ជនជាប់ឃុំនៅក្នុងពន្ធនាគារចំនួនពីរទៀត គឺពន្ធនាគារខេត្តបន្ទាយមានជ័យ និងពន្ធនាគារខេត្តស្វាយរៀង បានឆ្លងជំងឺកូវីដ-១៩។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានប្រាប់ វីអូឌី នៅថ្ងៃសុក្រនេះថា ជនជាប់ឃុំម្នាក់ដែលគ្រោងនាំខ្លួនយកទៅឃុំនៅក្នុងពន្ធនាគារខេត្តបន្ទាយមានជ័យ ត្រូវបានរកឃើញវិជ្ជមានជំងឺកូវីដ-១៩ នៅក្នុងអំឡុងពេលធ្វើចត្តាឡីស័ក កាលពីដើមសប្តាហ៍នេះ។ ប៉ុន្តែករណីនេះ មិនទាន់បង្កជាហានិភ័យឆ្លងចូលទៅក្នុងពន្ធនាគារ ឬឆ្លងទៅដល់អ្នកជាប់ឃុំផ្សេងទៀតនៅឡើយទេ។
ចំណែកឯករណីនៅក្នុងខេត្តស្វាយរៀងវិញក៏ដូចគ្នាដែរ លោកថា មានអ្នកជាប់ឃុំថ្មីដែលរកឃើញវិជ្ជមានកូវីដ-១៩ កាលពី២សប្តាហ៍មុននោះ គឺស្ថិតនៅក្នុងដំណាក់កាលធ្វើចត្តាឡីស័ក។ ប៉ុន្តែករណីនេះបានធ្វើឱ្យមានអ្នកប៉ះពាល់ផ្ទាល់និងប្រយោលប្រមាណជិត៥០នាក់។
លោកមានប្រសាសន៍យ៉ាងដូច្នេះថា៖ «ឆ្លងអ្នក [ជាប់ឃុំ] ចាប់ចូលថ្មីទេ! គាត់អ្នកទោសដែរ តែទើបនាំខ្លួនមកឃុំ។ គាត់មានកូវីដពីក្រៅមក ហើយយើងដាក់គាត់ក្នុងកន្លែងចត្តាឡីស័ក»។
គិតត្រឹមថ្ងៃទី៤ ខែមិថុនានេះ បើរាប់បញ្ចូលទាំងពន្ធនាគារទាំង២នេះ យ៉ាងហោចណាស់មានពន្ធនាគារចំនួន៦ហើយក្នុងចំណោមពន្ធនាគារចំនួន២៨នៅទូទាំងប្រទេស បានរកឃើញករណីឆ្លងជំងឺកូវីដ-១៩ ទៅលើអ្នកជាប់ឃុំ ក្នុងនោះ រួមមាន ពន្ធនាគារខេត្តព្រះសីហនុ ពន្ធនាគារព្រៃស ពន្ធនាគារខេត្តកណ្តាល និងពន្ធនាគារខេត្តកំពង់ស្ពឺ ដែលសរុបអ្នកជាប់ឃុំដែលឆ្លងប្រមាណជា៣៥០នាក់។
យ៉ាងណាក្តី បើតាមលោក នុត សវនា ស្ថានភាពជំងឺកូវីដ-១៩ នៅតាមពន្ធនាគារទាំងនោះ អាជ្ញាធរហាក់គ្រប់គ្រងសភាពការបានល្អឡើងវិញហើយ។
លោកថ្លែងបញ្ជាក់ថា៖ «និយាយទៅ កន្លែងទាំងអស់ហ្នឹង យើងកំពុងតែដុតដៃដុតជើងថែទាំពួកគាត់ និងតាមដានសុខភាព ហើយសំខាន់យើងបិទខ្ទប់ អ៊ីចឹងវាមិនទាន់ប្រក្រតីពេញលេញទេ ប៉ុន្តែវាផុតពីដំណាក់កាលគ្រោះថ្នាក់។ កាលពីដំបូង យើងភ័យបារម្ភហ្នឹង ឥលូវយើងគ្រប់គ្រងសភាពការបានហើយ»។
យោងតាមរបាយការណ៍របស់អង្គការលើកលែងទោសអន្តរជាតិ (Amnesty International) និងអង្គការឃ្លាំមើលសិទ្ធិមនុស្សអន្តរជាតិ (Human Rights Watch) កាលពីថ្ងៃទី២៣ ខែឧសភា បានឱ្យដឹងថា បច្ចុប្បន្ន កម្ពុជាមានអ្នកជាប់ឃុំសរុប៣៩ ០០០នាក់នៅក្នុងពន្ធនាគារទូទាំងប្រទេសចំនួន២៨ពន្ធនាគារ។
កន្លងមក អង្គការសិទ្ធិមនុស្សជាតិនិងអន្តរជាតិ បានដាក់ការព្រួយបារម្ភថា ភាពចង្អៀតណែននៅក្នុងពន្ធនាគារ គឺជាហានិភ័យឆ្លងជំងឺកូវីដ-១៩ នៅក្នុងពន្ធនាគារ និងបានស្នើសុំឱ្យមានការដោះលែងអ្នកទោសស្រាលៗ និងជនជាប់ឃុំបណ្តោះអាសន្នរង់ចាំសវនាការកាត់ទោស ឱ្យនៅក្រៅឃុំជាបណ្តោះអាសន្ន ដើម្បីកាត់បន្ថយភាពចង្អៀតណែននៅក្នុងពន្ធនាគារ៕