តំណាងសហជីពណាហ្គាវើលដ៍ បានយកញត្តិជាមួយស្នាមមេដៃអ្នកគាំទ្រជាង២ ០០០នាក់ (២ ០៤៩នាក់) ទៅដាក់នៅក្រសួងការងារ នាព្រឹកថ្ងៃអង្គារនេះ ដើម្បីប្តឹងទាមទារឱ្យក្រុមហ៊ុនកាស៊ីណូមួយនេះបញ្ឈប់ការកាត់បុគ្គលិកជាង១ ០០០នាក់។
សហជីពណាហ្គាវើលដ៍ បានផ្តើមធ្វើយុទ្ធនាការប្រមូលស្នាមមេដៃគាំទ្រពីបុគ្គលិកណាហ្គាវើលដ៍ទាំង២សាខាកាលពីសប្តាហ៍មុន បន្ទាប់ពីការចរចាជាមួយក្រុមហ៊ុនជាច្រើនលើកបានបរាជ័យ។
អនុប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៅក្រុមហ៊ុនណាហ្គាវើលដ៍ អ្នកស្រី ឈុន សុខា ប្រាប់ វីអូឌី ក្រោយពីដាក់ញត្តិរួចថា គោលបំណងនៃការដាក់ញត្តិរបស់ពួកគេ ដើម្បីស្វែងរកកិច្ចអន្តរាគមន៍ពីក្រសួងការងារ ទាមទារឱ្យក្រុមហ៊ុន ណាហ្គាវើលដ៍ បញ្ឈប់ការកាត់បុគ្គលិកចំនួន១ ៣២៩នាក់ជាបន្ទាន់។
ថ្នាក់ដឹកនាំសហជីពដែលមានសមាជិកជាង៤ ០០០នាក់ តំណាងឱ្យបុគ្គលិកកម្មករខ្មែរជាង៨ ០០០នាក់រូបនេះ បន្ថែមថា សេចក្តីសម្រេចកាត់បុគ្គលិកដែលមានទាំងថ្នាក់ដឹកនាំនិងសកម្មជនសហជីពទាំងអស់នេះ ជាការរំលោភសិទ្ធិមនុស្សនិងសិទ្ធិការងារធ្ងន់ធ្ងរ ដែលទាមទារឱ្យភាគីពាក់ព័ន្ធចូលរួមដោះស្រាយ។
អ្នកស្រី ឈុន សុខា ថ្លែងថា៖ «រឿងដែលកើតហេតុនៅក្នុងក្រុមហ៊ុនណាហ្គាវើលដ៍នេះ មិនមែនជារឿងតូចតាចទេ ហើយជារឿងមួយដែលពាក់ព័ន្ធនឹងការចង់គាស់រំលើងនូវសំឡេងរបស់សហជីពមិនឱ្យមានដូចកាលនៅក្នុងឆ្នាំ២០០៩ កន្លងមក ក្រុមហ៊ុនណាហ្គាវើលដ៍ ធ្លាប់បានធ្វើសម្រេចម្តង។ អ៊ីចឹងមក២០២១នេះ ក្រុមហ៊ុនបានបញ្ឈប់ក្រុមថ្នាក់ដឹកនាំសហជីព ក៏ដូចជាសកម្មជនសហជីព មួយរចនាសម្ព័ន្ធ»។
ប្រភពដដែលសង្ឃឹមថា ក្រសួងការងារនឹងជួយអន្តរាគមន៍ដោះស្រាយទៅតាមនីតិវិធីច្បាប់ត្រឹមត្រូវនិងដោយតម្លាភាព ដើម្បីបញ្ឈប់ការរំលោភបំពានរបស់ថៅកែឬនិយោជកបរទេសមកលើបុគ្គលិកនិយោជិតខ្មែរ ហើយនិងអាចទទួលបានលទ្ធផលវិជ្ជមានបានឆាប់រហ័ស។
យោងតាមខ្លឹមសារញត្តិនោះ សហជីពបានទាមទារឱ្យក្រុមហ៊ុនទទួលបុគ្គលិកដែលខ្លួនបានផ្ញើសារបញ្ឈប់ជាង៦០០នាក់ឱ្យចូលធ្វើការវិញ ផ្តល់សំណងបញ្ចប់អតីតភាពការងារស្របតាមច្បាប់សម្រាប់បុគ្គលិកដែលយល់ព្រមលាឈប់ ព្រមទាំងបន្តផ្តល់ប្រាក់ដំណាច់រំឭកអតីតភាពការងារដល់បុគ្គលិកកំពុងបម្រើការងារ និងអនុវត្តវិធានសុខាភិបាលទប់ស្កាត់ជំងឺកូវីដ-១៩ នៅកន្លែងការងារឱ្យមានប្រសិទ្ធភាព។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ លើកឡើងថា ក្រសួងបានទទួលញត្តិពាក្យបណ្តឹងរបស់សហជីពរួចហើយ និងថាមន្រ្តីរបស់ក្រសួងនឹងដោះស្រាយវិវាទការងារនេះទៅតាមនីតិវិធីច្បាប់ដែលមានជាធរមានរបស់កម្ពុជា។
លោកបន្ថែមថា៖ «យោងតាមច្បាប់ ក្រុមហ៊ុន សហគ្រាស មានសិទ្ធិក្នុងការពង្រីកឬបន្ថយបុគ្គលិករបស់ខ្លួន អាស្រ័យលើស្ថានភាពសេដ្ឋកិច្ចរបស់ខ្លួន។ អ្វីដែលច្បាប់ចង គឺត្រូវបញ្ឈប់ដោយស្របតាមនីតិវិធី និងទូទាត់សំណងត្រឹមត្រូវតាមច្បាប់ឬតាមការស្រុះស្រួលគ្នា»។
វីអូឌី មិនអាចទាក់ទងសុំការឆ្លើយតបពីប្រធានប្រតិបត្តិបុគ្គលិកក្រុមហ៊ុនណាហ្គាវើលដ៍ លោក Mike Ngai បានទេនៅថ្ងៃទី៨ ខែមិថុនា ឆ្នាំ២០២១នេះ។
យ៉ាងណា ក្រុមហ៊ុនមេរបស់ NagaWorld ដែលបានចុះបញ្ជីនៅហុងកុងឈ្មោះ NagaCorp បានជូនដំណឹងដល់ម្ចាស់ភាគហ៊ុនជាលើកដំបូងនៅថ្ងៃចន្ទម្សិលមិញ ពីកម្មវិធីកាត់បន្ថយការចំណាយរបស់ខ្លួនដែលថា «នឹងប៉ះទង្គិចដល់បុគ្គលិកមួយចំនួន»។
បើតាមសេចក្តីប្រកាសលើគេហទំព័រក្រុមហ៊ុនដដែល ឱ្យដឹងថា ក្រុមហ៊ុនមិនបានបញ្ជាក់ថា បុគ្គលិកចំនួនប៉ុន្មាននាក់ត្រូវជម្រុះចេញនោះទេ ដោយថា មានបុគ្គលិក«ក្នុងចំនួនភាគច្រើន»បានយល់ព្រមទទួលយកកញ្ចប់ប្រាក់សំណង ដើម្បីបញ្ចប់កិច្ចសន្យាការងារជាមួយក្រុមហ៊ុន។
ក្រុមហ៊ុនក៏បានបន្ថែមថា ខ្លួនក៏នឹងបញ្ចេញកញ្ចប់កម្ចីបន្ថែមចំនួន២០០លានដុល្លារ ដើម្បីបង្កើតទុនបម្រុងសម្រាប់ប្រើប្រាស់ក្នុងប្រតិបត្តិការ។
ដោយឡែក NagaCorp បានលើកឡើងកន្លងមកថា ពួកគេមិនបានបញ្ឈប់បុគ្គលិកណាម្នាក់នៅឆ្នាំ២០២០ទេ ក្នុងនាមជាម្ចាស់អាជីវកម្មដែលមានភាពទទួលខុសត្រូវមួយ។
ក្នុងរបាយការណ៍ប្រចាំឆ្នាំដដែល ក្រុមហ៊ុនបន្ថែមថា ពួកគេបានជួលបុគ្គលិក៨ ៣៧១នាក់ ដែលភាគច្រើននៅក្នុងប្រទេសកម្ពុជា និងត្រូវចំណាយលើប្រាក់ខែសរុប១០៥លានដុល្លារ រាប់ទាំងការចំណាយលើក្រុមនាយកក្រុមហ៊ុន២៨លានដុល្លារ៕