សាលាដំបូងរាជធានីភ្នំពេញ បដិសេធបណ្ដឹងសុំនៅក្រៅឃុំរបស់«យុវជនខ្មែរថាវរៈ»និង«សមាជិកសមាគមនិស្សិតបញ្ញវន្តខ្មែរ»ចំនួន៧នាក់ ក្រោមហេតុផលថា ដើម្បីរក្សាជនជាប់ចោទទុកជូនតុលាការសម្រាប់បន្តសវនាការ។
សាលាដំបូងរាជធានីភ្នំពេញ នៅថ្ងៃអង្គារនេះ បានបើកសវនាការជំនុំជម្រះលើបណ្តឹងសុំនៅក្រៅឃុំរបស់យុវជនខ្មែរថាវរៈចំនួន៥នាក់ និងសមាជិកសមាគមនិស្សិតបញ្ញវន្តខ្មែរចំនួន២នាក់។ យុវជនខ្មែរថាវរៈនិងសមាជិកសមាគមនិស្សិតបញ្ញវន្តខ្មែរទាំងនោះ មានដូចជា លោក ហ៊ុន វណ្ណៈ, លោក កើត សារ៉ាយ, កញ្ញា ឈឿន ដារ៉ាវី, កញ្ញា អេង ម៉ាឡៃ ហៅ សូ មេត្តា, លោក ថា ឡាវី, លោក មាន ព្រហ្មមុនី និងលោក មួង សុភ័ក្រ្ត។
ប៉ុន្តែក្រោយពីបើកសវនាការរយៈពេលជាង១ម៉ោង ចៅក្រមជំនុំជម្រះសាលាដំបូងរាជធានីភ្នំពេញ លោក ទិតសុទ្ធី បូរ៉ាឆាត បានសម្រេចប្រកាសសាលក្រម ដោយបដិសេធបណ្ដឹងសុំនៅក្រៅឃុំរបស់យុវជនខ្មែរថាវរៈនិងសមាជិកសមាគមនិស្សិតបញ្ញវន្តខ្មែរទាំង៧នាក់នោះ ក្រោមហេតុផលថា ដើម្បីរក្សាជនជាប់ចោទទុកជូនតុលាការពេលបើកសវនាការបន្តទៀត។
មេធាវីការពារក្ដីឱ្យយុវជនខ្មែរថាវរៈនិងសមាជិកសមាគមនិស្សិតបញ្ញវន្តខ្មែរ លោក សំ ចំរើន សម្ដែងការសោកស្ដាយចំពោះសេចក្ដីសម្រេចរបស់តុលាការពេលនេះ ដោយចាត់ទុកការសម្រេចនោះមិនបានផ្ដល់យុត្តិធម៌ដល់កូនក្ដីរបស់លោកឡើយ។
ក្រុមយុវជនខ្មែរថាវរៈ និងសមាជិកសមាគមនិស្សិតបញ្ញវន្តខ្មែរ ទាំង៧នាក់ ត្រូវបានតុលាការចោទប្រកាន់ពីបទ«ញុះញង់ឱ្យមានភាពវឹកវរដល់សន្តិសុខសង្គម និងផ្តើមគំនិតញុះញង់ឱ្យមានភាពវឹកវរដល់សន្តិសុខសង្គម»។ ការចាប់ខ្លួននិងចោទប្រកាន់ក្រុមយុវជនទាំងនេះ ពាក់ព័ន្ធករណីពួកគេចូលរួមតវ៉ា និងគ្រោងជួបជុំគ្នាដោយសន្តិវិធីនៅទីលានប្រជាធិបតេយ្យរាជធានីភ្នំពេញ ក្នុងអំឡុងខែសីហា និងខែកញ្ញា ឆ្នាំ២០២០ ដើម្បីទាមទារឱ្យដោះលែងលោក រ៉ុង ឈុន។
ប្រធានសហភាពការងារកម្ពុជា និងជាអតីតសមាជិកគណៈកម្មាធិការជាតិរៀបចំការបោះឆ្នោត (គ.ជ.ប) មកពីអតីតគណបក្សសង្រ្គោះជាតិ លោក រ៉ុង ឈុន ត្រូវបានសមត្ថកិច្ចចាប់ខ្លួនកាលពីថ្ងៃទី៣១ ខែកក្កដា ឆ្នាំ២០២០ ក្រោយពេលលោកបានចេញសេចក្តីថ្លែងការណ៍និងអត្ថាធិប្បាយជុំវិញបញ្ហាព្រំដែនកម្ពុជា-វៀតណាម នៅក្នុងខេត្តត្បូងឃ្មុំ៕
