រដ្ឋបាលរាជធានីភ្នំពេញ ដាក់ឱសានវាទរយៈពេលមួយសប្តាហ៍ដល់ម្ចាស់បែចិញ្ចឹមត្រី ផ្ទះបណ្ដែតទឹក និងម្ចាស់សំណង់មិនរៀបរយនៅលើផ្ទៃទន្លេ រុះរើសំណង់របស់ខ្លួនចេញពីតំបន់នោះឱ្យអស់ បើពុំនោះទេនឹងប្រឈមផ្លូវច្បាប់។
ក្នុងសេចក្តីជូនដំណឹងរបស់រដ្ឋបាលរាជធានីភ្នំពេញ ចុះថ្ងៃទី២ ខែមិថុនានេះ បញ្ជាក់ថា កន្លងមក មានជនឱកាសនិយមមួយចំនួនបានលបលួចធ្វើបែចិញ្ចឹមត្រី ផ្ទះបណ្ដែតទឹក ផ្ទះតូចៗ និងសំណង់មិនរៀបរយនៅលើផ្ទៃទន្លេ។
អាជ្ញាធររាជធានីភ្នំពេញ បន្តថា កន្លែងខ្លះបានប្រែក្លាយជាកន្លែងស្នាក់នៅដោយខុសច្បាប់យ៉ាងអនាធិបតេយ្យ ដែលបង្កឱ្យប៉ះពាល់ដល់សណ្តាប់ធ្នាប់ ផ្លូវនាវាចរ ប្រព័ន្ធអេកូឡូស៊ីចរន្តទឹកហូរគោករាក់ ពិសេសការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ ដែលធ្វើឱ្យប៉ះពាល់ដល់បរិស្ថាន ជីវចម្រុះ រួមទាំងសុខភាពពលរដ្ឋដែលប្រើប្រាស់ទឹកនោះ ជាដើម។
ករណីនេះ រដ្ឋបាលរាជធានីភ្នំពេញ សម្រេចទុកពេល១សប្តាហ៍ឱ្យម្ចាស់បែចិញ្ចឹមត្រី ផ្ទះបណ្តែតទឹក និងម្ចាស់សំណង់មិនរៀបរយលើផ្ទៃទន្លេទាំងអស់ ត្រូវរុះរើសំណង់របស់ខ្លួនចេញ ដោយគិតចាប់ពីថ្ងៃទី២ ដល់ថ្ងៃទី៩ ខែមិថុនា ឆ្នាំ២០២១នេះ ជាកំហិត។
សេចក្តីជូនដំណឹងមានខ្លឹមសារថា៖ «រដ្ឋបាលរាជធានីនឹងចាត់វិធានការរដ្ឋបាលដោយពុំទទួលខុសត្រូវរាល់ការខូចខាតឬការបាត់បង់ណាមួយឡើយ។ ហើយក្នុងករណីរឹងរូស អាជ្ញាធរមូលដ្ឋាននិងមន្ត្រីជំនាញនឹងកសាងសំណុំរឿងបញ្ជូនទៅតុលាការតាមផ្លូវច្បាប់»។
វីអូឌី មិនអាចសុំការបញ្ជាក់បន្ថែមពីអភិបាលរាជធានីភ្នំពេញ លោក ឃួង ស្រេង និងអ្នកនាំពាក្យ លោក ម៉េត មាសភក្តី បានទេ នៅថ្ងៃពុធនេះ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង គាំទ្រនឹងវិធានការរបស់អាជ្ញាធរ ដោយថា ដើម្បីរៀបចំសោភ័ណភាពនៅទីក្រុង និងបរិស្ថាន រួមទាំងគិតពីសុខភាពពលរដ្ឋទូទៅ។
ទោះជាបែបនេះក្តី លោកជំរុញទៅអាជ្ញាធរត្រូវផ្តល់សំណងឱ្យបានសមរម្យដល់ម្ចាស់សំណង់អនាធិបតេយ្យទាំងនោះ ដើម្បីផ្តល់យុត្តិធម៌ដល់ពួកគាត់។
លោកជំរុញដូច្នេះថា៖ «រឿងផលប៉ះពាល់ កាលណាពួកគាត់ [រដ្ឋបាលរាជធានីភ្នំពេញ] មិនបានគិតគូរអំពីសេចក្តីរស់នៅជាមូលដ្ឋាន ឧបមាដេញគាត់ចេញទីណាត់ទីណែង មិនដោះស្រាយសំណងជូនគាត់ សម្រាប់ដោះស្រាយការរស់នៅបន្តទៀតសម្រាប់ពួកគាត់ គឺជាការរំលោភហើយ ដែលធ្វើឱ្យប៉ះពាល់ដល់ជីវភាពរស់នៅ ក៏ដូចជាប៉ះពាល់ដល់កូនចៅរបស់គាត់រៀនសូត្រ»។
ទោះជាយ៉ាងណា រដ្ឋបាលរាជធានីភ្នំពេញ មិនបានបញ្ជាក់ពីតួលេខនៃសំណង់អនាធិបតេយ្យនៅតាមដងទន្លេថាមានចំនួនសរុបប៉ុន្មានប្រាកដនោះទេ៕
