អ្នកជាប់ឃុំជាង១០០នាក់នៅក្នុងពន្ធនាគារខេត្តកំពង់ស្ពឺ បានឆ្លងជំងឺកូវីដ-១៩ និងមានអ្នកជាប់ឃុំជាស្រ្តីម្នាក់បានស្លាប់ ដោយសារជំងឺនេះ។
អភិបាលខេត្តកំពង់ស្ពឺ លោក វ៉ី សំណាង មានប្រសាសន៍ថា គិតមកដល់រសៀលថ្ងៃអង្គារនេះ អ្នកជាប់ឃុំជាង១០០នាក់ក្នុងចំណោមអ្នកជាប់ឃុំសរុប១ ៨០២នាក់ បានឆ្លងជំងឺកូវីដ-១៩ បន្ទាប់ពីអ្នកជាប់ឃុំជាស្ត្រីម្នាក់អាយុ៦៦ឆ្នាំបានស្លាប់ដោយសារជំងឺនេះ កាលពីថ្ងៃទី៣១ ខែឧសភា។
បើតាមលោក វ៉ី សំណាង ស្ត្រីដែលស្លាប់នោះមានជំងឺប្រចាំកាយច្រើន ដែលធ្វើឱ្យគាត់មិនអាចទ្រាំទ្រជំងឺនេះបានយូរ។
លោកមានប្រសាសន៍បញ្ជាក់ថា៖ «សំខាន់ គាត់[អ្នកស្លាប់]មានជំងឺប្រចាំកាយច្រើន ដូចជា ឈឺតម្រងនោមផង រលាកពោះវៀនធំផង ហើយបើសិនជាគាត់មិនមានជំងឺកូវីដហ្នឹង ក៏គង់តែប្រហែលជាទៅមិនរួចដែរ! យើងមិនមើលរាល់ថ្ងៃ អ្នកក្រៅពីអ្នកគុក ក៏មានអ្នកស្លាប់ដែរ»។
ការស្លាប់របស់ទណ្ឌិតឈ្មោះ ឡាំ សុខា វ័យ៦៦ឆ្នាំ នៅក្នុងពន្ធនាគារខេត្តកំពង់ស្ពឺនេះ ជាករណីទី១ហើយចាប់តាំងពីជំងឺកូវីដ-១៩បានវាយលុកចូលក្នុងពន្ធនាគារមួយចំនួនមក។
លោក វ៉ី សំណាង បានថ្លែងបន្តថា មន្ត្រីជំនាញកំពុងស្រាវជ្រាវរកមូលហេតុដែលនាំឱ្យកើតជំងឺកូវីដ-១៩ នៅក្នុងពន្ធនាគារខេត្តនេះ ប៉ុន្តែលោកមិនទាន់បញ្ជាក់ពីលទ្ធផលនៅឡើយទេ។
លោកបន្ថែមថា៖ «ខ្ញុំមិនបានចាំតួលេខទេ តែជាង១០០នាក់ហើយនៅក្នុងហ្នឹង! ដូចខ្ញុំបានប្រាប់អ៊ីចឹង យើងគ្រាន់តែបានញែកអ្នកមិនមាន[កូវីដ-១៩] ឱ្យនៅមួយចំហៀងទៅ អ្នកមាននៅមួយចំហៀងទៅ ដើម្បីងាយស្រួលដល់ការព្យាបាលរបស់យើង។ ហើយដូចខ្ញុំថាមិញអ៊ីចឹង គឺយើងបានយកថ្នាំយកអីទៅព្យាបាលពួកគាត់ គឺព្យាបាលជារួមនៅក្នុងគុកហ្នឹងហ្មង»។
ពន្ធនាគារខេត្តកំពង់ស្ពឺ ជាពន្ធនាគារទី៤ហើយដែលមានករណីឆ្លងជំងឺកូវីដ-១៩ ក្នុងចំណោមអ្នកជាប់ឃុំ បន្ទាប់ពីពន្ធនាគារខេត្តព្រះសីហនុ ពន្ធនាគារព្រៃស (ម១) រាជធានីភ្នំពេញ និងពន្ធនាគារខេត្តកណ្តាល។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា មានប្រសាសន៍ថា ក្រោយពីជំងឺកូវីដ-១៩បានឆ្លងចូលក្នុងពន្ធនាគារខេត្តកំពង់ស្ពឺមក អាជ្ញាធរខេត្តនេះបានចាត់វិធានការរួចហើយ ដោយដាក់ឱ្យមានការព្យាបាលអ្នកជំងឺកូវីដ-១៩ នៅក្នុងពន្ធនាគារផ្ទាល់តែម្តង។
យ៉ាងណាក្តី អ្នកនាំពាក្យរូបនេះបញ្ជាក់ថា ស្ថានភាពហាក់បានធូរស្រាលឡើងវិញបន្តិចហើយ។
លោកថ្លែងដូច្នេះថា៖ «ដូចគ្នា! គឺអភិបាលខេត្តគាត់ប្រើរូបមន្តតែមួយ គឺគាត់រៀនតាមខេត្តព្រះសីហនុ គឺរដ្ឋបាលខេត្តគាត់លូកដៃចូលជាមួយការងារអន្តរាគមន៍ក្នុងការព្យាបាលនេះ ព្រោះធនធានសុខាភិបាលនៅលើដៃគាត់ផ្ទាល់ ធនធានកម្លាំងសន្តិសុខក៏នៅលើដៃគាត់ផ្ទាល់។ ហើយណាមួយ យើងធ្វើវិមជ្ឈការជូនទៅរដ្ឋបាលរាជធានីខេត្តហើយ ពន្ធនាគារខេត្ត អ៊ីចឹងអភិបាលខេត្ត ឯកឧត្តម វ៉ី សំណាង គាត់យកចិត្តទុកដាក់លើអាការងារហ្នឹង»។
បើតាមលោក នុត សវនា គិតត្រឹមថ្ងៃទី១ ខែមិថុនានេះ ការចាក់វ៉ាក់សាំងការពារជំងឺកូវីដ-១៩ ជូនដល់អ្នកជាប់ឃុំដូសទី២ បានប្រមាណជា៣០% ឬប្រមាណជាង១១ ០០០នាក់ ក្នុងចំណោមអ្នកជាប់ឃុំសរុបនៅទូទាំងប្រទេសជិត៤០ ០០០ នាក់។
ទោះជាយ៉ាងនេះក្តី អនុប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ លោក អំ សំអាត បានថ្លែងថា ដល់ពេលហើយដែលរដ្ឋាភិបាលនិងភាគីពាក់ព័ន្ធពិចារណាក្នុងការដោះលែងអ្នកទោសស្រាលៗឬជនជាប់ឃុំបណ្តោះអាសន្នដើម្បីរង់ចាំការកាត់ទោស ដើម្បីកាត់បន្ថយភាពចង្អៀតណែនក្នុងពន្ធនាគារ។
លោកថ្លែងបញ្ជាក់ថា៖ «បានជាយើងធ្វើការខាងសិទ្ធិមនុស្សហ្នឹង យើងគិតថា វាគួរតែដល់ពេលដែលរដ្ឋាភិបាល តុលាការ និងស្ថាប័នពាក់ព័ន្ធ ពិចារណាហើយ ទាក់ទងការកាត់បន្ថយភាពចង្អៀតណែននៅតាមពន្ធនាគារ ពីព្រោះរឿងដែលយើងបានលើកនេះជារឿងយូរមកហើយ តាំងពីមិនទាន់មានការរីករាលដាលឬការឆ្លងជំងឺកូវីដ-១៩ក្នុងពន្ធនាគារ។ ហើយឥលូវយើងឃើញថា ចាប់ផ្តើមបណ្តើរៗហើយ ហើយប្រសិនជាយើងអូសបន្លាយ មិនបានគិតគូរទេ ហានិភ័យនឹងកើតឡើងខ្ពស់ ហើយវាជាបញ្ហាប្រឈមសម្រាប់ពន្ធនាគារហ្នឹងវាចេះតែបន្តទៅទៀត»។
យើងតាមរបាយការណ៍របស់អង្គការលើកលែងទោសអន្តរជាតិ (Amnesty International) និងអង្គការឃ្លាំមើលសិទ្ធិមនុស្សអន្តរជាតិ (Human Rights Watch) កាលពីថ្ងៃទី២៣ ខែឧសភា បានឱ្យដឹងថា យ៉ាងហោចណាស់មានអ្នកជាប់ឃុំប្រមាណជា៣៥% នៃចំនួនអ្នកជាប់ឃុំសរុប៣៩ ០០០នាក់នៅក្នុងពន្ធនាគារទូទាំងប្រទេស គឺជាអ្នកជាប់ឃុំបណ្តោះអាសន្នដើម្បីរង់ចាំការសវនាការកាត់ទោស៕
