ក្រុមពលរដ្ឋដែលកំពុងរងផលប៉ះពាល់ពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី នៅស្រុកកណ្តាលស្ទឹង ខេត្តកណ្តាល បានព្រមានដើរហែក្បួនទ្រង់ទ្រាយធំនៅក្នុងសហគមន៍ និងបិទផ្លូវចូលការដ្ឋានសាងសង់ព្រលានយន្តហោះមួយនេះ ដើម្បីជំរុញទៅអាជ្ញាធរនិងក្រុមហ៊ុនដោះស្រាយសំណងផលប៉ះពាល់ដីធ្លីជូនពួកគេ។
ការព្រមានដើរហែក្បួននិងបិទផ្លូវពីសំណាក់ប្រជាពលរដ្ឋនេះធ្វើឡើង ខណៈពួកគេប្រហែល១០០នាក់មកពីឃុំបឹងខ្យាង ឃុំព្រែកស្លែង និងឃុំពត់ស បានប្រមូលផ្តុំគ្នាឈរលើកបដាតវ៉ានៅកន្លែងដីមានជម្លោះ នៅថ្ងៃទី១០ ខែមិថុនានេះ ដើម្បីទាមទារទៅក្រុមហ៊ុនឱ្យផ្តល់សំណងខូចខាតស្រូវដែលក្រុមហ៊ុនបានឈូសឆាយកាលពីពាក់កណ្តាលខែឧសភា និងទាមទារដោះស្រាយដីធ្លីរបស់ប្រជាពលរដ្ឋទាំងអស់ដែលកំពុងរងផលប៉ះពាល់។
ពលរដ្ឋឃុំបឹងខ្យាងមួយរូប អ្នកស្រី ឡុញ វណ្ណា អាយុ៣៨ឆ្នាំ ដែលអះអាងថា បានប៉ះពាល់ដី៧៦អា ប្រាប់អ្នកសារព័ត៌មាននៅកន្លែងតវ៉ាថា កាលពីថ្ងៃទី១៤ ខែឧសភា ក្រុមហ៊ុនបានដាក់គ្រឿងចក្រឈូសឆាយដីស្រែពង្រោះរបស់ពួកគាត់អស់១ហិកតាកន្លះ ស្ថិតនៅភូមិកំពង់តាឡុង ឃុំបឹងខ្យាង ដោយមិនបានដោះស្រាយសំណងជូនពលរដ្ឋឡើយ។ អ្នកស្រីថា ដីធ្លីរបស់ប្រជាពលរដ្ឋប៉ះពាល់ក្រោមគម្រោងអភិវឌ្ឍន៍ព្រលានយន្តហោះនោះ គឺអាជ្ញាធរនៅតែរក្សាជំហរផ្តល់សំណងត្រឹមតែ៨ដុល្លារក្នុង១ម៉ែត្រការ៉េដដែល។
អ្នកស្រី ឡុញ វណ្ណា ឱ្យដឹងទៀតថា ប្រសិនបើពុំមានការដោះស្រាយសំណងខូចខាតស្រូវនិងផលប៉ះពាល់ដីធ្លីទេ នៅថ្ងៃអាទិត្យសប្តាហ៍នេះ ពួកគាត់នឹងធ្វើយុទ្ធនាការដើរហែក្បួនក្នុងសហគមន៍។ ហើយអាទិត្យសប្តាហ៍បន្ទាប់ នឹងនាំគ្នាបិទផ្លូវចេញចូលការដ្ឋានសាងសង់ព្រលានយន្តហោះថ្មីនេះតែម្តង ដើម្បីជំរុញឱ្យមានដំណោះស្រាយ។
អ្នកស្រីបន្ថែមថា៖ «អ៊ីចឹងសុំឱ្យក្រុមហ៊ុនចេញមុខដោះស្រាយផលប៉ះពាល់ស្រូវនេះផង។ ហើយសុំឱ្យសម្តេច ហ៊ុន សែន ជួយដោះស្រាយផលប៉ះពាល់ដីធ្លីជូនបងប្អូនយើងនៅក្នុងសង្គមទាំងអស់ផង ព្រោះថា ដីរបស់ពួកខ្ញុំនេះមានប្លង់រឹងត្រឹមត្រូវ»។
ពលរដ្ឋម្នាក់ទៀត អ្នកស្រី អ៊ុន សឿន អាយុ៦៩ឆ្នាំ ដែលរងផលប៉ះពាល់ដីស្រែ៣០អា និយាយថា កាលពីមិនទាន់មានគម្រោងអភិវឌ្ឍន៍ព្រលានយន្តហោះ ដី៣០អានេះ អ្នកស្រីអាចបង្កបង្កើនផលបាន៣ដងក្នុងមួយឆ្នាំសម្រាប់ចិញ្ចឹមគ្រួសារ ប៉ុន្តែចាប់តាំងពីមានការអភិវឌ្ឍព្រលានយន្តហោះមក អាជ្ញាធរបានហាមមិនឱ្យចូលបង្កបង្កើនផលទៀតឡើយ។
អ្នកស្រី អ៊ុន សឿន ថាការពន្យារពេលមិនព្រមដោះស្រាយសំណងផលប៉ះពាល់ និងការហាមមិនឱ្យប្រជាពលរដ្ឋចូលបង្កបង្កើនផលលើដីស្រែរបស់ខ្លួនឯងនេះ បានធ្វើឱ្យគ្រួសារអ្នកស្រីជួបបញ្ហាជីវភាពជាខ្លាំង។
អ្នកស្រីបន្ថែមថា៖ «រដ្ឋត្រូវការដីកន្លែងនេះដើម្បីអភិវឌ្ឍធ្វើព្រលានហើយ អ៊ីចឹងក្នុងដំណោះស្រាយ គាត់ត្រូវដោះស្រាយផលប៉ះពាល់ជូនប្រជាពលរដ្ឋឱ្យបានសមរម្យ មានជីវភាពរស់នៅដោយសុខស្រួលផង។ ចុះបើអភិវឌ្ឍន៍ធ្វើឱ្យកូនចៅទឹកភ្នែកហូររាល់ថ្ងៃ តាំងពីអត់ដីធ្វើមក គឺមិនមានពេលដេកលក់ស្រួលទេ ពីព្រោះវាវេទនាខ្លាំងពេក។ អ្នកខ្លះមានកូន៥ទៅ៦នាក់ ដល់ពេលអត់មានដីសម្រាប់បង្កបង្កើនផល អ៊ីចឹងគ្នាបានអីហូប»។
មានវ័យ៧១ឆ្នាំ ពលរដ្ឋម្នាក់ទៀត លោក គង ឃន និយាយថា ប្រជាពលរដ្ឋមិនជំទាស់នឹងគម្រោងអភិវឌ្ឍន៍របស់រដ្ឋាភិបាលនោះទេ ប៉ុន្តែពួកគាត់សុំឱ្យមានការដោះស្រាយសំណងសមរម្យឬទៅតាមតម្លៃទីផ្សារបច្ចុប្បន្ន។
អភិបាលខេត្តកណ្តាល លោក គង់ សុភ័ណ្ឌ បានទទូចសុំកុំឱ្យប្រជាពលរដ្ឋធ្វើសកម្មភាពដើរហែក្បួននិងបិទផ្លូវ ដោយថា វាធ្វើឱ្យប៉ះពាល់ដល់សណ្តាប់ធ្នាប់សាធារណៈដែលប្រឈមនឹងផ្លូវច្បាប់។
អភិបាលខេត្តរូបនេះ បន្តថា ដំណោះស្រាយសម្រាប់ការអភិវឌ្ឍជំហានដំបូងនេះ គឺមានជម្រើសពីរ ដោយទី១ តម្លៃសំណងក្នុង១ម៉ែត្រការ៉េ ៨ដុល្លារដដែល និងទី២ ដោះដូរដីកន្លែងផ្សេង ហើយអាជ្ញាធរនឹងខិតខំសម្របសម្រួលដោះស្រាយបន្ថែមទៀត។
លោកបន្ថែមថា៖ «បើបងប្អូនបិទផ្លូវ បងប្អូនបានធ្វើខុសហើយ! ហើយបងប្អូនធ្វើខុស យើងមានតែអនុវត្តវិធានការច្បាប់ប៉ុណ្ណឹងទេ ពីព្រោះប្រទេសមានច្បាប់។ គាត់តវ៉ានេះ យើងបានលួងលោមគាត់ និយាយហេតុផលប្រាប់គាត់ ហើយបានដូរដីទៅតាមរដ្ឋាភិបាលកំណត់ជូនគាត់ហើយ បើគាត់នៅតែមិនព្រមទៀត ចាំជជែកគ្នាតាមនីតិវិធីបន្តទៀតទៅ»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទិ្ធមនុស្សកម្ពុជា លោក វណ្ណ សុផាត មានប្រសាសន៍ថា តាមច្បាប់ជាតិនិងអន្តរជាតិ រាល់គម្រោងអភិវឌ្ឍន៍នានា រដ្ឋាភិបាលត្រូវតែបានពិភាក្សាជាមួយប្រជាពលរដ្ឋឱ្យគ្រប់ជ្រុងជ្រោយអំពីផលប៉ះពាល់និងបញ្ហាសំណងផ្សេងៗ ហើយរដ្ឋត្រូវដោះស្រាយសំណងផលប៉ះពាល់ជូនពលរដ្ឋឱ្យបានសមរម្យដែលអាចទទួលយកបាន។
មន្ត្រីសិទ្ធិមនុស្សរូបនេះបន្តថា ប្រសិនបើក្រុមហ៊ុននិងរដ្ឋាភិបាលមិនបានដោះស្រាយសំណងផលប៉ះពាល់ជូនពលរដ្ឋត្រឹមត្រូវទេ នឹងនាំឱ្យប្រជាពលរដ្ឋមិនពេញចិត្តចំពោះគម្រោងអភិវឌ្ឍន៍នោះ ហើយពួកគេនឹងធ្វើការតវ៉ាផ្សេងៗផងដែរ៕
