ក្រុមអ្នកឃ្លាំមើល ជំរុញឱ្យតុលាការនិងអាជ្ញាធរពាក់ព័ន្ធបើកការស៊ើបអង្កេតទីតាំងសិប្បកម្មឈើមួយកន្លែងនៅស្រុកត្បែងមានជ័យ ខេត្តព្រះវិហារ ក្រោយមានការចាប់ឃុំខ្លួនអ្នកសារព័ត៌មានចំនួន៨នាក់ ពីបទ«គំរាមទារប្រាក់»ពីម្ចាស់សិប្បកម្មនោះ។
អ្នកសារព័ត៌មានចំនួន៨នាក់ ក្នុងនោះមានទាំងស្ត្រី២នាក់ផង ត្រូវបានសមត្ថកិច្ចស្រុកត្បែងមានជ័យចាប់ខ្លួនកាលពីថ្ងៃសុក្រ ដោយចោទពីបទ«កំហែងយក» បន្ទាប់ពីពួកគេរងការចោទថាបានជំរិតទារប្រាក់ក្នុងម្នាក់ចំនួន១០០ដុល្លារ ពីម្ចាស់សិប្បកម្មឈើមួយកន្លែងនៅចំណុចអូរទីទុយ ភូមិក្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ។
អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះវិហារ លោក ឡោ ចាន់ មានប្រសាសន៍នៅថ្ងៃចន្ទនេះថា អ្នកសារព័ត៌មានទាំង៨រូបនេះត្រូវបានព្រះរាជអាជ្ញារងសាលាដំបូងខេត្ត លោក គឹម សំលេង ដឹកនាំកម្លាំងចុះចាប់ដោយផ្ទាល់ តាមបណ្តឹងរបស់ម្ចាស់សិប្បកម្មឈើមួយកន្លែងនៅឃុំក្រាំងដូង។
លោកបានរៀបរាប់ពីដើមចមនៃការចាប់ខ្លួនអ្នកសារព័ត៌មានទាំងនោះថា ដំបូងឡើយ មានអ្នកសារព័ត៌មានមកពីអង្គភាពចំនួន៤ទៀតបានទៅជួបម្ចាស់សិប្បកម្មឈើមួយកន្លែង ហើយបានត្រឡប់ចេញទៅវិញក្រោយពីម្ចាស់សិប្បកម្មឈើនោះ ផ្តល់លុយក្នុងម្នាក់១៥០ ០០០រៀល ។
លោកបន្តថា ក្រោយពីអ្នកសារព័ត៌មានមកពីអង្គភាពទាំង៤នោះត្រឡប់ទៅវិញ អ្នកសារព័ត៌មានចំនួន៨នាក់នេះក៏បាននាំគ្នាទៅដល់សិប្បកម្មឈើនោះដែរ ហើយបានទារប្រាក់ពីម្ចាស់សិប្បកម្មឈើនោះ ក្នុងម្នាក់១០០ដុល្លារ តែម្ចាស់សិប្បកម្មមិនព្រម ដោយសុំផ្តល់ឱ្យត្រឹមតែ២០០ ០០០រៀលក្នុងម្នាក់។ លោកបន្តថា ដោយសារការចរចាតម្លៃមិនត្រូវគ្នា ទើបម្ចាស់សិប្បកម្មនោះដាក់ពាក្យប្តឹង ដែលឈានដល់ការចាប់ខ្លួនអ្នកសារព័ត៌មានទាំង៨នាក់នោះតែម្តង។
ទោះយ៉ាងណា លោក ឡោ ចាន់ ចង់ឃើញស្ថាប័នពាក់ព័ន្ធរកការពិតឱ្យឃើញ ថាហេតុអ្វីបានជាម្ចាស់សិប្បកម្មឈើមួយនេះផ្តល់លុយទៅអ្នកឱ្យអ្នកសារព័ត៌មានទាំងនោះ។
លោកថា៖ «ចុះបើអ្នកឯងអត់មានបទល្មើស ហេតុអ្វីបានអ្នកឯងចាំបាច់ឱ្យលុយគេ? ហើយថា បើម្នាក់៥០ដុល្លារ ៨នាក់ វាអស់៤០០ដុល្លារ! អាមុន៦០០ ០០០រៀល ផ្សេង៤នាក់ហើយ! អានេះ ៤០០ដុល្លារទៀត! វាឡើងប៉ុន្មានហើយ? គាត់សុខចិត្តចំណាយលុយលានៗធ្វើអីបើគាត់មិនខុសផងហ្នឹង! ដូចខ្ញុំអ៊ីចឹង អាណាមកសុំៗទៅ បើខ្ញុំមិនឱ្យ ចុះផ្សាយអីចុះទៅ»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី មានប្រសាសន៍ថា ជារឿយៗ អ្នកសារព័ត៌មានពេលចុះទៅដល់កន្លែងបទល្មើសឬរាយការណ៍ពីបទល្មើស ពួកគេភាគច្រើនត្រូវរងការចោទប្រកាន់។ ករណីនេះ លោកជំរុញឱ្យមានការស៊ើបអង្កេតជាក់លាក់មួយទៅលើសិប្បកម្មឈើនោះ ដើម្បីធានាតម្លាភាពសង្គម។
លោកថា៖ «យើងក៏ទទូចឱ្យសមត្ថកិច្ចធ្វើការតាមដាននិងស៊ើបអង្កេតឱ្យបានច្បាស់លាស់។ ហើយជាពិសេសទៅទៀត ប្រសិនបើការចូលទៅរបស់អ្នកសារព័ត៌មាន វាអាចថាមានពន្លឺនៅក្នុងការស៊ើបអង្កេតហ្នឹង អ៊ីចឹងអ្នកសារព័ត៌មានទាំងអស់ហ្នឹង វាគួរតែត្រូវបានដោះលែង»។
ប្រធានប្រចាំបញ្ជា និងជាអនុប្រធានប្រតិកម្មរហ័សនៃស្នងការដ្ឋាននគរបាលខេត្តព្រះវិហារ លោក ហុក ហេង អះអាងថា នគរបាលស្រុកត្បែងមានជ័យ មិនបានចោទប្រកាន់អ្នកកាសែតដែលត្រូវបានចាប់ខ្លួនទាំងនោះទេ ដោយពួកគេគ្រាន់តែសហការជាមួយតុលាការប៉ុណ្ណោះ។
លោកថា៖ «តុលាការជាអ្នកដឹកនាំបញ្ជា ប៉ូលិសស្រុកត្បែងមានជ័យគ្រាន់តែសហការទេ»។
វីអូឌី មិនអាចទាក់ទងសុំការបញ្ជាក់ពីតំណាងសិប្បកម្មឈើនៅភូមិក្រាំងដូង លោក ហ៊ឹម ឆេងហ៊ាន និងព្រះរាជអាជ្ញារងអមសាលាដំបូងខេត្តព្រះវិហារ លោក គឹម សំលេង ដែលដឹកនាំកម្លាំងចុះអនុវត្តច្បាប់ បានទេ នៅថ្ងៃនេះ។
ប៉ុន្តែអ្នកនាំពាក្យសាលាដំបូងខេត្តព្រះវិហារ លោកស្រី ជុំ កន្នីយ៉ា និយាយថា អ្នកសារព័ត៌មានទាំង៨នាក់នោះត្រូវបានចៅក្រមបង្គាប់ឱ្យឃុំខ្លួនបណ្តោះអាសន្ននៅពន្ធនាគារហើយ កាលពីថ្ងៃអាទិត្យ ក្រោមបទចោទ «កំហែងទារប្រាក់»។
ប៉ុន្តែនៅពេលសួរថា តើតុលាការនឹងស៊ើបអង្កេតករណីម្ចាស់សិប្បកម្មឈើនោះឬយ៉ាងណា? លោកស្រីអះអាងថា មិនទាន់ទទួលបានព័ត៌មាននេះពីចៅក្រមនៅឡើយទេ។
លោកស្រីថា៖ «ខ្ញុំអត់បានស៊ីជម្រៅរឿងអង្កេតការងាររបស់ចៅក្រមទេ ដោយសារខ្ញុំគ្រាន់តែជាអ្នកនាំពាក្យដែលថា [អ្នកកាសែតដែលចាប់ខ្លួន] ចូលពីថ្ងៃទី៥ ឃុំទាំងអស់ឬយ៉ាងម៉េច! គាត់ថាឃុំទាំងអស់»។
អ្នកនាំពាក្យក្រសួងព័ត៌មាន លោក មាស សុភ័ណ្ឌ ថ្លែងថា ក្រសួងមិនទាន់មានកិច្ចអន្តរាគមន៍ណាមួយទៅលើករណីចាប់ឃុំខ្លួនអ្នកសារព័ត៌មានទាំង៨នាក់នោះនៅឡើយទេ ដោយថា ទុកឱ្យសមត្ថកិច្ចជាអ្នកធ្វើការសិន។
កាលពីដើមឆ្នាំនេះ ស្ថាប័នចំនួន៤ រួមមាន សម្ព័ន្ធអ្នកសារព័ត៌មានកម្ពុជា (ខេមបូចា) មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ក្លឹបអ្នកសារព័ត៌មានបរទេសនៃកម្ពុជា និងសហព័ន្ធអ្នកសារព័ត៌មានអន្តរជាតិ បានកត់សម្គាល់ឃើញថា ចាប់ពីខែមករា ដល់ខែតុលា ឆ្នាំ២០២០ អ្នកសារព័ត៌មានចំនួន៥៩នាក់ បានទទួលរងនូវការធ្វើទុក្ខបុកម្នេញក្នុងរូបភាពផ្សេងៗ រួមមាន ការប្រើអំពើហិង្សា ការចាប់ខ្លួន និងការរងបណ្តឹងពីតុលាការ ក្នុងនោះ មានអ្នកសារព័ត៌មានចំនួន២៧នាក់ត្រូវបានចាប់ខ្លួន ៧នាក់ជាជនរងគ្រោះនៃការប្រើអំពើហិង្សា និងម្នាក់បានស្លាប់។
នៅខែវិច្ឆិកា ឆ្នាំ២០២០ សង្គមស៊ីវិលក្នុងស្រុកចំនួន៥៧ស្ថាប័ន បានអំពាវនាវឱ្យបញ្ឈប់ការយាយីទៅលើអ្នកសារព័ត៌មានគ្រប់រូបភាព រួមទាំងការគំរាមកំហែងដោយពាក្យសម្ដី ការប្រើប្រាស់ហិង្សា ការប្រើប្រាស់ប្រព័ន្ធតុលាការចោទប្រកាន់ជាដើម៕
