លោកនាយករដ្ឋមន្ត្រី ហ៊ុន សែន សុំការយោគយល់ពីប្រជាពលរដ្ឋចំពោះការដែលរដ្ឋាភិបាលមិនបានផ្គត់ផ្គង់ថវិកា៣០ម៉ឺនរៀលក្នុងមួយគ្រួសារ សម្រាប់អ្នកធ្វើចត្តាឡីស័ក ទៅតាមការសន្យាកន្លងមក ដោយសារការរីករាលដាលនៃជំងឺកូវីដ-១៩ លើសពីការរំពឹងទុក ប៉ុន្តែរដ្ឋាភិបាលផ្តល់ការឧបត្ថម្ភជាស្បៀងអាហារជំនួសវិញ។
កាលពីដើមខែមីនា ឆ្នាំ២០២១ រដ្ឋាភិបាលបានប្រកាសអំពីគោលនយោបាយផ្តល់សាច់ប្រាក់ចំនួន៣០ម៉ឺនរៀលក្នុងមួយគ្រួសារ ដល់អ្នកដែលរងផលប៉ះពាល់ធ្ងន់ធ្ងរដោយសារជំងឺកូវីដ-១៩ ដើម្បីដោះស្រាយការលំបាក។
ប៉ុន្តែតាមរយៈសារជាសំឡេងកាលពីម្សិលមិញ លោកនាយករដ្ឋមន្ត្រី ហ៊ុន សែន បានថ្លែងថា គម្រោងផ្គត់ផ្គង់ជាថវិកានេះ ត្រូវបានលុបចោលវិញ ដោយបង្វែរទៅជាការជួយឧបត្ថម្ភស្បៀងអាហារជំនួសវិញ។
លោកថា៖ «ការអាក់ខានក្នុងការផ្គត់ផ្គង់ថវិកា៣០ម៉ឺនរៀល គឺជាការអាក់ខានដែលយើងមើលឃើញថា មិនអាចធ្វើទៅបាន សូមបងប្អូនយោគយល់ អាធ្យាស្រ័យ។ អ្វីដែលចាំបាច់នៅពេលនេះ គឺការរស់ ខ្ញុំឱ្យបង្វិលការផ្គត់ផ្គង់នេះទៅជាអង្ករ ជាត្រីខ ជាមី ជាទឹកត្រី ទឹកស៊ីអ៊ីវ និងអ្វីៗតាមលទ្ធភាពដែលអាចធ្វើទៅបាន»។
លោកបានគូសបញ្ជាក់ទៀតថា ការសម្រេចលុបចោលការផ្តល់ថវិកានេះ ដោយសារតែបញ្ហាជំងឺកូវីដ-១៩ ពាក់ព័ន្ធព្រឹត្តិការណ៍២០កុម្ភៈ បានរីករាលដាលខ្លាំង រហូតឈានទៅបិទខ្ទប់រាជធានីភ្នំពេញទាំងមូល រួមទាំងក្រុងតាខ្មៅ ខេត្តកណ្តាល ហើយបានធ្វើឱ្យប៉ះពាល់ដល់មនុស្សរាប់ម៉ឺននាក់ដែលកំពុងរស់នៅក្នុងតំបន់បិទខ្ទប់ទាំងពីរនេះ។
ការថ្លែងរបស់លោកនាយករដ្ឋមន្ត្រី ធ្វើឡើងក្រោយពីមានពលរដ្ឋមួយចំនួននៅភូមិទ្រា៤ សង្កាត់ស្ទឹងមានជ័យ ខណ្ឌមានជ័យ ដែលជាតំបន់ក្រហម បានប្រមូលផ្តុំតវ៉ាកាលពីល្ងាចថ្ងៃម្សិលមិញ ជុំវិញការទទួលបានស្បៀង តែមិនទទួលបានថវិកាជំនួយចំនួន៣០ម៉ឺនរៀលដូចមុន។
អ្នកស្រី ហួ ស្រីមុំ រស់នៅសង្កាត់បឹងសាឡាង ខណ្ឌទួលគោក ដែលស្ថិតក្នុងតំបន់ក្រហម បាននិយាយនៅថ្ងៃពុធនេះថា គាត់ធ្លាប់ធ្វើចត្តាឡីស័ក២០ថ្ងៃរួចមកហើយ ក្រោយពីភោជនីយដ្ឋានដែលគាត់ធ្វើការមានអ្នកឆ្លងជំងឺកូវីដ-១៩ ទៅទទួលទានអាហារនៅទីនោះ។
ស្ត្រីអាយុ២៤ឆ្នាំរូបនេះបាននិយាយថា គាត់មិនជំទាស់នឹងការបង្វែរជំនួយផ្គត់ផ្គង់ពីសាច់ប្រាក់ទៅជាស្បៀងអាហារនេះទេ ប៉ុន្តែអ្វីដែលគាត់បារម្ភនោះគឺការដាច់ស្បៀង បើជំនួយជាស្បៀងនោះផ្តល់ឱ្យយឺតពេល។
អ្នកស្រីថា៖ «អត់លុយវាមិនអីទេ សំខាន់របស់ហូប និយាយរួមស្បៀងអាហារដែលត្រូវបម្រុងទុកហូបប្រចាំថ្ងៃ ព្រោះពងទានៅប៉ុន្មានគ្រាប់ទេ ហើយត្រីខនៅតែពីរកំប៉ុង»។
អ្នករស់នៅតំបន់បិទខ្ទប់ម្នាក់ទៀតនៅក្រុងតាខ្មៅ ខេត្តកណ្តាល លោក សោ សំអាល់ និយាយដែរថា ការជួយជាស្បៀងពេលនេះវាសំខាន់ជាងជួយជាថវិកា ព្រោះតំបន់បិទខ្ទប់ បើមានលុយក៏ពិបាកចាយដែរ។
លោកថា៖ «អត់អីទេ! បើបានតែស្បៀងក៏រឹតតែល្អ ព្រោះរឿងប្រាក់កាសហ្នឹងមិនសូវជាអីផង ព្រោះវាពិបាក ផ្សារគេបិទអស់ហើយ គ្មានអីទិញទេ»។
អ្នករស់នៅតំបន់ក្រហមម្នាក់ទៀត នៅភូមិឫស្សី សង្កាត់ស្ទឹងមានជ័យ២ លោក ម៉ុក ម៉ៃ អាយុ៧៤ឆ្នាំ មានមុខរបរជាអ្នករត់ម៉ូតូកង់៣ និយាយថា គាត់មានការខកចិត្តខ្លះដែរពីការប្រកាសរបស់រដ្ឋាភិបាលនេះ តែថា ការពន្លឿនស្បៀងទាន់ពេលក៏ជារឿងសំខាន់ដែរ ខណៈគាត់មិនអាចចេញទៅដឹកភ្ញៀវបាន ហើយកំពុងប្រឈមដាច់ស្បៀងនោះ។
លោកថា៖ «ខាងយើងនេះ គេបិទខ្ទប់ដល់ថ្ងៃ២៨ [មេសា] ឯណោះ អ៊ីចឹងហើយសមាជិកកូនចៅវារងាក់រងើកដែរ មានអីឱ្យតែបានគ្រឿងឧបភោគបរិភោគក៏បានដែរ បើអត់លុយ»។
ប្រធានផ្នែកសិទ្ធិមនុស្សនៅសមាគមអាដហុក លោក នី សុខា និយាយថា វិធានការបិទខ្ទប់របស់រដ្ឋាភិបាល ដើម្បីទប់ស្កាត់ជំងឺឆ្លងជាសកលនេះ នឹងមិនជោគជ័យទេ បើពលរដ្ឋមិនទទួលបានជំនួយស្បៀងទាន់ពេលនោះ ដោយថា មនុស្សអាចចេញទៅរកស្បៀងដើម្បីក្រពះ បើពួកគេគ្មានជម្រើស។
អ្នកស្រាវជ្រាវសង្គម លោកបណ្ឌិត សេង សារី សង្កេតឃើញថា រដ្ឋាភិបាលមានយន្តការសង្គ្រោះល្អ តែជំនួយស្បៀងទៅដល់ដៃអ្នករងផលប៉ះពាល់មានការយឺតយ៉ាវខ្លះ ដែលករណីនេះអាចបណ្តាលមកពីអ្នកអនុវត្តមិនយល់ឬខ្វះមធ្យោបាយ។
លោកាថា៖ «ប៉ុន្តែអ្វីដែលជាប្រសាសន៍របស់លោកនាយករដ្ឋមន្ត្រីកាលពីយប់មិញនេះ បង្ហាញអំពីសមត្ថភាពរបស់រដ្ឋាភិបាលនៅក្នុងការត្រៀមខ្លួនសម្រាប់ឆ្លើយតបទៅវិបត្តិដែលកើតឡើង។ ពេលខ្លះក៏វាជាការធ្វេសប្រហែស ក៏ដូចជាការប្រមាថរបស់ថ្នាក់ដឹកនាំទៅលើស្ថានភាពដែរ»។
ករណីនេះ លោកយល់ថា រដ្ឋាភិបាលគួរបើកចិត្តឱ្យទូលាយស្វែងរកជំនួយពីសប្បុរសជនជាតិ-អន្តរជាតិ អង្គការសង្គមស៊ីវិលក្នុងស្រុក ឬក៏យុវជនស្ម័គ្រចិត្ត ចូលរួមទាំងថវិកានិងកម្លាំងកាយចិត្តក្នុងការនាំស្បៀងទៅកាន់តំបន់ងាយរងគ្រោះ។
កាលពីថ្ងៃអាទិត្យ អភិបាលរាជធានីភ្នំពេញ លោក ឃួង ស្រេង បាននិយាយថា អង្គរ១៤០តោន និងគ្រឿងឧបភោគបរិភោគមួយចំនួនទៀតដែលបានពីការឧបត្ថម្ភរបស់រដ្ឋាភិបាល ត្រូវបានផ្គត់ផ្គង់ដល់អ្នកដែលខ្វះស្បៀងរស់នៅក្នុងតំបន់បិទខ្ទប់ជាបន្តបន្ទាប់ហើយ។
តែយ៉ាងណា រយៈពេល៤ថ្ងៃមកនេះ ប្រជាពលរដ្ឋរាប់រយនាក់បានផ្ញើសារជាបន្តបន្ទាប់ទៅកាន់បណ្តាញសង្គមក្រុមតេឡេក្រាម របស់រដ្ឋបាលរាជធានីភ្នំពេញ ដើម្បីសុំជំនួយស្បៀងអាហារបន្ទាន់ ខណៈដែលពួកគេមានការបារម្ភពីការដាច់ស្បៀង៕