អាជ្ញាធរខេត្តកំពង់ស្ពឺ បានឱ្យដឹងថា ក្រុមហ៊ុនឯកជនមួយចំនួនបានរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកយីហោដែលជ្រកក្រោមស្លាកស្រាបៀរជាបណ្តើរៗហើយ ខណៈអាជ្ញាធរខេត្តសម្រេចពន្យារពេលត្រឹមថ្ងៃទី១៥ ខែមិថុនានេះ ឱ្យក្រុមហ៊ុនរុះរើស្លាកយីហោផ្សព្វផ្សាយគ្រឿងស្រវឹងចេញឱ្យអស់ពីក្នុងខេត្ត។
អភិបាលខេត្តកំពង់ស្ពឺ លោក វ៉ី សំណាង ប្រាប់ វីអូឌី នៅថ្ងៃទី៦ ខែមិថុនា ឆ្នាំ២០២១នេះថា ក្រុមហ៊ុនឯកជនដែលមានផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកពាណិជ្ជកម្មគ្រឿងស្រវឹងនៅតាមដងផ្លូវ បានចាប់ផ្តើមរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកយីហោដែលជ្រកក្រោមស្លាកស្រាបៀរជាបណ្តើរៗហើយ ប៉ុន្តែលោកមិនបានបញ្ជាក់ពីចំនួនដែលរុះរើនោះទេ ខណៈអាជ្ញាធរទុកពេលត្រឹមថ្ងៃទី១៥ខែនេះ ត្រូវរុះរើចេញឱ្យអស់។
ទោះជាបែបនេះក្តី អភិបាលខេត្តរូបនោះបញ្ជាក់ថា ដើមចមដែលអាជ្ញាធរទុកពេលឱ្យក្រុមហ៊ុនបន្ថែមដល់ថ្ងៃទី១៥ ខែមិថុនា ដើម្បីរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកយីហោដែលជ្រកក្រោមស្លាកស្រាបៀរឱ្យអស់ចេញពីខេត្តនោះ ដោយសារក្រុមហ៊ុនស្រាបៀរទាំងនោះត្រូវការពេលជួលកម្មករ ខណៈស្ថានភាពកូវីដ-១៩ កំពុងរីករាលដាល មិនងាយរកកម្មកររុះរើបានលឿននោះទេ។
លោកមានប្រសាសន៍ថា៖ «យើងទុកពេលឱ្យគាត់ [ក្រុមហ៊ុនស្រាបៀរ] ត្រឹមពាក់កណ្តាលខែ ដោយសារគាត់ត្រូវមានក្រុមហ៊ុនធ្វើប៉ាណូជាអ្នកដើរដោះ [រុះរើ] ផ្ទាំងប៉ាណូ ឥលូវដោះហូរហែហើយ! យ៉ាងច្រើនយើងទុកឱ្យត្រឹមថ្ងៃ១៥ខែនេះ បើក្រុមហ៊ុនមិនរុះរើឱ្យអស់ទេ ខាងខេត្តនឹងចុះរុះរើផ្ទាល់ហើយ»។
មន្ត្រីឃ្លាំមើលសិទ្ធិមនុស្សនៃអង្គការលីកាដូប្រចាំខេត្តកំពង់ស្ពឺ លោក អ៊ុង សាមិត្ត មានប្រសាសន៍ថា បើសិនជាដល់ពាក់កណ្តាលខែមិថុនានេះ អាជ្ញាធរមិនរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកយីហោដែលជ្រកក្រោមស្លាកស្រាបៀរ តាមការប្រកាសរបស់ខ្លួនទេ នឹងធ្វើឱ្យពលរដ្ឋអស់ជំនឿលើការដឹកនាំរបស់ពួកគេ ពីព្រោះការពន្យារពេលនេះធ្វើឡើងច្រើនដងរួចទៅហើយ។
លោកមានប្រសាសន៍ថា៖ «ចាំមើលពាក់កណ្តាលខែហ្នឹង បើអត់រុះរើ ធ្វើឱ្យពលរដ្ឋលែងជឿលើអាជ្ញាធរហើយ ព្រោះយូរៗទៅ វាសាបរលាបការសន្យារបស់ពួកគាត់ដោយខ្លួនឯង»។
មន្ត្រីសិទ្ធិមនុស្សរូបនោះផ្តល់ជាអនុសាសន៍ថា ដើម្បីទប់ស្កាត់ការលក់គ្រឿងស្រវឹង និងការពារសុខភាពពលរដ្ឋនៅក្នុងខេត្តបាន លុះត្រាតែអាជ្ញាធរបិទកុំឱ្យមានការលក់គ្រឿងស្រវឹង ទើបទទួលផលវិជ្ជមានខ្ពស់ជាងការបញ្ជាឱ្យរុះរើផ្ទាំងប៉ាណូ។
យុទ្ធនាការណែនាំឱ្យពលរដ្ឋនិងក្រុមហ៊ុនឯកជនរុះរើស្លាកពាណិជ្ជកម្មស្រាបៀរឬយីហោដែលជ្រកក្រោមស្លាកស្រាបៀរនេះ ទើបតែមាននៅខេត្តកំពង់ស្ពឺមួយប៉ុណ្ណោះ ខណៈខេត្តផ្សេងទៀតនៅមិនទាន់អនុវត្តវិធានការនេះនៅឡើយទេ ស្របពេលក្រុមសង្គមស៊ីវិលមួយចំនួនចង់ឃើញវិធានការផ្អាកការផ្សព្វផ្សាយគ្រឿងស្រវឹងបែបនេះធ្វើឡើងនៅទូទាំងប្រទេសតែម្តង។
មជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានបង្ហាញពីលទ្ធផលនៃការស្ទង់មតិរបស់ខ្លួននៅអំឡុងឆ្នាំ២០១៧ ដោយរកឃើញថា មានមនុស្សប្រមាណ៩០ភាគរយបានឃើញការផ្សព្វផ្សាយពីផលិតផលគ្រឿងស្រវឹងនៅតាមមធ្យោបាយផ្សេងៗ ហើយក្នុងចំណោមអ្នកដែលបានឃើញការផ្សព្វផ្សាយនោះ ប្រមាណ៧០ភាគរយ ចង់សាកល្បងប្រើប្រាស់គ្រឿងស្រវឹងផងដែរ៕