ប្រជាពលរដ្ឋមួយចំនួននៅតាមបណ្តាខេត្តនានាបានឱ្យដឹងថា ពួកគេជួបបញ្ហាប្រឈមខ្វះស្បៀង ដោយសារតែអាជ្ញាធរបានបិទខ្ទប់តំបន់មួយចំនួនដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
លោក ឡង់ បញ្ញា អះអាងថាជាកម្មករសំណង់ រស់នៅភូមិ៤ សង្កាត់លេខ៤ ខណ្ឌមិត្តភាព ក្រុងព្រះសីហនុ ខេត្តព្រះសីហនុ និយាយនៅថ្ងៃសុក្រនេះថា កាលពីថ្ងៃម្សិលមិញ ប្រធានក្រុមនិងអាជ្ញាធរភូមិ-ឃុំបានចុះស្រង់ឈ្មោះពលរដ្ឋនៅតំបន់នោះ ដើម្បីចែកស្បៀងជូនពលរដ្ឋ ដោយសារនៅតំបន់នោះត្រូវបានអាជ្ញាធរកំណត់ថាជាតំបន់ក្រហម និងមិនអនុញ្ញាតឱ្យពួកគេចេញទៅក្រៅផ្ទះនោះទេ។
លោកបន្តថា នៅពេលអាជ្ញាធរចុះស្រង់ឈ្មោះមិនទាន់បានអស់គ្នាផងក៏ត្រឡប់ទៅវិញ ដោយថា ពលរដ្ឋនៅតំបន់នោះប្រជ្រៀតគ្នាមិនស្តាប់តាមការណែនាំរបស់អាជ្ញាធរ។ ករណីនេះធ្វើឱ្យពួកគាត់មិនបានចុះឈ្មោះ ខណៈស្បៀងកំពុងខ្វះខាត ដោយសារអាជ្ញាធរបិទខ្ទប់រយៈពេល៧ថ្ងៃមកហើយ។
លោកនិយាយថា៖ «អត់ទាន់បានចុះឈ្មោះ [បើកស្បៀងពីរដ្ឋបាលខេត្ត] ហើយមិនទាន់ដឹងថា គេបិទដល់ពេលណាផង ព្រោះថា គេបិទហ្នឹងបានប្រហែល១អាទិត្យ។ ណាមួយបិទអញ្ចឹងទៅ រកលុយមិនបានដែរ ព្រោះធ្វើការ! ពេលបិទអញ្ចឹង ខ្ញុំទៅធ្វើការមិនកើត គេឃុំយើងនៅតែក្នុងផ្ទះ»។
កម្មករសំណង់មួយរូប លោក សំ សុដន ដែលមានកូនក្នុងបន្ទុក១០នាក់ រស់នៅភូមិ៤ សង្កាត់លេខ៤ ខណ្ឌមិត្តភាព ខេត្តព្រះសីហនុ រៀបរាប់ថា ក្នុងមួយថ្ងៃ គ្រួសារគាត់ត្រូវចំណាយអង្កររហូតដល់១៣កំប៉ុងសម្រាប់ដាំបាយពីរពេលនិងបបរមួយពេល។
លោកបន្តថា នៅពេលដែលអាជ្ញាធរបិទខ្ទប់តំបន់របស់គាត់ជាបណ្តោះអាសន្ន ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ធ្វើឱ្យគ្រួសារគាត់ជួបបញ្ហាប្រឈមខ្លាំងក្នុងជីវភាព។ ករណីនេះ លោកស្នើទៅអាជ្ញាធរមូលដ្ឋានចុះស្រង់ឈ្មោះពួកគេនៅតាមផ្ទះ ដើម្បីផ្តល់ជាស្បៀងជូនពួកគាត់ឱ្យមានតម្លាភាព។
លោកស្នើដូច្នេះថា៖ «បើសិនជាអាច គាត់ [អាជ្ញាធរភូមិ-ឃុំ] ដើរកត់ [ស្រង់ស្ថិតិពលរដ្ឋនៅតំបន់ក្រហមដើម្បីចែកស្បៀង] តាមផ្ទះ បានគាត់កត់តាមផ្ទះវិញ ស្រួលជាង ឱ្យដឹងថា ផ្ទះណាអត់ៗ ព្រោះអ្នកខ្លះគាត់មានសម្បូរហូបចុកហើយនៅតែគេបានអំណោយទៀត ហើយខ្ញុំអត់មែនទែន ទៅជាអត់បានអំណោយនឹងគេវិញ»។
អ្នកនាំពាក្យសាលាខេត្តព្រះសីហនុ លោក ឃាង ភារម្យ មានប្រសាសន៍ថា ក្រុងព្រះសីហនុត្រូវបានអាជ្ញាធរសម្រេចបិទក្រុងជាបណ្តោះអាសន្ន ដោយសារមានអ្នកឆ្លងជំងឺកូវីដ-១៩។ លោកប្រាប់ប្រជាពលរដ្ឋឱ្យមានការអត់ធ្មត់បន្តិច ដោយសារក្នុងគោលការណ៍របស់រដ្ឋបាលក្រុងគ្រោងចែកស្បៀងជូនពលរដ្ឋវគ្គទី១ ឱ្យបាន១២ ០០០គ្រួសារ ខណៈបច្ចុប្បន្នចែកបានជាង១០ ០០០គ្រួសារហើយ។
លោកបន្តថា ស្បៀងដែលរដ្ឋបាលខេត្តត្រៀមចែកជូនប្រជាពលរដ្ឋដែលស្ថិតនៅក្នុងតំបន់បិទខ្ទប់ ជាពិសេសនៅតំបន់ក្រហមនោះ មានមិនខ្វះទេ។ ប៉ុន្តែលោកថា រដ្ឋបាលខេត្តត្រូវការប្រមូលស្ថិតិពលរដ្ឋនៅតំបន់ដែលកំពុងប្រឈមនោះពីអាជ្ញាធរមូលដ្ឋាន ដើម្បីត្រៀមបញ្ជូនស្បៀងជូនពលរដ្ឋឱ្យបានទាន់ពេល។
មន្ត្រីសម្របសម្រួលសមាគមអាដហុកប្រចាំខេត្តព្រះសីហនុ លោកស្រី ជាប សុធារី ដែលអះអាងថា គាត់កំពុងជាប់នៅក្នុងតំបន់ក្រហមដែរនោះ សង្កេតឃើញថា អាជ្ញាធរមូលដ្ឋានបានខិតខំចុះស្រង់ស្ថិតិពលរដ្ឋនៅក្នុងតំបន់ក្រហម ដើម្បីឱ្យរដ្ឋបាលខេត្តផ្តល់ស្បៀងជូនពលរដ្ឋដែរ។ ប៉ុន្តែលោកស្រីថា ការស្រង់ឈ្មោះនោះហាក់មានភាពយឺតយ៉ាវនិងមិនទាន់បានគ្រប់គ្នានៅឡើយ។
ករណីនេះ លោកស្រីអំពាវនាវទៅអាជ្ញាធរពាក់ព័ន្ធ ជាពិសេសអាជ្ញាធរមូលដ្ឋានចុះស្រង់ស្ថិតិពលរដ្ឋឱ្យមានតម្លាភាព និងពន្លឿនការចែកស្បៀងដល់ពលរដ្ឋឱ្យបានឆាប់ ដោយសារពលរដ្ឋក្រីក្រកំពុងជួបបញ្ហាប្រឈមខ្លាំងក្នុងជីវភាព។
លោកស្រីអំពាវនាវដូច្នេះថា៖ «ប្លុកផ្ទះជួល ប្លុកកន្លែងរញ៉េរញ៉ៃ ចង្អៀតណែនណាន់តាន់តាប់ ពួកគាត់មិនសូវមានអ្វីហូបទេ អញ្ចឹងត្រូវទៅមើលម្តុំអស់ហ្នឹង ព្រោះអាជ្ញាធរគាត់ដឹង មេភូមិ មេក្រុមគាត់ដឹងហើយ សូមឱ្យមានការជជែកគ្នាជាមួយអាជ្ញាធរមូលដ្ឋាន។ ខ្ញុំថា គួរតែមានការយកចិត្តទុកដាក់ជួយដោះស្រាយពួកគាត់ឱ្យបានទាន់ពេលវេលា»។
ចំណែកលោក លន់ សុផាត រស់នៅខេត្តសៀមរាប ដែលអះអាងថាជាអ្នកប្រកបរបរសេដ្ឋកិច្ចក្រៅប្រព័ន្ធ មិនបានចេញក្រៅរកប្រាក់មកទ្រទ្រង់ជីវភាពគ្រួសារនោះទេ បន្ទាប់ពីអាជ្ញាធរបិទតំបន់ខ្លះនៅក្នុងខេត្តសៀមរាប ជាពិសេសតំបន់ដែលគាត់រស់នៅត្រូវបានអាជ្ញាធរកំណត់ថាជាតំបន់ក្រហម។
ទោះជាយ៉ាងណា លោកថា បច្ចុប្បន្ននេះមិនឃើញមានអាជ្ញាធរភូមិឃុំនិងខេត្តចុះមកស្រង់ស្ថិតិពលរដ្ឋដែលស្ថិតនៅក្នុងតំបន់ក្រហម ដើម្បីផ្តល់ជាស្បៀងជូនពលរដ្ឋដែលរងផលប៉ះពាល់នៅឡើយ ជាហេតុធ្វើឱ្យពួកគាត់ខ្វះស្បៀងនិងប្រឈមនឹងការបង់លុយធនាគារ ជាដើម។
លោកនិយាយដូច្នេះថា៖ «បើសិនជាបញ្ហាបិទខ្ទប់រយៈពេលមួយខែទៅពីរខែទៀត វានឹងប្រឈមនឹងបញ្ហាអត់អាហារដែរ។ អត់ស្បៀង អត់មានលទ្ធភាពទិញអ្វីហូប អត់មានលុយទិញអង្ករ អត់មានលុយទិញម្ហូបដោះស្រាយ ដោយសារទី១ យើងនៅផ្ទះអត់មានចំណូល។ ហើយបញ្ហាសងលុយធនាគារក៏អត់មានការបន្ធូរបន្ថយ ព្រោះយើងនៅផ្ទះ អត់មានចំណូលផង ហើយគាត់នៅតែយកលុយពីប្រជាពលរដ្ឋ ហើយមិនមានការយោគយល់ លើសថ្ងៃក៏មិនបាន អត់មានការបន្ធូរបន្ថយ»។
អភិបាលរងខេត្តសៀមរាប លោក លី សំរិទ្ធ មានប្រសាសន៍ថា នៅក្នុងខេត្តសៀមរាប អាជ្ញាធរបានបិទតំបន់ឆ្លងរាលដាលជំងឺកូវីដ-១៩មួយចំនួន ប៉ុន្តែតំបន់ដែលបិទនោះក៏អនុញ្ញាតឱ្យពលរដ្ឋចេញចូលធ្វើដំណើរទៅផ្សារទិញគ្រឿងឧបភោគបរិភោគដែរ។
លោកបន្តថា បច្ចុប្បន្ននេះ ខេត្តមិនទាន់មានគម្រោងផ្តល់ស្បៀងជូនដល់ពលរដ្ឋនៅតំបន់បិទខ្ទប់នោះទេ ដោយសារមិនទាន់មានអ្នកដែលប៉ះពាល់ធ្ងន់ធ្ងរនៅឡើយ។
ក្រៅពីខេត្តព្រះសីហនុ និងខេត្តសៀមរាប ក៏មានខេត្តមួយចំនួនទៀតបានបិទខ្ទប់ក្រុងនិងតំបន់មួយចំនួនផងដែរ ក្នុងនោះមានខេត្តមណ្ឌលគិរី បាត់ដំបង តាកែវ កំពង់ចាម ត្បូងឃ្មុំ កំពង់ធំ កោះកុង បន្ទាយមានជ័យ និងកំពង់ស្ពឺ ជាដើម។
ទាក់ទិននឹងការបិទខ្ទប់ក្រុងនិងតំបន់មួយចំនួននេះដែរ កាលពីថ្ងៃទី២៦ ខែមេសា ឆ្នាំ២០២១ រដ្ឋាភិបាលបានសម្រេច បន្តការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល រយៈពេល៧ថ្ងៃទៀត ចាប់ពីម៉ោងសូន្យថ្ងៃទី២៩ ខែមេសា រហូតដល់ថ្ងៃទី០៥ ខែឧសភា ឆ្នាំ២០២១ ហើយការបិទខ្ទប់នេះអាចត្រូវបានបន្តបន្ថែមទៀត អាស្រ័យលើការចូលរួមអនុវត្តរបស់ប្រជាពលរដ្ឋ និងស្ថានភាពនៃការវិវត្តនៃការឆ្លងរាលដាលជំងឺកូវីដ-១៩៕
