ពលរដ្ឋអះអាងថា ដីជាង៣ ០០០ហិកតា របស់សហគមន៍មួយស្ថិតក្នុងភូមិរំចេក ឃុំអន្លង់វែង ស្រុកអន្លង់វែង ខេត្តឧត្តរមានជ័យ កំពុងរងការទន្ទ្រានយកធ្វើកម្មសិទ្ធិនិងទិញលក់ពីសំណាក់ជនខិលខូចយ៉ាងអនាធិបតេយ្យ ដោយពុំមានការទប់ស្កាត់ពីអាជ្ញាធរពាក់ព័ន្ធនៅឡើយ។
ប្រធានបណ្តាញសហគមន៍ព្រៃឈើនៅខេត្តឧត្តរមានជ័យ លោក សា ថ្លៃ បានអះអាងប្រាប់ វីអូឌី នៅថ្ងៃព្រហស្បតិ៍នេះថា ដីព្រៃសហគមន៍ «សាមគ្គីសង្គ្រោះព្រៃឈើ» ជាង៣ ០០០ហិកតា ត្រូវបានបុគ្គលឈ្មោះ នូ ឌីណា អាយុ៣៦ឆ្នាំ មុខរបរជាអ្នកលក់គ្រឿងដែក រស់នៅឃុំស្រែណូយ ស្រុកវ៉ារិន ខេត្តសៀមរាប ជាអ្នករំលោភយក ដោយបានគប់គិតគ្នាទិញដីព្រៃសហគមន៍ពីបុគ្គលឈ្មោះ ព្រួញ រស់នៅខេត្តសៀមរាប និងបុគ្គលម្នាក់ទៀតឈ្មោះ វួន រស់នៅភូមិអូរតាម៉ែង ឃុំអន្លង់វែង។
ប្រធានបណ្តាញសហគមន៍ព្រៃឈើ លោក សា ថ្លៃ បន្ថែមថា កន្លងមក ប្រជាសហគមន៍ធ្លាប់បានធ្វើរបាយការណ៍ដាក់ជូនសង្កាត់រដ្ឋបាលព្រៃឈើស្រុកអន្លង់វែង និងដាក់បណ្តឹងទៅសាលាដំបូងខេត្តឧត្តរមានជ័យ ដើម្បីឱ្យមានវិធានការលើរឿងនេះ ប៉ុន្តែរហូតមកដល់ពេលនេះ ពុំទាន់មានចំណាត់ណាមួយទៅលើជនល្មើសទាំងនោះនៅឡើយទេ។
លោកបន្ថែមថា៖ «ការសំណូមពររបស់ខ្ញុំ ធ្វើម៉េចឱ្យអាជ្ញាធរពាក់ព័ន្ធចាត់វិធានការឱ្យមានប្រសិទ្ធភាព។ យើងដឹងហើយចរិតនៃច្បាប់មិនលើកលែង គឺមិនលើកលែងឱ្យបុគ្គលណាមួយទេ មិនគិតថាអ្នកមានអ្នកក្រ អ្នកតូចឬអ្នកធំទេ តែខុសច្បាប់ ត្រូវអនុវត្តទៅតាមច្បាប់។ បើអាជ្ញាធរមិនចាត់វិធានការតឹងរ៉ឹង នៅតែលើកលែង នៅតែធ្វើស្ទើរៗ អ៊ីចឹងវានឹងអស់ហើយព្រៃហ្នឹង។ នៅស្រុកអន្លង់វែង មិនមែនមានតែសហគមន៍ហ្នឹងមួយទេដែលរងការកាប់បំផ្លាញ សហគមន៍មួយទៀតនោះទំហំជាង៦ ០០០ហិកតា ក៏ស្ទើរតែអស់ទាំងស្រុងដែរ»។
ប្រធានសហគមន៍សាមគ្គីសង្គ្រោះព្រៃឈើ លោក សត់ ពេក និយាយថា ប្រជាសហគមន៍បានខិតខំការពារព្រៃសហគមន៍មួយនេះណាស់ ប៉ុន្តែការពារមិនឈ្នះនោះទេ ដោយសារតែអ្នកដែលចូលទៅទន្ទ្រានយកនោះមានខ្នងនិងមានអំណាច។
ប្រធានសហគមន៍រូបនេះបន្តថា អ្នកទន្ទ្រាននិងទិញលក់ដីព្រៃសហគមន៍ បានគំរាមប្តឹងលោកទៅតុលាការ និងបានដាក់កម្លាំងមួយឡានមកតាមរកលោកដល់ផ្ទះ ក្រោយលោកផ្សព្វផ្សាយពីសកម្មភាពបុគ្គលនោះទិញលក់ដីព្រៃសហគមន៍ ប៉ុន្តែមិនបានជួបលោកនោះទេ ហើយលោកកំពុងបារម្ភពីសុវត្ថិភាពផ្ទាល់ខ្លួន។
លោកបន្ថែមថា៖ «កាលចុះល្បាតព្រៃនៅឆ្នាំ២០២០ ខ្ញុំសាកសួរគាត់ ហើយគាត់បានប្រាប់ខ្ញុំថា ឈ្មោះ ឌីណា គាត់ជាទាហាននៅកងពលលេខ៥ ចំណុះឱ្យលេខ២ និងមុខរបរគាត់មួយទៀតជាអ្នកលក់គ្រឿងដែកនៅខេត្តសៀមរាប។ អ៊ីចឹងហើយខ្ញុំបារម្ភពីសុវត្ថិភាព ហើយខ្ញុំបានរាយការណ៍ទៅប្រធានមន្ទីរកសិកម្ម រុក្ខាប្រមាញ់ និងនេសាទខេត្តឧត្តរមានរជ័យដែរ។ ទី១ ខ្ញុំបារម្ភពីសុវត្ថិភាព និងទី២ ខ្ញុំបារម្ភពីការបាត់បង់ព្រៃឈើសហគមន៍តែម្តង ពីព្រោះបទល្មើសហ្នឹងប្រព្រឹត្តដោយអ្នកមានអំណាច»។
បើតាមលោក សត់ ពេក សហគមន៍សាមគ្គីសង្គ្រោះព្រៃឈើ មានផ្ទៃដីសរុប៤ ១៥១ហិកតា ប៉ុន្តែបច្ចុប្បន្ននៅសល់ព្រៃប្រហែលជាង២០ភាគរយតែប៉ុណ្ណោះ។
វីអូឌី មិនអាចរកការឆ្លើយតបពីលោក នូ ឌីណា និងបុគ្គលពីរនាក់ទៀត ដែលរងនូវការចោទប្រកាន់ពីប្រជាពលរដ្ឋនោះទេ។
នាយរដ្ឋបាលព្រៃឈើខេត្តឧត្តរមានជ័យ លោក អឹម សៅរិទ្ធ បានទទួលស្គាល់ថា ពិតជាមានករណីកាប់រាននិងទិញលក់ដីព្រៃសហគមន៍ «សាមគ្គីសង្គ្រោះព្រៃឈើ» នេះពិតមែន ហើយថា ករណីនេះ លោកបានកសាងសំណុំរឿងបញ្ជូនទៅតុលាការហើយដែរ។
លោកបន្ថែមថា៖ «បាទ! ករណីនេះ យើងបានកសាងសំណុំរឿងបញ្ជូនទៅតុលាការហើយ»។
មន្រ្តីការពារសិទ្ធិមនុស្សសមាគមអាដហុកប្រចាំខេត្តឧត្តរមានជ័យ លោក ស្រី ណារ៉េន មានប្រសាសន៍ថា ករណីដីព្រៃសហគមន៍នៅខេត្តឧត្តរមានជ័យ បន្តបាត់បង់នេះ គឺដោយភាពកម្សោយនៃការអនុវត្តច្បាប់របស់អាជ្ញាធរពាក់ព័ន្ធ។
មន្ត្រីសិទ្ធិមនុស្សរូបនេះបានបារម្ភពីវិនាសកម្មព្រៃឈើសហគមន៍នៅក្នុងខេត្តឧត្តរមានជ័យ ប្រសិនអាជ្ញាធរនៅតែបណ្តែតបណ្តោយ និងមិនបានចាត់វិធានការច្បាប់តឹងរ៉ឹងចំពោះជនខិលខូចដែលបានល្មើសនោះទេ។
លោកបន្ថែមថា៖ «ជនខិលខូចបានគប់គិតជាមួយអ្នកមានអំណាចមួយចំនួន បានចូលទៅរុករានទៅលើដីព្រៃសហគមន៍ហ្នឹង ហើយប្រជាសហគមន៍គាត់បានធ្វើរបាយការណ៍និងដាក់បណ្តឹងសព្វគ្រប់មករដ្ឋបាលព្រៃឈើ និងអាជ្ញាធរពាក់ព័ន្ធទាំងអស់ហ្នឹង ប៉ុន្តែបើនិយាយពីចំណាត់ការវិញ អត់មានទេ! យើងមានការព្រួយបារម្ភណាស់ បើចេះតែបណ្តែតបណ្តោយអ៊ីចឹងទៀត នឹងរលាយហិនហោចអស់ព្រៃឈើនៅក្នុងខេត្តឧត្តរមានជ័យហ្នឹង»។
ប្រធានបណ្តាញសហគមន៍ព្រៃឈើនៅខេត្តឧត្តរមានជ័យ លោក សា ថ្លៃ ឱ្យដឹងថា នៅក្នុងខេត្តឧត្តរមានជ័យ មានសហគមន៍ព្រៃឈើចំនួន១៣សហគមន៍ ដោយសហគមន៍មួយចំនួនបានបាត់បង់ស្ទើរទាំងស្រុងទៅហើយ ដូចជាសហគមន៍ព្រៃឈើអណ្តូងបរ សហគមន៍ព្រៃឈើដុងបេង និងសហគមន៍ព្រៃឈើផ្សេងទៀត៕
