អាជ្ញាធរខេត្តកំពង់ស្ពឺ សម្រេចទុកពេល១សប្តាហ៍ទៀតឱ្យក្រុមហ៊ុនឯកជនដែលផ្សព្វផ្សាយផលិតផលគ្រឿងស្រវឹង ដើម្បីរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកយីហោដែលជ្រកក្រោមស្លាកស្រាបៀរឱ្យអស់ចេញពីខេត្ត ដើម្បីរៀបចំសោភ័ណភាពខេត្តកំពង់ស្ពឺ។
ការបញ្ជាឱ្យរុះរើនេះ ធ្វើឡើងបន្ទាប់ពីមានកិច្ចប្រជុំមួយកាលពីថ្ងៃទី២០ ខែឧសភា រដ្ឋបាលខេត្តកំពង់ស្ពឺបានដាក់ចេញនូវវិធានការរដ្ឋបាលរបស់ខ្លួន ពាក់ព័ន្ធនឹងការផ្សាយពាណិជ្ជកម្មគ្រឿងស្រវឹងនេះ ដោយបានណែនាំទៅពលរដ្ឋរុះរើស្លាកផ្សាយពាណិជ្ជកម្មគ្រឿងស្រវឹងក្នុងរយៈពេល១សប្តាហ៍។
អភិបាលខេត្តកំពង់ស្ពឺ លោក វ៉ី សំណាង ប្រាប់ វីអូឌី នៅថ្ងៃទី៣០ ខែឧសភា ឆ្នាំ២០២១នេះថា តាមគម្រោង អាជ្ញាធរទុកពេលឱ្យប្រជាពលរដ្ឋដែលមានផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកពាណិជ្ជកម្មគ្រឿងស្រវឹងនៅតាមដងផ្លូវ ត្រូវរុះរើចេញវិញយ៉ាងយូរ១សប្តាហ៍ ដើម្បីរៀបចំសោភ័ណភាពខេត្តកំពង់ស្ពឺ។
អភិបាលខេត្តរូបនេះបញ្ជាក់ថា ១សប្តាហ៍កន្លងមកនេះ ពលរដ្ឋបានរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកយីហោដែលជ្រកក្រោមស្លាកស្រាបៀរជិតអស់ហើយ ខណៈផ្ទាំងប៉ាណូដែលក្រុមហ៊ុនលើកនៅតាមដងផ្លូវមួយចំនួននៅមិនទាន់រុះរើចេញនៅឡើយ។
ករណីនេះ អភិបាលខេត្តរូបនោះអះអាងថា រដ្ឋបាលខេត្តសម្រេចទុកពេល១សប្តាហ៍បន្ថែមទៀត ដើម្បីឱ្យក្រុមហ៊ុនស្រាបៀរទាំងនោះរុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកយីហោដែលជ្រកក្រោមស្លាកស្រាបៀរឱ្យអស់ចេញពីខេត្តផងដែរ។
លោកមានប្រសាសន៍ថា៖ «អាជ្ញាធរយើងមិនទាន់រុះរើបានមួយស្លាកទេ ពីព្រោះយើងបញ្ជាឱ្យគេរុះរើផ្ទាំងប៉ាណូ។ គ្រាន់តែមិនទាន់បានបញ្ជាផង ប្រជាពលរដ្ឋគាត់រើខ្លួនគាត់ហើយ មានតែក្រុមហ៊ុនទេដែលគាត់សុំពេល [១សប្តាហ៍] ទៀត ដោយសារតែអាហ្នឹង អាជ្ញាធរទុកពេលឱ្យគាត់១សប្តាហ៍ឱ្យរុះរើឱ្យអស់ ហើយក្រុមហ៊ុនរកមធ្យោបាយជួលកម្មករ យើងនិយាយមួយម៉ាត់ វាស្រួលទេ តែគ្នាអ្នកធ្វើ បានគាត់លំបាក»។
យ៉ាងណា អភិបាលខេត្តរូបនេះបញ្ជាក់ថា បើសិនជាម្ចាស់ផ្ទាំងប៉ាណូជ្រកក្រោមផ្លាកផ្សាយពាណិជ្ជកម្មគ្រឿងស្រវឹង មិនធ្វើការរុះរើតាមការណែនាំទេ អាជ្ញាធរនឹងចុះរុះរើដោយផ្ទាល់តែម្តង។
មន្ត្រីឃ្លាំមើលសិទ្ធិមនុស្សលីកាដូប្រចាំខេត្តកំពង់ស្ពឺ លោក អ៊ុង សាមិត្ត មានប្រសាសន៍ថា អាជ្ញាធរទុកពេលឱ្យក្រុមហ៊ុន រុះរើផ្ទាំងប៉ាណូផ្សាយពាណិជ្ជកម្មគ្រឿងស្រវឹងឬស្លាកយីហោដែលជ្រកក្រោមស្លាកស្រាបៀរចំនួន១សប្តាហ៍បន្ថែមទៀត ប្រហែលជាក្រុមហ៊ុនមិនអាចរុះរើអស់បាននៅទូទាំងខេត្តនោះទេ ដោយសារផ្ទាំងប៉ាណូនោះមានច្រើននិងត្រូវប្រើកម្លាំងកម្មករក៏ច្រើនផងដែរ។
លោកផ្តល់ជាអនុសាសន៍ថា ដើម្បីទប់ស្កាត់ការលក់គ្រឿងស្រវឹង និងការពារសុខភាពពលរដ្ឋនៅក្នុងខេត្ត អាជ្ញាធរត្រូវបិទកុំឱ្យមានការលក់គ្រឿងស្រវឹង ទើបទទួលផលវិជ្ជមានខ្ពស់ជាងការបញ្ជាឱ្យរុះរើផ្ទាំងប៉ាណូ។
លោកមានប្រសាសន៍ថា៖ «បើសិនជាយើងចង់បន្ថយការផឹកស៊ី ការជួបជុំ អាជ្ញាធរអាចកាត់បន្ថយការលក់ដូរស្រាទៅ វាអាចទប់ស្កាត់បានហើយ។ បើគ្រាន់តែឱ្យរុះរើចេញអ៊ីចឹង វាទប់ស្កាត់បានខ្លះដែរ តែមិនបានច្រើនដូចបិទមិនឱ្យលក់ដូរស្រាទេ។
យុទ្ធនាការណែនាំឱ្យពលរដ្ឋនិងក្រុមហ៊ុនឯកជនរុះរើស្លាកពាណិជ្ជកម្មស្រាឬយីហោដែលជ្រកក្រោមស្លាកស្រាបៀរនេះ ទើបតែមាននៅខេត្តកំពង់ស្ពឺមួយប៉ុណ្ណោះ ខណៈខេត្តផ្សេងទៀតនៅមិនទាន់អនុវត្តវិធានការនេះនៅឡើយទេ ស្របពេលក្រុមសង្គមស៊ីវិលមួយចំនួនចង់ឃើញវិធានការផ្អាកការផ្សព្វផ្សាយគ្រឿងស្រវឹងបែបនេះធ្វើឡើងនៅទូទាំងប្រទេសតែម្តង។
មជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានបង្ហាញពីលទ្ធផលនៃការស្ទង់មតិរបស់ខ្លួននៅអំឡុងឆ្នាំ២០១៧ ដោយរកឃើញថា មានមនុស្សប្រមាណ៩០ភាគរយបានឃើញការផ្សព្វផ្សាយពីផលិតផលគ្រឿងស្រវឹងនៅតាមមធ្យោបាយផ្សេងៗ ហើយក្នុងចំណោមអ្នកដែលបានឃើញការផ្សព្វផ្សាយនោះ ប្រមាណ៧០ភាគរយ ចង់សាកល្បងប្រើប្រាស់គ្រឿងស្រវឹងផងដែរ៕
