អាជ្ញាធររាជធានីភ្នំពេញ បន្តបិទផ្សារមិនរៀបរយទាំងអស់ដែលមានទីតាំងក្នុងរាជធានីភ្នំពេញ ខណៈផ្សាររដ្ឋត្រូវបានអនុញ្ញាតឱ្យបើកដំណើរការឡើងវិញនាសប្ដាហ៍ក្រោយ។
ថ្ងៃទី១៤ ខែឧសភា ឆ្នាំ២០២១ រដ្ឋបាលរាជធានីភ្នំពេញ សម្រេចបន្តផ្អាកដំណើរការផ្សាររដ្ឋនិងផ្សារមិនរៀបរយទាំងអស់ជាបណ្តោះអាសន្ន រយៈពេល៧ថ្ងៃទៀត បន្ទាប់ពីវិធានការនេះបានអនុវត្តរយៈពេល១៤ថ្ងៃរួចមកហើយ ចាប់តាំងពីថ្ងៃទី២៤ ខែមេសា ឆ្នាំ២០២១ រហូតមក ក្រោមហេតុផលថា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
លិខិតរដ្ឋបាលរាជធានីភ្នំពេញ នៅថ្ងៃទី២០ ខែឧសភា ឆ្នាំ២០២១ ឱ្យដឹងថា ដើម្បីបង្ការនិងទប់ស្កាត់ការឆ្លងរាលដាលនៃជំងឺកូវីដ-១៩ក្នុងសហគមន៍ អាជ្ញាធរមិនទាន់អនុញ្ញាតឱ្យផ្សារមិនរៀបរយទាំងអស់ក្នុងរាជធានីភ្នំពេញ បើកដំណើរការឡើងវិញនោះទេ។
បើតាមលិខិតដដែលបន្តថា ផ្សារមិនរៀបរយដែលអាជ្ញាធរមិនទាន់អនុញ្ញាតឱ្យបើកដំណើរការឡើងវិញទាំងនោះមានដូចជា ផ្សារក្រមួន ផ្សារចាត់តាំង ផ្សាររោងចក្រ ផ្សារសហគមន៍ ផ្សារក្នុងដីឡូត៍ឯកជន ផ្សារជុំវិញមន្ទីរពេទ្យ និងផ្សារតាមចិញ្ចើមផ្លូវ ជាដើម។
យ៉ាងណា លិខិតសាលារាជធានីភ្នំពេញនោះ ក៏បានសម្រេចអនុញ្ញាតឱ្យផ្សាររដ្ឋទាំងអស់ដែលមានទីតាំងនៅក្រុងភ្នំពេញ បើកដំណើរការឡើងវិញជាធម្មតា ចាប់ពីថ្ងៃទី២៤ ខែឧសភា ឆ្នាំ២០២១។ ប៉ុន្តែអាជ្ញាធរហាមឃាត់ដាច់ខាតការជួបជុំប្រមូលផ្ដុំមនុស្សក្នុងបរិវេណផ្សារ ទោះបីក្រោមរូបភាពណាក៏ដោយ និងត្រូវបន្តអនុវត្តកាតព្វកិច្ចពាក់ម៉ាសនិងរក្សាគម្លាតសុវត្ថិភាព ព្រមទាំងវិធានការសុខាភិបាលផ្សេងទៀតផងដែរ។
លិខិតរដ្ឋបាលរាជធានីភ្នំពេញសរសេរថា៖ «ត្រូវកំណត់ចំនួនអតិថិជនចេញ-ចូលផ្សារក្នុងបរិមាណសមរម្យ សមាមាត្រទៅនឹងទំហំទីតាំងផ្សារ ដើម្បីរក្សាឱ្យបានជាដាច់ខាតនូវគម្លាតសុវត្ថិភាពបុគ្គល-សង្គម និងដើម្បីធានាឱ្យមានខ្យល់ចេញ-ចូលគ្រប់គ្រាន់ ដោយចៀសវាងការប្រជ្រៀតគ្នាឬប្រមូលផ្តុំមនុស្សច្រើន ដែលជាហានិភ័យនៃការចម្លងវីរុសកូវីដ-១៩ ក៏ដូចជាត្រូវគូសគំនូសសម្រាប់អតិថិជន ដើម្បីរក្សាគម្លាត១,៥ម៉ែត្រជាចាំបាច់សម្រាប់បរិវេណផ្សារនីមួយៗ»។
កាលពីថ្ងៃទី៦ ខែឧសភា រដ្ឋាភិបាលបានសម្រេចបិទបញ្ចប់វិធានការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល បន្ទាប់ពីបិទអស់រយៈពេល៤សប្តាហ៍ ដោយអនុញ្ញាតឱ្យពលរដ្ឋធ្វើដំណើរនិងប្រកបរបរមួយចំនួនជាប្រក្រតីឡើងវិញ។ ប៉ុន្តែលើកលែងតែតំបន់ក្រហម និងតំបន់លឿងទុំ រួមទាំងផ្សាររដ្ឋនិងផ្សារឯកជនមិនរៀបរយ ដែលនៅបន្តបិទខ្ទប់ ដើម្បីទប់ស្កាត់ការឆ្លងរាលដាលជំងឺកូវីដ-១៩៕