ពលរដ្ឋម្នាក់បានរងរបួសក្រោយពីកងកម្លាំងយោធាប្រហែល៤០នាក់បានប្រើកាំភ្លើងបាញ់លើពលរដ្ឋ បន្ទាប់ពីពួកគាត់បានលើកគ្នាទៅហាមឃាត់គ្រឿងចក្រឈូសឆាយលើដីធ្លីពួកគាត់ នៅចំណុចភូមិអង្គស្រែពោធិ៍ ឃុំទួលពេជ្រ ស្រុកអង្គស្នួល ខេត្តកណ្ដាល។
ប្រជាពលរដ្ឋរស់នៅភូមិអង្គស្រែពោធិ៍ លោក ផាត់ សុវណ្ណ ដែលអះអាងមានដីនៅទីនោះដែរ បានប្រាប់ វីអូឌី នៅថ្ងៃនេះថា ពលរដ្ឋម្នាក់ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត្រ រាជធានីភ្នំពេញ ក្រោយពីកងកម្លាំងយោធាប្រហែល៤០នាក់បានបាញ់គ្រាប់កាំភ្លើងជិត១០០គ្រាប់ឡើងលើ និងបាញ់សំដៅមកកាន់ពលរដ្ឋប្រមាណ៦០នាក់ដែលកំពុងតវ៉ារឿងដីធ្លី។
លោកបន្តថា ហេតុការណ៍ផ្ទុះអាវុធនេះកើតឡើងនៅវេលាម៉ោង៩កន្លះព្រឹកថ្ងៃព្រហស្បតិ៍នេះ ខណៈពួកគាត់បាននាំគ្នាចុះហាមឃាត់គ្រឿងចក្រមិនឱ្យឈូសឆាយដីរបស់ពួកគាត់។
លោកថា៖ «អ្នកដែលត្រូវគ្រាប់ គាត់មិនបានចូលទៅវាយប៉ូលិសនិងទាហាននោះដែរ គាត់នៅឈរលើដីគាត់ទេ គេបាញ់ត្រូវ ព្រឹកមិញហ្នឹង! ហេតុការណ៍ប៉ះគ្នាមួយប្រាវហ្នឹង បើសិនជាប្រជាជនយើងមានដំបងតែម្នាក់ឬពីរនាក់ គឺទាហានហ្នឹងបាញ់សម្លាប់ប្រជាជនទាំងអស់ហ្នឹង។ ខ្ញុំមិនដឹងទាហានខាងណាទេ ទាហានវៀតណាម ទាហានថៃទេ ដែលមកបាញ់ខ្មែរឯង។ ធ្វើដូចឃោរឃៅពេក ចង់សម្លាប់ប្រជាជន ចង់ប្លន់ប្រជាជនយើង វាអត់និយាយច្រើនជាមួយយើងទេ វាស្រែកថាសម្លាប់ចោលឥលូវហើយ»។
លោក ផាត់ សុវណ្ណ បន្តថា ពួកគាត់សុខចិត្តស្លាប់ ដោយមិនឱ្យដីដែលបានអាស្រ័យផលតាំងពីឆ្នាំ១៩៧៥ បាត់បង់នោះទេ។ លោកចាត់ទុកការប្រើប្រាស់កាំភ្លើងរបស់កងកម្លាំងយោធាបាញ់លើពលរដ្ឋដែលគ្រាន់តែតវ៉ារឿងដីធ្លីរបស់ខ្លួននេះថា ជាអំពើឃោរឃៅ។
លោកអំពាវនាវឱ្យរដ្ឋាភិបាលដោះស្រាយសំណងសមរម្យដល់ពួកគាត់ បើសិនជាត្រូវការដីរបស់ប្រជាពលរដ្ឋយកទៅអភិវឌ្ឍ មិនមែនប្រើកងកម្លាំងយកមកបាញ់សម្លាប់ពលរដ្ឋបែបនេះទេ។
លោកថា៖ «យើងមានតែម្រាមដៃ១០ លើកសំពះថ្នាក់ដឹកនាំ ហើយជម្រាបទៅពួកអ្នកធំៗ លោកឯងយកដីប្រជាពលរដ្ឋ លោកឯងមានគិតដល់គ្រួសារគេអត់ ប្រជាពលរដ្ឋមានស្រែមួយ ស្រែពីរ តវ៉ាប្ដូរជីវិត។ ពួកលោកឯងមានដីដល់ទៅ១០ទៅ២០ហិកតា ម៉េចបានជាពួកលោកឯងចង់បានដី! ប្រជាពលរដ្ឋសំណូមពរដល់ថ្នាក់ដឹកនាំឱ្យជួយដោះស្រាយដល់ប្រជាជនដែលអាចទទួលយកបាន។ មិនមែនប្រជាជនយួនទេ គឺប្រជាជនខ្មែរទាំងអស់ ហើយយកខ្មែរមកបាញ់ខ្មែរអ៊ីចឹង វាអាក្រក់មើលណាស់ ថ្នាក់ដឹកនាំ»។
លោក ង៉ែត សុភាព អះអាងថាជាប្អូនថ្លៃជនរងគ្រោះដែលរងរបួសដោយសារគ្រាប់កាំភ្លើងរបស់ក្រុមទាហាននោះ និយាយថា ក្រុមទាហានទាំងនោះចំណុះឱ្យក្រសួងការពារជាតិ។ លោកបន្តថា ការផ្ទុះអាវុធនេះ ដោយសារពួកគាត់ហាមគ្រឿងចក្រមិនឱ្យចូលឈូសឆាយដីស្រែរបស់ពួកគាត់។
លោកថា៖ «គេបាញ់បីដង [ទើប]បានបង ចន្ថា ដឹងគាត់ត្រូវរបួស ត្រូវគ្រាប់កាំភ្លើង។ គាត់នៅលើផ្លូវបេតុង មិនបានចុះអីទៅជិតទេ នៅចម្ងាយឆ្ងាយពីគេប្រហែល១០ម៉ែត្រ»។
លោក ង៉ែត សុភាព បន្តថា នៅម៉ោង១កន្លះរសៀលនេះ ក្រុមទាហានក៏បានបាញ់កាំភ្លើងប្រហែល២០គ្រាប់ទៀត ក្រោយពីពួកគាត់បាននាំគ្នាតវ៉ាបិទកំណាត់ផ្លូវលេខ៥១ ដើម្បីទាមទារឱ្យរដ្ឋាភិបាលនិងអាជ្ញាធរពាក់ព័ន្ធដោះស្រាយបញ្ហាដីធ្លីជូនដល់ពួកគាត់។
អ្នកនាំពាក្យក្រសួងការពារជាតិ លោក អ៊ុន សុវណ្ណ សុំមិនធ្វើអត្ថាធិប្បាយ ដោយថា លោកកំពុងប្រមូលព័ត៌មានជុំវិញករណីនេះ ។
លោកថា៖ «រឿងហ្នឹង ខ្ញុំកំពុងប្រមូលព័ត៌មាន ខ្ញុំមិនទាន់ទទួលបានរបាយការណ៍ផ្លូវការនៅឡើយទេ។ ចាំខ្ញុំប្រមូលបានព័ត៌មានពិស្ដារ ចាំខ្ញុំឆ្លើយតបវិញ។ យើងកំពុងតាមដានយ៉ាងយកចិត្តទុកដាក់»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ការប្រើប្រាស់អំពើហិង្សានិងយកកាំភ្លើងបាញ់លើប្រជាពលរដ្ឋបែបនេះ បង្ហាញឱ្យឃើញថា ប្រទេសកម្ពុជាមិនបានគោរពច្បាប់នោះឡើយ។ បញ្ហានេះ លោកជំរុញឱ្យមានការស៊ើបអង្កេតនិងដោះស្រាយបញ្ហាដីធ្លី ដើម្បីផ្តល់យុត្តិធម៌ជូនពលរដ្ឋផងដែរ។
លោកថា៖ «ខ្ញុំយល់ថា គប្បីមានចំណាត់ការពីថ្នាក់ដឹកនាំ ដើម្បីចុះធ្វើការស្រាវជ្រាវទៅក្រុមប្រដាប់អាវុធដែលបានប្រើប្រាស់អាវុធបាញ់ទៅលើប្រជាពលរដ្ឋឱ្យមានរបួសស្នាម និងស្រាវជ្រាវផងទៅលើវិវាទទាំងអស់នេះ ដើម្បីដោះស្រាយនិងរកយុត្តិធម៌ជូនពួកគាត់ ដើម្បីកុំឱ្យមានករណីអូសបន្លាយតទៅទៀត។ យើងព្រួយបារម្ភ បើមិនមានដំណោះស្រាយណាមួយដែលភាគីអាចទទួលយកបានទេ វាអាចធ្វើឱ្យបញ្ហាហ្នឹងវារីកធំឡើង ហើយធ្វើឱ្យប៉ះពាល់អាយុជីវិតពលរដ្ឋ»។
បើតាមក្រុមពលរដ្ឋ ប្រជាពលរដ្ឋចំនួន៧ភូមិ នៅក្នុងឃុំពេជ្រ ស្រុកអង្គស្នួល គ្រោងនាំគ្នាបន្តការតវ៉ាទៀត រហូតមានដំណោះស្រាយ ទោះបីជារងការគំរាមកំហែងដល់អាយុជីវិតក៏ដោយ៕