មន្ត្រីពន្ធនាគារ និងអាជ្ញាធរខេត្តកណ្ដាល បានអះអាងថា ពួកគេបានគ្រប់គ្រងសភាពការណ៍ជំងឺកូវីដ-១៩នៅក្នុងពន្ធនាគារខេត្តកណ្តាលរួចរាល់ហើយ បន្ទាប់ពីការរកឃើញអ្នកជាប់ឃុំនិងមន្ត្រីពន្ធនាគារចំនួន១០៦នាក់បានឆ្លងជំងឺកូវីដ-១៩។
អគ្គនាយករង និងជាអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានថ្លែងប្រាប់ វីអូឌី នៅថ្ងៃពុធនេះថា ក្រោយពីការផ្ទុះឡើងនូវជំងឺកូវីដ-១៩នៅក្នុងពន្ធនាគារខេត្តកណ្តាល កាលពីយប់ថ្ងៃទី២៥ ខែឧសភាមក អាជ្ញាធរបានបញ្ជូនគ្រូពេទ្យនិងអ្នកជំនាញទៅព្យាបាលដល់ពន្ធនាគារតែម្តង។
លោកមានប្រសាសន៍យ៉ាងដូច្នេះថា៖ «ខាងរដ្ឋបាលខេត្តគាត់ចាត់តាំងអ្នកជំនាញសុខាភិបាល ហើយនិងអង្គភាពពាក់ព័ន្ធហ្នឹងមកជួយអស់ហើយ អ៊ីចឹងសភាពការណ៍វាអត់អីទេ»។
កាលពីយប់ថ្ងៃទី២៥ ខែឧសភា អាជ្ញាធរខេត្តកណ្តាល រួមមាន ស្នងការនគរបាលខេត្ត លោក ឈឿន សុចិត្រ និងមន្ត្រីពន្ធនាគារខេត្តកណ្តាលជាច្រើននាក់បានចុះទៅរៀបចំចាត់ចែងទណ្ឌិតនៅក្នុងពន្ធនាគារខេត្តកណ្តាលភ្លាមៗ បន្ទាប់ពីអាជ្ញាធរបានរកឃើញថា មានទណ្ឌិតចំនួន១០៣នាក់ និងមន្ត្រីពន្ធនាគារចំនួន៣នាក់ មានវិជ្ជមានវីរុសកូវីដ-១៩។
ប្រធានពន្ធនាគារខេត្តកណ្តាល លោក ចាត ស៊ីនាង បានបដិសេធពីវិធានការជម្លៀសអ្នកទោសឱ្យចេញទៅព្យាបាលនៅខាងក្រៅ ខណៈអាជ្ញាធរបានគ្រប់គ្រងទៅលើវិធានការព្យាបាលទណ្ឌិតនៅក្នុងពន្ធនាគាររួចរាល់ហើយ ប៉ុន្តែលើកលែងតែករណីឈឺធ្ងន់ធ្ងរ។
លោកមានប្រសាសន៍យ៉ាងដូច្នេះថា៖ «ចំនួននេះគឺដូចខ្ញុំប្រាប់អ៊ីចឹងថា ខាងពេទ្យគេជាអ្នកធ្វើ! អ៊ីចឹងបើចង់ដឹងព័ត៌មាននេះ សូមទាក់ទងទៅឯកឧត្តមអភិបាលខេត្ត បាទ! បាទ! អត់មានទេ! [ជម្លៀសអ្នកទោសចេញក្រៅ] បើករណីធ្ងន់ធ្ងរ គេបញ្ជូនទៅពេទ្យហើយ»។
ចំណែកអភិបាលខេត្តកណ្តាល លោក គង់ សោភណ្ឌ មិនចង់អត្ថាធិប្បាយច្រើនឡើយលើករណីអ្នកជាប់ឃុំឆ្លងជំងឺកូវីដ-១៩នៅក្នុងពន្ធនាគារខេត្តនេះ។ ប៉ុន្តែលោកបានឆ្លើយប្រាប់ វីអូឌី យ៉ាងខ្លីថា អាជ្ញាធរអាចគ្រប់គ្រងសភាពការណ៍បានល្អហើយនៅពេលនេះ។
ពន្ធនាគារខេត្តកណ្តាល ជាពន្ធនាគារទី៣ ដែលជំងឺកូវីដ-១៩បានឆ្លងទៅលើអ្នកជាប់ឃុំ បន្ទាប់ពីពន្ធនាគារខេត្តព្រះសីហនុ មានអ្នកជាប់ឃុំចំនួន៣៤នាក់ និងពន្ធនាគារព្រៃស រាជធានីភ្នំពេញ មានអ្នកជាប់ឃុំចំនួន១៨នាក់ បានឆ្លងជំងឺកូវីដ-១៩។
ចំពោះមូលហេតុនៃការឆ្លងជំងឺកូវីដ-១៩ទៅក្នុងពន្ធនាគារនេះវិញ លោក នុត សវនា អគ្គនាយករង និងជាអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ បញ្ជាក់ថា បណ្តាលមកពីការគ្រប់គ្រងការចេញចូលរបស់អ្នកជាប់ឃុំនិងមន្ត្រីពន្ធនាគារ។
ជាក់ស្តែង ករណីនៅក្នុងពន្ធនាគារខេត្តព្រះសីហនុ លោកថា ប្រភពចម្លងជំងឺកូវីដ-១៩ បានចេញមកពីអ្នកទោសជនជាតិចិនតៃវ៉ាន់ម្នាក់ដែលអាជ្ញាធរបានធ្វេសប្រហែសក្នុងការដាក់ឱ្យធ្វើចត្តាឡីស័ក មុននឹងបញ្ចូលទៅក្នុងពន្ធនាគារ ខណៈករណីនៅពន្ធនាគារព្រៃសវិញ អាជ្ញាធរបានរកឃើញថា ខ្សែចម្លងជំងឺកូវីដ-១៩នេះគឺជាប់ពាក់ព័ន្ធនឹងមន្ត្រីអនុរក្សពន្ធនាគារតែម្តង។ ចំណែកប្រភពចម្លងនៅក្នុងពន្ធនាគារខេត្តកណ្តាលកាលពីយប់ថ្ងៃទី២៥ ខែឧសភាវិញ នៅមិនទាន់មានការបញ្ជាក់នៅឡើយទេ។
លោក នុត សវនា បានគូសបញ្ជាក់យ៉ាងដូច្នេះថា៖ «កិច្ចការនេះ យើងភ្លាមៗពេក យើងស្រាវជ្រាវអត់ទាន់សន្មតច្បាស់ទេ [ករណីឆ្លងពន្ធនាគារខេត្តកណ្តាល] អ៊ីចឹងយើងឃើញបញ្ហាជាចម្បង គឺការមិនបានយកសំណាកទៅពិនិត្យ។ ហើយម៉្យាងទៀត កន្លងមក វាមានមន្ត្រីយើងខ្លះគាត់រស់នៅក្នុងសហគមន៍ គាត់ប្រាស្រ័យទាក់ទងឬធ្វើដំណើរទៅកន្លែងផ្សេងៗ ហើយក្រោយមក ទើបគេប្រកាសស្រាវជ្រាវរកអ្នកពាក់ព័ន្ធ ដល់អ៊ីចឹងវាមានដោយមន្ត្រីយើងម្នាក់ពីរនាក់ទៅ ហ្នឹងនៅមណ្ឌលអប់រំកែប្រែទី១»។
កាលពីថ្ងៃទី២៣ ខែឧសភា អង្គការសិទ្ធិមនុស្សអន្តរជាតិធំៗចំនួនពីរ គឺអង្គការលើកលែងទោសអន្តរជាតិ (Amnesty International) និងអង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចេញសេចក្តីថ្លែងការណ៍រួមមួយ ដោយអំពាវនាវឱ្យរដ្ឋាភិបាលកម្ពុជាដោះលែងអ្នកជាប់ឃុំដែលមានបទល្មើសស្រាលៗ ឬអ្នកជាប់ឃុំដែលកំពុងរង់ចាំការកាត់ទោស ឱ្យនៅក្រៅឃុំជាបណ្តោះអាសន្នសិន ដើម្បីកាត់បន្ថយភាពចង្អៀតណែននៅក្នុងពន្ធនាគារ និងក្រោយពីដឹងថា ជំងឺកូវីដ-១៩បានឆ្លងចូលទៅក្នុងពន្ធនាគាររួចទៅហើយ៕