អ្នកភូមិនៅស្រុកកណ្តាលស្ទឹង ខេត្តកណ្តាល ដែលកំពុងរងផលប៉ះពាល់ពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី នៅថ្ងៃសុក្រនេះ បាននាំគ្នាតវ៉ារារាំងមិនឱ្យគ្រឿងចក្ររបស់ក្រុមហ៊ុនឈូសឆាយលើដីស្រែរបស់ពួកគេ។
លោក ឡុង សុភ័ក្រ រស់នៅឃុំបឹងខ្យាង ប្រាប់ វីអូឌី ថាក្រុមហ៊ុនសាងសង់ព្រលានយន្តហោះកម្ពុជា (CAIC) របស់ លោក ពង់ ឃាវសែ បានដាក់គ្រឿងចក្រចំនួន២គ្រឿង និងឡានបាញ់ទឹកចំនួន៣គ្រឿង អមដោយកម្លាំងសមត្ថកិច្ចប្រហែល២០នាក់ បានធ្វើសកម្មភាពឈូសឆាយដីស្រែពង្រោះរបស់ពួកគាត់អស់១ហិកតាកន្លះ ស្ថិតនៅភូមិកំពង់តាឡុង ឃុំបឹងខ្យាង ស្រុកកណ្តាលស្ទឹង ប៉ុន្តែត្រូវអ្នកភូមិប្រហែលជាង១០០នាក់ចុះរារាំងនិងបានឃាត់ខ្លួនមេការម្នាក់បញ្ជូនទៅដោះស្រាយនៅសាលាឃុំ។
លោកបន្ថែមថា៖ «គេយកគ្រឿងចក្រមកឈូសស្រូវប្រជាពលរដ្ឋអស់ប្រហែល១ហិកតាកន្លះ ចំនួន២ស្រែពីរម្ចាស់ទាំងខ្ញុំ ហើយវាចង់ឈូសខ្ញុំទៀត ពេលខ្ញុំចុះទៅឃាត់។ ខ្ញុំសុំឱ្យរដ្ឋាភិបាលនិងក្រុមហ៊ុនដោះស្រាយសំណងឱ្យពលរដ្ឋជាមុនសិនទៅ មុនឈូសដីស្រូវពលរដ្ឋ ហើយផ្តល់សំណងខូចខាតស្រូវផង ដោះស្រាយឥលូវៗនេះតែម្តង»។
ពលរដ្ឋនៅឃុំបឹងខ្យាងម្នាក់ទៀត លោក សួង ពៅ ឱ្យដឹងថា គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មីនេះ បានធ្វើឱ្យដីប្រជាពលរដ្ឋចំនួន៣ឃុំ ស្ថិតនៅស្រុកកណ្តាលស្ទឹង ខេត្តកណ្តាល និង១ឃុំស្ថិតក្នុងស្រុកបាទី ខេត្តតាកែវ ដែលមានទំហំដីសរុបប្រហែលជាង៤០០ហិកតារងផលប៉ះពាល់ និងមិនទាន់បានដោះស្រាយ។
លោក សួង ពៅ បន្តថា ការដោះស្រាយកន្លងមក ភាគីក្រុមហ៊ុនបានដោះស្រាយជាគោលនយោបាយ ដោយផ្តល់សំណងចន្លោះពី៣ដុល្លារ ទៅ៨ដុល្លារ ក្នុងមួយម៉ែត្រការ៉េ ប៉ុន្តែសំណងនេះ អ្នកភូមិមិនអាចទទួលយកបានទេ។ លោកថា ក្រុមពលរដ្ឋទាមទារសំណងផលប៉ះពាល់ទៅតាមតម្លៃទីផ្សារ ដោយលោកថា ដីតំបន់នោះបច្ចុប្បន្នមានតម្លៃចន្លោះពី៩០ដុល្លារ ទៅជាង១២០ដុល្លារ ក្នុងមួយម៉ែត្រការ៉េ។
លោកបន្ថែមថា៖ «ប្រជាជនយើងមិនជំទាស់ទេជាមួយការអភិវឌ្ឍ ប៉ុន្តែសុំឱ្យទិញយកឬផ្តល់សំណងទៅតាមតម្លៃទីផ្សារដីបច្ចុប្បន្ន»។
អភិបាលស្រុកកណ្តាលស្ទឹង លោក អ៊ូច សាវឿន មានប្រសាសន៍ថា ដីដែលក្រុមហ៊ុនចុះធ្វើសកម្មភាពឈូសឆាយនោះ គឺជាដីស្ថិតក្នុងគោលការណ៍សាងសង់ព្រលានយន្តហោះអន្តរជាតិភ្នំពេញថ្មី។ លោកថា ករណីក្រុមហ៊ុនដាក់គ្រឿងចក្រឈូសឆាយលើដីពលរដ្ឋនេះ លោកមិនបានដឹងនោះទេ។
ប៉ុន្តែយ៉ាងណា លោកថា លោកបានលើកយកករណីនេះទៅដល់អភិបាលខេត្តកណ្តាល លោក គង់ សុភ័ណ្ឌ ដើម្បីសុំគោលការណ៍ដោះស្រាយហើយ។
លោកបន្ថែមថា៖ «ពាក់ព័ន្ធរឿងនេះ គឺជាគោលការណ៍របស់ព្រលានយន្តហោះ ហើយដីនេះស្ថិតក្នុងដីអនុក្រឹត្យដើម្បីស្ថាបនាព្រលាន [យន្តហោះ] នេះ។ ខ្ញុំបានជូនដំណឹងទៅឯកឧត្តមអភិបាលខេត្តហើយ ដើម្បីសុំចំណាត់ការពីគាត់»។
អភិបាលស្រុករូបនេះមិនទាន់អាចបញ្ជាក់ពីចំនួនប្រជាពលរដ្ឋនិងចំនួនដីដែលរងផលប៉ះពាល់សរុបក្រោមគម្រោងអភិវឌ្ឍន៍នេះបាននៅឡើយទេ ដោយលោកថា មិនចាំចំនួននិងមិនបានយកឯកសារមកតាមខ្លួន។
វីអូឌី ពុំអាចសុំការបញ្ជាក់ពីតំណាងក្រុមហ៊ុនសាងសង់ព្រលានយន្តហោះកម្ពុជា (CAIC) បានទេ នៅថ្ងៃនេះ។
មន្ត្រីសម្របសម្រួលគម្រោងធុរកិច្ច និងមនុស្ស នៃមជ្ឈមណ្ឌលសិទិ្ធមនុស្សកម្ពុជា លោក វណ្ណ សុផាត មានប្រសាសន៍ថា តាមច្បាប់ជាតិនិងអន្តរជាតិ រាល់ផលប៉ះពាល់នៃគម្រោងអភិវឌ្ឍន៍នានា រដ្ឋត្រូវដោះស្រាយសំណងជូនពលរដ្ឋឱ្យបានសមរម្យដែលអាចទទួលយកបានទាំងអស់គ្នា។
ពាក់ព័ន្ធនឹងបញ្ហាជម្លោះដីធ្លីជំុវិញគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី នៅខេត្តកណ្តាល លោក វណ្ណ សុផាត បានស្នើឱ្យរដ្ឋាភិបាលកំណត់ឱ្យបានច្បាស់អំពីទំហំនៃការផ្តល់សំណងសមរម្យដល់ពលរដ្ឋ និងត្រូវមានការចូលរួមពីប្រជាពលរដ្ឋដែលរងផលប៉ះពាល់ក្នុងតំបន់នីមួយៗ ដើម្បីឱ្យពលរដ្ឋអាចទទួលយកបានទាំងអស់គ្នា និងគ្មានការរំលោភសិទ្ធិមនុស្ស។
លោកបន្ថែមថា៖ «យើងមានរដ្ឋធម្មនុញ្ញ ច្បាប់ផ្សេងៗទៀត និងគោលការណ៍របស់អង្គការសហប្រជាជាតិ ស្តីអំពីការអភិវឌ្ឍដោយសារការបណ្តេញចេញ សុទ្ធតែបានចែងឱ្យមានការផ្តល់សំណងដោយសមរម្យនិងយុត្តិធម៌ និងអាចទទួលយកបានពីភាគីពាក់ព័ន្ធ»។
កាលពីថ្ងៃទី៣ ខែមិថុនា ឆ្នាំ២០២០ រដ្ឋាភិបាលបានចេញអនុក្រឹត្យមួយដោយផ្តល់ដីរដ្ឋទំហំប្រហែល២ ៦០០ហិកតា ដែលលាតសន្ធឹងលើស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវ ទៅឱ្យក្រុមហ៊ុនវិនិយោគអាកាសយានដ្ឋានកម្ពុជា វិនិយោគរួមគ្នាជាមួយសាជីវកម្មវិនិយោគក្រៅប្រទេស និងលេខាធិការដ្ឋានអាកាសចរណ៍ស៊ីវិល ដើម្បីអភិវឌ្ឍព្រលានយន្តហោះអន្តរជាតិភ្នំពេញថ្មីមួយនេះ៕
