ក្រសួងពាណិជ្ជកម្ម បានច្រានចោលព័ត៌មានមិនពិតដែលចោទថា ក្រសួងលក់ស្បៀងជូនពលរដ្ឋនៅក្នុងតំបន់ក្រហម មិនត្រឹមត្រូវតាមតួនាទី និងដើរតួនាទីជំនួសអាជីវករ ផ្ទុយពីវិធានរដ្ឋាភិបាល។
សេចក្តីបំភ្លឺរបស់ក្រសួងពាណិជ្ជកម្ម នៅថ្ងៃទី២៧ ខែមេសា ឆ្នាំ២០២១ បានឱ្យដឹងថា មានព័ត៌មានមួយចំនួនបានផ្សព្វផ្សាយមិនពិត និងវាយប្រហារ បន្ទច់បង្អាក់សកម្មភាពរបស់ក្រសួងដែលលក់ស្បៀងជូនប្រជាពលរដ្ឋនៅតំបន់បិទខ្ទប់ ដោយក្នុងនោះក៏មានការបង្ហោះរូបភាពមួយចំនួននៅក្នុងបណ្ដាញសង្គមដែលមានលក្ខណៈបំភ្លៃការពិត បង្កឱ្យមានការភ័ន្តច្រឡំពីសំណាក់សាធារណជន បង្កចលាចលក្នុងសង្គម និងធ្វើឱ្យបាត់បង់ទំនុកចិត្តលើការដឹកនាំរបស់រាជរដ្ឋាភិបាល។
ករណីនេះ ក្រសួងពាណិជ្ជកម្មបំភ្លឺថា ការចេញលក់ ផ្គត់ផ្គង់ ដឹកជញ្ជូន និងចែកចាយស្បៀងអាហារ សម្រាប់ប្រជាពលរដ្ឋនៅតំបន់ក្រហមនេះ គឺក្រសួងបានធ្វើតាមការណែនាំរបស់រាជរដ្ឋាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងលក់ក្នុងតម្លៃក្រោមទីផ្សារ ហើយដឹកជញ្ជូនដល់ទីតាំងដោយមិនគិតថ្លៃសេវាដឹកជាដើម ពោលគឺមិនមែនដូចព័ត៌មានមួយចំនួនផ្សាយដោយបំភ្លៃផ្ទុយពីការពិតនោះទេ។
ក្រសួងបញ្ជាក់ថា ការលក់ស្បៀងនៅតាមផ្ទះពលរដ្ឋ និងនៅលើទីផ្សារអនឡាញរបស់ក្រសួងពាណិជ្ជកម្ម បានផ្តល់សេវាដឹកជញ្ជូនដល់លំនៅដ្ឋានរបស់ប្រជាពលរដ្ឋរស់នៅក្នុងតំបន់ក្រហម បានចំនួន៦០០ការបញ្ជាទិញ ដោយមិនគិតថ្លៃឈ្នួល សំដៅចូលរួមអនុវត្តឱ្យបានម៉ឺងម៉ាត់និងត្រឹមត្រូវបំផុតនូវវិធានការការពារកូវីដ-១៩ កំណត់ដោយក្រសួងសុខាភិបាល។
ក្រសួងបន្ថែមថា ការលក់ផ្គត់ផ្គង់ស្បៀងនិងគ្រឿងឧបភោគបរិភោគចាំបាច់សម្រាប់ប្រជាពលរដ្ឋនៅក្នុងតំបន់ក្រហមនោះ ក្រសួងពាណិជ្ជកម្ម ក៏បានបញ្ចេញស្បៀងឱ្យចរាចរក្នុងទីផ្សារ តាមរយៈរថយន្តចល័តរបស់ក្រុមហ៊ុន ហ្គ្រីនត្រេដ និងរបស់ក្រសួងចំនួន៨គ្រឿង និងបើកស្ដង់លក់ទំនិញរបស់ក្រសួងពាណិជ្ជកម្ម សរុបមាន១១ទីតាំង ដែលមាន២៥ស្តង់ ដើម្បីទ្រទ្រង់ស្ថិរភាពថ្លៃទំនិញជាស្បៀងមូលដ្ឋាន ក៏ដូចជាទប់ស្កាត់ការឡើងថ្លៃហួសហេតុដែលបង្កឡើងដោយជនឆក់ឱកាសនិងជនខិលខូចមួយចំនួនផងដែរ។
ក្រសួងពាណិជ្ជកម្ម បញ្ជាក់ទៀតថា បច្ចុប្បន្ននេះ ក្រសួងបានចាត់មន្ត្រីរបស់ខ្លួនឱ្យបន្តចុះត្រួតពិនិត្យនិងតាមដានសន្ទស្សន៍ថ្លៃទំនិញតាមទីផ្សារជាប្រចាំ ដើម្បីទប់ស្កាត់ការបន្លំគុណភាព ការលក់ដូរបំប៉ោងតម្លៃទំនិញ ព្រមទាំងណែនាំដល់អាជីវករទាំងអស់ឱ្យបិទស្លាកថ្លៃនៅលើមុខទំនិញ និងកុំឱ្យមានការផ្លាស់ប្តូរថ្លៃទំនិញតាមអំពើចិត្តលើសពីតម្លៃទំនិញដែលបានលក់មុនពេលបិទខ្ទប់។
ក្នុងករណីមានការលួចបន្លំ ដំឡើងថ្លៃណាមួយកើតឡើង ក្រសួងលើកទឹកចិត្តដល់ពលរដ្ឋអាចរាយការណ៍ជាបន្ទាន់មកកាន់អាជ្ញាធរមានសមត្ថកិច្ច និងអង្គភាពពាក់ព័ន្ធរបស់ក្រសួង ឬមន្ត្រីប្រចាំការនៅតាមស្តង់លក់ទំនិញ ដើម្បីចាត់វិធានការ ឱ្យបានទាន់ពេលវេលា។
បើតាមមន្ត្រីក្រសួងពាណិជ្ជកម្ម គិតចាប់ពីថ្ងៃទី២២ ដល់ទី២៦ ខែមេសា ឆ្នាំ២០២១ គឺរយៈពេល៥ថ្ងៃ ក្រសួងពាណិជ្ជកម្ម បានលក់ស្បៀងជូនប្រជាពលរដ្ឋដែលរស់នៅក្នុងតំបន់ក្រហម បានអង្ករ១ ៤៥២បាវ, មី៤ ២៨៣កេស, ត្រីខ ២ ៨០៣យួរ, ទឹកត្រី ១ ១៦១យួរ, ទឹកស៉ីអ៉ីវ ១ ០៩៧យួរ, ទឹកបរិសុទ្ធ ២៣០យួរ, ឆៃប៉ូវ ៦០២ថង់ (១ថង់ ២គីឡូក្រាម) រួមទាំងបន្លែបង្ការមួយចំនួនទៀត៕
