កម្មករ-កម្មការិនីជាង៣០នាក់ដែលធ្វើការងារនៅរោងចក្រមួយក្នុងខេត្តកំពង់ឆ្នាំង បានរងរបួសធ្ងន់និងស្រាលដោយសារគ្រោះថ្នាក់ចរាចរណ៍ ខណៈពេលពួកគេជិះរថយន្តទៅបំពេញការងារ នៅថ្ងៃព្រហស្បតិ៍នេះ។
ប្រធានមន្ទីរការងារ និងបណ្តុះបណ្តាលវិជ្ជាជីវៈ លោក ពៅ ស៊ីថា ប្រាប់ វីអូឌី នៅព្រឹកថ្ងៃទី១៣ ខែឧសភានេះថា ករណីគ្រោះថ្នាក់ចរាចរណ៍លើរថយន្តដឹកកម្មករនេះ បានកើតឡើងនៅចំណុចផ្លូវលេខ១៣៧ ស្ថិតក្នុងភូមិក្រសាំងពុល ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។ ប៉ុន្តែលោកមិនបានបញ្ជាក់ថា កម្មករដែលជិះលើរថយន្តនោះធ្វើការនៅរោងចក្រណាខ្លះនោះទេ។
លោកបានបន្តថា ហេតុការណ៍នេះបានបណ្តាលឱ្យកម្មករ-កម្មការិនីចំនួន៣១នាក់ រងរបួសធ្ងន់និងស្រាល ខណៈកម្មការិនីម្នាក់ត្រូវបានបញ្ជូនទៅសង្គ្រោះនៅមន្ទីរពេទ្យមិត្តភាពកម្ពុជា-ចិន ព្រះកុសុមៈ (ពេទ្យលោកសង្ឃ) នៅរាជធានីភ្នំពេញ ដោយសាររបួសធ្ងន់ធ្ងរជាងគេ។
ប៉ុន្តែបើតាមការចុះផ្សាយលើទំព័រហ្វេសប៊ុករបស់ការិយាល័យផ្សព្វផ្សាយអប់រំ នៃស្នងការដ្ឋាននគរបាលខេត្តកំពង់ឆ្នាំង ឱ្យដឹងថា ហេតុការណ៍គ្រោះថ្នាក់ចរាចរណ៍នេះបានបណ្តាលឱ្យកម្មករ៤៧នាក់ រងរបួសធ្ងន់និងស្រាល ក្នុងនោះកម្មការិនីម្នាក់រងរបួសធ្ងន់។
ប្រភពដដែលបន្តថា គ្រោះថ្នាក់នេះកើតឡើងដោយរថយន្តម៉ាក HYUNDAI ពណ៌ស ពាក់ផ្លាកលេខ ភ្នំពេញ ៣D-៥៨៦០ បានដឹកកម្មករជាង៤០នាក់ បម្រុងទៅបំពេញកាងារ ប៉ុន្តែត្រូវជួបគ្រោះថ្នាក់ចរាចរណ៍ក្រឡាប់ធ្លាក់ផ្លូវនៅត្រង់ចំណុចផ្លូវកោង។
ស្នងការដ្ឋាននគរបាលខេត្តកំពង់ឆ្នាំង បញ្ជាក់ថា ក្រោយកើតហេតុនេះ សមត្ថកិច្ចបានអន្តរាគមន៍ប្រមូលយកវត្ថុតាង រួមមានរថយន្តនិងរបស់របរផ្សេងទៀតទៅរក្សាទុកនៅប៉ុស្តិ៍នគរបាលរដ្ឋបាលឃុំស្វាយ ដើម្បីកសាងសំណុំរឿងតាមនីតិវិធីច្បាប់ ខណៈអ្នកបើកបរបានរត់គេចខ្លួនបាត់។
អនុប្រធានក្រុមការងារ សុវត្ថិភាពចរាចរណ៍ផ្លូវគោក សម្រាប់គាំពារកម្មករនិយោជិត លោក ព្រាប ច័ន្ទវិបុល ឱ្យដឹងតាមរយៈរបាយការណ៍មួយកាលពីថ្ងៃទី៩ ខែកុម្ភៈ ឆ្នាំ២០២១ ថា ក្នុងឆ្នាំ២០២០ គ្រោះថ្នាក់ចរាចរណ៍បានកើតឡើងលើកម្មករនិយោជិតចំនួន១ ៩០០ករណី ក្នុងនោះបណ្តាលឱ្យមានអ្នកស្លាប់៨៨នាក់ និងរបួស២ ១៤០នាក់។ ប្រភពដដែលបន្តថា ចំនួននេះមានការថយចុះ៣១% បើប្រៀបធៀបទៅនឹងឆ្នាំ២០១៩៕
