ក្រសួងមហាផ្ទៃ ដាក់ចេញវិធានការទប់ស្កាត់ការឆ្លងរាលដាលជំងឺកូវីដ-១៩ នៅតាមមណ្ឌលអប់រំកែប្រែនិងពន្ធនាគារតាមរាជធានី-ខេត្ត ក្រោយរកឃើញជំងឺមួយនេះបានឆ្លងដល់មន្ត្រីអនុរក្សពន្ធនាគារនិងអ្នកជាប់ឃុំមួយចំនួន។
នៅក្នុងសេចក្តីណែនាំរបស់ក្រសួងមហាផ្ទៃ ចុះថ្ងៃទី៩ ខែមិថុនា ឆ្នាំ២០២១ ក្រសួងមហាផ្ទៃបានលើកឡើងថា បច្ចុប្បន្នជំងឺកូវីដ-១៩ បាននិងកំពុងឆ្លងចូលក្នុងមណ្ឌលអប់រំកែប្រែនិងពន្ធនាគាររាជធានី-ខេត្តមួយចំនួន តាមរយៈការរកឃើញវិជ្ជមានលើមន្ត្រីអនុរក្សពន្ធនាគារនិងអ្នកជាប់ឃុំ។
ករណីនេះ ក្រសួងប្រាប់ទៅអភិបាលរាជធានី-ខេត្តឱ្យយកចិត្តទុកដាក់សម្របសម្រួលជាមួយមន្ទីរសុខាភិបាលនិងស្ថាប័នពាក់ព័ន្ធផ្សេងទៀត ផ្តល់ការគាំទ្រដល់អគ្គនាយកដ្ឋានពន្ធនាគារនិងមណ្ឌលអប់រំកែប្រែដែលរកឃើញវិជ្ជមានជំងឺកូវីដ-១៩ ដោយធ្វើការចាត់ចែងព្យាបាលអ្នកជំងឺ រួមទាំងពង្រឹងការអនុវត្តវិធានការសុខាភិបាលនៅតាមមណ្ឌលអប់រំកែប្រែនិងពន្ធនាគារ ដើម្បីទប់ស្កាត់ការឆ្លងរាលដាលបន្ថែមទៀត។
សេចក្តីណែនាំដដែលនេះបន្ថែមថា ចំពោះមណ្ឌលអប់រំកែប្រែនិងពន្ធនាគារខេត្តដែលមិនទាន់ឆ្លងជំងឺកូវីដ-១៩ ត្រូវពង្រឹងការអនុវត្តវិធានការសុខាភិបាល ការធ្វើអនាម័យជាប្រចាំនៅតាមទីកន្លែងបំពេញការងារ និងតាមបន្ទប់ឃុំឃាំងនានា ដោយពាក់ម៉ាស់ លាងសម្អាតដៃដោយសាប៊ូ ទឹកអាល់កុល ឬជែល ការវាស់កម្ដៅលើមន្ត្រីអនុរក្សពន្ធនាគារនិងអ្នកជាប់ឃុំ រួមទាំងពិនិត្យសុខភាពមុនអនុញ្ញាតឱ្យចេញចូលពន្ធនាគារ ជាដើម។
ក្រសួងមហាផ្ទៃ ក៏ជំរុញឱ្យបង្កើនការយកចិត្តទុកដាក់ដល់ការរក្សាសន្តិសុខនិងសុវត្ថិភាពនៅតាមមណ្ឌលអប់រំកែប្រែនិងពន្ធនាគារទាំងអស់ឱ្យបានល្អប្រសើរផងដែរ ហើយថា ក្នុងករណីមានការឆ្លងជំងឺកូវីដ-១៩ នៅមណ្ឌលអប់រំកែប្រែឬពន្ធនាគារណាមួយនោះ អភិបាលរាជធានី-ខេត្តត្រូវសហការជួយធ្វើអន្តរាគមន៍ឆ្លើយតបនិងត្រូវរាយការណ៍ជាបន្ទាន់ទៅក្រសួងមហាផ្ទៃ។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានបដិសេធឆ្លើយតបបន្ថែម ដោយប្រាប់ថាជាប់រវល់។
អភិបាលខេត្តកោះកុង លោកស្រី មិថុនា ភូថង មានប្រសាសន៍ថា ពន្ធនាគារនៅខេត្តនេះពុំទាន់មានករណីឆ្លងជំងឺកូវីដ-១៩ នៅឡើយទេ។ លោកស្រីបន្ថែមថា កន្លងមក ទាំងអាជ្ញាធរខេត្តនិងមន្ត្រីពន្ធនាគារបានយកចិត្តទុកដាក់ខ្ពស់ ក្នុងការការពារនិងទប់ស្កាត់ការឆ្លងរាលដាលជំងឺកូវីដ-១៩ក្នុងពន្ធនាគារ តាមរយៈការអនុវត្តវិធានការការពាររបស់ក្រសួងសុខាភិបាល។
អភិបាលខេត្តរូបនេះបន្តថា រដ្ឋបាលខេត្តនឹងពង្រឹងការអនុវត្តទៅតាមការណែនាំរបស់ក្រសួងមហាផ្ទៃនេះបន្តទៀត ដើម្បីកុំឱ្យមានការឆ្លងដល់ពន្ធនាគារ។
លោកស្រីបន្ថែមថា៖ «យើងបានអនុវត្តយ៉ាងខ្ជាប់ខ្ជួននូវវិធានការការពាររបស់ក្រសួងសុខាភិបាល ដោយយើងបានត្រៀមសម្រាប់អ្នកចូលពន្ធនាគារថ្មី គឺយើងដាក់ឱ្យធ្វើចត្តាឡីស័ក។ ហើយយើងបានធ្វើតេស្តនិងត្រួតពិនិត្យបន្ថែមទៀតលើការអនុវត្តវិធានការការពាររបស់ពួកគាត់ និងយើងពង្រឹងកិច្ចការងារណាដែលនៅខ្វះចន្លោះ»។
អនុប្រធានអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ករណីក្រសួងមហាផ្ទៃប្រាប់ឱ្យអភិបាលរាជធានី-ខេត្ត ពង្រឹងការទប់ស្កាត់ការឆ្លងរាលដាលជំងឺកូវីដ-១៩ ចូលមណ្ឌលអប់រំកែប្រែនិងពន្ធនាគារនោះ គ្រាន់តែគោលការណ៍មួយប៉ុណ្ណោះ ប៉ុន្តែមិនអាចអនុវត្តបាននូវវិធានការការពាររបស់ក្រសួងសុខាភិបាលបានទេ ដោយសារតែភាពចង្អៀតណែនក្នុងពន្ធនាគារ។
មន្ត្រីសិទ្ធិមនុស្សរូបនេះបន្តថា សង្គមស៊ីវិលនៅតែមានការព្រួយបារម្ភពីការឆ្លងរាលដាលជំងឺកូវីដ-១៩ នៅតាមមណ្ឌលអប់រំកែប្រែនិងពន្ធនាគារ ដោយសារតែនៅក្នុងពន្ធនាគារមានភាពចង្អៀតណែន មិនអាចរក្សាគម្លាត អនាម័យ បរិស្ថាន ការបរិភោគ និងការប្រើប្រាស់ទឹកស្អាត ជាដើម។
លោកបន្ថែមថា៖ «អ៊ីចឹងវានៅតែមានហានិភ័យខ្ពស់! អ៊ីចឹងអ្វីដែលសំខាន់ ក្រៅពីឱ្យមន្ត្រីពង្រឹងការអនុវត្តវិធានការនូវការទប់ស្កាត់របស់ក្រសួងសុខាភិបាលហ្នឹង រដ្ឋាភិបាលត្រូវរិះរកមធ្យោបាយនិងវិធី ដើម្បីកាត់បន្ថយភាពចង្អៀតណែននៅក្នុងពន្ធនាគារ ដូចដែលអង្គការសង្គមស៊ីវិលធ្លាប់ផ្តល់អនុសាសន៍នៅពេលកន្លងមក គឺទាក់ទងនឹងមធ្យោបាយនិងវិធីសាស្ត្រ ដើម្បីដោះលែងទៅលើអ្នកជាប់ឃុំមួយចំនួន ដូចជា ការឱ្យនៅក្រៅឃុំបណ្តោះអាសន្ន ការពន្លឿននីតិវិធីក្នុងការកាត់សេចក្តី និងការដោះលែងអ្នកដែលជិតផុតទោស ជាដើម»។
កាលពីខែឧសភា ឆ្នាំ២០២១នេះ មន្រ្តីរដ្ឋាភិបាលកម្ពុជាឱ្យដឹងថា ពន្ធនាគារចំនួន៤ ក្នុងចំណោមពន្ធនាគារចំនួន២៨នៅទូទាំងប្រទេស មានផ្ទុះករណីឆ្លងជំងឺកូវីដ-១៩ ដោយផ្តើមដំបូងនៅដើមខែឧសភានេះ មានចំនួន៣៤ករណី នៅពន្ធនាគារខេត្តព្រះសីហនុ។ បន្ទាប់មក នៅថ្ងៃទី២០ ខែឧសភា ផ្ទុះ១៨ករណី នៅពន្ធនាគារព្រៃស រាជធានីភ្នំពេញ និងក្នុងចំនួនមិនជាក់លាក់នៅពន្ធនាគារ PJ រាជធានីភ្នំពេញ ខណៈពេលដែលពន្ធនាគារខេត្តកណ្តាល មានអ្នកឆ្លងកើនដល់ជាង៣០០នាក់ គិតចាប់តាំងពីថ្ងៃទី២៥ ខែឧសភាមក។ បើតាមមន្ត្រីរដ្ឋាភិបាលដដែល អ្នកជាប់ឃុំនៅក្នុងពន្ធនាគារទូទាំងប្រទេសមានប្រមាណ៤០ ០០០នាក់៕
