ក្រុមសាច់ញាតិអះអាងថា មានអ្នកទោសនយោបាយនិងអ្នកទោសមនសិការចំនួន៤នាក់បានឆ្លងជំងឺកូវីដ-១៩ ស្របពេលខាងពន្ធនាគារកំពុងតែរឹតបន្ដឹងការចេញ-ចូលសួរសុខទុក្ខអ្នកជាប់ឃុំពីសំណាក់សាច់ញាតិនៅក្នុងពន្ធនាគារ។
អ្នកស្រី ហង្ស ផារី ភរិយារបស់លោក សួង សុភ័ណ្ឌ ប្រធានគណបក្សខ្មែរឈ្នះ ឱ្យដឹងនៅថ្ងៃសុក្រនេះថា អ្នកស្រីបានទទួលដំណឹងកាលពីថ្ងៃទី២៦ ខែឧសភា ឆ្នាំ២០២១នេះ ថាប្តីរបស់អ្នកស្រីបានឆ្លងជំងឺកូវីដ-១៩ ថែមទាំងមិនបានដឹងពីប្រភពនៃការឆ្លងជំងឺនេះដែរ។
ករណីនេះ អ្នកស្រីបានបង្ហាញក្តីបារម្ភនៅពេលទទួលបានដំណឹងនេះ ខណៈអ្នកស្រីខានបានជួបសួរសុខទុក្ខស្វាមីរបស់ខ្លួនជាច្រើនខែមកហើយ ក្រោយពីខាងពន្ធនាគារបានរឹតបន្តឹងមិនឱ្យមានការចេញចូលសួរសុខទុក្ខអ្នកជាប់ឃុំ។
អ្នកស្រីបន្តថា៖ «ខាងពន្ធនាគារហ្នឹង គេមិនបានទាក់ទងឱ្យខ្ញុំបានដឹងពីព័ត៌មានប្តីរបស់ខ្ញុំហ្នឹងវាចូលជាង៣ខែហើយ។ ខ្ញុំអត់ដែលបានទទួលដំណឹងពីគាត់ ទើបតែដឹង គឺដឹងពេលគាត់ឆ្លងកូវីដតែម្តង»។
ព័ត៌មានបឋមដែល វីអូឌី ទទួលបាននៅថ្ងៃនេះ ឱ្យដឹងថា មានអ្នកទោសនយោបាយនិងអ្នកទោសមនសិការចំនួន៤នាក់បានឆ្លងជំងឺកូវីដ-១៩ នៅពន្ធនាគារព្រៃស ខណៈមានអ្នកទោសផ្សេងទៀតត្រូវបានរាយការណ៍មកថា ក៏កំពុងតែឆ្លងជំងឺនេះដែរ។
អ្នកជាប់ឃុំក្នុងពន្ធនាគារព្រៃសទាំង៤នាក់ដែលឆ្លងជំងឺកូវីដ-១៩នោះ រួមមាន លោក សួង សុភ័ណ្ឌ ប្រធានគណបក្សខ្មែរឈ្នះ, លោក មាន ព្រហ្មមុន្នី សកម្មជនបរិស្ថាន ត្រូវបានចាប់ខ្លួននៅអំឡុងពេលតវ៉ាឱ្យមានការដោះលែងលោក រ៉ុង ឈុន នៅមុខសាលាដំបូងរាជធានីភ្នំពេញ, លោក តុន និមល និងលោក ចាន់ សារ៉ាត់ ជាអតីតមន្ត្រីនិងសកម្មជនគណបក្សសង្គ្រោះជាតិ។
អ្នកស្រី ជ័យ ស្រីវី ភរិយារបស់លោក តុន និមល ប្រាប់ថា អ្នកស្រីបានទទួលដំណឹងពីខាងពន្ធនាគារកាលពីថ្ងៃម្សិលមិញថា ប្តីអ្នកស្រីឆ្លងជំងឺកូវីដ-១៩។ ករណីនេះ អ្នកស្រីស្នើឱ្យមានការដោះលែងលោក តុន និមល ឱ្យនៅក្រៅឃុំជាបណ្តោះអាសន្ន ដើម្បីឱ្យប្តីអ្នកស្រីទទួលបានការព្យាបាលមួយដ៏ត្រឹមត្រូវ។
អ្នកស្រីបន្តថា៖ «គេចាប់ប្តីខ្ញុំដែលអត់មានកំហុសហើយយកទៅឃុំឃាំង ហើយស្រាប់តែគាត់ឆ្លងកូវីដហ្នឹងទៀត។ ឥលូវនេះ ខ្ញុំកំពុងថាស្នើសុំឱ្យគេពិនិត្យពីរឿងហ្នឹង ថាសុំឱ្យបាននៅក្រៅឃុំដើម្បីបានព្យាបាល»។
វីអូឌី ពុំអាចសុំការបញ្ជាក់ពីអគ្គនាយករង និងជាអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានទេ នៅថ្ងៃនេះ។
នាយករងអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា លោកនៅពុំទាន់បានទទួលព័ត៌មាននេះច្បាស់នៅឡើយ ប៉ុន្តែលោកបង្ហាញក្តីបារម្ភជុំវិញការឆ្លងរាលដាលជំងឺកូវីដ-១៩ នៅក្នុងពន្ធនាគារ។ ក្នុងនាមអង្គការមិនមែនរដ្ឋាភិបាល លោកថា កំពុងតាមដាននិងអង្កេតករណីនេះ ខណៈបញ្ហានេះជាហានិភ័យខ្ពស់សម្រាប់ជនជាប់ឃុំ។
លោកបន្តថា៖ «យើងធ្លាប់ផ្តល់ជាអនុសាសន៍សម្រាប់ពន្ធនាគារហើយ ថាធ្វើម៉េចកាត់បន្ថយភាពចង្អៀតណែន ដោយទី១ យើងមើលទៅលើការឃុំខ្លួនបណ្តោះអាសន្ននៃការចោទប្រកាន់ គួរណាស់តែអនុគ្រោះអនុវត្តទៅលើសិទ្ធិសេរីភាពលើជនជាប់ចោទជាធំ មានន័យថា ជ្រើសរើសឱ្យនៅក្រៅឃុំបណ្តោះអាសន្នសិន ជាជាងការឃុំខ្លួន ទាក់ទងទៅនឹងបទល្មើសដែលមិនមែនជាបទល្មើសធ្ងន់ធ្ងរ ដូចជាបទល្មើសមជ្ឈិមកម្រិតស្រាលជាដើម»។
គួរបញ្ជាក់ថា ជំងឺកូវីដ-១៩ បានឆ្លងរាលដាលចូលក្នុងពន្ធនាគារចំនួន៣នៅកម្ពុជា ក្នុងនោះរួមមាន ពន្ធនាគារខេត្តកណ្តាល មានអ្នកជាប់ឃុំនិងមន្ត្រីពន្ធនាគារជាង១០០នាក់ ពន្ធនាគារខេត្តព្រះសីហនុ មានអ្នកជាប់ឃុំចំនួន៣៤នាក់ និងពន្ធនាគារព្រៃស រាជធានីភ្នំពេញ មានអ្នកជាប់ឃុំចំនួន១៨នាក់ បានឆ្លងជំងឺនេះ។
ចំពោះមូលហេតុនៃការឆ្លងជំងឺកូវីដ-១៩ ទៅក្នុងពន្ធនាគារនេះវិញ លោក នុត សវនា បញ្ជាក់ថា បណ្តាលមកពីការគ្រប់គ្រងការចេញចូលរបស់អ្នកជាប់ឃុំនិងមន្ត្រីពន្ធនាគារ។ តែយ៉ាងណា អគ្គនាយកដ្ឋានពន្ធនាគារ ចាប់តាំងពីដើមខែនេះ បានដាក់ចេញនូវយុទ្ធនាការចាក់វ៉ាក់សាំងប្រឆាំងកូវីដ-១៩ សម្រាប់អ្នកជាប់ឃុំទាំងអស់នៅក្នុងពន្ធនាគារទូទាំងប្រទេស៕