ពលរដ្ឋដែលជាអ្នកវិនិយោគជាមួយក្រុមហ៊ុន GoldFX Investment រាប់សិបនាក់បានជួបជុំគ្នាមុខស្នាក់ការក្រុមហ៊ុនក្នុងខណ្ឌទួលគោក រាជធានីភ្នំពេញ ជាថ្មីម្តងទៀត នៅព្រឹកថ្ងៃទី៩ ខែមិថុនានេះ ដើម្បីដាក់ញត្តិបដិសេធមិនចូលរួមប្តឹងជនទី៣ជាមួយក្រុមហ៊ុន ខណៈពួកគេថាបញ្ហានេះគឺជាការទទួលខុសត្រូវរបស់ក្រុមហ៊ុនទាំងស្រុង។
កាលពីថ្ងៃទី៣១ ខែឧសភា អ្នកវិនិយោគប្រមាណ៦០នាក់បានប្រមូលគ្នាតវ៉ានៅមុខសាខាក្រុមហ៊ុនម្តងរួចមកហើយ ដើម្បីទាមទារឱ្យក្រុមហ៊ុនទទួលខុសត្រូវសងប្រាក់ដើមរបស់ពួកគេដែលបានបាត់ បន្ទាប់ពីរង់ចាំដំណោះស្រាយសមស្របពីក្រុមហ៊ុនអស់រយៈពេល២ខែ។
ពលរដ្ឋម្នាក់ដែលបានដាក់លុយវិនិយោគចំនួនជាង៨ម៉ឺនដុល្លារ បានប្រាប់ វីអូឌី ក្នុងលក្ខខណ្ឌសុំមិនបញ្ចេញឈ្មោះថា ពួកគេប្រមាណ៧០នាក់បានយកញត្តិបង្ហាញពីជំហរបដិសេធមិនចូលរួមប្តឹងជនទី៣តាមការស្នើរបស់ក្រុមហ៊ុនឡើយ។ លោកបន្ថែមថា ពួកគេមួយចំនួនបន្តទៅក្រសួងសេដ្ឋកិច្ច និងហិរញ្ញវត្ថុ ដើម្បីស្នើសុំកិច្ចអន្តរាគមន៍ពីក្រសួង ចំពោះញត្តិដែលពួកគេបានដាក់កាលថ្ងៃម្សិលមិញ។
លើសពីនេះ ពួកគាត់ក៏បានស្នើសុំអន្តរាគមន៍ពីខុទ្ទកាល័យលោកនាយករដ្ឋមន្រ្តី ហ៊ុន សែន ហើយថា លោកនាយករដ្ឋមន្រ្តីបានចាត់តាំងលោក ដួង តារា ដើម្បីចូលរួមជួយសម្របសម្រួលដោះស្រាយទាមទារឱ្យក្រុមហ៊ុនទទួលខុសត្រូវលើប្រាក់ដែលបានបាត់បង់។
លោកថ្លែងថា៖ «ពួកខ្ញុំគ្រាន់តែទាមទារប្រាក់ដើមមកវិញ ឱ្យជួយអន្តរាគមន៍យកប្រាក់ដើមមកវិញ។ ព្រោះអីរឿងលុយហ្នឹងវាមិនត្រូវបាត់ទៅដោយងាយស្រួលទេបើសិនជាគ្មានស៊ីញ៉េពីប្រធានក្រុមហ៊ុនចេញទៅ មិនអាចបុគ្គលិកណាយកលុយរត់ទាំងលានបានទេ»។
អ្នកវិនិយោគម្នាក់ទៀត ឈ្មោះ ម៉ុម ពេជ្របញ្ញា ដែលបានចូលរួមដាក់ញត្តិផងនោះ បានឱ្យដឹងថា រយៈពេលជាង២ខែមកនេះ ក្រុមហ៊ុនមិនបានផ្តល់ដំណោះស្រាយសមរម្យណាមួយដែលអាចទទួលយកបាន ដើម្បីឱ្យពួកគេមានទំនុកចិត្តអាចយកប្រាក់វិនិយោគចំនួន៨ ០០០ដុល្លាររបស់លោកមកវិញនោះទេ។
និស្សិតវិស្វករផ្នែកគូសប្លង់រូបនេះបន្ថែមថា លោកសង្ឃឹមថា ក្រសួងសេដ្ឋកិច្ច និងហិរញ្ញវត្ថុ និងភាគីពាក់ព័ន្ធ អាចរកដំណោះស្រាយដល់ពួកគេបានឆាប់រហ័ស។
លោក ពេជ្របញ្ញា និយាយថា៖ «ដោយសារពួកខ្ញុំរង់ចាំយូរពេក គឺអត់មានដំណោះស្រាយល្អទេ។ សម័យកូវីដអ៊ីចឹងផង វាបាត់លុយអ៊ីចឹងទៀត អ៊ីចឹងវាធ្វើឱ្យអតិថិជនពិបាកខ្លាំង»។
អ្នកវិនិយោគមួយរូបទៀតប្រាប់ថាឈ្មោះ ម៉ិញ ដែលបានដាក់លុយចំនួន១០ ០០០ ដុល្លារដែលប្រមូលពីក្រុមគ្រួសារ លើកឡើងថា លោកនិងអ្នកវិនិយោគដទៃបានផ្តល់ទំនុកចិត្តខ្ពស់ចំពោះក្រុមហ៊ុន Gold FX ដោយសារក្រុមហ៊ុនមានអាជ្ញាបណ្ណ និងចុះបញ្ជីនៅក្រសួង ព្រមទាំងមានតំណាងមកពីគ្រួសារមន្រ្តីជាន់ខ្ពស់រដ្ឋាភិបាលទៀតផង។ យ៉ាងណា និស្សិតផ្នែកពាណិជ្ជកម្មរូបនេះបន្ថែមថា លោកនឹងបន្តចូលរួមតវ៉ាទាមទារយកប្រាក់ដើមមកវិញឱ្យទាល់តែបាន។
លោក ម៉ិញ និយាយថា៖ «គោលជំហររបស់យើង គឺនៅតែមកអ៊ីចឹងដដែល ធ្វើអ៊ីចឹងរហូត តាមបណ្តាញសង្គម មកផ្ទាល់ មកក្រុមហ៊ុន គឺតវ៉ារហូត! រហូតដល់បានដំណោះស្រាយពីខាងក្រុមហ៊ុន»។
អ្នកវិនិយោគម្នាក់ទៀត ឈ្មោះ យន់ សុផុល ដែលបានវិនិយោគលុយចំនួន៣ ០០០ដុល្លារនៅក្រុមហ៊ុន GoldFX នៅដើមខែមីនា ឆ្នាំ២០២០ ឱ្យដឹងថា គាត់មិនអាចចូលរួមប្តឹងជនទី៣ជាមួយក្រុមហ៊ុននោះទេ ដោយថា បញ្ហានេះគឺជាការទទួលខុសត្រូវរបស់ក្រុមហ៊ុនទាំងស្រុង។
អ្នកនាង យន់ សុផុល និយាយថា៖ «បញ្ហាអ្នកដែលគេកេងប្រវ័ញ្ច កិបកេងប្រមូលលុយទៅប៉ុន្មាននាក់ក៏ដោយ គឺជារឿងផ្ទៃក្នុងរបស់ក្រុមហ៊ុន។ អតិថិជនទាំងអស់គឺយកលុយមកវិនិយោគជាមួយក្រុមហ៊ុន គឺអត់ដែលស្គាល់បុគ្គលទាំងអស់ហ្នឹងទេ។ អ៊ីចឹងបញ្ហាទាំងអស់ហ្នឹងគឺជាទំនួលខុសត្រូវរបស់ក្រុមហ៊ុន»។
វីអូឌី មិនអាចទាក់ទងសុំការឆ្លើយតបពីតំណាងរបស់ក្រុមហ៊ុន GoldFX Investment បានទេ។ ដោយឡែក ជំនួយការផ្ទាល់លោកនាយករដ្ឋមន្រ្តី ហ៊ុន សែន លោក ដួង តារា ក៏មិនអាចរកការឆ្លើយតបបានឡើយដែរនៅថ្ងៃពុធនេះ ខណៈអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន ថ្លែងថា ក្រសួងនឹងពិនិត្យមើលសំណើក្នុងញត្តិរបស់ពលរដ្ឋដែលបានដាក់មកនោះ។
កាលពីថ្ងៃទី២ ខែមិថុនា ក្រុមហ៊ុន GoldFX បានចេញសេចក្តីប្រកាសព័ត៌មានមួយលើទំព័រ Facebook ឆ្លើយតបទៅនឹងការតវ៉ារបស់អតិថិជនអ្នកវិនិយោគទាមទាររកដំណោះស្រាយនៅមុខក្រុមហ៊ុន។ ក្នុងលិខិតនោះ ក្រុមហ៊ុនបានស្នើឱ្យអតិថិជនរងគ្រោះមានភាពអត់ធ្មត់រង់ចាំដំណោះស្រាយ ដែលធ្វើឡើងតាមនីតិវិធីតុលាការ ដោយប្តឹងទៅជនដែលបានធ្វើឱ្យបាត់លុយនោះ។
យ៉ាងណា វីអូឌី មិនអាចសុំការអធិប្បាយពីអ្នកនាំពាក្យអយ្យការអមសាលាដំបូងរាជធានីភ្នំពេញ លោក ប្លង់ សុផល បានទេ នៅថ្ងៃទី៩ ខែមិថុនានេះ ដោយលោកថា លោកមិនទាន់បានពិនិត្យមើលពាក្យបណ្តឹងរបស់ក្រុមហ៊ុននៅឡើយ៕
