ថ្នាក់ដឹកនាំក្រសួងការពារជាតិ ជំរុញដល់កងយោធពលខេមរភូមិន្ទពន្លឿនការដឹកជញ្ជូនស្បៀងរបស់រដ្ឋាភិបាលជូនពលរដ្ឋដែលកំពុងជួបការលំបាកនៅតំបន់បិទខ្ទប់ ស្របពេលដែលក្រសួងនឹងចាប់ផ្តើមយុទ្ធនាការចាក់វ៉ាក់សាំងជូនពលរដ្ឋនៅតំបន់ក្រហមចាប់ពីថ្ងៃស្អែកនេះ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
យុទ្ធនាការចាក់វ៉ាក់សាំងនៅតំបន់ក្រហមក្នុងរាជធានីភ្នំពេញ នឹងចាប់ផ្តើមពីថ្ងៃស្អែកនេះទៅ ដោយប្រើរយៈពេល៣០ថ្ងៃ គ្របដណ្តប់លើតំបន់មួយចំនួនក្នុងខណ្ឌចំនួន៤ រួមមាន ខណ្ឌពោធិ៍សែនជ័យ ខណ្ឌមានជ័យ ខណ្ឌកំបូល និងខណ្ឌដង្កោ។ យុទ្ធនាការនេះក៏គ្រោងនឹងប្រើប្រាស់វ៉ាក់សាំងដែលជាជំនួយរបស់ប្រទេសចិនចំនួន៩០០ ០០០ដូស ចាក់ជូនប្រជាពលរដ្ឋជាង៨០០ ០០០នាក់។
រដ្ឋមន្ត្រីក្រសួងការពារជាតិ លោក ទៀ បាញ់ មានប្រសាសន៍ក្នុងពិធីបើកយុទ្ធនាការចាក់វ៉ាក់សាំងនៅតំបន់ក្រហម ក្នុងរាជធានីភ្នំពេញ នាថ្ងៃសុក្រនេះថា លោកមានមោទកភាពចំពោះរដ្ឋាភិបាលដែលបានប្រគល់ភារកិច្ចនេះឱ្យក្រសួងការពារជាតិ ទទួលបន្ទុកចាក់វ៉ាក់សាំងជូនប្រជាពលរដ្ឋនៅតំបន់ក្រហមនៃខណ្ឌទាំង៤ដែលមានហានិភ័យខ្ពស់នៃការឆ្លងជំងឺកូវីដ-១៩។
ស្របពេលគ្នានោះ លោកក៏បានណែនាំដល់កម្លាំងកងយោធពលខេមរភូមិន្ទដែលមានភារកិច្ចចាក់វ៉ាក់សាំងជូនពលរដ្ឋនោះថា ភាពជោគជ័យនៃយុទ្ធនាការនេះអាស្រ័យលើការចូលរួមពីគ្រប់ភាគីពាក់ព័ន្ធ ក្នុងការរួមគ្នាជួយប្រជាពលរដ្ឋក្នុងគ្រាដ៏លំបាកនេះ។ លោកបន្តថា ក្រៅពីការផ្តល់វ៉ាក់សាំង កត្តាចាំបាច់មួយទៀតដែលត្រូវធ្វើនោះ គឺមន្ត្រីពាក់ព័ន្ធក៏ត្រូវបញ្ជូនស្បៀងទៅដល់ដៃប្រជាពលរដ្ឋក្រីក្រនៅតំបន់បិទខ្ទប់ឱ្យបានទាន់ពេលវេលាផងដែរ។
លោកថា៖ «ចំពោះចំណុចនេះជាចំណុចមួយដែលមានសារៈសំខាន់ណាស់ យើងបិទខ្ទប់មិនឱ្យគ្នាចេញ គឺជារឿងចំបាច់ ក៏ប៉ុន្តែជីវភាពមានអ្នកមួយចំនួនគ្នាក្រលំបាក រកព្រឹកទទួលទានពេលល្ងាចអីជាដើម ដល់បិទអ៊ីចឹង វាលំបាកដែរ! សម្តេច [ហ៊ុន សែន] លោកបានប្រាប់មកហើយដែរ គឺជំហានដំបូង គឺ [ស្បៀង] ១ម៉ឺនកញ្ចប់ដែលខ្ញុំចង់បានបំផុត ដាក់ឱ្យចំអ្នកក្រលំបាកមែនទែន អាហ្នឹងគឺជាការចាំបាច់»។
មេបញ្ជាការរងកងទ័ពជើងគោក និងជាមេបញ្ជាការកងពលតូចលេខ៧០ លោក ម៉ៅ សុផាន់ បានគាំទ្រការផ្តល់អនុសាសន៍របស់រដ្ឋមន្ត្រីនេះ។
លោកថា៖ «យើងខ្ញុំទាំងអស់គ្នាសូមប្តេជ្ញាចិត្តយ៉ាងម៉ឺងម៉ាត់ក្នុងប្រតិបត្តិការចុះចាក់វ៉ាក់សាំងជូនប្រជាពលរដ្ឋនៅពេលនេះ ប្រកបដោយការទទួលខុសត្រូវ ពិសេសធានាបាននូវសន្តិសុខ សណ្តាប់ធ្នាប់ វិធានការការពារជំងឺកូវីដ-១៩ និងចាក់រហ័សតាមពេលវេលាកំណត់»។
ក្នុងពិធីនោះដែរ ប្រធានគណៈកម្មការចំពោះកិច្ចចាក់វ៉ាក់សាំងក្នុងក្របខណ្ឌទូទាំងប្រទេស លោកស្រីវេជ្ជបណ្ឌិត ឱ វណ្ណឌីន ក៏បានក្រើនរំឭកពីបែបបទបច្ចេកទេស និងវិធានបង្ការដល់ក្រុមការងារក្រសួងការពារជាតិ ដើម្បីកុំឱ្យយុទ្ធនាការនេះក្លាយជាប្រភពចម្លងជំងឺកូវីដ-១៩ ទៅដល់អ្នកទៅទទួលសេវានិងផ្តល់សេវា។
លោកស្រីថា៖ «យើងខ្ញុំសូមធ្វើការណែនាំដល់ក្រុមចុះចាក់វ៉ាក់សាំងទាំងអស់ សូមគោរពឱ្យបានតាមស្តង់ដារប្រតិបត្តិនិងបច្ចេកទេសនៃការចាក់វ៉ាក់សាំងកូវីដ-១៩ និងអនុវត្តការការពារវីរុសកូវីដ-១៩ ឱ្យម៉ត់ចត់មែនទែន ដើម្បីធានាបាននូវសុវត្ថិភាពផ្ទាល់ខ្លួន ក៏ដូចជាអ្នកដែលមកចាក់វ៉ាក់សាំងផងដែរ»។
កម្មការិនីធ្វើការនៅរោងចក្រមួយក្នុងរាជធានីភ្នំពេញ និងជាអ្នកស្នាក់នៅបន្ទប់ជួលក្នុងតំបន់ក្រហម ក្នុងខណ្ឌដង្កោ អ្នកស្រី ឃួន សុខុន និយាយថា គាត់ប្រឈមនឹងបញ្ហាដាច់ស្បៀង ហើយគាត់បានព្យាយាមផ្ញើសារទៅកាន់ក្រុមតេឡេក្រាមរបស់រដ្ឋបាលរាជធានីភ្នំពេញ ប្រមាណ២សប្តាហ៍មក ប៉ុន្តែពុំមានការឆ្លើយតបឬមានការជួយពីសំណាក់អាជ្ញាធរនៅឡើយ។
ស្ត្រីវ័យ៣៣ឆ្នាំរូបនេះបានអំពាវនាវដល់អាជ្ញាធរនិងក្រសួងស្ថាប័នពាក់ព័ន្ធ ជួួយពន្លឿនការផ្តល់ស្បៀងដល់ពួកគាត់ឱ្យបានឆាប់ផង ព្រោះបច្ចុប្បន្នកំពុងតែខ្វះស្បៀងខ្លាំង។
អ្នកស្រីថា៖ «ខ្ញុំដាក់យូរដែរហើយ តាំងពីថ្ងៃទី១៤ [មេសា] មក ដាក់ពីរដងហើយ! ដាក់លើកទី១ ខ្ញុំមានលុយខ្លះទិញម្ហូបខ្លះបានពីរបីពេល បានម៉ា [ម្ចាស់ផ្ទះជួល] គាត់ចែក [អង្ករ] ឱ្យបាន៥គីឡូក្រាម ហើយខ្ញុំហូបប៉ុន្មានថ្ងៃមុនអា៥គីឡូហ្នឹង ហើយបានបងជាប់បន្ទប់ គាត់ឱ្យខ្លះ [ឥលូវសល់ប៉ុន្មាន?] សល់ប្រហែល១គីឡូ»។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ សង្កេតឃើញថា ក្នុងអំឡុងពេលរដ្ឋាភិបាលដាក់ចេញវិធានការបិទខ្ទប់ដើម្បីទប់ស្កាតជំងឺកូវីដ-១៩ប្រមាណ៣សប្តាហ៍មកនេះ មានប្រជាពលរដ្ឋជាច្រើនរយគ្រួសារបានប្រើប្រាស់បណ្តាញសង្គម ដើម្បីអំពាវនាវរកស្បៀងជាបន្តបន្ទាប់ពីរដ្ឋាភិបាលដើម្បីសុំជំនួយ ខណៈដែលពួកគាត់កំពុងជួបការលំបាកក្នុងជីវភាពនិងដាច់ស្បៀង។
លោកបន្តថា ភាពជោគជ័យនៃការប្រយុទ្ធប្រឆាំងជំងឺកូវីដ-១៩ ត្រូវដើរទន្ទឹមគ្នារវាងវិធានបិទខ្ទប់ ការចាក់ថ្នាំបង្ការ និងការដោះស្រាយបញ្ហាស្បៀង និងជីវភាពរបស់ប្រជាពលរដ្ឋដែលរងផលប៉ះពាល់។
លោកថា៖ «ដើម្បីទប់ស្កាត់ជំងឺកូវីដ-១៩ ឱ្យមានប្រសិទ្ធភាព រដ្ឋត្រូវគិតទាំងសេដ្ឋកិច្ច គិតទាំងសុវត្ថិភាពនៃការឆ្លងជំងឺកូវីដ-១៩»។
បើតាមក្រសួងការពារជាតិ យុទ្ធនាការចុះចាក់វ៉ាក់សាំងនៅតំបន់ក្រហមក្នុងខណ្ឌទាំង៤នេះ ប្រើកម្លាំងយោធពលខេមរភូមិន្ទ ឬកម្លាំងយោធាសរុប១ ៤៩០នាក់ ក្នុងនោះគ្រូពេទ្យសម្រាប់ចាក់វ៉ាក់សាំង៤៥០នាក់ ក្រុមបម្រើការងារសណ្តាប់ធ្នាប់៩០០នាក់ ក្រុមដឹកជញ្ជូនស្បៀង៥០នាក់ និងក្រុមធ្វើបណ្ណចាក់វ៉ាក់សាំង៩០នាក់។
ការវាយលុកនៃជំងឺកូវីដ-១៩ ឆ្លងចូលសហគមន៍ពាក់ព័ន្ធព្រឹត្តិការណ៍២០កុម្ភៈ គិតត្រឹមថ្ងៃ២៩ ខែមេសានេះ បានសម្លាប់មនុស្សជិត១០០នាក់ ឆ្លងទៅដល់មនុស្សជាង១ម៉ឺននាក់ ក្នុងនោះជាង៨ ០០០នាក់កំពុងសម្រាកព្យាបាលនៅឡើយ៕