អង្គការ-សមាគមអ្នកសារព័ត៌មានចំនួន៤ អំពាវនាវទៅក្រសួងព័ត៌មាន ស្តារឡើងវិញនូវសិទ្ធិរបស់អ្នកសារព័ត៌មានក្នុងការចូលទៅយកព័ត៌មានដោយសុវត្ថិភាពនៅតំបន់ក្រហម ក្នុងរាជធានីភ្នំពេញ។
ការអំពាវនាវរបស់អង្គការសមាគមទាំងនេះធ្វើឡើងក្រោយពីក្រសួងព័ត៌មាន កាលពីថ្ងៃទី០៤ ខែឧសភា បានព្រមានចាត់វិធានការច្បាប់លើអ្នកសារព័ត៌មានដែលចុះផ្សាយព័ត៌មានពាក់ព័ន្ធវិធានការបិទខ្ទប់និងវិធានការសុខាភិបាលបំភ្លៃខុសពីការពិត ហើយធ្វើឱ្យសាធារណជនមានការភ័ន្តច្រឡំនិងបង្កភាពច្របូកច្របល់ក្នុងសង្គម នៅអំឡុងពេលឆ្លងរាលដាលនៃជំងឺកូវីដ-១៩។
សេចក្តីថ្លែងការណ៍រួមរបស់អង្គការ-សមាគមអ្នកសារព័ត៌មានចំនួន៤ រួមមាន មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) សមាគមសម្ព័ន្ធអ្នកសារព័ត៌មានកម្ពុជា (CamboJA) សហព័ន្ធអ្នកសារព័ត៌មានអន្តរជាតិ (IFJ) និងក្លឹបអ្នកសារព័ត៌មានបរទេសនៃកម្ពុជា (OPCC) ចុះថ្ងៃទី០៦ ខែឧសភា ឆ្នាំ២០២១ បានលើកឡើងថា លទ្ធភាពរបស់អ្នកសារព័ត៌មានក្នុងការផ្លាស់ទីដោយសេរីទៅក្នុងតំបន់ក្រហម គឺមានភាពចាំបាច់ណាស់ដល់ការងាររបស់ពួកគេ ក្នុងការផ្តល់ព័ត៌មានជូនដល់សាធារណជន។ ប៉ុន្តែការដកហូតសិទ្ធិសេរីភាពរបស់អ្នកសារព័ត៌មាននាពេលថ្មីៗនេះ ដោយមិនឱ្យចូលយកព័ត៌មានក្នុងតំបន់ក្រហមនោះ បានរឹតត្បិតសិទ្ធិរបស់ពួកគេក្នុងការរាយការណ៍ដោយសេរីនិងយុត្តិធម៌។
សេចក្តីថ្លែងការណ៍រួមបន្តថា ក្រៅពីការរឹតត្បិតសិទ្ធិរបស់អ្នកសារព័ត៌មានមិនឱ្យចូលក្នុង«តំបន់ក្រហម» ការអនុញ្ញាតចូលទៅ«តំបន់លឿងទុំ»សម្រាប់តែអ្នកសារព័ត៌មានដែលត្រូវបានអនុញ្ញាតដោយរដ្ឋាភិបាលនោះ គឺបានដាក់កម្រិតលើលំហូរព័ត៌មាន ខណៈការផ្តល់ព័ត៌មានទៅសាធារណជនគឺជាគន្លឹះក្នុងការគ្រប់គ្រងការរីករាលដាលនៃជំងឺកូវីដ-១៩។
អង្គការ-សមាគមទាំងនោះបញ្ជាក់ថា អ្នកសារព័ត៌មានឯករាជ្យមួយចំនួនបានត្រៀមខ្លួនទទួលយកហានិភ័យ និងចាត់វិធានការការពារខ្លួនដែលចាំបាច់យ៉ាងម៉ត់ចត់ ដើម្បីចុះយកព័ត៌មានក្នុងតំបន់ក្រហម ទៅតាមវិធីដែលអាចការពារខ្លួនពួកគេនិងការពារសុវត្ថិភាពសាធារណជនបាន។
អង្គការសមាគមអ្នកសារព័ត៌មានបានបន្តទៀតថា អ្នកសារព័ត៌មានទាំងអស់ដែលប្រកាន់ខ្ជាប់នូវវិធានការសុខាភិបាល គោលការណ៍វិជ្ជាជីវៈ និងមានក្រមសីលធម៌ត្រឹមត្រូវនោះ គួរតែត្រូវបានអនុញ្ញាតឱ្យចូលយកព័ត៌មានក្នុងតំបន់ក្រហម និងតំបន់លឿងទុំ។ ពួកគេយល់ថា ការរឹតត្បិតនេះនឹងធ្វើឱ្យប៉ះពាល់ដល់ការប្តេជ្ញាចិត្តរបស់រដ្ឋាភិបាលក្នុងការការពារសេរីភាពសារព័ត៌មាននិងការទទួលបានព័ត៌មាន។
អ្នកសារព័ត៌មានទាំងអស់ ទាំងអ្នកសារព័ត៌មានបម្រើការតាមស្ថាប័ន និងអ្នកសារព័ត៌មានឯករាជ្យមិនមានស្ថាប័ន (freelance journalists) បានដើរតួនាទីយ៉ាងសំខាន់នៅក្នុងការប្រយុទ្ធប្រឆាំងនឹងព័ត៌មានមិនពិត ហើយគួរតែទទួលបានសិទ្ធិស្មើគ្នាក្នុងការចូលយកព័ត៌មានក្នុងតំបន់ហាមឃាត់។ នេះបើតាមការលើកឡើងនៅក្នុងសេចក្តីថ្លែងការណ៍រួមនោះ។
អង្គការ-សមាគមអ្នកសារព័ត៌មាន បានទាមទារឱ្យក្រសួងព័ត៌មានអនុញ្ញាតឱ្យប្រព័ន្ធផ្សព្វផ្សាយឯករាជ្យនិងអ្នកសារព័ត៌មានឯករាជ្យមិនមានស្ថាប័ន (freelance journalists) បំពេញមុខងាររបស់ពួកគេនៅទូទាំងតំបន់ក្រហម តំបន់លឿងទុំ និងតំបន់លឿង ហើយថា អ្នកសារព័ត៌មានដែលមានបណ្ណបញ្ជាក់អត្តសញ្ញាណនៅមានសុពលភាព និងប្រកាន់ខ្ជាប់នូវវិធានការគម្លាតសង្គមយ៉ាងតឹងរ៉ឹង មានការពាក់ម៉ាស់ ហើយមានការប្រុងប្រយ័ត្នខ្ពស់នោះ ត្រូវតែទទួលបានការអនុញ្ញាតឱ្យបន្តការងាររបស់ពួកគេដោយប្រក្រតី។
អង្គការ-សមាគមអ្នកសារព័ត៌មាន បានគូសបញ្ជាក់ថា៖ «ក្នុងនាមជាអ្នកសារព័ត៌មាន យើងជឿជាក់ថា ការផ្តល់ព័ត៌មានត្រឹមត្រូវ ឆ្លងកាត់ការផ្ទៀងផ្ទាត់ និងមិនលម្អៀង គឺជាសេវាកម្មសាធារណៈដ៏ចាំបាច់មួយ។ ហើយយើងខ្ញុំសូមជំរុញដល់ក្រសួងព័ត៌មាន មេត្តាអនុញ្ញាតឱ្យអ្នកសារព័ត៌មានឯករាជ្យទាំងជនជាតិកម្ពុជានិងជនបរទេស អាចបន្តបំពេញតួនាទីដ៏សំខាន់នេះ»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា លោក ណុប វី មានប្រសាសន៍ថា ប្រសិនបើមានការបិទខ្ទប់ឬមិនអនុញ្ញាតឱ្យអ្នកសារព័ត៌មានចូលទៅយកព័ត៌មានក្នុងតំបន់ណាមួយនោះ វានឹងប៉ះពាល់ទៅដល់ការទទួលព័ត៌មានពិតរបស់សាធារណជន។
ករណីនេះ លោកបានទទូចឱ្យមានការគាំទ្រនិងអនុញ្ញាតឱ្យមានស្ថាប័នសារព័ត៌មានចម្រុះ អាចចូលទៅយកព័ត៌មាននៅតំបន់ហាមឃាត់ណាមួយបានដូចៗគ្នា ដោយពុំមានការរើសអើង ដើម្បីឱ្យពួកគេអាចប្រមូលយកព័ត៌មានផ្សេងៗ ដែលប្រជាពលរដ្ឋកំពុងជួបបញ្ហាយកទៅផ្សព្វផ្សាយឱ្យសាធារណជននិងរដ្ឋាភិបាលបានដឹង ហើយធ្វើការដោះស្រាយទាន់ពេលវេលា។
លោក ណុប វី បន្ថែមថា៖ «អ្វីដែលជាការព្រួយបារម្ភរបស់យើង គឺយើងព្រួយបារម្ភរឿងទាក់ទងនឹងផលប៉ះពាល់ទៅដល់ការទទួលបានព័ត៌មានពីសាធារណជនទូទៅ រួមជាមួយខាងអាជ្ញាធរក៏ដូចជាប្រមុខដឹកនាំរដ្ឋាភិបាល ដើម្បីគាត់ដឹងអំពីបញ្ហារបស់ប្រជាពលរដ្ឋរស់នៅក្នុងតំបន់ក្រហម និងតំបន់ដែលមានការរាំងខ្ទប់។ នេះជាការព្រួយរបស់យើង ដែលយើងទាមទារធ្វើម៉េចឱ្យមានការអនុញ្ញាតឱ្យអ្នកសារព័ត៌មានគាត់អាចចេញចូលដើម្បីយកព័ត៌មានបាន ដោយសារតែពួកគាត់មានវិធីការពារខ្លួនពីការឆ្លងជំងឺកូវីដ-១៩»។
អ្នកនាំពាក្យក្រសួងព័ត៌មាន លោក មាស សោភ័ណ្ឌ សុំមិនបកស្រាយនឹងសេចក្តីថ្លែងការណ៍របស់អង្គការ-សមាគមទាំង៤នេះ។
តែយ៉ាងណា លោកថា៖ «ក្រសួងព័ត៌មាន ស្នើដល់អ្នកសារព័ត៌មានទាំងអស់គោរពទៅតាមសារាចរ បទបញ្ជាណែនាំ និងគោលការណ៍ណែនាំរបស់សមត្ថកិច្ច ធ្វើយ៉ាងណាចូលរួមទាំងអស់គ្នា ដើម្បីការពារផលប្រយោជន៍ប្រជាពលរដ្ឋ សុខភាពសាធារណៈ និងប្រទេសជាតិយើងទាំងមូលដែលកំពុងតែស្ថិតក្នុងវិបត្តិនៃការរីករាលដាលជំងឺកូវីដ-១៩នេះ»។
កាលពីថ្ងៃទី៣ ខែឧសភា ឆ្នាំ២០២១ អង្គការសង្គមស៊ីវិលចំនួន៤៥ បានផ្សព្វផ្សាយរបាយណ៍មួយដោយលើកឡើងថា គិតចាប់តាំងពីអំឡុងខែមករា ដល់ខែមេសា ឆ្នាំ២០២១នេះ មានអ្នកកាសែត៣នាក់ត្រូវបានអាជ្ញាធរចាប់ឃាត់ខ្លួន និងប្រព័ន្ធផ្សព្វផ្សាយចំនួន៦ត្រូវបានក្រសួងព័ត៌មានដកអាជ្ញាបណ្ណ ពាក់ព័ន្ធនឹងសកម្មភាពរាយការណ៍ព័ត៌មានទាក់ទងនឹងជំងឺកូវីដ-១៩៕
