគាត់និងបុគ្គលិកផ្សេងទៀតបារម្ភខ្លាចបាត់បង់ការងារ បន្ទាប់ពីរមណីយដ្ឋាននេះត្រូវអាជ្ញាធរឈូសឆាយអស់។
លោកថា៖ «នេះព្រលឹមឡើងម៉ោង៦កន្លះព្រឹក ដាក់កម្លាំងរុញយកៗតែម្ដង! គេរុកបំបាក់របងប្រហែលកម្ពស់២ម៉ែត្របាក់អស់។ អីវ៉ាន់សម្បីតែឡាន យកមិនទាន់ផង គាត់ស្ទូចយកទៅខណ្ឌទៀត»។
នាយករដ្ឋបាលសាលាខណ្ឌជ្រោយចង្វារ លោក សែម ដារិទ្ធ សុំមិនធ្វើអត្ថាធិប្បាយលម្អិតលើបញ្ហានេះទេ ដោយថាករណីនេះ អាជ្ញាធរធ្វើតាមបញ្ជាថ្នាក់លើតែប៉ុណ្ណោះ។
លោកថា៖ «ទាក់ទងទៅអភិបាលខណ្ឌ ខ្ញុំមិនអាចឆ្លើយជូនបានទេ! នេះគឺមានបញ្ជាថ្នាក់លើក្នុងកិច្ចការងារហ្នឹង ដឹងតែប៉ុណ្ណឹងបានហើយ»។
វីអូឌី មិនអាចសុំការឆ្លើយតបពីអភិបាលខណ្ឌជ្រោយចង្វារ លោក ឃ្លាំង ហួត បានទេ ខណៈអភិបាលរាជធានីភ្នំពេញ លោក ឃួង ស្រេង និងអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្ដី មិនអាចទាក់ទងបានឡើយ។ ចំណែកក្រុមហ៊ុន OCIC ក៏មិនអាចរកការបំភ្លឺបានដែរពាក់ព័ន្ធករណីនេះ។
អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វ៉ាន់ សូផាត ចាត់ទុកការយកអាជ្ញាធរនិងកងកម្លាំងទៅការពារឱ្យក្រុមហ៊ុនថាជារឿងផ្ទុយនឹងច្បាប់ និងជាការគំរាមហែងពលរដ្ឋរងគ្រោះ។
លោកសង្កេតឃើញថា រាល់ក្រុមហ៊ុនដែលមានទំនាស់ជាមួយប្រជាពលរដ្ឋ បន្ទាប់ពីពួកគេទទួលបានដីសម្បទានពីរដ្ឋាភិបាល ភាគច្រើនអាជ្ញាធរតែងតែប្រើកម្លាំងការពារឱ្យក្រុមហ៊ុនទៅវិញ។
លោកថា៖ «កន្លងមកនេះ ភាគច្រើនក្រុមហ៊ុនអាចមានអំណាច អាចទាក់ទាញកម្លាំងសមត្ថកិច្ច ជួយការពារនៅពេលណាដែលគាត់ត្រូវការបណ្ដេញប្រជាពលរដ្ឋចេញ។ នេះវាជាចំណុចខុសឆ្គងមួយសម្រាប់អ្នកអនុវត្តច្បាប់ ដែលយកកងកម្លាំងទៅអនុវត្តច្បាប់ គឺយើងធ្វើម៉េចឱ្យមានសមភាព យើងហាក់បីឃើញលម្អៀងទៅក្រុមហ៊ុនជាជាងប្រជាពលរដ្ឋ។ ប្រជាពលរដ្ឋជាប្រជាពលរដ្ឋយើង ក្រោមឆ័ត្ររដ្ឋធម្មនុញ្ញទាំងអស់គ្នា ប៉ុន្តែដល់ការអនុវត្តវាផ្សេងគ្នា»។
កាលពីឆ្នាំ២០១៦ រដ្ឋបាលរាជធានីភ្នំពេញ បានប្រជុំកំណត់ជាគោលនយោបាយ ដើម្បីដោះស្រាយផលប៉ះពាល់ដីធ្លីជូនពលរដ្ឋនៅខណ្ឌជ្រោយចង្វារ ដោយសម្រេចផ្តល់ចំណែក១០ភាគរយជូនម្ចាស់ដី និង៥០ភាគរយបានទៅរដ្ឋបាលរាជធានីភ្នំពេញ ខណៈ៤០ភាគរយទៀតបានទៅភាគីក្រុមហ៊ុន OCIC។ ប៉ុន្តែយន្តការដោះស្រាយសំណងនេះ ពលរដ្ឋដែលរងផលប៉ះពាល់អះអាងថា ធ្វើឡើងដោយមិនមានតម្លាភាពនិងអយុត្តិធម៌ ដែលបង្កឱ្យមានជម្លោះរ៉ាំរ៉ៃមិនទាន់ដោះស្រាយចប់រហូតមកដល់សព្វថ្ងៃនេះ៕