ឧត្តមទីប្រឹក្សាផ្ទាល់ព្រះមហាក្សត្រ អះអាងថា ខាងក្រសួងព្រះបរមរាជវាំងមិនធ្លាប់ដែលបានទទួលលិខិតស្នាមពីអ្នកបញ្ញវន្តមួយក្រុម ទាក់ទងនឹងការស្នើសុំព្រះរាជអន្តរាគមន៍ពីព្រះមហាក្សត្រ ដោះស្រាយរឿងវិបត្តិនយោបាយរវាងគណបក្សប្រជាជនកម្ពុជា និងអតីតគណបក្សសង្គ្រោះជាតិនោះទេ។
លោក ស៊ឺន ស៊ូប៊ែរ ឧត្តមទីប្រឹក្សាផ្ទាល់ព្រះមហាក្សត្រ មានប្រសាសន៍នៅថ្ងៃទី១៣ ខែឧសភានេះថា បើតាមដឹង ព្រះមហាក្សត្រដូចមិនធ្លាប់ទទួលបានលិខិតទូលថ្វាយ ដើម្បីសុំឱ្យព្រះអង្គជួយសម្របសម្រួលរឿងវិបត្តិនយោបាយរវាងបក្សកាន់អំណាច និងអតីតបក្សប្រឆាំងនោះទេ។
លោកបន្តថា៖ «ឮនិយាយពីរឿងហ្នឹងយូរណាស់ដែរហើយ ប៉ុន្តែអត់ដែលឃើញគាត់មកពឹងយកទៅដាក់ឱ្យឬស្អីផង ដល់អ៊ីចឹងទៅ ខ្ញុំអត់ដឹងដែរ! ឥលូវនេះ គេអត់មានខុទ្ទកាល័យខាងជើងទេ គេកំពុងជួសជុល ម្ល៉ោះហើយអត់មានដំណើរការ អ៊ីចឹងហើយទាល់តែទៅខាងត្បូង»។
ចំណែកមន្រ្តីខុទ្ទកាល័យព្រះបរមរាជវាំង លោក អ៊ុំ ដារាវុធ បានបញ្ជាក់ដែរថា លោកក៏មិនដែលបានដឹងថាមានលិខិតទូលថ្វាយព្រះមហាក្សត្រ អំពីការស្នើសុំព្រះរាជតម្រិះពីព្រះអង្គជុំវិញបញ្ហានយោបាយនេះដែរ។
លោកបន្តថា៖ «អូ! ខ្ញុំអត់ដឹងរឿងហ្នឹងទេ មានតែឯកឧត្តម គង់ សំអុល។ ជាផ្លូវការ គេតាមហ្នឹងទាំងអស់ [គង់ សំអុល]ឥលូវយើងអត់មានគ្រប់គ្រងទេខាងខុទ្ទកាល័យ។ ជាផ្លូវការ ទៅខាងក្រសួងព្រះបរមរាជវាំងទាំងអស់»។
វីអូឌី មិនអាចសុំការបញ្ជាក់ពីលោក គង់ សំអុល រដ្ឋមន្រ្តីក្រសួងព្រះបមរាជវាំង បានទេ នៅថ្ងៃនេះ។
នាយកវិទ្យាស្ថានប្រជាធិបតេយ្យកម្ពុជា លោក ប៉ា ចន្ទរឿន ឱ្យដឹងថា ក្រុមបញ្ញវន្តខ្មែរចំនួន៥រូប រួមនឹងរូបលោក បានដាក់ថ្វាយលិខិតសុំព្រះរាជអន្តរាគមន៍ពីព្រះមហាក្សត្រចំនួន២លើកមកហើយ ដោយលើកទី១ ដាក់ទៅក្រសួងព្រះបរមរាជវាំង នៅអំឡុងឆ្នាំ២០១៨ និងលើកទី២ នៅចុងឆ្នាំ២០១៩ ប៉ុន្តែពុំមានការឆ្លើយតបណាមួយនៅឡើយ។
លោកបន្តថា ក្រុមការងារលោកគ្រោងនឹងក្រាបបង្គំទូលថ្វាយព្រះមហាក្សត្រជាថ្មីទៀតក្នុងពេលឆាប់ៗនេះ ដោយខ្លឹមសារនៃលិខិតនោះគឺសុំយាងព្រះអង្គមកជួយផ្សះផ្សានយោបាយ ជាពិសេសនយោបាយដែលកំពុងតែប្រេះឆារវាងបក្សកាន់អំណាច និងអតីតគណបក្សសង្រ្គោះជាតិ។
លោកបន្តថា៖ «យើងក៏នឹងថាជួបគ្នាជាថ្មីទៀត ដើម្បីសម្រេចថា តើគួរតែរៀបចំជាលិខិតជាថ្មីមួយទៀត ដើម្បីទៅទូលព្រះករុណាជាម្ចាស់ជីវិតតម្កល់លើត្បូង ដើម្បីឱ្យព្រះអង្គជួយអន្តរាគមន៍ដោះស្រាយនយោបាយខ្មែរយើង»។
បើតាមលោក ប៉ា ចន្ទរឿន មានតែតួអង្គព្រះមហាក្សត្រទេដែលទ្រង់អាចមានព្រះរាជសិទ្ធិក្នុងការបញ្ចប់វិវាទនយោបាយនេះបាន។
អតីតគណបក្សសង្រ្គោះជាតិ ត្រូវបានរំលាយដោយអំណាចនៃសាលដីកាតុលាការកំពូល កាលពីឆ្នាំ២០១៧។
នៅក្នុងរដ្ឋធម្មនុញ្ញដែលជាច្បាប់កំពូល មាត្រា៨ ចែងថា ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និងនិរន្តរភាពជាតិ ហើយទ្រង់ក៏ជាអ្នកធានាឯករាជ្យជាតិ អធិបតេយ្យ បូរណភាពទឹកដីរបស់ប្រទេសកម្ពុជា និងជាអ្នកធានាការគោរពសិទ្ធិមនុស្ស និងសេរីភាពរបស់ប្រជាពលរដ្ឋ ព្រមទាំងធានាការគោរពសន្ធិសញ្ញាអន្តរជាតិ។
លោកបណ្ឌិត មាស នី អ្នកស្រាវជ្រាវការអភិវឌ្ឍសង្គម យល់ឃើញថា ព្រះមហាក្សត្រពិតជាតួអង្គដ៏សំខាន់បំផុតក្នុងការបញ្ចប់ជម្លោះនយោបាយផ្ទៃក្នុងរវាងខ្មែរនិងខ្មែរ។
បើទោះជាបែបណា លោកបណ្ឌិត មាស នី នៅតែមានទុទ្ទិដ្ឋិនិយមថា ការសុំយាងព្រះមហាក្សត្រដើម្បីឱ្យទ្រង់កោះអញ្ជើញអ្នកនយោបាយទាំងពីរភាគី មកអង្គុយលើតុចរចា ប្រហែលនឹងមិនអាចកើតមានទេ។
ជាប្រវត្តិសាស្រ្តរបស់កម្ពុជា ក្រោយការបោះឆ្នោតឆ្នាំ១៩៩៣ ព្រះបរមរតនកោដ្ឋ ព្រះបាទសម្តេចព្រះនរោត្តម សីហនុ ទ្រង់បានក្លាយជាបិតាផ្សះផ្សាជាតិ នៅពេលមានជម្លោះនយោបាយកើតឡើងម្តងៗ។ នៅនាទីចុងក្រោយ អ្នកនយោបាយមកពីគ្រប់ភាគីបានឯកភាពនិងសម្រេចបញ្ចប់វិវាទរៀងៗខ្លួន ក្រោយពីព្រះមហាក្សត្រកោះអញ្ជើញដើម្បីរកដំណោះស្រាយ៕