ក្រសួងសុខាភិបាល ឱ្យដឹងថា ស្រី្តជនជាតិខ្មែរម្នាក់ទៀត បានស្លាប់ដោយសារជំងឺកូវីដ-១៩ ដែលធ្វើឱ្យចំនួនអ្នកស្លាប់ដោយសាររោគផ្លូវដង្ហើមមួយនេះកើនឡើងដល់ទៅ ២៥នាក់ហើយនៅកម្ពុជា។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី៩ ខែមេសា ឆ្នាំ២០២១ ឱ្យដឹងថា ស្ត្រីជនជាតិខ្មែរ ដែលបានស្លាប់នៅរសៀលថ្ងៃសុក្រនេះ មានអាយុ៥៥ឆ្នាំ រស់នៅសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
ក្រសួងបន្តថា ស្ត្រីរូបនេះបានរកឃើញវិជ្ជមានកូវីដ-១៩ កាលពីថ្ងៃទី៣០ខែមីនា ហើយត្រូវបានដាក់សម្រាកព្យាបាលនៅមន្ទីរពេទ្យមិត្តភាពខ្មែរ-សូវៀតនៅថ្ងៃដដែលនោះ។ ដោយស្ថានភាពរបស់អ្នកជំងឺធ្ងន់ធ្ងរ តាំងពីពេលចូលសម្រាកពេទ្យដំបូង តម្រូវឱ្យក្រុមគ្រូពេទ្យប្រើប្រាស់ម៉ាស៊ីនជំនួយដង្ហើមតាំងពីថ្ងៃសម្រាកដំបូងផងដែរ។
ក្រសួងបញ្ជាក់ថា ទោះបីជាក្រុមគ្រូពេទ្យបានខិតខំជួយសង្រ្គោះតាមលក្ខណៈបច្ចេកទេសយ៉ាងណាក៏ដោយ ក៏មិនអាចជួយសង្រ្គោះអ្នកជំងឺបានឡើយ ហើយស្ថានភាពអ្នកជំងឺកាន់តែធ្ងន់ធ្ងរទៅៗ រហូតបណ្តាលឱ្យអ្នកជំងឺស្លាប់នៅថ្ងៃនេះតែម្តង ដោយសារខ្សោយសួតធ្ងន់ធ្ងរ និងរលាកសួតទាំងសងខាង បង្កដោយវីរុសកូវីដ-១៩។
ក្រសួងសុខាភិបាលបានរកឃើញអ្នកវិជ្ជមានជំងឺកូវីដ-១៩ថ្មី ចំនួន ៥៧៦នាក់បន្ថែមទៀតនៅថ្ងៃទី៩ ខែមេសា ដែលធ្វើឱ្យចំនួនអ្នកឆ្លងជំងឺនេះសរុបនៅកម្ពុជា បានកើនដល់ ៣ ៦០៤នាក់។ ក្នុងនោះអ្នកជំងឺព្យាបាលជាសះស្បើយមានចំនួន ១ ៩៨៤នាក់ និងកំពុងសម្រាកព្យាបាលចំនួន ១ ៥៩១នាក់៕