អភិបាលរាជធានីភ្នំពេញ បានសម្រេចបន្តបិទផ្សាររដ្ឋនិងផ្សារមិនរៀបរយក្នុងរាជធានីភ្នំពេញទាំងអស់រយៈពេល១ សប្តាហ៍ទៀត ដើម្បីទប់ស្កាត់ការឆ្លងរីករាលដាលជំងឺកូវីដ-១៩។
ក្នុងសេចក្ដីសម្រេចចុះថ្ងៃទី១៤ ខែឧសភា ឆ្នាំ២០២១ អភិបាលរាជធានីភ្នំពេញ ឱ្យដឹងថា អាជ្ញាធរសម្រេចបន្តផ្អាកដំណើរការផ្សាររដ្ឋនិងផ្សារមិនរៀបរយទាំងអស់ជាបណ្តោះអាសន្ន រយៈពេល៧ថ្ងៃទៀត គិតចាប់ពីម៉ោងសូន្យថ្ងៃទី១៥ ដល់ ថ្ងៃទី២១ ខែឧសភា ឆ្នាំ២០២១ ក្រោមហេតុផលថា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
អាជីវករម្នាក់នៅផ្សារសូឡា សង្កាត់ស្ទឹងមានជ័យ១ អ្នកស្រី លាន សោភា លើកឡើងថា ចាប់តាំងពីអាជ្ញាធរប្រកាសបិទផ្សារបណ្តោះអាសន្នរយៈពេល១ខែមកនេះ បានធ្វើឱ្យគាត់គ្មានប្រាក់ចំណូល ដើម្បីដោះស្រាយបញ្ហាប្រឈមក្នុងជីវភាពគ្រួសារ និងសងបំណុលធនាគារនោះទេ។ អ្នកស្រីបន្តថា បើការបិទផ្សារនៅតែអូសបន្លាយយ៉ាងនេះ អ្នកស្រីនិងអាជីវករផ្សេងទៀតនឹងជួបបញ្ហាប្រឈមកាន់តែខ្លាំង ដោយពេលនេះ កូនៗរបស់គាត់បានឈប់រៀន ដោយសារគាត់គ្មានប្រាក់បង់ថ្លៃសាលា ខណៈថ្លៃឈ្នួលផ្ទះជួលដែលកំពុងស្នាក់នៅក៏មិនទាន់បានបង់ដែរ។
អ្នកស្រី លាន សោភា មានប្រសាសន៍ថា៖ «បើសិនជាគេបិទផ្សារយូរទៀត ពួកខ្ញុំដាច់បាយ អត់ទាំងលុយទៀត។ ខ្ញុំចង់ឱ្យគេបើកផ្សារវិញ ហើយរៀបចំឱ្យបានត្រឹមត្រូវទៅ ដើម្បីបានលក់ដូរវិញ គ្រាន់បានលុយចិញ្ចឹមកូនបានមួយរស់ៗ។ ខ្ញុំជំពាក់ថ្លៃគេ៥ខែហើយ តែម្ចាស់ផ្ទះគេលើកលែងឱ្យ ចាំចប់កូវីដរកសងគេខ្លះ ខ្ញុំក៏ជំពាក់ធនាគារដែរ»។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ មានប្រសាសន៍ថា អំឡុងពេលបិទផ្សារនេះ អាជ្ញាធរគួររៀបចំប្រព័ន្ធសុវត្ថិភាពសម្រាប់អ្នកលក់និងអ្នកទិញឱ្យបានល្អ ដើម្បីបញ្ចៀសការឆ្លងជំងឺកូវីដ-១៩ នៅពេលអាជ្ញាធរបើកឱ្យដំណើរការលក់ដូរឡើងវិញ។
លោក វន់ ពៅ ថ្លែងដូច្នេះថា៖ «ពេលបិទ មិនព្រមរៀបចំសុវត្ថិភាពឱ្យហើយ ពេលផ្ទុះបានរៀបចំអ្វីតាមក្រោយទៀត វាជារឿងហួសពេល អ្នកដែលរងគ្រោះគឺប្រជាពលរដ្ឋតូចតាចដែលជាអាជីវករហ្នឹងឯង។ អ៊ីចឹងទេ ត្រូវរៀបចំប្រព័ន្ធសុវត្ថិភាពឱ្យបានសព្វគ្រប់ឱ្យហើយ កុំឱ្យពិបាកទៅដល់ពលរដ្ឋនិងអ្នកទិញទាំងអ្នកលក់ ហើយយើងត្រូវមើលគំរូប្រទេសគេជិតខាង គេរៀបចំផ្សារដូចម្ដេច»។
កាលពីថ្ងៃទី៦ ខែឧសភា រដ្ឋាភិបាលបានសម្រេចបិទបញ្ចប់វិធានការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល បន្ទាប់ពីបិទអស់រយៈពេល៤សប្តាហ៍ ដោយអនុញ្ញាតឱ្យពលរដ្ឋធ្វើដំណើរនិងប្រកបរបរមួយចំនួនជាប្រក្រតីឡើងវិញ។ ប៉ុន្តែលើកលែងតែតំបន់ក្រហម និងតំបន់លឿងទុំ រួមទាំងផ្សាររដ្ឋនិងផ្សារឯកជនមិនរៀបរយ ដែលនៅបន្តបិទខ្ទប់ ដើម្បីទប់ស្កាត់ការឆ្លងរាលដាលជំងឺកូវីដ-១៩។
គិតត្រឹមថ្ងៃទី១៤ ខែឧសភា ឆ្នាំ២០២១នេះ កម្ពុជារកឃើញអ្នកឆ្លងជំងឺកូវីដ-១៩ សរុប២១ ៤៩៩នាក់ ក្នុងនោះ អ្នកជំងឺព្យាបាលជាសះស្បើយចំនួន៩ ៨៦៧នាក់ និងអ្នកស្លាប់ដោយសារជំងឺកូវីដ-១៩ មានចំនួន១៤៧នាក់៕