តុលាការសាលាដំបូងខេត្តកំពត កំពុងធ្វើការសាកសួរនិងបន្តស៊ើបអង្កេតលើជនសង្ស័យ២នាក់ ពាក់ព័ន្ធនឹងករណីឈូសឆាយនិងកាប់ឆ្ការដីព្រៃសហគមន៍ភ្នំពោន នៅស្រុកដំណាក់ចង្អើរ យកធ្វើជាកម្មសិទ្ធិផ្ទាល់ខ្លួន។
ការសាកសួរនេះ ធ្វើឡើងបន្ទាប់ពីស្នងការរងទទួលផែនការិយាល័យនគរបាលសេដ្ឋកិច្ច ខេត្តកែប លោក ង៉ែត ទូច បានបញ្ជូនជនសង្ស័យ២នាក់ រួមមាន ឈ្មោះ អេង ឃុយ អាយុ៤៩ឆ្នាំ និងឈ្មោះ សូរ ផល អាយុ៤៨ឆ្នាំ ទៅសាលាដំបូងខេត្តកំពត កាលពីថ្ងៃម្សិលមិញ ពាក់ព័ន្ធនឹងករណីឈូសឆាយនិងកាប់ឆ្ការដីព្រៃសហគមន៍ភ្នំពោន ខណៈមនុស្ស១៦នាក់ទៀត ជាអ្នកស៊ីឈ្នួលកាប់ឆ្ការព្រៃ ត្រូវបានអាជ្ញាធរអប់រំនិងឱ្យធ្វើកិច្ចសន្យា ហើយបានអនុញ្ញាតឱ្យត្រឡប់ទៅផ្ទះវិញ ។
ព្រះរាជអាជ្ញារងអមសាលាដំបូងខេត្តកំពត លោក ខា ដែនណា ប្រាប់ វីអូឌី នៅថ្ងៃចន្ទនេះថា ជនសង្ស័យទាំង២នាក់នោះ ត្រូវបានសមត្ថកិច្ចបញ្ជូនទៅតុលាការ កាលពីថ្ងៃម្សិលមិញ ហើយតំណាងអយ្យការកំពុងបន្តពិនិត្យនិងធ្វើការស៊ើបអង្កេតបន្ថែមទៀតរហូតមកដល់ថ្ងៃនេះ ដោយសារសំណុំរឿងនោះមានភាពស្មុគស្មាញច្រើន។
លោកមានប្រសាសន៍ថា៖ «តំណាងអយ្យការនឹងធ្វើការស៊ើបអង្កេតបន្ដលើជនពាក់ព័ន្ធក្នុងករណីនេះ តំណាងអយ្យការកំពុងពិនិត្យសំណុំរឿងនិងស៊ើបអង្កេតបន្ដ។ ដូច្នេះ មិនទាន់អាចបញ្ជាក់រយៈពេលចប់ជូនបានទេ ដោយអាស្រ័យលើភាពស្មុគស្មាញនៃការស៊ើបអង្កេត»។
អ្នកនាំពាក្យរដ្ឋបាលខេត្តកែប លោក វ៉ៅ សុខា មានប្រសាសន៍ថា ដើមចមដែលនាំឱ្យសមត្ថកិច្ចឃាត់ខ្លួនមនុស្ស២នាក់ បញ្ជូនទៅតុលាការ និង១៦នាក់ទៀតឱ្យធ្វើកិច្ចសន្យានិងឱ្យត្រឡប់ទៅផ្ទះវិញនោះ ដោយសារពួកគេកាប់ឆ្ការដីព្រៃសហគមន៍ភ្នំពោន ក្នុងស្រុកដំណាក់ចង្អើរ ខេត្តកំពត ដើម្បីយកធ្វើជាកម្មសិទ្ធិដោយខុសច្បាប់។
លោមានប្រសាសន៍ថា៖ «ទាំងអស់១៨នាក់! ហើយ១៦នាក់យើងហៅមកធ្វើការអប់រំណែនាំ ហើយដោះលែងគាត់វិញ។ នៅ២នាក់ ប្រហែលជាមេខ្លោងហើយ ប្រហែលជាមេការរបស់គាត់ [២នាក់ត្រូវបញ្ជូនទៅតុលាការ] ដីហ្នឹងមិនមានម្ចាស់ទេ ដីហ្នឹងគាត់មានបណ្ណចុះបញ្ជីបទបញ្ជា០១នៅខាងក្រោម ហើយគាត់ទៅរំលោភបំពានថែមទៅលើទៀត»។
អ្នកនាំពាក្យរូបនោះបញ្ជាក់ថា កន្លងមក ជនសង្ស័យធ្លាប់បានទៅកាប់ឆ្ការដីព្រៃនៅទីនោះម្តងរួចមកហើយ ដោយកាប់ឆ្ការបានដីជិត៥ហិកតា។ លោកបន្តថា ក្រោយមកទៀត ពួកគេបានបន្តកាប់ឆ្ការព្រៃបន្ថែមទៀត នៅថ្ងៃទី៤ ខែមិថុនា ឆ្នាំ២០២១ ទើបសមត្ថកិច្ចចុះទៅបង្ក្រាបនិងឃាត់ខ្លួនបញ្ជូនទៅតុលាការ កាលពីថ្ងៃទី៦ ខែមិថុនា ឆ្នាំ២០២១ ដើម្បីចាត់វិធានការច្បាប់។
មន្ត្រីឃ្លាំមើលសិទ្ធិមនុស្សនៃអង្គការការពារសិទ្ធិមនុស្សលីកាដូប្រចាំខេត្តកែប លោក អ៊ុក សុវណ្ណចាន់ថន គាំទ្រអាជ្ញាធរដែលមានវិធានការច្បាប់លើជនសង្ស័យដែលកាប់ឆ្ការរំលោភយកដីព្រៃសហគមន៍ភ្នំពោន។ ប៉ុន្តែលោកថា មុននឹងធ្វើការចោទប្រកាន់ តុលាការត្រូវធ្វើការស្រាវជ្រាវឱ្យបានច្បាស់លាស់លើអ្នកដែលចុះទៅកាប់ឆ្ការដីព្រៃនោះ ពីព្រោះរឿងនេះអាចនឹងមានអ្នកមានអំណាចឬមានលុយនៅពីក្រោយខ្នង។
លោកមានប្រសាសន៍ថា៖ «តុលាការគាត់ប្រាកដជាមានការស៊ើបអង្កេតឱ្យបានច្បាស់លាស់ហើយ ហើយបន្ថែមលើពីនេះទៀត ខ្ញុំក៏ស្នើសុំបន្ថែមលើការស៊ើបអង្កេតសុំធ្វើការស៊ើបអង្កេតឱ្យបានច្បាស់លាស់ ក្រែងមានអ្នកនៅពីក្រោយខ្នង អាចថាអ្នកមានលុយឬមានអំណាចនៅពីលើហ្នឹង ដែលគាត់បញ្ជាបន្ត ដើម្បីបោកបញ្ឆោតឱ្យពួកគាត់ទៅកាប់ព្រៃ ដើម្បីផ្តល់ជាថវិកា ផ្តល់ជាទីតាំងដីខ្លះសម្រាប់ពួកគាត់នៅពេលដែលពួកគាត់កាប់បានជោគជ័យ»៕
