អាជីវករនិងកសិករមួយចំនួននៅស្រុកស្អាង ខេត្តកណ្តាល ស្នើសុំទៅអាជ្ញាធរឱ្យជួយរកទីផ្សារ និងបញ្ឈប់ការចាប់យកបន្លែបង្ការរបស់ពួកគេដែលបានដឹកយកមកលក់នៅរាជធានីភ្នំពេញ និងកន្លែងផ្សេងទៀត។
លោក តុំ សុគីម ជាអាជីវករទិញបន្លែពីកសិករនៅស្រុកស្អាង យកមកលក់នៅរាជធានីភ្នំពេញ និងចែកចាយបន្តទៅខេត្តផ្សេងទៀត ប្រាប់ វីអូឌី នៅថ្ងៃព្រហស្បតិ៍នេះថា កាលពីយប់មិញនេះ អាជ្ញាធរបានចាប់យកបន្លែ រួមទាំងរ៉ឺម៉កម៉ូតូរបស់លោក ខណៈលោកយកបន្លែពីស្រុកស្អាង មកបោះឱ្យម៉ូយនៅម្តុំស្តុបបាគូរ ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ។
អាជីវកររូបនេះអះអាងថា ក្រុមល្បាតរបស់អាជ្ញាធរខណ្ឌដង្កោ គំរាមកំហែង និងចាប់យកបន្លែ រួមទាំងរ៉ឺម៉កម៉ូតូរបស់លោក រហូតមកដល់ថ្ងៃព្រហស្បតិ៍នេះនៅពុំទាន់ប្រគល់ឱ្យលោកវិញនៅឡើយ។
លោកបន្ថែមថា៖ «ក្រុមពួកអ្នកជិះល្បាតហ្នឹង បានចុះមករុញរបស់របរខ្ញុំធ្លាក់ពីលើរ៉ឺម៉កមកផ្ទប់ជាមួយឡាន ហើយបើកយករ៉ឺម៉កបន្លែខ្ញុំទៅបាត់។ ខ្ញុំយល់ថា ទង្វើនេះជាទង្វើបំពាននិងល្មើសច្បាប់ទាំងស្រុង ព្រោះរ៉ឺម៉កខ្ញុំជារ៉ឺម៉កដឹកបន្លែ។ ហើយមិនមែនមកប៉ាតណាប៉ាតណីតាមផ្លូវដែរ គឺខ្ញុំបោះឱ្យម៉ូយដែលឡានគេចាំយកកន្លែងហ្នឹងទេ»។
លោក តុំ សុគីម បន្ថែមថា បន្លែរបស់លោកដែលអាជ្ញាធរខណ្ឌដង្កោចាប់យកនោះមានតម្លៃជាង១លានរៀល។ លោកបានទាមទារឱ្យអាជ្ញាធរចេញថ្លៃខូចខាត និងទាមទាររ៉ឺម៉កម៉ូតូមកវិញផងដែរ។
កសិករជួលដីដាំបន្លែនៅឃុំព្រែកគយ និងឃុំទឹកវិល ស្រុកស្អាង លោក តៃ សុង និយាយថា ករណីអាជ្ញាធរចាប់យកបន្លែ និងរារាំងមិនឱ្យអាជីវករអាចចរាចរបន្លែបាននេះ នឹងធ្វើឱ្យប៉ះពាល់ដល់ពួកគាត់ដែរ។
កសិកររូបនេះបន្តថា អាជីវករទាំងនោះបានមកជួយប្រមូលទិញបន្លែពីកសិករ ដើម្បីយកទៅលក់នៅរាជធានីភ្នំពេញ និងចែកចាយទៅបណ្តាខេត្តផ្សេងទៀត ខណៈដែលបន្លែរបស់ពួកគាត់កំពុងប្រឈមការឈូសឆាយចោលដោយសារគ្មានទីផ្សារសម្រាប់លក់ចេញ។
លោក តៃ សុង បន្ថែមថា សកម្មភាពអាជ្ញាធរចាប់យកបន្លែរបស់អាជីវករនេះ បានធ្វើឱ្យអាជីវករនិងកសិករខាតបង់ផលប្រយោជន៍ជាច្រើនផងដែរ។
លោកបន្ថែមថា៖ «បើគាត់មិនឱ្យយើងលក់កន្លែងណា សុំឱ្យគាត់ប្រាប់ឱ្យត្រង់ ហើយគាត់ត្រូវរកកន្លែងឬទីតាំងណាមួយសម្រាប់ឱ្យពួកយើងបានលក់បន្លែឱ្យសមរម្យ។ រាល់ថ្ងៃ ពួកយើងពិបាករកកន្លែងលក់ណាស់ ពេលខ្លះត្រូវបានគេចាប់ខ្លួន។ បើសិនយើងមិនខំដើរលក់ទេ វានឹងត្រូវបាត់បង់ទាំងស្រុងហើយ»។
បើតាមព័ត៌មានដដែល លោក តៃ សុង ចាប់តាំងពីរដ្ឋាភិបាលសម្រេចបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល មានច្រើនករណីហើយដែលអាជ្ញាធរបានរារាំង និងចាប់យកបន្លែរបស់កសិករនិងអាជីវករដែលយកមកលក់នៅជាយរាជធានីភ្នំពេញ។
អភិបាលខណ្ឌដង្កោ អ្នកស្រី គឹម ញឹប សុំមិនឆ្លើយតបទេ ដោយប្រាប់ថាកំពុងជាប់រវល់ប្រជុំ។ ចំណែកនាយករដ្ឋបាលខណ្ឌ លោក ម៉ុក ពុទ្ធា ទូរសព្ទចូលគ្មានអ្នកទទួល។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ករណីអាជ្ញាធរហាមឃាត់ឬចាប់យកបន្លែរបស់អាជីវករមិនឱ្យលក់ដូរនិងចែកចាយបន្តនោះ បង្ហាញថា អាជ្ញាធរគ្រប់គ្រងនៅតំបន់នោះមិនបានយល់ដឹង និងបានអនុវត្តផ្ទុយពីសេចក្តីសម្រេចរបស់រដ្ឋាភិបាលដែលអនុញ្ញាតឱ្យមានការចរាចរគ្រឿងឧបភោគបរិភោគ និងដឹកទំនិញចេញចូលរាជធានីភ្នំពេញ ដោយសេរីបាន។
លោកបន្ថែមថា៖ «អ៊ីចឹងបើគាត់ប្រព្រឹត្តនូវទង្វើបែបនេះ ខ្ញុំគិតថា សាលារាជធានីភ្នំពេញ ឬមន្ត្រីរដ្ឋាភិបាល ត្រូវត្រួតពិនិត្យនៃការអនុវត្តរបស់មន្ត្រីថ្នាក់ក្រោមឱ្យបានមែនទែន ពីព្រោះថា គាត់មិនបានជួយសម្រួលដល់ការប្រកបមុខរបរ ការរកស៊ីនិងការផ្គត់ផ្គង់ដែលពួកគាត់ចង់ចូលរួមចំណែកក្នុងការផ្តត់ផ្គង់ ខណៈដែលមានការរីករាលដាលជំងឺកូវីដហ្នឹង ធ្វើឱ្យមនុស្សក្នុងរាជធានីភ្នំពេញ កង្វះនូវអាហារ និងម្ហូបអាហារកំពុងឡើងថ្លៃនោះ»។
ពាក់ព័ន្ធករណីនេះ វីអូឌី បានសុំការឆ្លើយតបពីអ្នកនាំពាក្យសាលារាជធានីភ្នំពេញ លោក ម៉េត មាសភក្តី និងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទដែរ ប៉ុន្តែទូរសព្ទចូលគ្មានអ្នកទទួល។
យ៉ាងណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ប្រាប់ វីអូឌី កាលពីថ្ងៃទី២២ ខែមេសានេះថា ក្រសួងកំពុងរិះរកមធ្យោបាយ និងកំពុងសហការជាមួយក្រសួងពាណិជ្ជកម្ម ដើម្បីនាំបន្លែពីកសិករនៅតាមបណ្តាខេត្តនានាជិតរាជធានីភ្នំពេញ យកទៅចែកចាយនៅតាមតំបន់បិទខ្ទប់ក្នុងភូមិសាស្ត្ររាជធានីភ្នំពេញ ខណៈបន្លែនៅតំបន់នោះបានឡើងថ្លៃខ្ពស់។
ដោយសារគ្មានទីផ្សារលក់បន្លែចេញ ប្រជាកសិករមួយចំនួននៅស្រុកស្អាង ខេត្តកណ្តាល បានសម្រេចឈូសបន្លែសាលាដចោលជាច្រើនតោន ស្របពេលរដ្ឋាភិបាលបានបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ដើម្បីទប់ស្កាត់ការឆ្លងរាលដាលជំងឺកូវីដ-១៩៕