មន្ត្រីជាន់ខ្ពស់ក្រសួងការពារជាតិ អះអាងថា ក្រសួងកំពុងស្រាវជ្រាវរកមុខមន្ត្រីយោធាដែលបាញ់ប្រហារទៅលើប្រជាពលរដ្ឋម្នាក់ឱ្យរងរបួសនៅក្នុងជម្លោះដីធ្លីមួយកន្លែងនៅខេត្តកណ្តាល កាលពីថ្ងៃម្សិលមិញ ដើម្បីយកទៅអនុវត្តទោសទៅតាមច្បាប់។
អ្នកនាំពាក្យក្រសួងការពារជាតិ លោក ឈុំ សុជាតិ ប្រាប់ វីអូឌី នៅថ្ងៃសុក្រនេះថា ក្រសួងបានទទួលរបាយការណ៍របស់អាជ្ញាធរហើយ ពាក់ព័ន្ធនឹងករណីការប្រើប្រាស់អាវុធរបស់ក្រុមយោធាបាញ់ទៅលើប្រជាពលរដ្ឋកាលពីថ្ងៃម្សិលមិញ។ លោកបន្តថា បច្ចុប្បន្ន គណៈកម្មការឯកភាពខេត្តកំពុងធ្វើការស៊ើបអង្កេតនិងស្រាវជ្រាវ ដើម្បីយកអ្នកដែលបានបាញ់នោះមកដាក់ទោស។
លោក ឈុំ សុជាតិ បានថ្លែងថា៖ «បើយើងរកឃើញ យើងនឹងដាក់ទោសទណ្ឌតាមហ្នឹងហើយ ប៉ុន្តែឥលូវយើងមិនទាន់ឃើញភស្តុតាងជាក់ស្ដែង អ្នកណាបាញ់ ឈ្មោះណាបាញ់ ឬបាញ់ត្រូវពីណានោះ! យើងគ្រាន់តែឮនិងឃើញរបាយការណ៍ ប៉ុន្តែយើងមិនទាន់ឃើញលម្អិតអ្នកណាជាអ្នកប្រព្រឹត្ត»។
កាលពីថ្ងៃទី៣ ខែមិថុនា កងកម្លាំងយោធាប្រដាប់ដោយអាវុធប្រមាណ៤០នាក់បានបើកការបាញ់ប្រហារដោយគ្រាប់កាំភ្លើងពិត ទៅលើប្រជាពលរដ្ឋប្រមាណ៦០នាក់ដែលតវ៉ានៅក្នុងជម្លោះដីធ្លីមួយកន្លែង ស្ថិតនៅចំណុចភូមិអង្គស្រែពោធិ៍ ឃុំទួលពេជ្រ ស្រុកអង្គស្នួល ខេត្តកណ្ដាល បណ្ដាលឱ្យពលរដ្ឋម្នាក់រងរបួសធ្លាយស្មា និងត្រូវបានបញ្ជូនទៅសង្គ្រោះបន្ទាន់នៅឯមន្ទីរពេទ្យកាល់ម៉ែត រាជធានីភ្នំពេញ។
ការផ្ទុះអាវុធរបស់ក្រុមយោធាបានធ្វើឡើងបន្ទាប់ពីក្រុមពលរដ្ឋបានលើកគ្នាទៅតវ៉ាហាមឃាត់មិនឱ្យយកគ្រឿងចក្រឈូសឆាយព្រំដីស្រែរបស់ពួកគេដែលធ្លាប់អាស្រ័យផលរាប់ឆ្នាំមកហើយ។
លោក ង៉ែត សុភាព ដែលត្រូវជាប្អូនថ្លៃជនរងគ្រោះ បានអំពាវនាវឱ្យរដ្ឋាភិបាលនិងស្ថាប័នពាក់ព័ន្ធជួយរកយុត្តិធម៌ឱ្យបងថ្លៃរបស់លោក និងឱ្យជួយដោះស្រាយបញ្ហាវិវាទដីធ្លីនេះដល់ពួកគាត់ ដើម្បីឱ្យបានចូលអាស្រ័យផលលើដីស្រែនោះឡើងវិញ។
លោកថា៖ «ខ្ញុំចង់ឱ្យថ្នាក់ដឹកនាំជួយរកយុត្តិធម៌ឱ្យបងថ្លៃខ្ញុំផង ព្រោះគាត់ជាមនុស្សស្លូតត្រង់ គាត់មិនដែលទៅរំលោភបំពានដីរបស់អ្នកណាទេ។ ហើយឱ្យថ្នាក់ដឹកនាំជួយរកដំណោះស្រាយឱ្យប្រជាពលរដ្ឋផង ឱ្យប្រជាពលរដ្ឋបានអាស្រ័យផលបានវិញផង»។
ក្រោយពីមានករណីផ្ទុះអាវុធជាច្រើនគ្រាប់ដែលបាញ់ដោយក្រុមយោធានោះ អាជ្ញាធរខេត្តកណ្ដាលបានចេញសេចក្ដីជូនដំណឹងមួយកាលពីថ្ងៃម្សិលមិញថា ដីចម្ការបារាំង ដែលមានទំហំ២៨០ហិកតានេះ គឺជាដីរដ្ឋ ដែលរាជរដ្ឋាភិបាលគ្រោងរៀបចំមួយផ្នែកសម្រាប់ប្រើប្រាស់ជាប្រយោជន៍វិស័យការពារជាតិ និងមួយផ្នែកទៀតប្រើប្រាស់សម្រាប់វិស័យបរិស្ថាន និងជាទីតាំងសម្រាប់ទុកដាក់សំរាមនិងសំណល់រឹងចុងក្រោយកម្រិតតំបន់ (Regional landfill)។
សេចក្តីជូនដំណឹងដដែល ឱ្យដឹងថា ករណីនេះ ក្រុមការងារគណៈកម្មការអន្តរក្រសួងដោះស្រាយផលប៉ះពាល់ កំពុងខិតខំសិក្សាស្រាវជ្រាវ ដើម្បីឈានដល់ការដោះស្រាយគោលនយោបាយជូនប្រជាពលរដ្ឋដែលបានអាស្រ័យផលពិតប្រាកដ។
ប៉ុន្តែសេចក្តីជូនដំណឹងរបស់អាជ្ញាធរខេត្តកណ្ដាលនេះ មិនបានលើកឡើងពីការប៉ះទង្គិចគ្នានេះទេ តែបានព្រមានចាត់វិធានការច្បាប់លើក្រុមប្រជាពលរដ្ឋ ប្រសិនជាពួកគេមិនគោរពតាមការណែនាំរបស់អាជ្ញាធរមានសមត្ថកិច្ចនិងនៅតែបន្តបិទផ្លូវជាតិលេខ៥១។
ករណីនេះ ប្រជាពលរដ្ឋរស់នៅភូមិអង្គស្រែពោធិ៍ លោក ផាត់ សុវណ្ណ លើកឡើងថា ពួកគាត់ហាក់មិនមានជំនឿលើការដោះស្រាយរបស់អាជ្ញាធរនេះទេ ព្រោះកន្លងមក អាជ្ញាធរធ្លាប់សន្យាជាច្រើនលើកហើយ ប៉ុន្តែរហូតមកដល់ពេលនេះ មិនទាន់មានដំណោះស្រាយជូនប្រជាពលរដ្ឋនៅឡើយ។ មួយវិញទៀត លោកថា បើសិនអាជ្ញាធរចង់ដោះស្រាយវិវាទពិតមែននោះ អាជ្ញាធរនឹងមិនប្រើប្រាស់គ្រឿងចក្រទៅឈូសឆាយដី និងមិនប្រើកាំភ្លើងបាញ់បោះមកលើប្រជាពលរដ្ឋនោះទេ។
លោកថា៖ «ខ្ញុំចង់ឃើញការដោះស្រាយរបស់រដ្ឋ ថាតើរដ្ឋគិតយ៉ាងណាជាមួយដីធ្លីប្រជាពលរដ្ឋហ្នឹង គិតជាសំណង ឬឱ្យដីហ្នឹងទៅប្រជាពលរដ្ឋ ឬយ៉ាងម៉េច! បើមិនឱ្យ រដ្ឋគិតគូរមក ព្រោះពលរដ្ឋមួយចំនួនអត់មានសង្ឃឹមទេ ដោយភាគច្រើនខ្លាចទាហានបាញ់។ ការបាញ់បោះមកលើប្រជាពលរដ្ឋនោះដូចជាសត្វធាតុអ៊ីចឹង រំលោភសិទ្ធិមនុស្សខ្លាំងណាស់ ដោយប្រជាពលរដ្ឋមានតែដៃទទេ ចំណែកអាជ្ញាធរថាការពារខ្លួនដែរ តែកាន់សុទ្ធតែអាវុធ»។
អនុប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ លោក អំ សំអាត គាំទ្រចំពោះការស្រាវជ្រាវនិងស៊ើបអង្កេតស្វែងរកអ្នកប្រព្រឹត្តមកដាក់ទោសតាមច្បាប់ ខណៈលោកសង្កេតឃើញថា កន្លងមក មន្ត្រីយោធាដែលប្រើអាវុធបាញ់លើប្រជាពលរដ្ឋរឿងដីធ្លីនៅខេត្តព្រះសីហនុ និងក្រចេះ រួមទាំងខេត្តផ្សេងទៀត មិនទាន់យកមកដាក់ទោសនៅឡើយ។ លោកបន្តថា ប្រសិនបើរដ្ឋាភិបាលនិងស្ថាប័នពាក់ព័ន្ធមិនចាប់មន្ត្រីនិងយោធាមកអនុវត្តច្បាប់ទេ លោកថា អំពើទាំងអស់នេះនឹងកើតឡើងបន្តទៀត។
លោកថា៖ «បើយើងមិនស៊ើបអង្កេត[រក]អ្នកបង្កបាញ់ឱ្យពលរដ្ឋរងរបួស ឬអ្នកពាក់ព័ន្ធមកអនុវត្តតាមច្បាប់ទេ វាជាវប្បធម៌និទណ្ឌភាពដែលបន្តលើកទឹកចិត្តឱ្យអំពើទាំងអស់នេះតទៅទៀត។ អ៊ីចឹងហើយបានជាយើងនៅតែទាមទារថា ធ្វើម៉េចឱ្យមានការស៊ើបអង្កេតទៅលើករណីហ្នឹង ហើយរកអ្នកដែលបាញ់ពលរដ្ឋឱ្យរងរបួស និងអ្នកពាក់ព័ន្ធ មកអនុវត្តតាមផ្លូវច្បាប់ ដើម្បីបំបាត់វប្បធម៌និទណ្ឌភាព ហើយបញ្ហាដីធ្លីត្រូវដោះស្រាយដោយសន្តិវិធីឬតាមអាជ្ញាធរដែលពាក់ព័ន្ធ ហើយបញ្ចៀសអំពើហិង្សារបៀបនេះបន្តទៀត»។
កាលពីថ្ងៃទី១៣ ខែកុម្ភៈ ឆ្នាំ២០១៩ រដ្ឋមន្ត្រីក្រសួងមហាផ្ទៃ លោក ស ខេង បានជំរុញឱ្យរដ្ឋបាលខេត្តទាំងអស់ពង្រឹងការអនុវត្តច្បាប់ឱ្យបានត្រឹមត្រូវ ពិសេសការចុះអនុវត្តសាលដីការបស់តុលាការ ដោយថា ការប្រើប្រាស់កម្លាំងយោធាណាមួយគឺជារឿងខុសច្បាប់៕
