សមត្ថកិច្ចរាជធានីភ្នំពេញ កំពុងស្រាវជ្រាវករណីហិង្សាមួយដែលកើតឡើងទៅលើកូនប្រុសរបស់អតីតមន្ត្រីគណបក្សសង្រ្គោះជាតិ វ័យ១៥ឆ្នាំ ដែលត្រូវបានជនមិនស្គាល់មុខជិះម៉ូតូយកដុំឥដ្ឋតាន់គប់លើ បណ្តាលឱ្យរងរបួសក្បាលធ្ងន់ធ្ងរកាលពីថ្ងៃម្សិលមិញ លើផ្លូវបេតុងមួយកន្លែងនៅស្កាត់បឹងទំពន់ទី១ ខណ្ឌមានជ័យ។
ជនរងគ្រោះរូបនេះឈ្មោះ កាក់ សុវណ្ណច្ឆ័យ ត្រូវបានជនមិនស្គាល់មុនវាយកាលពីថ្ងៃម្សិលមិញ ខណៈដែលគាត់កំពុងឌុបម្តាយត្រឡប់មកពីទិញដំឡូងនៅក្បែរផ្ទះ។
នាយនគរបាលប៉ុស្តិ៍រដ្ឋបាលសង្កាត់បឹងទំពុនទី១ លោក ឈឹម ចំរើន លើកឡើងថា សមត្ថកិច្ចមិនទាន់អាចកំណត់មុខសញ្ញាជនសង្ស័យបាននៅឡើយ ដោយសារកាមេរ៉ាសុវត្ថិភាពបំពាក់តាមផ្ទះក្បែរកន្លែងកើតហេតុនៅឆ្ងាយ ចាប់ចំណុចទីតាំងកើតហេតុមិនបាន។
តែយ៉ាងណាលោកថា នឹងបន្តស្រាវជ្រាវកាមេរ៉ាតាមដងផ្លូវបន្ថែមទៀត ហើយនឹងកសាងសំណុំរឿងបញ្ជូនទៅថ្នាក់លើដើម្បីចាត់ការបន្ត ដោយមិនឱ្យលើសពី១សប្តាហ៍ឡើយ។
លោក ឈឹម ចំរើន និយាយថា៖ «យើងព្យាយាមបន្តឆែកតាមផ្លូវហ្នឹងរហូត ប៉ុន្តែជាក់ស្តែង យើងឆែកតាំងពីម្សិលមិញ ហើយថ្ងៃនេះទៀត គឺអត់ទាន់មានអត្តសញ្ញាណអីដែលកំណត់សម្គាល់ឃើញបានទេ ព្រោះជិះលើផ្លូវ កាមេរ៉ាភាគច្រើនគេដាក់តែមុខផ្ទះគេ ហើយអានេះវាតាមផ្លូវ អ៊ីចឹងវាអត់ទាន់បានលទ្ធផលអីទេ»។
ជនរងគ្រោះ កាក់ សុវណ្ណច្ឆ័យ ជាកូនប្រុសរបស់លោក កាក់ កុម្ភារ អតីតសមាជិកក្រុមប្រឹក្សារាជធានីភ្នំពេញ នៃអតីតគណបក្សសង្គ្រោះជាតិ ដែលត្រូវបានតុលាការសម្រេចផ្តន្ទាទោសដាក់ពន្ធនាគារព្រៃស ១ឆ្នាំ៨ខែ កាលពីចុងខែមិថុនា ឆ្នាំ២០២០ ក្រោមការចោទពីបទ «ប្រមាថ និងញុះញង់ឱ្យប្រព្រឹត្តបទឧក្រិដ្ឋជាអាទិ៍ បង្កឱ្យមានភាពវឹកវរធ្ងន់ធ្ងរដល់សន្តិសុខជាតិ»។
អ្នកស្រី ព្រុំ ចាន់ថា ម្តាយជនរងគ្រោះឈ្មោះ កាក់ សុវណ្ណច្ឆ័យ ប្រាប់ វីអូឌី នៅថ្ងៃទី២៧ ខែមេសា ឆ្នាំ២០២១នេះថា ជនដៃដល់មានគ្នា២នាក់ ជិះម៉ូតូមួយគ្រឿងម៉ាក PCX ពណ៌ស មិនចាំស្លាកលេខ ក្នុងទិសដៅស្របគ្នា បានយកដុំឥដ្ឋតាន់ គប់ទៅលើកូនប្រុសគាត់ត្រូវចំក្បាលខាងឆ្វេង ក្នុងចម្ងាយប្រហែល១ម៉ែត្រកន្លះពីគ្នា ខណៈកូនគាត់កំពុងជិះម៉ូតូឌុបអ្នកស្រីត្រឡប់ពីទិញដំឡូង តាមផ្លូវបេតុងលេខ៤៥BT ក្បែរវិទ្យាស្ថានអាជីវកម្មនៃកម្ពុជា ចម្ងាយប្រមាណ២០០ម៉ែត្រពីផ្ទះអ្នកស្រី។
អ្នកស្រីបន្តថា កូនគាត់រងរបួសបែកក្បាលខាងឆ្វេង ដេរអស់ចំនួន២០ថ្នេរ នៅគ្លីនិកឯកជនមួយកន្លែង បន្ទាប់ពីមន្ទីរពេទ្យរដ្ឋចំនួន២បានបដិសេធមិនទទួលព្យាបាល។
អ្នកស្រីនិយាយថា៖ «អរុណរះ [ឈ្មោះពេទ្យឯកជនមួយកន្លែង] ហ្នឹង គេទទួលខ្ញុំ ពេទ្យឯកជន ប៉ុន្តែគេដេរហើយចាក់ថ្នាំឃាត់ឈាមឱ្យកូនខ្ញុំហើយ គេប្រាប់អាការកូនខ្ញុំថា បើសិនជាហូរឈាមច្រើនពេកក៏គេអត់មានឈាមបញ្ចូលឱ្យដែរ។ អ៊ីចឹងគេឱ្យកូនខ្ញុំមកផ្ទះវិញ គេអត់ទទួលឱ្យកូនខ្ញុំដេកទេ»។
ភរិយាអតីតមន្រ្តីគណបក្សប្រឆាំងដែលសកម្មក្នុងការតវ៉ាទាមទារឱ្យដោះលែងប្តី និងអតីតមន្ត្រីបក្សប្រឆាំងដែលជាប់ឃុំផ្សេងទៀតរូបនេះ និយាយថា នៅក្បែរកន្លែងកើតហេតុមានកាមេរ៉ាសុវត្ថិភាពបំពាក់នៅ២ទីតាំង ប៉ុន្តែម្ចាស់ទីតាំងបដិសេធមិនផ្តល់រូបភាពដល់អ្នកស្រីឡើយ ដោយថា កាមេរ៉ាពួកគេខូចនិងដាក់បែរមិនចំចំណុចកើតហេតុ ហើយអ្នកស្រីថា សមត្ថកិច្ចបានចុះទៅឆែកកាមេរ៉ារបស់ពួកគេមុនអ្នកស្រីរួចទៅហើយ។
ប្រភពដដែលបញ្ជាក់ថា ក្រោយកើតហេតុ អ្នកស្រីបានដាក់ពាក្យប្តឹងទៅប៉ុស្តិ៍នគរបាលសង្កាត់បឹងទំពុនទី១ រួចហើយ កាលពីរសៀលថ្ងៃម្សិលមិញ ប៉ុន្តែអ្នកស្រីមិនសង្ឃឹមទទួលបានយុត្តិធម៌នោះទេ។
អ្នកស្រីបានចាត់ទុកករណីនេះថា ជាការបំបាក់ស្មារតីផ្នែកនយោបាយ ខណៈគ្រួសារអ្នកស្រី រួមទាំងកូនប្រុសដែលមានជំងឺម៉្យាងដែលចូលចិត្តនៅម្នាក់ឯង គ្មានជម្លោះឬគំនុំជាមួយអ្នកណាទេនាពេលកន្លងមក។
អ្នកស្រី ចាន់ថា និយាយថា៖ «ហៅមិនចូល ទិញក៏មិនចូល ចង់ប្រើហិង្សាម៉េចក៏មិនចូល ក៏មិនញញើត អ៊ីចឹងពួកគាត់មានតែធ្វើវិធីបែបហ្នឹងហើយ ដើម្បីបំបាក់ស្មារតីក្រុមស្ត្រីខ្ញុំ ហើយនិងក្រុមប្រពន្ធអ្នកនយោបាយទាំងអស់។ ប៉ុន្តែកុំសង្ឃឹមឱ្យសោះ គ្រាន់តែប្រាប់ថា កុំសង្ឃឹម! ទោះជាអ្នកឯងសម្លាប់ដល់ជីវិតទៀត ក៏ខ្ញុំអត់ចុះញ៉មដែរ»។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា លើកឡើងថា កន្លងមកមានការប្រើអំពើហិង្សាលើអតីតសមាជិកបក្សប្រឆាំងមួយចំនួនដូចជា លោក ស៊ិន បូណា និង លោក ឌិន វ៉ារិន ប៉ុន្តែលោកមិនអាចបូកសរុបចំនួនករណីទាំងនោះបានទេ ដោយសារក្នុងរបាយការណ៍ពីមន្រ្តីមូលដ្ឋានមិនបានបញ្ជាក់ពីអតីតភាពការងារ ឬនិន្នាការនយោបាយរបស់ពួកគេនោះឡើយ។
លោកបន្ថែមថា ចំពោះករណីទាំងនោះ ខាងសមត្ថកិច្ចនៅតែបន្តធ្វើការស្រាវជ្រាវ ដោយមិនមានការរើសអើងនិន្នាការនយោបាយ ឬស្ថានភាពក្រុមគ្រួសារជនរងគ្រោះទេ។
លោក សាន សុខសីហា បានគូសបញ្ជាក់ថា៖ «ដូចខ្ញុំធ្លាប់បានបញ្ជាក់តាំងពីដើមកាលពីមុនអ៊ីចឹង ការស្រាវជ្រាវមិនប្រាកដថាឃើញ ហើយមិនប្រាកដថានេះទេ ព្រោះវាស៊ីសងលើស្ថានភាពទីតាំងជាក់ស្តែង ថាតើមានភស្តុតាងអីខ្លះ មានកាមេរ៉ាច្បាស់ឬអត់អ៊ីចឹង។ ការស្រាវជ្រាវ វាទាក់ទងនឹងបញ្ហាហ្នឹង»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត បានបង្ហាញក្តីបារម្ភកាន់តែខ្លាំងចំពោះករណីហិង្សាកើតឡើងជាថ្មីទៀត ទៅលើក្រុមគ្រួសារអតីតគណបក្សប្រឆាំង អំឡុងរដ្ឋាភិបាលកំពុងបិទខ្ទប់ទីក្រុង និងប្រយុទ្ធប្រឆាំងជំងឺកូវីដ-១៩ ខណៈករណីហិង្សាលើអតីតសកម្មជនជាច្រើននាក់នាពេលកន្លងមក នៅមិនទាន់ត្រូវបានដោះស្រាយនិងផ្តល់យុត្តិធម៌ជូនជនរងគ្រោះនៅឡើយ។
លោកថា សមត្ថកិច្ចគួរតែខំប្រឹងប្រែងស៊ើបអង្កេតនិងចុះស្រាវជ្រាវបន្ថែមទៀត ដើម្បីរកឱ្យឃើញជនជាប់សង្ស័យមកដាក់ទោសទណ្ឌតាមច្បាប់ ដើម្បីបញ្ចប់ការរិះគន់ពីតម្លាភាព ភាពអយុត្តិធម៌ក្នុងការអនុវត្តច្បាប់ និងទប់ស្កាត់បញ្ហានិទណ្ឌភាពក្នុងសង្គម។
លោក អំ សំអាត មានប្រសាសន៍ថា៖ «យើងជាអង្គការសង្គមស៊ីវិលដែលធ្វើការផ្នែកសិទ្ធិមនុស្សហ្នឹង នៅតែទទូចទោះបីកាលៈទេសៈណាក៏ដោយ។ បទល្មើសដែលកើតឡើង អាជ្ញាធរដែលមានសមត្ថកិច្ចហ្នឹងត្រូវតែធ្វើការស៊ើបអង្កេត និងស្វែងរកអ្នកដែលប្រព្រឹត្តហ្នឹងយកទៅអនុវត្តតាមផ្លូវច្បាប់ ដើម្បីបំបាត់និទណ្ឌភាព និងការភ័យខ្លាចរបស់អ្នកផ្សេងតទៅទៀត»។
កុមារា កាក់ សុវណ្ណច្ឆ័យ ធ្លាប់ត្រូវបានសមត្ថកិច្ចរាជធានីភ្នំពេញ ឃាត់ខ្លួនរយៈពេល៤៨ម៉ោងកាលពីខែតុលា ឆ្នាំ២០២០ ពាក់ព័ន្ធនឹងការចូលទៅកាន់ស្នាក់ការអតីតគណបក្សសង្គ្រោះជាតិ ដែលតុលាការចាត់ទុកថាជាតំបន់ហាមឃាត់។
ការដោះលែងពេលនោះ បន្ទាប់ពីក្មេងប្រុសរូបនេះបានធ្វើកិច្ចសន្យាជាមួយសមត្ថកិច្ចដោយឈប់ចូលទៅក្នុងបរិវេណទីស្នាក់ការអតីតគណបក្សសង្គ្រោះជាតិ និងឈប់បង្ហោះសកម្មភាពឬរូបភាពផ្សេងៗទៀតដែលមានខ្លឹមសារមិនពិតនិងបង្កឱ្យមានការភាន់ច្រឡំ។
បើតាមលោក អំ សំអាត ឱ្យដឹងថា មកទល់ពេលបច្ចុប្បន្ន មានអតីតសកម្មជនបក្សប្រឆាំងប្រមាណ២០រូបហើយដែលត្រូវបានជនមិនស្គាល់មុខវាយឱ្យរងរបួសជាបន្តបន្ទាប់៕
