ក្រសួងសុខាភិបាល ឱ្យដឹងថា អ្នកជំងឺកូវីដ-១៩ ចំនួន២នាក់បន្ថែមទៀតបានស្លាប់បាត់បង់ជីវិត ដោយសារមានបញ្ហាផ្លូវដង្ហើមនិងសួតធ្ងន់ធ្ងរបណ្ដាលមកពីវីរុសកូវីដ-១៩ ដោយម្នាក់ជាបុគ្គលិកនៅមន្ទីរពេទ្យកាល់ម៉ែត្រ ដែលធ្វើឱ្យចំនួនអ្នកស្លាប់ដោយសារវីរុសមួយនេះកើនឡើងដល់២៤នាក់។
សេចក្ដីប្រកាសព័ត៌មានក្រសួងសុខាភិបាល ចេញផ្សាយនៅថ្ងៃទី០៨ ខែមេសា ឆ្នាំ២០២១ ឱ្យដឹងថា អ្នកស្លាប់ដោយសារជំងឺកូវីដ-១៩ ទាំងពីរនាក់នោះបានស្លាប់នៅមន្ទីរពេទ្យហ្លួងម៉ែ កាលពីថ្ងៃទី០៧ ខែមេសា។
ក្រសួងបន្តថា អ្នកស្លាប់ជាបុរសជនជាតិខ្មែរទាំងពីរនាក់ ដោយម្នាក់មានអាយុ៦៨ឆ្នាំ រស់ភូមិទ្រា៤ សង្កាត់ស្ទឹងមានជ័យ ខណ្ឌមានជ័យ ត្រូវបានរកឃើញមានជំងឺកូវីដ-១៩ នៅថ្ងៃទី០៧ ខែមេសា ឆ្នាំ២០២១។ បុរសរូបនេះបានបញ្ជូនទៅដល់មន្ទីរពេទ្យហ្លួងម៉ែ នៅម៉ោង១កន្លះរំលងអធ្រាត្រ ថ្ងៃទី០៧ ខែមេសា ក្នុងស្ថានភាពគ្មានសញ្ញាជីវិត សន្លប់បាត់បង់ស្មារតី ដោយក្រុមគ្រូពេទ្យបានខិតខំជួយសង្គ្រោះតាមលក្ខណៈបច្ចេកទេស ប៉ុន្តែមិនអាចជួយបាន។
ចំណែកអ្នកស្លាប់ម្នាក់ទៀតមានអាយុ៤៩ឆ្នាំ រស់នៅភូមិទ្រា៣ សង្កាត់ស្ទឹងមានជ័យ និងបានស្លាប់កាលពីថ្ងៃទី០៧ ខែមេសាដែរនោះ បានបញ្ជូនទៅដល់មន្ទីរពេទ្យកាលពីថ្ងៃទី៥ ខែមេសា ក្នុងស្ថានភាពធ្ងន់ធ្ងរ ហត់ដង្ហក់ខ្លាំង ដោយក្រុមគ្រូពេទ្យបានខិតខំព្យាបាលតាមលក្ខណៈបច្ចេកទេស ប៉ុន្តែអ្នកជំងឺមានស្ថានភាពធ្ងន់ធ្ងរពីមួយថ្ងៃទៅមួយថ្ងៃ រហូតបណ្តាលឱ្យស្លាប់។ ក្រសួងបញ្ជាក់ថា បុរសរូបនេះស្លាប់ព្រោះមានបញ្ហាផ្លូវដង្ហើម និងរលាកសួតសងខាងធ្ងន់ធ្ងរ ដោយសារជំងឺកូវីដ-១៩។
សេចក្តីជូនដំណឹងរបស់រដ្ឋបាលរាជធានីភ្នំពេញ បានបញ្ជាក់ពីករណីរកឃើញអ្នកវិជ្ជមានកូវីដ-១៩ កាលពីថ្ងៃទី០៣ ខែមេសា ចំនួន២៥នាក់ ដោយក្នុងនោះក៏មានឈ្មោះ ប៊ុន ទិវា ផងដែរ។
លិខិតនោះបញ្ជាក់ថា លោក ប៊ុន ទិវា មានអាយុ៤៩ឆ្នាំ ជាបុគ្គលិកបម្រើការងារនៅមន្ទីរពេទ្យកាល់ម៉ែត្រ និងជាម្ចាស់មន្ទីរពិសោធន៍វេជ្ជសាស្ត្រមានជ័យ ទៀតផង។
សេចក្តីជូនដំណឹងរបស់មន្ទីរពេទ្យកាល់ម៉ែត្រ បញ្ជាក់ថា លោក ប៊ុន ទិវា ដែលជាអ្នកជំនាញផ្នែកបច្ចេកទេសមន្ទីរពិសោធន៍ ពិតជាបុគ្គលិករបស់ខ្លួនបម្រើការងារនៅផ្នែកមន្ទីរពិសោធន៍ប្រាកដមែន។
សេចក្តីជូនដំណឹងនេះ អះអាងថា លោក ប៊ុន ទិវា បានស្លាប់ពិតប្រាកដមែន កាលពីវេលាម៉ោងជិត១២ថ្ងៃត្រង់ កាលពីម្សិលមិញ ប៉ុន្តែស្លាប់ដោយរោគាពាធប៉ុណ្ណោះ។
យ៉ាងណា លិខិតបញ្ជាក់មរណភាពរបស់មន្ទីរពេទ្យហ្លួងម៉ែកាលពីម្សិលមិញ ដែលត្រូវបានចែកចាយលើបណ្តាញសង្គមនៅថ្ងៃនេះឱ្យដឹងថា បុរសមានវ័យ៤៩ឆ្នាំនោះ មានឈ្មោះប៊ុន ទិវា ដែលជាបុគ្គលិកមន្ទីរពេទ្យកាល់ម៉ែត្រ។
លិខិតដដែលបង្ហាញថា តាមរោគវិនិច្ឆ័យពេលចូលសម្រាកពេទ្យ លោក ប៊ុន ទិវា មានបញ្ហារលាកសួតសងខាងធ្ងន់ធ្ងរ។ ប្រភពដដែលថា បើតាមរោគវិនិច្ឆ័យស្លាប់ បញ្ជាក់ថា បុគ្គលិកមន្ទីរពេទ្យកាល់ម៉ែត្ររូបនេះ ខ្សោយសួត និងរលាកសួតសងខាងធ្ងន់ធ្ងរ ដោយសារវីរុសកូវីដ-១៩។
ចាប់ពីតាំងថ្ងៃទី២០ ខែកុម្ភៈ ដល់ថ្ងៃទី៨ ខែមេសា អ្នកឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ បានកើនឡើងដល់២ ៤៩៦នាក់ និងស្លាប់ចំនួន២៤នាក់។
ដោយឡែក អ្នកឆ្លងជំងឺនេះសរុបនៅទូទាំងប្រទេសមានចំនួន៣ ០២៨នាក់ ក្នុងនោះព្យាបាលជាសះស្បើយ១ ៩១៤នាក់ និងកំពុងសម្រាកព្យាបាលចំនួន១ ០៨៥នាក់៕
