កម្មករសំណង់ចំនួន១៤នាក់ដែលលួចចេញពីតំបន់បិទខ្ទប់ក្នុងខេត្តព្រះសីហនុ ដើម្បីធ្វើដំណើរទៅស្រុកកំណើតនៅខេត្តសៀមរាប នឹងត្រូវប្រឈមមុខផ្លូវច្បាប់ បើទោះបីជាពួកគេអះអាងថា ការលួចចេញនោះដោយសារតែបញ្ហាគ្មានប្រាក់ចំណូលនិងខ្វះស្បៀងអាហារសម្រាប់បរិភោគក្តី។
កាលពីថ្ងៃទី២៩ ខែមេសា ឆ្នាំ២០២១ សមត្ថកិច្ចខេត្តសៀមរាប បានរកឃើញករណីវិជ្ជមានវីរុសកូវីដ-១៩ លើពលរដ្ឋចំនួន៨នាក់ ក្នុងចំណោមពលរដ្ឋជាកម្មករសំណង់ទាំង១៤នាក់ដែលបានលួចធ្វើដំណើរចេញពីតំបន់បិទខ្ទប់ក្នុងខេត្តព្រះសីហនុ ទៅកាន់ខេត្តនោះ។
ក្រោយទទួលបានព័ត៌មាននេះ អាជ្ញាធរខេត្តព្រះសីហនុ កាលពីថ្ងៃទី១ ខែឧសភា បានស្នើឱ្យអាជ្ញាធរខេត្តសៀមរាប ចាត់វិធានការច្បាប់ ជុំវិញករណីគេចវេះដោយចេតនា មិនគោរពវិធានរដ្ឋបាលដែលមានចែងក្នុងមាត្រា៤ និងមាត្រា១០ នៃច្បាប់ស្ដីពី«វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ» ចំពោះបុគ្គលល្មើសទាំងនោះ ឱ្យបានតឹងរ៉ឹងបំផុត។
អភិបាលរងខេត្តសៀមរាប លោក លី សំរិទ្ធ បានមានប្រសាសន៍កាលពីម្សិលមិញថា បច្ចុប្បន្ននេះ ប្រជាពលរដ្ឋដែលគេចវេះពីតំបន់បិទខ្ទប់ក្នុងខេត្តព្រះសីហនុទាំង១៤នាក់នោះ អាជ្ញាធរបានរកឃើញករណីវិជ្ជមានវីរុសកូវីដ-១៩ កើនដល់ចំនួន៩នាក់ហើយ។
លោកបន្តថា អាជ្ញាធរខេត្តនឹងអនុវត្តការផាកពិន័យទៅតាមច្បាប់ទៅលើពួកគេ ក្រោយព្យាបាលជំងឺកូវីដ-១៩បានជាសះស្បើយនិងក្រោយការធ្វើចត្តាឡីស័ករួច។
លោក លី សំរិទ្ធ មានប្រសាសន៍ថា៖ «គាត់ត្រូវប្រឈមហើយ ប៉ុន្តែសំខាន់យើងព្យាបាលគាត់សិន គ្រាន់តែទោសហ្នឹងវាមិនធំដុំអីទេណា៎! គ្រាន់តែជាការពិន័យ […] បងប្អូនទាំងអស់គ្នាត្រូវប្រយ័ត្ន ធ្វើដំណើរ ជាពិសេសគឺខ្លួនឯង រៀបចំខ្លួនមិនឱ្យឆ្លងទៅអ្នកដទៃ រៀបចំខ្លួនមិនឱ្យចម្លងទៅអ្នកដទៃ អាហ្នឹងគឺជាកាតព្វកិច្ចយើងក្នុងដំណាក់កាលនេះហើយ»។
ពលរដ្ឋដែលអះអាងថាជាកម្មករសំណង់នៅខេត្តព្រះសីហនុ លោក ណា និត អាយុ២០ឆ្នាំ បានឱ្យដឹងថា លោកមិនមានការងារធ្វើជាង១០ថ្ងៃហើយ ខណៈអាហារសម្រាប់ហូបចុកក៏មិនមានដែរ ទើបលោកបង្ខំចិត្តវិលមកកាន់ស្រុកកំណើតនៅឯស្រុកពួក ខេត្តសៀមរាបវិញ។
លោកថា៖ «នៅនោះវាអត់មានការងារធ្វើ ហើយមួយអត់មានអីហូបអី ការហូបចុកដែរ»។
បុរសដែលទើបតែធ្វើការបានជាង២ខែនៅខេត្តព្រះសីហនុរូបនេះ បន្តថា លោកបានចាកចេញពីខេត្តព្រះសីហនុ នៅថ្ងៃទី២៨ ខែមេសា តាមរថយន្តឈ្នួល និងបានទៅដល់ខេត្តសៀមរាបនៅថ្ងៃទី២៩ ខែមេសា ហើយក៏ត្រូវបានអាជ្ញាធរឱ្យធ្វើចត្តាឡីស័ក។ លោកបន្តថា អំឡុងពេលធ្វើចត្តាឡីស័កនោះ អាជ្ញាធរបានយកសំណាកលោកទៅពិនិត្យនិងបានរកឃើញវិជ្ជមានវីរុសកូវីដ-១៩។
លោក ឆាត រតនា អះអាងថាជាកម្មករសំណង់ចំណាកស្រុកពីខេត្តសៀមរាប ទៅធ្វើការនៅខេត្តព្រះសីហនុដែរនោះ បានឱ្យដឹងថា ការដែលលោកសម្រេចចិត្តវិលទៅស្រុកកំណើតវិញនោះ ដោយសារតែលោកទទួលដំណឹងថា មានការបើកផ្លូវធ្វើចរាចរណ៍ឆ្លងខេត្តឡើងវិញ ខណៈដែលលោកក៏មិនមានការងារធ្វើផងដែរ។
ករណីនេះ លោកស្នើដល់អាជ្ញាធរលើកលែងទោសដល់ពួកគាត់ និងអំពាវនាវទៅពលរដ្ឋផ្សេងទៀតមិនត្រូវរត់គេចចេញពីតំបន់បិទខ្ទប់ដូចខ្លួននោះឡើយ។
លោកនិយាយថា៖ «ខ្ញុំសំណូមពរឱ្យកុំបាច់ព្រមាន [ដាក់ទោស] អ៊ីចឹងទេ។ ខ្ញុំវាក្រដែរហ្នឹង! បើខ្ញុំវាបានជាខុសទៅហើយ លើកលែងទោសបានម្ដងទៅ អារឿងច្បាប់រឿងអីខ្ញុំមិនសូវដឹងដែរបង សុំលើកលែង[ទោស] បង! បើមានអ្នកណាធ្វើដូចខ្ញុំអី សូមកុំធ្វើឱ្យសោះ»។
តែយ៉ាងណា អធិការនគរបាលស្រុកពួក លោក ទេព ពុំសែន មានប្រសាសន៍ថា ក្នុងចំណោមអ្នកទាំង១៤នាក់នោះ មាន៧នាក់រស់នៅក្នុងស្រុកពួក ហើយបច្ចុប្បន្ន ពួកគេកំពុងធ្វើចត្តាឡីស័កនិងព្យាបាលជំងឺនៅឯក្រុងសៀមរាប។
លោកបន្តថា អាជ្ញាធរនឹងចាត់វិធានការតាមផ្លូវច្បាប់ដោយពុំមានការយោគយល់ឡើយ ប្រសិនបើករណីនេះ រដ្ឋបាលខេត្តបញ្ជូនឱ្យមន្ត្រីមូលដ្ឋានដោះស្រាយ។
លោកថា៖ «ច្បាប់បង្កើតមកហើយ ត្រូវតែអនុវត្ត ត្រូវតែចាប់បង្ខំ ជួនកាលមនុស្សខ្លះឆ្លើយបំពាន ឆ្លើយដើម្បីឱ្យរួចពីសំណាញ់ច្បាប់ ជួនកាលគាត់គិតថាឆ្លើយថាអត់ទៅវាស្រួល ស្រណុកគេបន្ធូរ។ អ៊ីចឹងប្រសិនបើយើងបន្ធូរគ្រប់គ្នា ឆ្លើយមកថាអត់គ្រប់តែគ្នា អ៊ីចឹងវាទៅជាយើងមិនសូវគោរពច្បាប់ មិនសូវអនុវត្តច្បាប់ឱ្យបានម៉ឺងម៉ាត់ទេ»។
រដ្ឋបាលខេត្តព្រះសីហនុ បានសម្រេចបិទខ្ទប់ភូមិសាស្រ្តក្រុងព្រះសីហនុ ចំនួន១៤ថ្ងៃ ចាប់ពីថ្ងៃទី២៣ ខែមេសា ដល់ថ្ងៃទី៦ ខែឧសភា ឆ្នាំ២០២១ ដើម្បីទប់ស្កាត់ការឆ្លងរាលដាលជំងឺកូវីដ-១៩ ក្នុងសហគមន៍។
ប្រធានមជ្ឈមណ្ឌលអប់រំប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង បានជំរុញឱ្យអាជ្ញាធរត្រូវប្រឹងប្រែងដោះស្រាយករណីជីវភាពពលរដ្ឋដែលរស់នៅក្នុងតំបន់បិទខ្ទប់ ដើម្បីបញ្ចៀសបញ្ហានេះកុំឱ្យកើតមានឡើង ខណៈលោកថា កត្តាជីវភាពជារឿងសំខាន់របស់ពលរដ្ឋ។
លោកមានប្រសាសន៍ថា៖ «អាជ្ញាធរគួរតែប្រឹងប្រែងធ្វើយ៉ាងណាកំណត់អ្នកដែលខ្វះខាត ធ្វើយ៉ាងណាឱ្យគាត់ទទួលស្បៀងអាហារហូបចុក ជាពិសេសអ្នកចំណាកស្រុកទៅធ្វើការអី ហូរហែជាដើមអ៊ីចឹង។ កាលណាអត់មានផ្គត់ផ្គង់អាហារ ពិបាកណាស់ អ្នកខ្លះធ្វើសំណង់ អ្នកខ្លះធ្វើអី ជួនកាលក៏គ្នាមិនទាន់បានបើកលុយបើកកាក់ ជួនកាលក៏គ្នារកការងារមិនបានធ្វើ នៅក្នុងស្ថានភាពលំបាកអីចឹងគួរតែដោះស្រាយឱ្យគ្នា»។
សេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី៤ ខែឧសភា ឆ្នាំ២០២១នេះ បានរកឃើញអ្នកឆ្លងកូវីដ-១៩ថ្មីចំនួន៩៣៨នាក់ និងមានឣ្នកជាសះស្បើយចំនួន៣៦១នាក់ ។
ដោយឡែក នៅខេត្តសៀមរាប រកឃើញអ្នកឆ្លងកូវីដ-១៩ថ្មីចំនួនម្នាក់បន្ថែមទៀត ដែលធ្វើឱ្យចំនួនអ្នកឆ្លងសរុបនៅខេត្តនេះមានចំនួន៥៦នាក់។ ប្រភពដដែលបន្តថា អ្នកជាសះស្បើយសរុបមានចំនួន២៣នាក់ និងកំពុងសម្រាកព្យាបាលចំនួន៣៣នាក់៕