ថ្នាក់ដឹកនាំសហគមន៍ខ្មែរកម្ពុជាក្រោម បានដាស់តឿនជាថ្មីទៀតដល់រដ្ឋាភិបាលកម្ពុជាឱ្យមានភាពម្ចាស់ការនិងថែរក្សាបូរណភាពទឹកដីកម្ពុជាបច្ចុប្បន្នឱ្យបានគង់វង្ស ដើម្បីចៀសវាងកុំឱ្យព្រឹត្តិការណ៍ប្រវត្តិសាស្រ្តនៃការបាត់បង់ទឹកដីកម្ពុជាក្រោម វិលមកសារជាថ្មីទៀត។
ការលើកឡើងនេះ ធ្វើឡើងស្របពេលនៃការប្រារព្ធខួបលើកទី៧២ឆ្នាំ នៃការបាត់បង់ទឹកដីកម្ពុជាក្រោម ទៅលើប្រទេសវៀតណាម ថ្ងៃទី០៤ ខែមិថុនា ឆ្នាំ១៩៤៩ – ថ្ងៃទី៤ ខែមិថុនា ឆ្នាំ២០២១។
នាយកប្រតិបត្តិសហគមន៍ខ្មែរកម្ពុជា លោក ថាច់ សេដ្ឋា បានថ្លែងនៅថ្ងៃសុក្រនេះថា ប្រវត្តិសាស្រ្តបានបង្រៀនកម្ពុជារួចហើយពីការបាត់បង់ទឹកដីមួយផ្នែកធំនៃដែនដីកម្ពុជាក្រោមទៅលើប្រទេសវៀតណាម តាមរយៈការសម្រេចដោយរដ្ឋការបារាំងក្នុងសម័យនោះ។
ករណីនេះ លោកថា សហគមន៍មិនចង់ឃើញកម្ពុជាត្រូវបាត់បង់ទឹកដីបន្ថែមទៀតទៅលើប្រទេសជិតខាងដូចក្នុងអតីតកាលនោះទេ។
លោកបន្តថា៖ «អ៊ីចឹងហើយយើងមើលឃើញបច្ចុប្បន្ន ដែលជាការហូរចូលរបស់ជនជាតិយួន ក៏ជាការបារម្ភរបស់យើងខ្លាំងដែរ ខ្លាចវិលទៅរកប្រវត្តិសាស្រ្តចាស់ហ្នឹង។ យើងឃើញហើយក្នុងសម័យកាលនីមួយៗ ដែលយួនចូលមកត្រួតត្រាចង់បានទឹកដីខ្មែរហ្នឹង គឺប្រើប្រាស់យុទ្ធសាស្រ្តមិនជាខុសគ្នាប៉ុន្មានទេ។ ពេលខ្លះធ្វើជារបៀបចិត្តល្អជួយខ្មែរ ប៉ុន្តែទន្ទឹមនឹងការជួយហ្នឹង គឺសុទ្ធសឹងតែបង្កប់ដោយល្បិចកិច្ចកលដែលមានបង្កប់កម្លាំងទាហានយោធា គ្រាន់តែរង់ចាំឱកាសណាមួយនោះ គេនឹងងើបនិងយកទឹកដីយើង»។
សម្រាប់ការប្រារព្ធរំឭកព្រឹត្តិការណ៍នៃការបាត់បង់ទឹកដីកម្ពុជាក្រោមនៅក្នុងឆ្នាំនេះ លោក ថាច់ សេដ្ឋា លើកឡើងថា ខាងសហគមន៍មិនបានរៀបចំជាពិធីអ្វីធំដុំដូចរាល់ឆ្នាំនោះទេ ដោយសារវិបត្តិជំងឺកូវីដ-១៩។
បើតាមនាយកប្រតិបត្តិសហគមន៍ខ្មែរកម្ពុជាក្រោមរូបនេះ ជាគំនិតដើម សហគមន៍គ្រោងនិមន្តព្រះសង្ឃចំនួន១ ៩៤៩អង្គ បិណ្ឌបាត នៅក្នុងថ្ងៃទី៤ ខែមិថុនានេះ ប៉ុន្តែដោយមានបញ្ហាជំងឺកូវីដ-១៩ ពិធីដែលគ្រោងប្រារព្ធនៅថ្ងៃនេះ ត្រូវលើកពេលទៅថ្ងៃទី២៦ ខែមិថុនាវិញ។ ជាងនេះទៀត លោកថា គម្រោងនិមន្តព្រះសង្ឃរាប់បាត ត្រូវបង្វែរទៅជាពិធីចែកអំណោយមនុស្សធម៌ដល់គ្រួសារជួបវិបត្តិជំងឺកូវីដ-១៩ ចំនួន១ ០០៩គ្រួសារវិញ ដើម្បីដោះស្រាយបញ្ហាខ្វះខាតផ្នែកជីវភាព។
វីអូឌី មិនអាចសុំការបំភ្លឺជុំវិញការលើកឡើងរបស់សមាគមខ្មែរកម្ពុជាក្រោម ពីស្ថានទូតវៀតណាមប្រចាំកម្ពុជា បានទេ នៅថ្ងៃនេះ។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ប្រតិកម្មតបដោយដាក់ជាចម្ងល់ថា តើសហគមន៍ខ្មែរកម្ពុជាក្រោមនេះថា ជាសហគមន៍ដែលបម្រើឱ្យបក្សនយោបាយឬជាសហគមន៍បម្រើឱ្យសេចក្តីត្រូវការរបស់សាធារណជន?
លោកបន្តថា៖ «ទីមួយ ខ្ញុំសួរបញ្រ្ចាសទៅវិញ សមាគមខ្មែរកម្ពុជាក្រោម ជាសមាគមនយោបាយឬជាសមាគមសង្គមកិច្ច។ បើជាសមាគមសង្គមកិច្ច ម៉េចទៅនិយាយរឿងនយោបាយ អាណាលេបអាណាខ្ជាក់អាណា! ខ្ញុំមិននិយាយជាមួយសមាគមដែលតាំងខ្លួនជាសមាគមសង្គមកិច្ច[តែ]បែរមកនិយាយរឿងនយោបាយ[ទេ]»។
លោក ប៉ា ចន្ទរឿន នាយកវិទ្យាស្ថានប្រជាធិបតេយ្យកម្ពុជា យល់ឃើញថា ការរិះគន់ឬការព្រួយបារម្ភណាមួយតាមរយៈការសំដែងមតិរបស់ពលរដ្ឋ មិនមែនមានន័យថា ជាការរើសអើងជាតិសាសន៍នោះទេ។ តែផ្ទុយទៅវិញ លោកថា នេះជាកាតព្វកិច្ចក្នុងនាមជាពលរដ្ឋភ័យព្រួយចំពោះការគ្រប់គ្រងអន្តោប្រវេសន៍មិនបានដិតដល់ប៉ុណ្ណោះ។
បើតាមលោក ប៉ា ចន្ទរឿន មិនថាតែពលរដ្ឋកម្ពុជាទេ ពលរដ្ឋប្រទេសផ្សេងៗទៀតលើសកលលោក ក៏តែងមានការបារម្ភពីអនាគតប្រទេសរបស់ពួកគេដូច្នោះដែរ។
លោកនាយឧត្តមសេនីយ៍ កែវ វណ្ណថន អគ្គនាយករង និងជាអ្នកនាំពាក្យនៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ បញ្ជាក់តាមសារអេឡិចត្រូនិចនៅថ្ងៃនេះថា ជនបរទេសអន្តោប្រវេសន៍វៀតណាមដែលកំពុងរស់នៅកម្ពុជាជិត៩០ ០០០នាក់ (៨៩ ៤៧១នាក់)។ គិតចាប់ពីឆ្នាំ២០១៤ ដល់បច្ចុប្បន្ន កម្ពុជាបណ្តេញជនអន្តោប្រវេសន៍វៀតណាមប្រមាណជាង១០ ០០០នាក់ (១១ ៨០០នាក់)។
ដោយឡែក សម្រាប់ឆ្នាំ២០២១នេះវិញ លោកថា មានជនអន្តោប្រវេសន៍វៀតណាមចំនួន៨១នាក់ហើយត្រូវបានបណ្តេញចេញពីកម្ពុជា។
បើតាមលោក កែវ វណ្ណថន ជនជាតិវៀតណាមដែលចូលមកកម្ពុជា ភាគច្រើនជាអ្នកទេសចរនិងអ្នកបម្រើការងារដូចជនបរទេសដទៃទៀតដែរ។
ទឹកដីកម្ពុជាក្រោម ឬហៅថា«ទឹកដីកូសាំងស៊ីន» ជាអតីតបូរណភាពទឹកដីរបស់កម្ពុជា ត្រូវបានអាណានិគមនិយមបារាំង កាត់ប្រគល់ទៅឱ្យវៀតណាម កាលពីថ្ងៃទី៤ ខែមិថុនា ឆ្នាំ១៩៤៩។
ជារៀងរាល់ឆ្នាំ នៅមុនពេលអតីតគណបក្សសង្រ្គោះជាតិ ត្រូវបានរំលាយដោយសាលដីកាតុលាការកំពូលកាលពីឆ្នាំ២០១៧ ទាំងសកម្មជន អ្នកគាំទ្រគណបក្សនយោបាយ រួមទាំងតំណាងរាស្រ្តនៃអតីតគណបក្សប្រឆាំងមួយនេះ តែងប្រារព្ធទិវានៃការចងចាំទាក់ទិនការបាត់បង់ទឹកដីកម្ពុជាក្រោមនេះផងដែរ៕