មន្ត្រីសង្គមស៊ីវិលនិងសកម្មជនបរិស្ថានបារម្ភពីការបាត់បង់ព្រៃកោងកាងនិងដីព្រែកនៅខេត្តកោះកុង ខណៈបទល្មើសទាំងនេះនៅតែបន្តកើតមាន ហើយការទប់ស្កាត់របស់អាជ្ញាធរពុំមានប្រសិទ្ធភាពនៅឡើយ។
ការព្រួយបារម្ភរបស់មន្ត្រីសង្គមស៊ីវិលនិងសកម្មជនបរិស្ថាននេះ ក្រោយមានការផ្សាយតាមបណ្តាញសង្គមកាលពីសប្តាហ៍មុននេះថា តំបន់ដីព្រែករាប់រយម៉ែត្រនៅក្រុងខេមរភូមិន្ទ និងព្រៃកោងកាងជាង២០០ហិកតានៅស្រុកគិរីសាគរ ខេត្តកោះកុង ត្រូវបានជនខិលខូចចាក់ដីលុបនិងទន្ទ្រានយកធ្វើកម្មសិទ្ធិដោយខុសច្បាប់។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា តាមព័ត៌មានដែលលោកទទួលបាន គឺមួយរយៈចុងក្រោយនេះមានការចាក់ដីរំលោភចូលឆ្នេរសមុទ្រនិងការទន្ទ្រានយកដីព្រៃកោងកាងកើតមានស្ទើរគ្រប់កន្លែងនៃខេត្តកោះកុង។ លោកថា សកម្មភាពល្មើសទាំងនោះ គឺអាជ្ញាធរពុំបានចាត់វិធានការច្បាប់ទៅជនល្មើសឱ្យមានប្រសិទ្ធភាពនោះឡើយ។
មន្ត្រីសិទ្ធិមនុស្សរូបនេះឱ្យដឹងថា អ្នកដែលធ្វើសកម្មភាពរំលោភយកឆ្នេរសមុទ្រនិងព្រៃកោងកាងភាគច្រើនជាអ្នកមានលុយនិងមានអំណាច។ លោក ហ៊ួរ អ៊ីន បារម្ភពីការបាត់បង់យ៉ាងឆាប់រហ័សនូវទ្រព្យសម្បត្តិសាធារណៈរបស់រដ្ឋទាំងនេះ ប្រសិនបើអាជ្ញាធរពាក់ព័ន្ធបណ្តែតបណ្តោយមិនចាត់វិធានការឱ្យបានតឹងរ៉ឹងទេនោះ។
លោកបន្ថែមថា៖ «កាលណាអត់មានចំណាត់ការតាមផ្លូវច្បាប់ឱ្យបានតឹងរ៉ឹង អ៊ីចឹងករណីការលុបព្រែក ការកាប់ព្រៃកោងកាងធ្វើជាកម្មសិទ្ធិឯកជនហ្នឹង វានៅតែបន្តកើតមាន មិនអាចបញ្ឈប់អំពើល្មើសច្បាប់ទាំងហ្នឹងបានទេ បើកាលណាការអនុវត្ត [ច្បាប់] នៅមានភាពធូររលុងបែបនេះ។ ហើយកាលណាបណ្តែតបណ្តោយឱ្យមានការបំផ្លិចបំផ្លាញអ៊ីចឹង នៅពេលខាងមុខ យើងនឹងលែងស្គាល់អ្វីទៅជាព្រៃការពារនិងអ្វីជាចំណីព្រែកទេ វាបានរួមតូចៗដោយអ្នកមានលុយមានអំណាចរំលោភយក»។
មន្រ្តីជាន់ខ្ពស់ផ្នែកតស៊ូមតិ នៃសមាគមបណ្តាញយុវជនកម្ពុជា (CYN) លោក សាន់ ម៉ាឡា មានប្រសាសន៍ថា ករណីបទល្មើសធនធានធម្មជាតិទាំងព្រៃឈើ ព្រៃកោងកាង តំបន់ព្រែក និងឆ្នេរសមុទ្រ នៅតែបន្តកើតមានដោយមិនអាចទប់ស្កាត់បាន ដោយសារកម្សោយក្នុងការគ្រប់គ្រងនិងទប់ស្កាត់របស់អាជ្ញាធរពាក់ព័ន្ធ ជាពិសេសមន្ទីរបរិស្ថានដែលជាសេនាធិការរបស់ក្រសួងបរិស្ថាន។ ហើយមួយទៀត បញ្ហាធ្វេសប្រហែសឬការគប់គិតគ្នាប្រព្រឹត្តអំពើពុករលួយរវាងអាជ្ញាធរមូលដ្ឋានិងជនល្មើសផងដែរ។
លោកបន្ថែមថា៖ «លោកបន្ថែមថា សព្វថ្ងៃនេះ យើងមើលឃើញថា បន្ទាប់ពីក្រសួងបរិស្ថានរឹតត្បិតមកលើសកម្មភាពអ្នកការពារ [បរិស្ថាន] គឺបទល្មើសគ្រប់ប្រភេទ រាប់ទាំងការកាប់បំផ្លាញព្រៃឈើ ការទន្ទ្រានយកព្រៃកោងកាង ការចាក់ដីលុបព្រែកឆ្នេរសមុទ្រ បានបន្តកើតមានជាហូរហែគួរឱ្យព្រួយបារម្ភមែនទែន។ ដូច្នេះ យើងទាមទារឱ្យក្រសួងបរិស្ថានធ្វើការបើកចំហ អនុញ្ញាតឱ្យគ្រប់ភាគីពាក់ព័ន្ធ ជាពិសេសសហគមន៍អាចចូលរួមចំណែកក្នុងដំណើរអភិរក្សធនធានធម្មជាតិរបស់ប្រទេសយើងទាំងអស់គ្នា»។
អភិបាលរងខេត្តកោះកុង លោក សុខ សុទ្ធី បានទទួលស្គាល់ថា មានបទល្មើសចាក់ដីរំលោភព្រែកនិងមានការទន្ទ្រានយកដីព្រៃកោងកាងពិតប្រាកដមែន ប៉ុន្តែមានតិចតួចប៉ុណ្ណោះ ដែលអាជ្ញាធរខេត្តកំពុងតែមានវិធានការទប់ស្កាត់។
អភិបាលរងខេត្តរូបនេះបានច្រានចោលចំពោះការផ្សព្វផ្សាយតាមបណ្តាញសង្គម ដែលថា ព្រៃកោងកាងជាង២០០ហិកតានៅភូមិព្រែកខ្សាច់ ឃុំព្រែកខ្សាច់ ស្រុកគិរីសាគរ កំពុងរងការកាប់ទន្ទ្រានថ្មី។ លោកថា ករណីនេះបានកើតឡើងតាំងពីឆ្នាំ២០១៨ និងឆ្នាំ២០១៩ ហើយអាជ្ញាធរដោះស្រាយចប់និងបានបញ្ជូនជនល្មើសមួយចំនួនទៅតុលាការផងដែរ។
លោកបន្ថែមថា៖ «ខ្ញុំមិនដឹងថា មូលហេតុអីបានជាសារព័ត៌មានមួយចំនួនលើកយកបញ្ហាហ្នឹងមកនិយាយម្តងទៀត។ ហើយឃើញថ្មីៗនេះ និយាយរួម ២ថ្ងៃនេះ និយាយរឿងហ្នឹងប្រហែលជាង១០០សារព័ត៌មាន។ ហើយរឿងនេះ រឿងចាស់តាំងពីឆ្នាំ២០១៨ ឆ្នាំ២០១៩ម្ល៉េះ ហើយខាងជំនាញបានកសាងសំណុំរឿងបញ្ជូនទៅ [ទៅតុលាការ] ថែមទៀត»។
ប្រធានមន្ទីរបរិស្ថានខេត្តកោះកុង លោក ហ៊ុន ម៉ារាឌី មានប្រសាសន៍ថា ករណីលុបព្រែកនិងការកាប់ទន្ទ្រានយកដីព្រៃកោងកាងមួយចំនួនជារឿងចាស់ ប៉ុន្តែយ៉ាងណា លោកថា មន្ទីរបរិស្ថានខេត្តកំពុងស្រាវជ្រាវនិងធ្វើការងារលើរឿងទាំងនោះ។
លោកបន្ថែមថា៖ «កិច្ចការងារនេះ ខ្ញុំកំពុងតែស្រាវជ្រាវ។ ខ្ញុំបានចាត់ឱ្យមន្ត្រីរបស់ខ្ញុំចុះពិនិត្យមើលផ្ទាល់ដល់ទីតាំងនោះហើយ»។
ក្នុងពិធីបុណ្យសមុទ្រលើកទី៨ នៅខេត្តកំពត កាលពីខែធ្នូ ឆ្នាំ២០១៩ លោកនាយករដ្ឋមន្រ្តី ហ៊ុន សែន បានថ្លែងថា កម្ពុជាត្រូវការពារឆ្នេរសមុទ្រឱ្យបានគង់វង្ស ដោយមិនត្រូវឱ្យមានការចាក់ដីរំលោភចូលសមុទ្រឬកាប់ព្រៃកោងកាងដើម្បីទន្ទ្រានយកដីធ្វើជាកម្មសិទ្ធិនោះឡើយ៕