បុគ្គលិកកាស៊ីណូមួយចំនួននៅក្រុងប៉ោយប៉ែត ខេត្តបន្ទាយមានជ័យ កំពុងប្រឈមបញ្ហាខ្វះអាហារ ស្របពេលបាត់បង់ការងារនិងការកើនឡើងនៃបំណុលធនាគារ ខណៈពួកគេមិនទាន់ទទួលបានប្រាក់ឧបត្ថម្ភឬស្បៀងអាហារ អំឡុងពេលបិទខ្ទប់ដើម្បីកាត់ផ្តាច់រលកចម្លងជំងឺកូវីដ-១៩នៅឡើយ។
បុគ្គលិកកាស៊ីណូ DNA Star Vegas ផ្នែកល្បែង លោក ស៊ិន រក្សា ឱ្យដឹងនៅថ្ងៃនេះថា លោកនិងភរិយា ព្រមទាំងបុគ្គលិកប្រមាណ៤០នាក់ផ្សេងទៀត ជាប់ក្នុងអាគារស្នាក់នៅរបស់កាស៊ីណូកម្ពស់៧ជាន់ ជាង១សប្ដាហ៍មកហើយ។ លោកថា អាជ្ញាធរដាក់របាំងមុខច្រកផ្លូវ និងអនុញ្ញាតឆ្លងកាត់ចេញត្រឹម១០នាទីដើម្បីទិញអាហារដែលមានលក់ក្នុងផ្ទះជាប់រោងចក្រ និងមានអ្នកដឹកតាមរទេះម្តងម្កាលប៉ុណ្ណោះ។
បុរសវ័យ២០ឆ្នាំរូបនេះអះអាងថា លោកហូបបាយជាមួយត្រីខកំប៉ុង ពងទា និងមីកញ្ចប់ ជាប្រចាំ និងទិញសាច់ជ្រូកប្រឡាក់ទុកហូបម្តងម្កាលប៉ុណ្ណោះ ដើម្បីត្បិតត្បៀតលុយកាក់សេសសល់ពីប្រាក់ខែចុងក្រោយ ទុកសម្រាប់ត្រៀមទប់ទល់បានមួយរយៈពេលខ្លីទៀត។
បើតាមលោក រក្សា បុគ្គលិកដទៃទៀត រួមទាំងលោកផង ដែលកំពុងជាប់ក្នុងអាគារស្នាក់នៅ កំពុងប្រឈមនឹងបញ្ហាដាច់ស្បៀង ប្រសិនបើការបិទខ្ទប់បន្តអូសបន្លាយ ដោយសារពួកគេមិនទទួលបានប្រាក់ខែ ប្រាក់ឧបត្ថម្ភ ឬស្បៀងអាហារពីថៅកែឬអាជ្ញាធរនៅឡើយ។
លោក ស៊ិន រក្សា និយាយថា៖ «ក្តីបារម្ភខ្ញុំមានតែរឿងស្បៀងនិងទឹកដោះគោកូន ព្រោះអីអត់មានចំណូល អត់ការងារធ្វើ កូនទើបបាន២ខែ។ កូនអឹមទឹកដោះគោរហូត ហើយប្រពន្ធនៅជុំគ្នានៅអាគារនេះ»។
បុគ្គលិកផ្នែកចែកបៀរនៅកាស៊ីណូ Great Lion ក្នុងភូមិក្បាលស្ពាន សង្កាត់ប៉ោយប៉ែត លោក យ៉ុង យិន និយាយថា លោកត្រូវបានអនុញ្ញាតឱ្យមកស្នាក់នៅបន្ទប់ជួលជាមួយគ្រួសារដែលមានគ្នា៥នាក់ ជាប់ខ្សែក្រវាត់តំបន់ក្រហមមួយថ្ងៃមុនបិទខ្ទប់ថ្ងៃទី២៤ ខែមេសា។
បុរសវ័យ៣៩ឆ្នាំ និងមានកូនតូចពីរនាក់ក្នុងបន្ទុករូបនេះ បន្ថែមថា លោកនិងបុគ្គលិកដទៃទៀតដែលមានប្រមាណ៧០នាក់ មិនទាន់ទទួលបានប្រាក់ឧបត្ថម្ភឬប្រាក់ឈ្នួលអំឡុងពេលបិទខ្ទប់ ដូចកម្មករក្នុងវិស័យរោងចក្រដេរសម្លៀកបំពាក់និងបុគ្គលិកកាស៊ីណូដែលមានសហជីពតំណាងមួយចំនួននោះទេ។
លោក យ៉ុង យិន និយាយថា៖ «បញ្ហាធំហ្នឹង បុគ្គលិកក៏ដូចជាប្រជាជននៅខ្មែរយើងភាគច្រើនជួបទៅ ឮថា យើងខ្ចីខាងធនាគារ។ អ៊ីចឹងកន្លែងការងារត្រូវបានបិទ អ៊ីចឹងយើងជួបផលវិបាកខ្លាំងតែម្តង បន្ទាប់ពីអត់ការងារធ្វើហើយ យើងមិនដឹងថាទៅចាប់អាជីពការងារអីផ្សេងនៅឡើយ»។
បុគ្គលិកកាន់ផ្នែកស្តុក ដែលធ្វើការប្តូរវេននៅកាស៊ីណូ Grand Diamond City លោក សូ សំរិទ្ធិសិលា លើកឡើងថា លោកស្នាក់នៅប្លុកបន្ទប់ជួល ក្នុងភូមិក្បាលស្ពាន១ សង្កាត់ប៉ោយប៉ែត ក្បែរកន្លែងធ្វើការដែលជាតំបន់ផ្ទុះជំងឺខ្លាំងមួយ។ លោកថា អាជ្ញាធរបានដាក់ប៉ារ៉ាស់ព័ន្ធខ្សែបិទច្រកចេញចូលនីមួយៗ និងដាក់កម្លាំងយាមកាមមិនឱ្យនរណាម្នាក់ចេញឬចូលសូម្បីទិញអាហារ។
លោកថា ចាប់ពីមានការរីករាលដាលជំងឺកូវីដ-១៩ នៅឆ្នាំ២០២០មក ក្រុមហ៊ុនកាស៊ីណូបានបែកចែកវេនសម្រាប់បុគ្គលិកធ្វើការ ហើយលោកអាចបន្តធ្វើការបានក្នុង១ត្រីមាសបាន១ខែប៉ុណ្ណោះ ដោយលោកត្រូវរត់ម៉ូតូឌុបឬរករបរផ្សេងបន្ថែម ដើម្បីបានប្រាក់ផ្គត់ផ្គង់ជីវភាព។
លោកបន្ថែមថា ចាប់ពីពេលបិទខ្ទប់លើកនេះ លោកត្រូវបាត់បង់ចំណូលទាំងស្រុង និងកំពុងប្រឈមការដាច់ស្បៀង និងអស់ប្រាក់ទិញម្ហូបអាហារ ដោយសារអង្ករ ត្រីខ មីកញ្ចប់ ប្រហុក និងអាហារក្រៀមៗដែលទិញស្តុកមុនពេលបិទខ្ទប់កាន់តែខើច ហើយមិនទាន់ឃើញមានអាជ្ញាធរចុះមកចែកស្បៀងនៅឡើយ។
លោក សំរិទ្ធិសិលា និយាយថា៖ «ថ្ងៃខ្លះក៏ដាំបបរទៅ យើងរិះថាំ យើងត្បិតត្បៀត យើងសន្សំសំចៃ។ យើងសង្ឃឹមថាដល់ថ្ងៃទី៨ គេបើក។ ឥលូវដល់ថ្ងៃទី៥ នៅសល់៣ថ្ងៃទៀត។ បើសិនជាគេបិទបន្តទៀត កន្លះខែទៀត អាហ្នឹងគឺយើងយ៉ាប់មែនទែន គឺមានន័យថាដាច់ស្បៀងហើយ»។
ប្រធានផ្នែកគ្រប់គ្រងធនធានមនុស្សនៅកាស៊ីណូ Sand Palace ក្នុងសង្កាត់ប៉ោយប៉ែត លោក វ៉ាន់ ចំរើន អះអាងថាបុគ្គលិកកាស៊ីណូរបស់លោកមិនសូវប្រឈមនឹងបញ្ហាទេ ដោយសារអ្នកដែលជាប់ក្នុងអាគារប្រមាណ៣០នាក់ ទទួលបានការឧបត្ថម្ភអាហារ១ថ្ងៃ៣ពេល និងការស្នាក់នៅពីថៅកែ។ យ៉ាងណា លោកថា ខាងក្រុមហ៊ុនមិនផ្តល់ប្រាក់ឧបត្ថម្ភឬប្រាក់លើកទឹកចិត្ត អំឡុងពេលអាជីវកម្មកាស៊ីណូផ្អាកដំណើរការនោះឡើយ។
លោក វ៉ាន់ ចំរើន និយាយថា៖ «យើងបារម្ភខ្លាំងដែរ ដោយសារបើសិនមានការរីករាលដាលធ្ងន់ធ្ងរទៅ បុគ្គលិកយើងក៏អត់ការងារធ្វើយូរដែរ ព្រោះអីយើងអត់បានដំណើរការអាជីវកម្មរកស៊ីកាស៊ីណូយើង»។
មន្រ្តីសម្របសម្រួលសិទ្ធិការងារប្រចាំខេត្តបន្ទាយមានជ័យ របស់សម្ព័ន្ធសហជីពចលនាកម្មករកម្ពុជា លោក ប៊ុន សុធី លើកឡើងថា បុគ្គលិកកាស៊ីណូក្នុងក្រុងប៉ោយប៉ែតកំពុងជួបបញ្ហាគ្មានការងារធ្វើ បំណុលកើនឡើង គ្មានលុយផ្គត់ផ្គង់ការរស់នៅប្រចាំថ្ងៃ និងបារម្ភពីការរីករាលដាលជំងឺកូវីដ-១៩ ទៀតផង។
បើតាមមន្រ្តីសហជីពរូបនេះ នៅក្រុងប៉ោយប៉ែតមានបុគ្គលិកប្រមាណ២ម៉ឺននាក់បម្រើការនៅកាស៊ីណូតូចនិងធំសរុបប្រហែល៥០កន្លែង។ លោកថា បុគ្គលិកក្នុងវិស័យនេះគួរតែទទួលបានការយកចិត្តទុកដាក់សមរម្យមួយ ដូចទៅនឹងកម្មករក្នុងវិស័យកាត់ដេរដែរ។
លោក សុធី និយាយថា៖ «វិស័យកាស៊ីណូ គឺអត់រលីងហ្មង ស្អីក៏មិនឱ្យដែរ! រដ្ឋាភិបាលក៏មិនបានជួយ៣០ដុល្លារ ថៅកែក៏មិនបានជួយ៤០[ដុល្លារ]។ អ៊ីចឹងស្អីក៏គាត់អត់ទទួលបានដែរ ហើយបុគ្គលិកអី គាត់រស់នៅតាមយថាកម្ម មានន័យថា អ្នកមានលទ្ធភាពប៉ុណ្ណា រស់ប៉ុណ្ណា ទៅនៅណាក៏ទៅហ្នឹងទៅ»។
វីអូឌី មិនអាចទាក់ទងសុំការអធិប្បាយពីអ្នកនាំពាក្យក្រសួងការងារ លោក ហេង សួរ បានទេ នៅថ្ងៃទី៥ ខែឧសភាឆ្នាំ២០២១នេះ។
ដោយឡែក អភិបាលក្រុងប៉ោយប៉ែត លោក គាត ហ៊ុល នៅមិនទាន់អាចជម្រាបបានទេ ជុំវិញបញ្ហាប្រឈមរបស់បុគ្គលិកកាស៊ីណូនេះ ដោយថាជាប់រវល់។
លោកមានប្រសាសន៍ថា៖ «ខ្ញុំអត់ទាន់នេះទេបង កំពុងតែជាប់ដៃ សុំពេលបន្តិចទៀតបង។ ចាំតិចទៀត អត់ទាន់ទេ មនុស្សច្រើនណាស់»។
កាលពីថ្ងៃទី១ ខែឧសភា រដ្ឋបាលខេត្តបន្ទាយមានជ័យ បានកំណត់តំបន់មួយចំនួនក្នុងភូមិសាស្រ្តសង្កាត់ប៉ោយប៉ែត ជាតំបន់ក្រហម បន្ទាប់ពីប្រកាសឱ្យផ្អាកអាជីវកម្មកាស៊ីណូទាំងអស់នៅទូទាំងក្រុង នៅថ្ងៃទី២៧ ខែមេសា។ វិធានការបិទខ្ទប់នេះនឹងអនុវត្តរហូតដល់ថ្ងៃទី៨ ខែឧសភា ឆ្នាំ២០២១។
គិតត្រឹមថ្ងៃទី៥ ខែឧសភា ឆ្នាំ២០២១ ក្រសួងសុខាភិបាលបានរកឃើញករណីវិជ្ជមានកូវីដ-១៩ នៅខេត្តបន្ទាយមានជ័យចំនួន៦១៦ករណី ដែលភាគច្រើនឋិតនៅក្រុងប៉ោយប៉ែត៕
