រដ្ឋបាលរាជធានីភ្នំពេញ សម្រេចបន្តអនុវត្តវិធានការរដ្ឋបាលជាបណ្ដោះអាសន្នចំនួន២សប្ដាហ៍បន្ថែមទៀត ដើម្បីទប់ស្កាត់ការរីករាលដាលជំងឺកូវីដ-១៩ នៅក្នុងភូមិសាស្រ្តរាជធានីភ្នំពេញ គិតចាប់ពីថ្ងៃទី១៥ ដល់ទី២៨ ខែមេសា ឆ្នាំ២០២១។
លិខិតរដ្ឋបាលរាជធានីភ្នំពេញ ចេញនៅថ្ងៃទី១៣ ខែមេសានេះ បានឱ្យដឹងថា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ អាជ្ញាធរសម្រេចបន្តផ្អាកជាបណ្ដោះអាសន្ននូវសកម្មភាពនានានៅចន្លោះម៉ោង៨យប់ដល់ម៉ោង៥ភ្លឺ ដូចជាការផ្អាកធ្វើចរាចរ ផ្អាកការប្រមូលផ្ដុំ ឬការជួបជុំគ្នាទទួលទានអាហារ ភេសជ្ជៈ ឬទទួលទានគ្រឿងស្រវឹង លើកលែងតែករណីចាំបាច់មួយចំនួន និងផ្អាកសកម្មភាពអាជីវកម្មចំពោះតូបអាហារ អាហារដ្ឋាន ភោជនីយដ្ឋាន ហាងកាហ្វេ ហាងភេសជ្ជៈ និងភោជនីយដ្ឋាននៅតាមសណ្ឋាគារ ដែលទទួលអតិថិជនឱ្យចូលទទួលទានក្នុងបរិវេណអាជីវកម្មរបស់ខ្លួន ប៉ុន្តែអាចលក់ដូរជាលក្ខណៈវេចខ្ចប់បាន។
លិខិតដដែលបានឱ្យដឹងទៀតថា ប្រជាពលរដ្ឋដែលមិនអនុវត្តតាមវិធានការរបស់អាជ្ញាធរនឹងត្រូវទទួលទោស ដូចមានកំណត់ក្នុងច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងលិខិតបទដ្ឋានគតិយុត្តិពាក់ព័ន្ធជាធរមានផ្សេងទៀត។
អភិបាលរាជធានីភ្នំពេញ លោក ឃួង ស្រេង បានបដិសេធក្នុងការផ្ដល់អត្ថាធិប្បាយបន្ថែមជុំវិញការបន្តវិធានការនេះ ដោយលោកអះអាងថា ក្នុងលិខិតរបស់រដ្ឋបាលរាជធានីភ្នំពេញបានបកស្រាយគ្រប់ជ្រុងជ្រោយហើយ។
លោកមានប្រសាសន៍៖ «ក្នុងលិខិតខ្ញុំពន្យល់ហើយ មើលលិខិតខ្ញុំទៅអូន! ក្នុងលិខិតបានពន្យល់ហើយ»។
ប្រធានមជ្ឈមណ្ឌលអប់រំប្រជាពលរដ្ឋ ដើម្បីការអភិវឌ្ឍ និងសន្តិភាព លោក យង់ គីមអេង គាំទ្រការបន្តអនុវត្តវិធានការរដ្ឋបាលរបស់រដ្ឋបាលរាជធានីភ្នំពេញ ដើម្បីទប់ស្កាត់ការឆ្លងរាលដាលជំងឺកូវីដ-១៩នេះ។
ទោះយ៉ាងណា លោកថា អាជ្ញាធរក៏គួរតែយកចិត្តទុកដាក់លើបញ្ហាជីវភាពរបស់ប្រជាពលរដ្ឋដែលរស់នៅក្នុងតំបន់បិទខ្ទប់ នៅពេលពួកគេមិនអាចចេញប្រកបរបរឬបំពេញការងារបាន។
លោកមានប្រសាសន៍ថា៖ «វាជារឿងមួយដែលប្រសើរក្នុងការផ្អាកនេះ គួរតែបន្តទៅមុខទៀត[នូវ]បម្រាមគោចរ ក្នុងកាលៈទេសៈនេះក៏វាចាំបាច់ដែរ ដោយសារតែទំហំនៃការរីករាលដាលជំងឺកូវីដ-១៩ នៅតែជាការព្រួយបារម្ភនៅឡើយ ប៉ុន្តែក្នុងនោះដែរ សូមឱ្យអាជ្ញាធរគិតគូរពីការរស់នៅរបស់ពួកគាត់ផងដែរ កុំឱ្យពួកគាត់ប្រឈមជីវភាពរស់នៅរបស់គាត់»។
កាលពីថ្ងៃទី១ ខែមេសា ឆ្នាំ២០២១ រដ្ឋបាលរាជធានីភ្នំពេញ បានសម្រេចដាក់ចេញវិធានការរដ្ឋបាលនេះជាលើកទី១ម្តងរួចមកហើយ ក្នុងភូមិសាស្រ្តរាជធានីភ្នំពេញ ជាបណ្ដោះអាសន្ន ដើម្បីទប់ស្កាត់ការឆ្លងរាលដាលជំងឺកូវីដ-១៩។
បម្រាមគោចរនេះ ធ្វើឡើងបន្ទាប់ពីព្រឹត្តិការណ៍ឆ្លងជំងឺកូវីដ-១៩ ចូលទៅកាន់សហគមន៍ជាលើកទី៣ បណ្តាលឱ្យមានអ្នកឆ្លងជំងឺនេះកាន់តែច្រើន និងស្លាប់ជាបន្តបន្ទាប់។
អ្នកនាំពាក្យនគរបាលរាជធានីភ្នំពេញ លោក សាន សុខសីហា មានប្រសាសន៍ថា បម្រាមគោចរនេះមិនមានគោលការណ៍ក្នុងការឃាត់ខ្លួនប្រជាពលរដ្ឋនោះឡើយ ហើយប្រសិនបើរកឃើញថា ពួកគេល្មើសនឹងវិធានការរបស់អាជ្ញាធរ គឺគ្រាន់តែបញ្ជូនទៅធ្វើចត្តាឡីស័កតាមផ្ទះ និងឃាត់យានជំនិះទុកជាបណ្តោះអាសន្នតែប៉ុណ្ណោះ។
លោកមានប្រសាសន៍ថា៖ «គឺមិនមានគោលការណ៍ក្នុងការចាប់ឃាត់មនុស្សទេ។ គឺយើងគ្រាន់តែចាប់យានយន្តរក្សាទុកហើយមនុស្សឱ្យគាត់ទៅធ្វើចត្តាឡីស័កខ្លួនឯងទៅតាមគេហដ្ឋានរៀងៗខ្លួន»។
បើតាមអ្នកនាំពាក្យរូបនេះបញ្ជាក់ថា គិតចាប់ពីថ្ងៃទី២ ខែមេសា រហូតដល់ថ្ងៃទី១២ ខែមេសា ឆ្នាំ២០២១ អាជ្ញាធរបានឃាត់យានយន្តចំនួន២០៣គ្រឿង ក្នុងនោះមានម៉ូតូ១៦៤គ្រឿង និងរថយន្ត៣៩គ្រឿង៕
