ជនជាតិដើមភាគតិកួយនៅខេត្តព្រះវិហារ ចោទក្រុមហ៊ុនឯកជនមួយថា បានដាក់គ្រឿងចក្រឈូសឆាយយកដីធ្លីរបស់ពួកគេ និងជាតំបន់បុរាណមួយកន្លែងស្ថិតក្នុងឃុំរមណីយ ស្រុករវៀង ដោយពុំមានការទប់ស្កាត់ពីអាជ្ញាធរ ប៉ុន្តែតំណាងក្រុមហ៊ុនបានបដិសេធ។
ពលរដ្ឋ១២នាក់ តំណាងឱ្យ៣៣គ្រួសារ នៅថ្ងៃទី២៥ ខែឧសភា ឆ្នាំ២០២១នេះ បាននាំគ្នាទៅសាសាស្រុករវៀង ដើម្បីសួររឿងក្រុមហ៊ុនដាក់គ្រឿងចក្រឈូសឆាយតំបន់ប្រវត្តិសាស្ត្រមួយកន្លែង និងដើម្បីរកអន្តរាគមន៍ពីអភិបាលស្រុក ឱ្យជួយដោះស្រាយបញ្ហាដីធ្លីរបស់ពួកគេ។
លោក ខាត់ ខុម ជាជនជាតិដើមភាគតិចកួយ ដែលអះអាងថាជាតំណាងប្រជាពលរដ្ឋ បានប្រាប់ វីអូឌី ថា ដីស្រែចម្ការវិលជុំ និងដីព្រៃតំបន់បុរាណ សរុបប្រហែល៦០ហិកតា របស់ជនជាតិដើមភាគតិចកួយចំនួន៣៣គ្រួសារ នៅតំបន់សន្លុងត្នោត ស្ថិតក្នុងភូមិអូរពោធិ៍ ឃុំរមណីយ ត្រូវបានក្រុមហ៊ុនឯកជនមួយឈ្មោះ ហាក់ ប៊ុនថា បានដាក់គ្រឿងចក្រឈូសឆាយជាបន្តបន្ទាប់ ដោយពុំមានការទប់ស្កាត់និងដោះស្រាយផលប៉ះពាល់ជូនពលរដ្ឋឡើយ។
តំណាងពលរដ្ឋរូបនេះបន្តថា ប្រសិនបើអាជ្ញាធរមិនដោះស្រាយ ហើយក្រុមហ៊ុននៅតែបន្តឈូសឆាយប៉ះពាល់ដីធ្លីរបស់ពួកគាត់ទៀត ជនជាតិដើមភាគកួយទាំងនេះនឹងប្រឈមបញ្ហាជីវភាពរស់នៅ ដូចជា បាត់បង់អត្តសញ្ញាណ ប្រពៃណី មុខរបរ ការបាត់បង់ព្រៃឈើបម្រុងទុក កន្លែងកប់សព និងទីទួលសម្រាប់ឃ្វាលគោក្របីរបស់ពួកគាត់ ជាដើម។
លោកបន្ថែមថា៖ «យើងចង់ឱ្យក្រុមហ៊ុនហ្នឹងដកចេញទៅវិញ ព្រោះវាបានឈូសឆាយប៉ះពាល់ដល់ដីស្រែ ផលដំណាំផ្សេងៗរបស់ប្រជាពលរដ្ឋយើង។ ហើយការឈូសឆាយនេះទៀត វាក៏បានធ្វើឱ្យប៉ះពាល់ប្រពៃណីទំនៀមទម្លាប់របស់ជនជាតិដើមភាគតិចយើងដែលធ្លាប់គោរពផងដែរ»។
អ្នកស្រី ងូន ហ៊ាង អាយុ៥៣ឆ្នាំ ជាជនជាតិដើមភាគតិចកួយ និយាយថា ថ្មីៗនេះ ក្រុមហ៊ុនបានដាក់គ្រឿងចក្រឈូសឆាយដំណាំពោត ស្រូវពង្រោះ និងចម្ការវិលជុំរបស់អ្នកភូមិអស់ជាង២ហិកតា ដោយមិនបានដោះស្រាយសំណងជូនពលរដ្ឋឡើយ។
អ្នកស្រីបន្តថា ជនជាតិដើមភាគតិចកួយគ្មានមុខរបរអ្វីផ្សេងក្រៅពីការធ្វើស្រែ ដាំដំណាំចម្ការវិលជុំ និងរកអនុផលព្រៃឈើនោះទេ ហើយប្រសិនបើក្រុមហ៊ុនឈូលឆាយយកដីស្រែចម្ការអស់ គឺពួកគាត់នឹងជួបបញ្ហាជីវភាពជាក់ជាមិនខាន។
អ្នកស្រីបន្ថែមថា៖ «ស្រូវពនេចរនិងចម្ការវិលជុំរបស់ពួកខ្ញុំជនជាតិដើមភាគតិច គេឈូសជាន់អស់ អ៊ីចឹងខ្ញុំសុំឱ្យរដ្ឋាភិបាលជួយដោះស្រាយដល់ជនជាតិដើមភាគតិចពួកខ្ញុំផង។ ពួកខ្ញុំអត់មានអីសង្ឃឹមទេ ខ្ញុំគ្មានមុខរបរអ្វីទេ ១គ្រួសារមានដី២ទៅ៣ហិកតា ទុកគ្រាន់បង្កបង្កើនផលចិញ្ចឹមជីវិត ខ្ញុំកូនច្រើនណាស់ ១០នាក់ឯណោះ គ្នាបានអីស៊ី»។
អភិបាលស្រុករវៀង លោក ហោ ប៊ុនហួរ សុំមិនឆ្លើយពាក់ព័ន្ធករណីនេះទេ ដោយលោកឱ្យ វីអូឌី ចុះយកព័ត៌មានជាមួយអាជ្ញាធរដល់កន្លែងកើតហេតុផ្ទាល់តែម្តង។
លោក សែ លីណា ដែលអ្នកភូមិអះអាងថាជាមេការរបស់ក្រុមហ៊ុន ហាក់ ប៊ុនថា បានទទួលស្គាល់ថា រូបគាត់ជាមេការមើលការខុសត្រូវលើការឈូសឆាយដីធ្លីនៅឃុំរមណីយ ស្រុករវៀង ខេត្តព្រះវិហារ ពិតមែន ប៉ុន្តែលោកមិនប្រាប់ឈ្មោះក្រុមហ៊ុនដែលលោកធ្វើការងារឱ្យនោះទេ។ លោកបន្តថា ការឈូសឆាយរបស់ក្រុមហ៊ុននោះ គឺមិនបានប៉ះពាល់ទៅដល់ដីធ្លីរបស់ប្រជាពលរដ្ឋឡើយ។
លោកបន្ថែមថា៖ «ខ្ញុំអ្នកមើលការខុសត្រូវពីលើនេះ ការឈូសឆាយហ្នឹងមិនបានប៉ះពាល់ដីពលរដ្ឋទេ ស្រែគាត់នៅតែស្រែគាត់ដដែលតើ!»
នាយកប្រតិបត្តិអង្គការពន្លកខ្មែរ នៅខេត្តព្រះវិហារ លោក ប៉ិក សោភ័ណ្ឌ មានប្រសាសន៍ថា ទីតាំងដែលក្រុមហ៊ុន កំពុងឈូសឆាយនោះជាទីតាំងស្លដែកបុរាណ និងជាកន្លែងអ្នកភូមិជនជាតិដើមភាគតិចរស់នៅអាស្រ័យផល ដោយធ្វើស្រែធ្វើចម្ការវិលជុំ រួមទាំងកន្លែងរកផលអនុផលព្រៃឈើទៀតផង។
លោកបន្តថា តំបន់ដែលក្រុមហ៊ុនកំពុងធ្វើសកម្មភាពឈូសឆាយនោះ ជាតំបន់ប្រវត្តិសាស្ត្រមួយនិងជាតំបន់ហាមឃាត់មិនអាចឱ្យក្រុមហ៊ុនណាមួយទៅអភិវឌ្ឍនៅលើដីតំបន់នោះបានឡើយ។ បញ្ហានេះ លោកជំរុញឱ្យអាជ្ញាធរពន្លឿនការដោះស្រាយជូនប្រជាពលរដ្ឋឱ្យបានឆាប់ ដើម្បីកុំឱ្យមានការតវ៉ាផ្សេងៗកើតឡើង។
លោកបន្ថែមថា៖ «ជាការទទួលខុសត្រូវ អាជ្ញាធរនៅតំបន់ហ្នឹងគាត់បានដឹងច្បាស់ហើយថាតំបន់ហ្នឹងវាត្រូវបានហាមឃាត់ មិនអាចឱ្យក្រុមហ៊ុនសម្បទានសេដ្ឋកិច្ចណាទៅវិនិយោគនៅតំបន់ហ្នឹងបានទេ»៕