មន្ត្រីអង្គការសង្គមស៊ីវិល ជំរុញទៅអាជ្ញាធរពាក់ព័ន្ធពង្រឹងវិធានការទប់ស្កាត់ផលិតផលក្លែងក្លាយបន្ថែមទៀត ព្រមទាំងចាត់វិធានការច្បាប់ចំពោះអ្នកនៅពីក្រោយខ្នងបទល្មើសទាំងនោះ ដើម្បីធានាប្រសិទ្ធភាព ខណៈពួកគេសង្កេតឃើញមានការចរាចរផលិតផលក្លែងក្លាយនៅកម្ពុជានៅតែកើតមានឡើង។
ការជំរុញនេះធ្វើឡើងបន្ទាប់ពីមន្ត្រីជំនាញនៃក្រសួងពាណិជ្ជកម្ម បានរឹបអូសនិងបំផ្លាញចោលនូវអាល់កុលក្លែងក្លាយឬមេតាណុលជិត១២តោន នៅរាជធានីភ្នំពេញ កាលពីថ្ងៃអង្គារនេះ។
ទំព័រហ្វេសប៊ុករបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម កាលពីថ្ងៃទី១១ ខែឧសភា ឱ្យដឹងថា អាល់កុលឬមេតាណុលក្លែងក្លាយជិត១២តោននោះ បានរឹបអូសពីតាមបណ្តាឃ្លាំងស្តុក មធ្យោបាយដឹកជញ្ជូន និងឱសថស្ថាននានាក្នុងរាជធានីភ្នំពេញ។
នាយកប្រតិបត្តិនៃមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍នៅថ្ងៃទី១២ ខែឧសភានេះថា អាជ្ញាធរត្រូវពង្រឹងវិធានការទប់ស្កាត់ការនាំចូលផលិតផលក្លែងក្លាយចូលមកកម្ពុជា។ លោកបន្តថា ប្រជាពលរដ្ឋខ្មែរជាច្រើនរងគ្រោះដោយសារជំងឺកូវីដ-១៩ ហើយត្រូវរងគ្រោះដោយសារតែផលិតផលក្លែងក្លាយទាំងនេះបន្ថែមទៀត។
លោកក៏បានជំរុញដល់ស្ថាប័នពាក់ព័ន្ធត្រូវអនុវត្តទៅតាមច្បាប់ឱ្យមានប្រសិទ្ធភាព បើមានអំពើពុករលួយណាមួយកើតឡើងរវាងឈ្មួញនិងអាជ្ញាធរ ជុំវិញការនាំចូលផលិតផលក្លែងក្លាយបែបនេះចូលមកកម្ពុជា ពិសេសត្រូវដាក់ទោសទណ្ឌទៅលើអ្នកប្រព្រឹត្តឬអ្នកនៅពីក្រោយខ្នង ដើម្បីចៀសវាងការបង្កឱ្យមានវិបត្តិសុខភាពសាធារណៈកើតឡើង។
លោក យង់ គិមអេង មានប្រសាសន៍ថា៖ «ទាមទារឱ្យអាជ្ញាធរទប់ស្កាត់ឱ្យខានតែបានលើបញ្ហាហ្នឹង ដើម្បីកុំឱ្យមានរបស់ក្លែងក្លាយនាំចូលកម្ពុជា។ ប្រសិនបើកម្ពុជាចាត់វិធានការបានតឹងរ៉ឹង យកជនដែលនាំចូលផលិតផលក្លែងក្លាយចូលក្នុងស្រុកយកទៅដាក់ពន្ធនាគារឱ្យខានតែបាន រិះរកជីកកកាយដល់ឫសគល់ ប្រហែលជាអ្នកដែលរកស៊ីរបស់ក្លែងក្លាយលែងហ៊ានតទៅទៀតដែរ»។
នាយកប្រតិបត្តិនៃអង្គការតម្លាភាពកម្ពុជា លោក ប៉ិច ពិសី ក៏បានជំរុញឱ្យអាជ្ញាធរពាក់ព័ន្ធទាំងអស់ត្រូវអនុវត្តច្បាប់ឱ្យមានប្រសិទ្ធភាព ដោយធ្វើយ៉ាងណាទប់ស្កាត់ការនាំចូលផលិតផលក្លែងក្លាយនិងខូចគុណភាពកុំឱ្យចូលទៅកាន់ទីផ្សារនៅកម្ពុជាបាន ។
លោកមានប្រសាសន៍ថា៖ «ផលិតផលក្លែងក្លាយមានគ្រោះថ្នាក់ធ្ងន់ធ្ងរណាស់ដល់សុខភាពសាធារណៈដល់ប្រជាជនយើង។ ជាពិសេសប្រសិនជាការនាំចូល យើងអត់ចាប់បានវិញ បានន័យថា របស់ក្លែងក្លាយនឹងនៅទីផ្សារ ប្រជាពលរដ្ឋគាត់អាចទិញ គាត់អាចប្រើប្រាស់ទៅ ប៉ះពាល់សុខភាពសាធារណៈ។ អ៊ីចឹងនេះជារឿងមួយដែលសំខាន់ យើងត្រូវទប់ស្កាត់»។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានឱ្យ វីអូឌី ដឹងតាមរយៈប្រព័ន្ធតេឡេក្រាមថា តាំងពីប្រទេសកម្ពុជា ទទួលរងនូវវិបត្តិជំងឺកូវីដ-១៩មក ពោលគឺចាប់តាំងពីដើមឆ្នាំ២០២០ រហូតដល់បច្ចុប្បន្ននេះ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានយកចិត្តទុកដាក់យ៉ាងខ្លាំងចំពោះបញ្ហានេះ។
លោកថា វិធានការទាំងនោះមានដូចជា ការឃ្លាំមើលនិងពិនិត្យទំនិញយុទ្ធសាស្ត្រ ក៏ដូចជាទំនិញបម្រើវិស័យសុខាភិបាល រួមមាន អាល់កុល ជែលលាងដៃ ម៉ាស និងឧបករណ៍ឬសម្ភារផ្សេងទៀត។
លោកថា គិតតាំងពីដើមឆ្នាំ២០២០ មកដល់បច្ចុប្បន្ននេះ អគ្គនាយកដ្ឋានមួយនេះបានរឹបអូសនិងបំផ្លាញចោលនូវមេតាណុលដែលគេបន្លំប្រើជាអាល់កុលបានចំនួន១០៦តោន បង្គារចាក់ចាហួយចូលចំនួន២០តោន និងបានរឹបអូសនូវសម្ភារក្លែងក្លាយឬគ្មានគុណភាពតាមស្តង់ដារបានជាង៣០០តោនផងដែរ។
អ្នកនាំពាក្យរូបនេះអះអាងទៀតថា អាជ្ញាធរនៅតែបន្តពិនិត្យទំនិញសេវា និងបានកំណត់ច្បាស់លាស់ក្នុងការបង្ក្រាបនូវរាល់ការធ្វើចរាចរណ៍ ការស្តុកទុក និងការលក់ដូរនូវទំនិញក្លែងក្លាយឬគ្មានគុណភាពបន្ថែមទៀត។
ទោះជាបែបនេះក្តី កាលពីថ្ងៃទី១២ ខែមីនា ឆ្នាំ២០១៩ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង បានរិះគន់ការបង្ក្រាបផលិតផលក្លែងក្លាយកន្លងមក ដោយថា ពួកគេបង្ក្រាបបានតែទំនិញ ប៉ុន្តែមិនឃើញមានការចាប់ខ្លួនអ្នកទទួលខុសត្រូវយកមកផ្ដន្ទាទោសឡើយ។ លោកថា ប្រសិនបើបញ្ហានេះនៅតែកើតមានឡើងទៀត លោកនឹងមិនចូលរួមកម្មវិធីបំផ្លាញផលិតផលក្លែងក្លាយទៀតឡើយ។
លោកបន្តថា ការចាប់ទំនិញក្លែងក្លាយបានហើយយកទៅកម្ទេចចោល ដោយមិនមានចាត់វិធានការលើជនដែលប្រព្រឹត្តល្មើស គឺមិនអាចបញ្ឈប់ការចរាចរទំនិញក្លែងក្លាយនិងខូចគុណភាពទាំងនោះនៅលើទីផ្សារបានទេ។
លោក ស ខេង បន្ថែមពេលនោះថា ទំនិញក្លែងក្លាយនិងខូចគុណភាព គឺធ្វើឱ្យប៉ះពាល់ខ្លាំងដល់សុខភាពពលរដ្ឋ រហូតឈានដល់ការបាត់បង់ជីវិត និងធ្វើឱ្យប៉ះពាល់ដល់កិត្តិយសរបស់ប្រទេសជាតិទៀតផង៕
