មន្ត្រីសង្គមស៊ីវិលនិងពលរដ្ឋលើកឡើងថា បើរដ្ឋាភិបាលបើករាជធានីភ្នំពេញ និងក្រុងតាខ្មៅ ខេត្តកណ្តាល មួយផ្នែកឡើងវិញក្រោយថ្ងៃទី៥ ខែឧសភានេះ នឹងធ្វើឱ្យប្រជាពលរដ្ឋមានឱកាសរកប្រាក់ទ្រទ្រង់ជីវភាពគ្រួសារ ក្រោយពីពួកគេជួបបញ្ហាប្រឈមជាច្រើនក្នុងជីវភាពអំឡុងពេលបិទខ្ទប់កន្លងមក។
ការលើកឡើងនេះបន្ទាប់ពីលោកនាយករដ្ឋមន្ត្រី ហ៊ុន សែន បានឆ្លើយតបទៅនឹងសំណួររបស់ប្រជាពលរដ្ឋនៅក្នុង បណ្តាញសង្គមហ្វេសប៊ុកកាលពីថ្ងៃទី២ ខែឧសភា ម្សិលមិញ ដែលស្នើឱ្យបើករាជធានីភ្នំពេញ និងក្រុងតាខ្មៅ ឡើងវិញថារដ្ឋាភិបាលមិនបន្ដបិទរាជធានីភ្នំពេញនិងតាមបណ្ដាខេត្តទៀតឡើយ គ្រាន់តែបិទតំបន់តូចៗមួយចំនួនដែលនៅមានហានិភ័យខ្ពស់នៃការឆ្លងរីករាលជំងឺកូវីដ-១៩ប៉ុណ្ណោះ។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា៖ «ពុំមានហេតុផលបន្តបិទទេ យើងនឹងបើក! តែខេត្តឬរាជធានីអាចបិទតំបន់តូចៗដែលនៅមានហានិភ័យលើការឆ្លងខ្ពស់។ ការបិទកន្លងមក គឺជាការបង្ខំចិត្ត ដើម្បីកាត់បន្ថយការឆ្លងនិងការស្លាប់របស់ប្រជាជនយើង។ សូមយោគយល់ដល់ការលំបាករួមរបស់ជាតិ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍នៅថ្ងៃចន្ទនេះថា ក្រោយពីរដ្ឋាភិបាលសម្រេចបិទខ្ទប់រាជធានីភ្នំពេញ និងក្រុងតាខ្មៅ ជិត១ខែមកនេះ ជាបទពិសោធន៍មួយធ្វើឱ្យរដ្ឋាភិបាលអាចកំណត់ថា តំបន់ណាដែលត្រូវបិទបន្ត និងតំបន់ណាដែលត្រូវបើកឱ្យពលរដ្ឋធ្វើដំណើរ ដើម្បីឱ្យពលរដ្ឋក៏ដូចជា បុគ្គលិកក្រុមហ៊ុនឯនជន សង្គមស៊ីវិល និងមន្ត្រីរាជការ បានទៅធ្វើការងារនិងប្រកបមុខរបររកប្រាក់ទ្រទ្រង់ជីវភាព។
លោកមានប្រសាសន៍ថា៖ «បិទខ្ទប់ក្នុងមួយរយៈចុងក្រោយនេះ ប្រហែលជារដ្ឋាភិបាលមានបទពិសោធន៍ថាតើ ទីតាំងណាខ្លះដែលជាតំបន់ហានិភ័យខ្ពស់ ហើយអាចមានលទ្ធភាពក្នុងការគ្រប់គ្រងហានិភ័យហ្នឹងបានហើយ។ អញ្ចឹងបានជាទាំងអស់ហ្នឹងហើយ [បទពិសោធន៍] ដែលធ្វើឱ្យរដ្ឋាភិបាលសម្រេចចិត្តបើក [រាជធានី និងក្រុង] ក្រោយថ្ងៃ៥ [ខែឧសភា] នេះ ហើយការបើកនេះក៏វាជួយដែរ ដើម្បីឱ្យប្រជាពលរដ្ឋគាត់ចាប់ផ្តើមជីវភាពរបស់គាត់។ មួយវិញទៀត ក៏អាចជួយបន្ធូរបន្ថយបន្ទុករបស់រដ្ឋនៅក្នុងការជួយផ្គត់ផ្គង់ដល់ពលរដ្ឋដែរ»។
ទោះជាបែបនេះក្តី លោក យង់ គិមអេង ស្នើទៅរដ្ឋាភិបាលត្រូវយកចិត្តទុកដាក់ផ្គត់ផ្គង់ស្បៀងបន្ថែមទៀតដល់ពលរដ្ឋដែលកំពុងស្ថិតនៅតំបន់បិទខ្ទប់ទាំងអស់ ជាពិសេសពលរដ្ឋដែលក្រីក្រ នោះទើបអាចរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩ បានប្រសិទ្ធភាពខ្ពស់។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មានប្រសាសន៍គាំទ្រ បើសិនជារដ្ឋាភិបាលបើកឱ្យពលរដ្ឋនៅរាជធានីភ្នំពេញ និងក្រុងតាខ្មៅ ធ្វើដំណើរឡើងវិញក្រោយថ្ងៃទី៥ ខែឧសភា ដោយបន្តបិទតែតំបន់តូចៗដែលកំពុងរងគ្រោះនោះ។
ប៉ុន្តែដើម្បីឱ្យការទប់ស្កាត់ការឆ្លងរាលដាលជំងឺកូវីដ-១៩ ឱ្យកាន់តែមានប្រសិទ្ធភាព និងមានការចូលរួមពីពលរដ្ឋនោះ លោកស្រីអំពាវនាវទៅរដ្ឋាភិបាលត្រូវពង្រឹងការអនុវត្តវិធានការរដ្ឋបាល និងផ្តល់ស្បៀងជូនពលរដ្ឋ ឬបន្ធូរបន្ថយការបង់ទឹកភ្លើងដល់ពលរដ្ឋនៅតំបន់បិទខ្ទប់ ទើបជួយដោះស្រាយបញ្ហាប្រឈមនិងហានិភ័យនានាដល់ពលរដ្ឋនៅតំបន់ទាំងនោះបាន។
លោកស្រីមានប្រសាសន៍ថា៖ «ការបិទខ្ទប់នេះ ពលរដ្ឋជាច្រើនប្រកបមុខរបរសេដ្ឋកិច្ចក្រៅប្រព័ន្ធ ឬក៏បងប្អូនកម្មករត្រូវបាត់បង់ចំណូល ខ្ញុំគិតថា រដ្ឋត្រូវតែមានការសម្របសម្រួលជាមួយភ្នាក់ងាររដ្ឋ ភ្នាក់ងារអគ្គិសនី ភ្នាក់ងារទឹក គួរតែជួយសម្របសម្រួលបន្ធូរបន្ថយអ្នកដែលនៅក្នុងតំបន់បិទខ្ទប់ឱ្យបានច្រើន ព្រោះការបិទខ្ទប់នេះប៉ះពាល់ជីវភាពគាត់រួចទៅហើយ រដ្ឋត្រូវពិនិត្យមើលលទ្ធភាពដែលអាចជួយសម្រួលផ្នែកជីវភាព»។
លោក ស៊ា ម៉ន ជាពលរដ្ឋម្នាក់អះអាងថារស់នៅក្នុងតំបន់លឿងទុំ ស្ថិតនៅភូមិត្រពាំងឈូក សង្កាត់កន្ទក ខណ្ឌកំបូល រាជធានីភ្នំពេញ និយាយថា គាត់រីករាយនៅពេលទទួលបានព័ត៌មានថា រដ្ឋាភិបាលគ្រោងបើករាជធានី និងក្រុងតាខ្មៅ មួយផ្នែកនោះ។ លោកបន្តថា ការបើករាជធានីនិងក្រុងនោះ នឹងធ្វើឱ្យគាត់និងពលរដ្ឋផ្សេងទៀតមានឱកាសរកប្រាក់ចំណូលបានឡើងវិញ ដើម្បីទ្រទ្រង់ជីវភាពគ្រួសារ។
លោកនិយាយថា៖ «ខ្ញុំគិតថា បើបើក [រាជធានី និងក្រុង] ឱ្យដំណើរការវិញល្អ យើងអាចចេញចូលបាន ជួយឱ្យយើងបានទៅធ្វើការបានប្រាក់ចំណូលខ្លះ។ ប៉ុន្តែយើងនៅតែអនុវត្តតាមគោលការណ៍របស់ក្រសួង “៣ការពារ ៣កុំ” ដដែល ដើម្បីការពារការឆ្លងរីករាលដាលនិងការពារសុខភាពប្រជាពលរដ្ឋយើងទាំងអស់គ្នា។ កុំឱ្យពេលគេបើកហើយ យើងមិនការពារ វានឹងពិបាកលើសដើម»។
វីអូឌី មិនអាចសុំការបញ្ជាក់ជុំវិញករណីនេះពីអភិបាលរាជធានីភ្នំពេញ លោក ឃួង ស្រេង និងអ្នកនាំពាក្យសាលារាជធានីភ្នំពេញ លោក ម៉េត មាសភក្តី បានទេ ដោយពួកគាត់ថាជាប់រវល់ប្រជុំ។
នៅក្នុងកិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ តាមរយៈ Video Conference នៅព្រឹកថ្ងៃទី៣ ខែឧសភានេះ អភិបាលរាជធានីភ្នំពេញ ឃួង ស្រេង ថ្លែងថា រាជរដ្ឋាភិបាលនឹងបើកឱ្យធ្វើចរាចរណ៍ឡើងវិញនៅទូទាំងប្រទេស ពីតំបន់មួយទៅតំបន់មួយ ពីខេត្តមួយទៅខេត្តមួយ នៅថ្ងៃទី៦ ខែឧសភា។
ប៉ុន្តែលោក ឃួង ស្រេង បន្តថា សម្រាប់ភ្នំពេញ នៅតែរក្សាបិទខ្ទប់តំបន់លឿង តំបន់លឿងទុំ និងតំបន់ក្រហមដដែល ដោយគ្រាន់តែបង្រួមតំបន់លឿងទុំ និងតំបន់ក្រហម មកនៅតូចជាងមុនប៉ុណ្ណោះ ដើម្បីបង្ការទប់ស្កាត់នូវជំងឺកូវីដ-១៩ ឱ្យមានប្រសិទ្ធភាព ចៀសវាងការបន្តរីកររាលដាលជំងឺកូវីដ-១៩ ទៅតំបន់ផ្សេងទៀត ជាដើម។
ក្រោយពីការឆ្លងរាលដាលក្នុងសហគមន៍ជាថ្មីដែលមានឈ្មោះថា «ព្រឹត្តិការណ៍សហគមន៍២០កុម្ភៈ» កាន់តែខ្លាំងនោះ រដ្ឋាភិបាលបានសម្រេចបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ចាប់តាំងពីថ្ងៃទី១៤ ខែមេសា ឆ្នាំ២០២១មក និងបន្តបិទខ្ទប់តំបន់ហានិភ័យរហូតដល់ថ្ងៃទី០៥ ខែឧសភា ឆ្នាំ២០២១ រួមនឹងដាក់ចេញនូវវិធានការមួយចំនួនទៀត ដើម្បីកាត់ផ្តាច់ខ្សែសង្វាក់នៃការឆ្លងរាលដាលនៃជំងឺកូវីដ-១៩ ក្នុងនោះក៏មានការកំណត់តំបន់ក្រហម តំបន់លឿងទុំ និងតំបន់លឿង ផងដែរ។
ក្រៅពីនោះ រដ្ឋបាលរាជធានីភ្នំពេញ ក៏បានចេញសេចក្តីណែនាំទៅអាជ្ញាធរទាំង១៤ខណ្ឌ ផ្អាកដំណើរការលក់ដូរនៅផ្សាររដ្ឋនិងផ្សារមិនរៀបរយទាំងអស់ រួមមាន ផ្សារក្រមួន ផ្សារចាត់តាំង ផ្សាររោងចក្រ ផ្សារសហគមន៍ ផ្សារក្នុងដីឡូត៍ឯកជន ផ្សារជុំវិញមន្ទីរពេទ្យ និងផ្សារតាមចិញ្ចើមផ្លូវ ជាដើម។ វិធានការបិទផ្សារនេះ តម្រូវឱ្យផ្អាកជាបណ្តោះអាសន្នរយៈពេល១៤ថ្ងៃ គិតចាប់ពីថ្ងៃទី២៤ ខែមេសា ដល់ថ្ងៃទី៧ ខែឧសភា ឆ្នាំ២០២១ ដើម្បីបង្ការនិងទប់ស្កាត់ការឆ្លងរាលដាលធ្ងន់ធ្ងរនៃជំងឺកូវីដ-១៩ បន្ថែមទៀត៕