រដ្ឋាភិបាលបានដាក់ចេញវិធានការថ្មីមួយទៀតសំដៅដល់ការធានាប្រសិទ្ធភាពគ្រប់គ្រងការឆ្លងរាលដាលនៃជំងឺកូវីដ-១៩ ដើម្បីបញ្ចៀសការបិទខ្ទប់រាជធានីភ្នំពេញ និងក្រុងតាខ្មៅ ជាថ្មីទៀត ខណៈក្រសួងសុខាភិបាលមិនទាន់អាចទប់ស្កាត់ការឆ្លងរាលដាលក្នុងសហគមន៍ពាក់ព័ន្ធព្រឹត្តិការណ៍សហគមន៍២០កុម្ភៈបាននៅឡើយ រយៈពេលជាង២ខែមកនេះ។
លោកនាយករដ្ឋមន្ត្រី ហ៊ុន សែន កាលពីម្សិលមិញ បានសម្រេចឱ្យបន្តបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល ៧ថ្ងៃបន្ថែមទៀត រហូតដល់ថ្ងៃទី៥ ខែឧសភា ឆ្នាំ២០២១ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។ ការបិទខ្ទប់នេះបានធ្វើឡើងម្តងរួចមកហើយ រយៈពេល១៤ថ្ងៃ ដោយអនុវត្តចាប់ពីថ្ងៃទី១៥ ដល់ថ្ងៃទី២៨ ខែមេសា ក្រោយពីជំងឺសកលនេះបានបន្តឆ្លងដល់អាជីវករផ្សារមួយចំនួននៅរាជធានីភ្នំពេញ និងកម្មកររោងចក្រកាត់ដេរ ដែលសុទ្ធតែជាកន្លែងប្រមូលផ្ដុំមនុស្សច្រើន។
រដ្ឋាភិបាលបញ្ជាក់ផងដែរថា រយៈពេលនៃការបិទខ្ទប់នេះអាចត្រូវបានបន្តបន្ថែមទៀត អាស្រ័យលើកាចូលរួមអនុវត្តរបស់ប្រជាពលរដ្ឋរស់នៅក្នុងតំបន់បិទខ្ទប់ និងស្ថានភាពការវិវត្តនៃការឆ្លងរាលដាលនៃជំងឺកូវីដ-១៩។
មួយវិញទៀត រដ្ឋាភិបាលតាមរយៈសេចក្តីសម្រេចកម្រាស់១៤ទំព័រដដែល បានដាក់ចេញនូវវិធានការមួយចំនួនសម្រាប់គណៈកម្មការចំពោះកិច្ចចាក់វ៉ាក់សាំង ក្នុងគោលដៅធានាប្រសិទ្ធភាពគ្រប់គ្រងការឆ្លងរាលដាលជំងឺកូវីដ-១៩ ដើម្បីបញ្ចៀសឱ្យបាននូវការបិទខ្ទប់ជាថ្មីទៀតសម្រាប់ភូមិសាស្ត្រទាំងនេះ។
នាយករដ្ឋមន្ត្រីណែនាំឱ្យគណៈកម្មការចំពោះកិច្ចចាក់វ៉ាក់សាំងកូវីដ-១៩ ត្រូវប្រើប្រាស់កម្លាំងសរុប និងមធ្យោបាយរបស់ជាតិ ជំរុញដល់ការចាក់វ៉ាក់សាំងឱ្យបានលឿនក្នុងរយៈពេលដ៏ខ្លី សម្រាប់ប្រជាពលរដ្ឋដែលមានអាយុចាប់ពី១៨ឆ្នាំឡើងទៅឱ្យបានគ្រប់គ្នា នៅក្នុងភូមិសាស្រ្តរាជធានីភ្នំពេញ និងទីប្រជុំជនធំៗនៃខេត្តកណ្តាល ដែលមានមនុស្សច្រើនកុះករ សំដៅបង្កើតឱ្យមានភាពស៊ាំនៅក្នុងសហគមន៍កាន់តែច្រើន ដើម្បី «ធានាប្រសិទ្ធភាពក្នុងការគ្រប់គ្រងការឆ្លងរាលដាលនៃជំងឺកូវីដ-១៩ និងជាពិសេសបញ្ចៀសឱ្យបាននូវការបិទខ្ទប់ជាថ្មីសម្រាប់ភូមិសាស្ត្រនេះ»។
ប្រធានគណៈកម្មការចំពោះកិច្ចដឹកនាំការចាក់វ៉ាក់សាំងក្នុងក្របខណ្ឌទូទាំងប្រទេស និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា ក្រុមការងារកំពុងត្រៀមខ្លួនប្រើប្រាស់ធនធានដែលមាននៅក្នុងដៃដើម្បីអនុវត្តនូវអនុសាសន៍របស់ប្រមុខរដ្ឋាភិបាលនេះ ។
លោកស្រីថា៖ «យើងកំពុងរៀបចំផែនការសម្រាប់ចាក់វ៉ាក់សាំងជូនដល់បងប្អូនយើងនៅរាជធានីភ្នំពេញ និងតំបន់ដែលប្រជាពលរដ្ឋខេត្តកណ្តាលរស់នៅជាប់នឹងរាជធានីភ្នំពេញ។ ហើយការចាក់នេះ វាអាស្រ័យលើវ៉ាក់សាំងដែលយើងមាននៅក្នុងដៃ ប៉ុន្តែវត្ថុបំណងរបស់យើងៗនឹងចាក់ជូនបងប្អូនប្រជាពលរដ្ឋទៅតាមការណែនាំរបស់សម្តេចតេជោនាយករដ្ឋមន្ត្រី»។
កម្មកររោងចក្រកាត់ដេរម្នាក់ រស់នៅភូមិត្រពាំងថ្លឹង៣ សង្កាត់ចោមចៅ ខណ្ឌពោធិ៍សែនជ័យ ជាតំបន់ក្រហម លោក ធ្លក សុគុណ អាយុ៣០ឆ្នាំ និយាយថា គាត់នឹងទៅចាក់វ៉ាក់សាំងបង្ការជំងឺកូវីដ-១៩នេះ បើមានការជូនដំណឹងពីអាជ្ញាធរ។
លោកថា៖ «ខ្ញុំកំពុងចាំមើលគេដែរហ្នឹង! បើគេឱ្យទៅចាក់ ខ្ញុំទៅចាក់! ព្រោះអីបើយើងបានចាក់ បានការពារដែរ»។
កម្មការិនីបម្រើការងារនៅរោងចក្រកាត់ដេរម្នាក់ទៀតនៅក្រុងតាខ្មៅ ជាតំបន់បិទខ្ទប់ដូចគ្នា អ្នកស្រី គង់ ណារ៉ា អាយុ៣៩ឆ្នាំ បានអះអាងប្រហាក់ប្រហែលគ្នានេះដែរ ។
អ្នកស្រីថា៖ «បើគេជូនដំណឹង ខ្ញុំទៅចាក់! ព្រោះអីរោងចក្រខ្ញុំគេតម្រូវឱ្យចាក់។ ព្រោះអីរោងចក្រខ្ញុំគេធ្លាប់ប្រមូលកាតទៅម្តងហើយ ខ្ញុំសួរគេៗថា ប្រមូលយកទៅចាក់វ៉ាក់សាំង តែគ្រាន់ថាស្ថិតិប៉ុន្មាន គេអត់ទាន់ជូនដំណឹង»។
អ្នកស្រាវជ្រាវការអភិវឌ្ឍសង្គម លោកបណ្ឌិត សេង សារី យល់ឃើញថា ការចាក់វ៉ាក់សាំងជាផ្នែកមួយជួយបង្ការហានិភ័យនៃជំងឺឆ្លងសកលនេះ បើរដ្ឋាភិបាលផ្តល់វ៉ាក់សាំងដល់មនុស្សប្រមាណ១០លាននាក់តាមការគ្រោងទុក។
ប៉ុន្តែលោកបារម្ភថា បញ្ហានេះនឹងមិនជោគជ័យទេ បើអាជ្ញាធរអនុវត្តតែវិធានបិទខ្ទប់ តែមិនអាចអនុវត្តវិធានរក្សាគម្លាតសុវត្ថិភាពសង្គមនៅកន្លែងទទួលវ៉ាក់សាំងឬកន្លែងយកសំណាកជាដើមទេនោះ។
លោកថា៖ «ប៉ុន្តែច្រកមួយដែលជំរុញឱ្យមានការជួបជុំហ្នឹង គឺការទៅទទួលអំណោយនិងការទៅចាក់វ៉ាក់សាំងហ្នឹងឯង អាហ្នឹងសំខាន់ណាស់! ប្រសិនបើការគ្រប់គ្រងកន្លែងជួបជុំហ្នឹងមិនបានល្អ ហើយគាត់មិនមានគម្លាតសង្គមអីមិនបានល្អដូចការណែនាំរបស់ក្រសួងសុខាភិបាលទេ កន្លែងហ្នឹងដូចជាប្រភពចម្លងអ៊ីចឹងដែរ»។
យ៉ាងណា ក្នុងសេចក្តីសម្រេចនោះ រដ្ឋាភិបាលក៏បានណែនាំផងដែរចំពោះយុទ្ធនាការជាតិចាក់វ៉ាក់សាំងនេះ ដោយត្រូវធានាឱ្យបាននូវរបៀបរៀបរយនិងសណ្តាប់ធ្នាប់ ដើម្បីបង្ការការឆ្លងរាលដាលនៃជំងឺកូវីដ-១៩ អំឡុងនៃកិច្ចដំណើរការនាំយកសេវាទៅកៀកនឹងប្រជាពលរដ្ឋនេះ។
សូមជម្រាបថា គិតត្រឹមថ្ងៃទី២៥ ខែមេសា ឆ្នាំ២០២១ រាជរដ្ឋាភិបាលកម្ពុជាបានចាក់វ៉ាក់សាំងការពារកូវីដ-១៩ ជូនមន្រ្តីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសសរុបចំនួនជាង១លាននាក់ ( ១ ២៩៥ ៦៦០ នាក់)។
យ៉ាងណា វ៉ាក់សាំង ស៊ីណូហ្វាម ចំនួន៤០០ ០០០ដូសទៀត ជាជំនួយរបស់ចិន នឹងមកដល់កម្ពុជានៅថ្ងៃទី២៨ ខែមេសា ស្អែកនេះ ដែលធ្វើឱ្យកម្ពុជាទទួលបានជំនួយវ៉ាក់សាំងទាំង៣លើកសរុប ១លាន ៧សែនដូស។ គិតត្រឹមព្រឹកថ្ងៃអង្គារម្សិលមិញ ការឆ្លងរីករាលដាលកូវីដ-១៩ ចូលទៅកាន់សហគមន៍ជាលើកទី៣ ដែលរដ្ឋាភិបាលហៅថាជា«ព្រឹត្តិការណ៍សហគមន៍២០កុម្ភៈ» បានសម្លាប់មនុស្សអស់៧៩នាក់ និងឆ្លងដល់មនុស្សជាង១ម៉ឺននាក់ ខណៈអ្នកជំងឺព្យាបាលជាសះស្បើយសរុបទាំងមុនព្រឹត្តិការណ៍នេះមានចំនួនជាង៣ពាន់នាក់ (៣ ៥៧៧) និងជាង៦ពាន់នាក់ (៦ ៨៩២) កំពុងសម្រាកព្យាបាលនៅឡើយ៕