អាជ្ញាធរខេត្តពោធិ៍សាត់ បានដកយកសម្ភារ និងហាមឃាត់អ្នកសារព័ត៌មានសំឡេងប្រជាធិបតេយ្យវីអូឌី (VOD) ម្នាក់មិនឱ្យថតរូប អំឡុងពេលលោកចុះយកព័ត៌មានរឿងពលរដ្ឋនៅខេត្តកំពង់ឆ្នាំងតវ៉ាបិទកំណាត់ផ្លូវជាតិលេខ៥ ដែលជាប់ព្រំប្រទល់ខេត្តពោធិ៍សាត់ ដើម្បីទាមទារឱ្យអាជ្ញាធរដោះស្រាយវិវាទដីធ្លីរបស់ពួកគេ។
អ្នករាយការណ៍ព័ត៌មានវីអូឌី លោក ឃុត សុគន្ធ លើកឡើងថា នៅព្រឹកមិញនេះ រូបលោកបានចុះទៅយកព័ត៌មាននៅឃុំអន្សាចំបក់ ស្រុកក្រគរ ព្រំប្រទល់ខេត្តកំពង់ឆ្នាំង និងខេត្តពោធិ៍សាត់ ពាក់ព័ន្ធនឹងអភិបាលរងខេត្តពោធិ៍សាត់ចុះទៅប្រាប់ពលរដ្ឋខេត្តកំពង់ឆ្នាំងដែលមានដីនៅក្នុងខេត្តពោធិ៍សាត់ មិនឱ្យអាស្រ័យផលលើដីនោះទៀត។
លោកបន្តថា អំឡុងពេលដែលអភិបាលរងខេត្តពោធិ៍សាត់ លោក ចេង ឡៃ និយាយទៅកាន់ប្រជាពលរដ្ឋ រូបលោកបានយកឧបករណ៍មកថតសំឡេងនិងយកសៀវភៅមកកត់ត្រា ប៉ុន្តែត្រូវបានសមត្ថកិច្ចហៅទៅសួរនាំ ហើយបានឆក់យកឧបករណ៍ថតសំឡេងនិងសៀវភៅពីលោក។
លោកថា៖ «សមត្ថកិច្ចបានហៅខ្ញុំទៅ ហើយបានចាប់ក៏ឆក់យកសៀវភៅ និង Recorder ឬឧបករណ៍ថតសំឡេងពីខ្ញុំ ហើយបានលុបចោលសំឡេងដែលខ្ញុំបានថត ហើយគាត់បានព្យាយាមមិនឱ្យយើងថតទៅទៀត។ ហើយគាត់ថា បើថត គាត់ចាប់យកទូរសព្ទអីអ៊ីចឹងទៅ។ ហើយរហូតខ្ញុំបានទៅនិយាយជាមួយអភិបាលរងខេត្តពោធិ៍សាត់ លោក ចេង ឡៃ ហ្នឹង ថាមូលហេតុអីមិនឱ្យខ្ញុំថត តែគាត់មិនបានឆ្លើយទេ គ្រាន់តែគាត់ប្រាប់ថា ឥលូវហ្នឹងគាត់កំពុងធ្វើការអស់ហ្នឹង ហើយគាត់មិនឱ្យមានការថតអីទេ»។
លោក សុគន្ធ បន្តថា ក្រៅពីឆក់សម្ភាររបស់លោកហើយ សមត្ថកិច្ចក៏បានបា្រប់លោកមិនឱ្យថតផ្ដិតយករូបភាពផ្សេងៗ ពាក់ព័ន្ធទិដ្ឋភាពតវ៉ានោះឡើយ ទោះបីជារូបលោកបានប្រាប់ទៅសមត្ថកិច្ចថា ខ្លួនជាអ្នកយកព័ត៌មានរួចហើយក៏ដោយ។
លោកថា៖ «ខ្ញុំបានប្រាប់ហើយ ព្រោះពេលគាត់ហៅខ្ញុំទៅ គាត់សួរខ្ញុំ អ្នកឯងមកពីណា! ខ្ញុំបានប្រាប់ថា ខ្ញុំអ្នកសារព័ត៌មានវីអូឌី ហើយគាត់បានថតរូបយើងផង ហើយបានថតទាំងកាតស្ថាប័នយើង ថតទៅទាំងអស់ ហើយគាត់សួរ ប៉ុន្តែមិនដឹងទៅក្នុងគោលបំណងយ៉ាងម៉េច ខ្ញុំមិនដឹងទេ»។
អ្នករាយការណ៍ព័ត៌មានដែលមានពិការភាពរូបនេះ បន្តថា សមត្ថកិច្ចបានប្រគល់ឧបករណ៍ថតសំឡេងនិងសៀវភៅមកឱ្យលោកវិញ បន្ទាប់ពីមានការសម្របសម្រួល និងក្រោយពេលជំនួបរវាងអភិបាលរងខេត្ត លោក ចេង ឡៃ ជាមួយពលរដ្ឋ ត្រូវបានបិទបញ្ចប់។
អភិបាលរងខេត្តពោធិ៍សាត់ លោក ចេង ឡៃ មានប្រសាសន៍ថា មូលហេតុដែលសមត្ថកិច្ចមិនឱ្យថតនិងលុបសំឡេងចោល ដោយសារអាជ្ញាធរកំពុងធ្វើការ។
លោកថា៖ «Recorder ឬឧបករណ៍ថតសំឡេង គេយកមកមើលតើ! ចាំបាច់យកសំឡេងធ្វើអី! គេលុបចោល គ្រាន់តែប៉ុណ្ណឹងតើ! ខ្ញុំឱ្យថតជារូបថតបានតើ! ព្រោះព្រឹកមិញ រដ្ឋបាលចម្រុះមក ជាសមត្ថកិច្ច។ ខ្ញុំអត់បាម្ភអីទេកន្លែងហ្នឹង ព្រោះសមត្ថកិច្ចគេធ្វើការ»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី ចាត់ទុកការដកឧបករណ៍ថតសំឡេងយកទៅលុបចោលនិងដកយកសម្ភាររបស់អ្នកសារព័ត៌មានអំឡុងពេលកំពុងបំពេញតួនាទីនេះ ថាជាការគំរាមកំហែងនិងរំលោភសិទ្ធិសេរីភាពរបស់អ្នកសារព័ត៌មានយ៉ាងធ្ងន់ធ្ងរ។
លោកថា៖ «វាជាការគំរាមកំហែង ជារូបភាពបំភិតបំភ័យទៅដល់កិច្ចការអ្នកសារព័ត៌មាន។ មួយវិញទៀត វាជាការរំលោភបំពានធ្ងន់ធ្ងរទៅដល់កិច្ចការងារអ្នកសារព័ត៌មានដែលមានច្បាប់ការពារ។ ទង្វើបែបហ្នឹង វាអាចជះឥទ្ធិពលអវិជ្ជមាន វាធ្វើឱ្យប៉ះពាល់ទៅដល់មុខមាត់ ហើយនិងកិច្ចសហការល្អ ក៏ដូចជាការដែលរដ្ឋាភិបាលបានលើកឡើងថា អ្នកសារព័ត៌មានមិនអាចខ្វះបាននៅក្នុងការពិនិត្យតាមនៅក្នុងរឿងករណីផ្សេងៗដែលកើតមានឡើងនៅក្នុងសង្គម»។
លោក ណុប វី បន្តថា រដ្ឋាភិបាលគួរមានវិធានការទៅលើមន្ត្រីទាំងឡាយណាដែលបំភិតបំភ័យ គំរាមកំហែង និងរំខានដល់កិច្ចការអ្នកសារព័ត៌មាន ដើម្បីបង្ហាញពីឆន្ទៈនិងបំណងដែលរដ្ឋាភិបាលតែងតែលើកឡើងថា អ្នកសារព័ត៌មានជាដៃគូសហការល្អមួយពិតមែន។
អ្នកនាំពាក្យក្រសួងព័ត៌មាន លោក មាស សុភ័ណ្ឌ ពុំអាចសុំការអត្ថាធិប្បាយបានទេ នៅថ្ងៃនេះ។
អង្គការអ្នកកាសែតគ្មានព្រំដែន កាលពីពេលថ្មីៗនេះ បានបន្តផ្តល់ចំណាត់ថ្នាក់សេរីភាពសារព័ត៌មាននៅកម្ពុជា ឆ្នាំ២០២១ ស្ថិតនៅលេខរៀងទី១៤៤ ក្នុងចំណោម១៨០ប្រទេសនៅលើពិភពលោក។ ចំណាត់ថ្នាក់នេះបង្ហាញថា សេរីភាពសារព័ត៌មាននៅកម្ពុជានៅតែស្ថិតនៅក្នុងរូបភាពអាក្រក់ដដែល។
សេរីភាពសារព័ត៌មានដែលអង្គការនេះវាយតម្លៃ បង្ហាញថា កម្ពុជាបានធ្លាក់ចុះ៣ឆ្នាំជាប់ៗគ្នាចាប់តាំងពីឆ្នាំ២០១៧មក ពោលគឺចំណាត់ថ្នាក់លេខ១៤២ នៅឆ្នាំ២០១៨ ចំណាត់ថ្នាក់លេខ១៤៣ នៅឆ្នាំ២០១៩ និងចំណាត់ថ្នាក់លេខ១៤៤ នៅឆ្នាំ២០២០ និងឆ្នាំ២០២១នេះ៕
