មន្ត្រីជាន់ខ្ពស់អគ្គនាយកដ្ឋានពន្ធនាគារ លើកឡើងថា លទ្ធភាពនៃការឆ្លងរាលដាលនៃជំងឺកូវីដ-១៩ ក្នុងចំណោមអ្នកជាប់ឃុំតាមពន្ធនាគារក្នុងប្រទេស កំពុងឋិតក្នុងហានិភ័យខ្ពស់ បន្ទាប់ពីរកឃើញករណីវិជ្ជមានលើអ្នកជាប់ឃុំនៅពន្ធនាគារខេត្តព្រះសីហនុ ជាង៣០នាក់។
បើតាមរបាយការណ៍ពីរដ្ឋបាលខេត្តព្រះសីហនុ កាលពីថ្ងៃទី៨ ខែឧសភា អ្នកជាប់ឃុំចំនួន៣៥នាក់នៅពន្ធនាគារក្នុងខេត្តជាប់មាត់សមុទ្រមួយនេះ ត្រូវបានរកឃើញវិជ្ជមានកូវីដ-១៩ ក្នុងចំណោមអ្នកឆ្លងថ្មីចំនួន១២៦នាក់។
អ្នកនាំពាក្យអគ្គនាយកដ្ឋានពន្ធនាគារ លោក នុត សវនា លើកឡើងនៅថ្ងៃចន្ទនេះថា ចាប់ពីពេលនេះ ជនជាប់ឃុំថ្មីៗត្រូវឆ្លងកាត់ការធ្វើវិភាគរកវិជ្ជមានកូវីដ-១៩ ចាប់ពីពេលអាជ្ញាធរឃាត់ខ្លួននិងឡើងតុលាការ មុននឹងបញ្ជូនមកដាក់ខ្លួនដាច់ដោយឡែក១៤ថ្ងៃ តាមវិធានសុខាភិបាលនៅពន្ធនាគារបន្ថែមទៀត។
លោកមានប្រសាសន៍ថា៖ «ឥលូវនេះ ត្រូវតែពិនិត្យសំណាក ព្រោះយើងមើលខាងក្រៅ យើងមើលអត់ដឹងទេ ទោះបីធ្វើចត្តាឡីស័ក១៤ថ្ងៃ ក៏អាចមានហានិភ័យឆ្លងចូលដល់ក្នុង[ពន្ធនាគារ]ដែរ»។
ប្រភពដដែលឱ្យដឹងទៀតថា សម្រាប់មន្រ្តីអនុរក្សប្រចាំការនៅតាមពន្ធនាគារទាំងអស់ មិនអនុញ្ញាតឱ្យធ្វើដំណើរដោយសេរី ហើយត្រូវរាយការណ៍ជាប្រចាំមកអង្គភាពរបស់ពួកគេ។ លើសពីនេះ សម្រាប់អ្នកដែលមានភារកិច្ចចូលក្នុងពន្ធនាគារ ត្រូវតែសួរនាំពីប្រវត្តិនៃការធ្វើដំណើរជាមុន។
លោក នុត សវនា មានប្រសាសន៍ថា៖ «ពេលនេះគឺជាពេលអាសន្ន ដែលយើងទាំងអស់គ្នា គ្រប់គោលដៅទាំងអស់ ត្រូវយកចិត្តទុកដាក់ខ្ពស់ក្នុងការងារនេះ។ សូម្បីតែមន្រ្តីដែលគាត់មានសិទ្ធិធ្វើដំណើរពីនេះទៅនោះ ពេលនេះត្រូវតែកម្រិតចលនារបស់ពួកគាត់ កម្រិតសកម្មភាពចល័តរបស់គាត់»។
បើតាមមន្រ្តីអ្នកនាំពាក្យរូបនេះ អាជ្ញាធរបានបិទខ្ទប់ការចេញចូលពន្ធនាគារខេត្តព្រះសីហនុ និងស្រាវជ្រាវរកមូលហេតុឆ្លង ព្រមទាំងអ្នកពាក់ព័ន្ធផ្សេងៗ ដើម្បីយកសំណាកនិងដាក់ខ្លួនដាច់ដោយឡែកសម្រាប់អ្នកប៉ះផ្ទាល់ ហើយពន្លឿនការចាក់វ៉ាក់សាំងលើអ្នកជាប់ឃុំនៅតំបន់ហានិភ័យខ្ពស់ផងដែរ។
អ្នកស្រី ឡុច ទូច ភរិយារបស់លោក កៅ ហួរ ដែលបានជាប់ឃុំនៅពន្ធនាគារខេត្តព្រះសីហនុ ដោយសារវិវាទដីធ្លី លើកឡើងថា អ្នកស្រីមានការបារម្ភពីបញ្ហាសុខភាពប្តីរបស់គាត់ជាខ្លាំង បន្ទាប់ពីដឹងថា ជំងឺកូវីដ-១៩ បានឆ្លងរាលដាលចូលពន្ធនាគារខេត្ត ហើយមន្រ្តីពន្ធនាគារប្រាប់គាត់ថា មានអ្នកវិជ្ជមានកូវីដ-១៩ ស្នាក់នៅបន្ទប់ជាមួយប្តីរបស់គាត់ទៀតផង។
អ្នកស្រីបានស្នើឱ្យមានការដោះលែងស្វាមីរបស់ខ្លួន ដោយថា ប្តីអ្នកស្រីត្រូវបានកាត់ទោសឱ្យជាប់ពន្ធនាគារទាំងអយុត្តិធម៌ និងទាំងដែលគាត់មានជំងឺវង្វេងស្មារតីថែមទៀត។
អ្នកស្រី ឡុច ទូច និយាយថា៖ «ប្តីខ្ញុំគ្មានអ្នកណាទីពឹង គាត់មិនដឹងទីពឹងនរណា! ហើយដេកយប់ឡើង កូនចៅយំចង់ងាប់អស់ហើយ ដោយសារឮកូរ៉ូណា យំ! នាំគ្នាជុំគ្នាយំទ្រហឹងអឺងអាត់ ហើយព្រួយបារម្ភខ្លាចគាត់ឆ្លងកូរ៉ូណា ព្រោះគាត់មានជំងឺចាំបាច់អ៊ីចឹង ហើយគាត់វិកលចរិតទៀត»។
ដោយឡែក អ្នកស្រី ឡុញ គង់ វ័យ២៥ឆ្នាំ ដែលមានម្តាយឈ្មោះ អេង វ៉ាន់ អាយុ៥៨ឆ្នាំ កំពុងជាប់ពន្ធនាគារខេត្តព្រះសីហនុដែរនោះ ប្រាប់ វីអូឌី ថា ម្តាយរបស់អ្នកស្រីបានជាប់ឃុំរយៈពេល១០ខែ ពីបទប្រើប្រាស់អំពើហិង្សាក្នុងជម្លោះដីធ្លីមួយកន្លែង។
អ្នកស្រីថា ម្តាយរបស់គាត់មានរោគក្រពះប្រចាំកាយ ហើយគាត់មិនដឹងពីសុខទុក្ខម្តាយរបស់ខ្លួន និងមិនដឹងថាត្រូវទាក់ទងទៅអ្នកណានោះទេ បន្ទាប់ពីមានការហាមឃាត់សាច់ញាតិអ្នកជាប់ឃុំមិនឱ្យចូលពន្ធនាគារសួរសុខទុក្ខចាប់តាំងពីផ្ទុះព្រឹត្តិការណ៍សហគមន៍២០កុម្ភៈមក។
អ្នកស្រី ឡុញ គង់ និយាយថា៖ «ខ្ញុំសំណូមពរថា គាត់ជួយធ្វើម៉េចឱ្យអ្នកនៅក្នុងហ្នឹងជួយកុំឱ្យមានការឆ្លងតៗគ្នា ព្រោះខ្ញុំខ្លាចតែគាត់ឆ្លងនៅក្នុងហ្នឹងដែរ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត លើកឡើងថា ករណីវិជ្ជមានកូវីដ-១៩ ដែលរកឃើញនៅពន្ធនាគារខេត្តព្រះសីហនុ ជាមេរៀនមួយក្រើនរំឭកដល់អ្នកគ្រប់គ្រងពន្ធនាគារទាំងអស់នៅទូទាំងប្រទេស ឱ្យបង្កើនការប្រុងប្រយ័ត្ន និងរកដំណោះស្រាយកាត់បន្ថយភាពចង្អៀតណែនក្នុងបន្ទប់ឃុំខ្លួន ដែលនាំឱ្យមានហានិភ័យនៃការឆ្លងខ្ពស់និងលឿនរហ័ស។
លោក អំ សំអាត មានប្រសាសន៍ថា៖ «កន្លងមក អង្គការសង្គមស៊ីវិលយើងក៏ទទូចដែរ ទាក់ទងនឹងគ្រប់ពន្ធនាគារទាំងអស់ ជាពិសេសទាក់ទងនឹងបញ្ហាត្រូវតុលាការ ប្រសិនជាបទល្មើសណាដែលវាជាបទល្មើសព្រហ្មទណ្ឌកម្រិតស្រាល អាចអនុញ្ញាតឱ្យនៅក្រៅឃុំបាន គួរតែឱ្យនៅក្រៅឃុំបណ្តោះអាសន្ន ដើម្បីកាត់បន្ថយភាពចង្អៀតណែននិងហានិភ័យខ្ពស់នៅក្នុងពន្ធនាគារហ្នឹង៕
